سكووووووت هنصوت

احن الى عالمي القديم

2012-02-11T06:19:00.003+03:00

بمجرد ما انتهيت من مطالعة كافة الإخطارات على حائطي الخاص في وش الكتاب...وما ان انتهيت من المرور على جميع حوائط الأصدقاء واديت واجبي الإجتماعي من لايكات وكومنتات على ما يستحق من الصور والتعليقات....اصابتني حالة من الملل...ورغبة حارقة بالطل على مدونتي...

لم اكتب شيئا يذكر من اكثر من عامين....

كان التدوين عالما....عالما كاملا له مفرداته وادواته...له نماذجه واصحابه...مدونتي تحمل بصماتي....تحمل سنوات عمري...

تخبطاتي وملامح شخصيتي العشوائية...مدونتي بروابطها الهامشية تحمل تطوري....

اخر ما كتبت كان في وقفة خالد سعيد الثانية ... منذ ذاك الوقت وكل شئ يجري بسرعة

وقفت حزنا وحدادا على شهيد العصر خالد سعيد....وسافرت الى بلاد كثيرة وبعيدة....

رأيت الكثير ... وعاصرت الكثير....ازعم اني امرح بسنوات عمري كما ينبغي

لم يعد يطل على مدونتي منذر ومهنى ومفيد والحسيني ومريم والساعاتي

اصبحت الأسماء التي نلقاها على القهوة مندهشين لها شكل وملامح وصفات

اللعنة على عالم كتاب الوشوش...الذي محى متعة التخفي

....انت مندهش؟؟ انت سكوت؟؟ غريبة تخيلتك اكبر...وانا كمان!!

لم نعد نعرف بعضنا البعض بأسمائنا الحركية....لم اعد سكوت...وانما صرت فجأة مها ... لم يعد مهنى حزين....وانما صار مهنى

لم يعد المستقبل غامضا فقد اصبح ماض بالفعل!!

لم يعد الطالب طالب...ولا المحب محب....كبرنا جميعا...ولم يبقى لنا من ماضينا الا قليل من الصور وبعض التدوينات

الثورة نعمة ....لله الحمد من قبل ومن بعد....لكن لماذا بالله عليكم افتقد جلستي على الأرض تحت منصة القاضي استمع الى المرافعات الهزلية لمحامي الظابط المنفلت السافل اسلاك نبيه؟؟

لماذا افتقد سفاهات الأصدقاء....لماذا افتقد نوارة التي كانت تمشي في الطرقات فلا يهاجمها بلطجية....لماذا افتقد مريم ومنذر ورانيا

لماذا افتقد ابناء مصر.....الكيان الذي صنعناه حلما....واستنزفناه....ثم استنزفنا....ثم ذاب وذبنا معه

ممممممممممم فلأحتفظ بتراهاتي ها هنا...مالنا نحن ووش الكتاب...نحن ابناء التدوين....

قولي يا فيروز...

بكره امام سفارة السودان من 5-7

2011-05-28T20:25:00.006+03:00

البنوته الحلوة الي في الفيديو ده...اسمها صفية اسحق...فتاة سودانية جميلة كل جريمتها انها ناشطة سياسية

يمكن مش شبه الناشطات السياسيات المصريات الي صوتهم عالي ونبرتهم حادة وتبص للوحش في عينه وتقوله امشي من وشي الساعادي..هي اقرب لفتاة وديعة رقيقة صوتها يكاد لا يسمع ... لكن عقلها نشط وواعي وعندها افكار واحلام تخليها تحلم ببكره اجمل واقوى

البنوته الجميلة دي...عملت زي كل بنوته مهتمة بواقع بلادها ونشرت مقالة ولا اتنين في مجلة ولا اتنين تدافع عن حقوق المرأة في المجتمع السوداني

كل جريمتها انها حاولت تكون متفاعلة مع قضايا وطنها..فكانت النتيجة اختطافها من الأمن الوطني وضربها وتعذيبها وانتهاءا بإغتصابها

مش هطول عليكوا في الحكاية..تقدروا تسمعوها منها مباشرة...

لم تنتهي الكارثة بما حدث لصفية....بل تفاقمت لما الأديب والصحفي السوداني فيصل صالح تضامن معاها

وطالب فقط بفتح تحقيق في الحادثة....تم توجيه تهمة اليه بنشر اخبار كاذبة ومضللة وحسب رؤية المحاميين السودانين غالبا هياخد فيها حكم...

محاكمة فيصل هتكون بكره....

فيصل هو الرجل الأول الي استطاع ان يقول كلمة في حق هذه الفتاة المسكينة...لإن لم يقتلك الغم كمدا على شهادة هذه الفتاة

فاسفة على ازعاجك لست انت من اريد...لكن لو اتهزيت إن امرأة عربية مسلمة تم انتهاكها واغتصابها بالشكل البشع ده لمجرد انها ناشطة سياسية

لمجرد انها تفكر...ويتم التنكيل بكل من وقف معها حتى لا يتسنى لأحد ان يقول لوجه الظلم لأ

لو مصر بعد الثورة مش هتقف مع صفية وفيصل...يبقى احنا لسة معندناش دم

للتضامن مع فيصل اضغط هنا حضور

رسالة الى الوالي

2011-05-23T21:34:00.002+03:00

عزيزي المجلس العسكري العظيم,

تحية طيبة وبعد....

أكتب اليك الأن كي يذكر التاريخ فيما بعد....أن خياراتك كلها كانت بإرادتك الحرة وببصيرة واعية, كي يحاسبكم التاريخ كما سيحاسبنا ليس فقط على النوايا الحسنة, لكن على ما اقترفنا عمدا وقصدا من أفعال وأقوال كي لا يكون لك علينا حجة بجهل او بغفلة.

عزيزي المجلس العسكري, لن أذكرك بما فات من أمرك, ولن أشكرك أنك حين صوبت مسدسك إلى رأس الشعب لم تطلق الرصاص, فأنت مثلنا جميعا بك ما بنا من همّ وفساد وظلم وجور وندوب وقروح من عهد سمج جثم على البلاد فأزهق روحها نفسا نفسا ولم يترك الا الكثير من المخاط والجراثيم في رئتيها.

عزيزي المجلس العسكري, أتذكر عام 2008 يوم أن سمحت لرجال الأعمال أن يطردوا سكان جزيرة القرصاية والذهب من اراضيهم كي تباع بثمن بخس, وقتها نزلت قواتك وحاصرت الجزيرة وحظرت كل وسائل النشر او البث من المنطقة, يومها بكى اهالي الجزيرة حين رأوا جنود الوطن, ابناء الوطن, تقف درعا حاميا يحمي اللص الذي يسرق اموال الوطن. لن أعاتبك أنك لم تمنع هذا الظلم البين الذي أجبر العزّل يحفرون قبورهم بأيديهم ويناموا فيها صارخين "أن اردمونا تحتها" لم تكن الشرطة هي التي تدخلت يا عزيزي المجلس..كنت أنت, انت حمى الوطن ودرعه الأصيل هو الذي وقف امام الشعب من أجل مصلحة رجال الأعمال. لكن لا بأس, هذه الأيام ولّت وكنت مقهورا مثلنا, ومغبونا مثلنا, وسأشطح بخيالي واتخيلك تبكي وانت تجبر هؤلاء المساكين على الخروج من اراضيهم, سأتجاوز واقول انك بكيت في داخلك الما على حال فقراء مصر ومساكينها.

لن أذكرك ان مدينة السويس ظلت أيام بلياليها أثناء الثورة تضرب بقبضة دامية وانت هناك قريب من رأس السلطة تشاهد عن بعد وتنتظر, دون أن تتدخل حتى يفتك الرصاص الحي والذخيرة بأبناء شعبك واهلك وناسك.

لن احاسبك ولن اعاتبك ان سمحت لبعض رجالك ان يطووا صفحة الاسرى المصريين في 67 وكيف قتلوا ظلما وعدوانا, ولا نعرف شيئا عما حدث لهم إلا من الأفلام الوثائقية الإسرائيلية وحين نعرف لا يتحرك فيك فردا سائلا اين هو حق هؤلاء المغدور بهم ظلما وعدوانا دون جريرة.

لن اعاتبك على ما فات من ذنوبك يا عزيزي المجلس فكلنا خطاءون, وكلنا مذنبون, وانت مثلنا كنت مقهورا تظن أنك ضعيف (رغم انك الوحيد القوي) او لعلك ظننت اننا نحن الضعفاء , لا نستحق الا مبارك بظلمه وجبروته لهذا صمت وبلعت كرامتك وكرامتنا وانتظرت كما انتظرنا. تركتنا نعافر وحدنا هذا النظام الذي هرانا قتلا وقمعا وسجنا وحبسا وتعذيبا, وجلس اعضاؤك بجوار قاتلنا في عروضك العسكرية يستعرض طائراته وقواته دون ان يهتز لك رمش, صمت وأن تشاهد التاريخ يزيف امام عينيك وينسب الفضل الى غير اهله, ويحرم مصابوا اكتوبر العظيم من الفضل والتقدير والعرفان وينسب الفضل كل الفضل لحفنة من المنتفعين. صمت وانت تشاهد بأم عينك مصابوا الثورة يتسولون اموال نفقاتهم وانت تنفق حوافز ومكافاءات لقاتليهم استرضاءا لهم بدلا من ان تضرب بقبضة من حديد على من داس بقدمه الغليظة على رقبة الشعب.

سنترك كل ما فات للماضي يا عزيزي المجلس ونطوي معك هذه الصفحة, انت منا ونحن منك..ولإن كنت مخطئا قديما فكلنا خطاؤون. الأن تملك الفرصة أن تتطهر تماما من كل ما سبق, الأن تملك القدرة على أن تمحوا كل هذا التاريخ وتستبدله بصفحة بيضاء مشرفة تفخرونفخر معك بها.

عزيزي المجلس العسكري, إنك اليوم إن تقف مع بلدك وتساعدنا كي نطهر أنفسنا اولا وبلادنا ثانيا من كل من دنسها بجشعة وظلمه وبطشة وجبروته فإنك تبني لنفسك ولأولادك مستقبلا جديدا يقولون فيه لولا اباءنا لضاعت مصر, لهم ندين بالفضل أن بلادنا راقية متحضرة يسود فيها القانون على الوزير قبل الغفير.

إرحل الأن وساعدنا كي نتطهر ونطهر انفسنا, راهن علينا فنحن الأصل ونحن البلد, لا تراهن على فسده فقد رأيت بعينك ان الظلم لا يدوم ولو بدا غير ذلك.

عزيزي المجلس العسكري العظيم, أذكرك أنك لميت وإنهم ميتون, وأننا جميعا سنلقى وجه رب كريم, يحاسبنا على كل كبيرة وصغيرة وأن صحيفتك ممتلئة خيرا وشرا فلا تنهي صفحتك بأن تراهن على الباطل ولو بدا اقوى, وراهن على الحق وإن بدا اضعف, ونحن الشرعية والحق.

النظام البائد بظلمه وفساده وطغيانه واباطرته وشرطته ورجال اعماله واعضاء حزبهم الوثني هم الباطل الذي لا مراء فيه.

اعتبر الأن يا عزيزي المجلس قبل أن يأتي يوم لا ينفع فيه الندم ولا يستجاب لك وقت ان تقول رب ارجعون لعلي اعمل عملا صالحا. الأن الان ايها المجلس.

لأنهم أطباء لا اعذرهم

2011-05-19T01:13:00.002+03:00

إضراب الأطباء مطلب مشروع تماما...اه ما قلناش حاجة

طبعا...نظامنا الصحي ردئ جدا مفيش شك...بس لو حبينا نحلل كده ايه مشكلة الصحة في مصر هنلاقيها الاتي:

1- تعليم صحي سئ...محدش يقولي عندنا احسن دكاترة..الكلام ده ما يتقالش مرسل كده لازم احصائيات...والواقع ان عدد ورقات البحث المنشورة لأطباء مصريين من جامعات حكومية في مجلات دولية وعالمية قليل جدا ان لم يكن معدوم

2- نظام تمريضي مترهل وسئ للغاية...وده مش ممثل نهائي في اضراب الاطباء بالمناسبة

3- نظام رقابي شبه غير متواجد...في كل دول العالم الأطباء بيخضعوا لعشرات الجهات الرقابية بل ان المحاميين عايشين على قفا الأطباء..وما وارهمش غيرهم..ومتبرعين ينخوروا وراهم ببلاش عشان دول اسهل فئة تقدر تطلعها غلطانة يعني في ضغط عصبي ونفسي رهيب

4-مستشفيات مجهزة باجهزة طبية وفي جو صحي مناسب تخضع فيه الأجهزة للصيانة بشكل دوري عشان ما تتسببش في كوارث زي ما بيحصل

5- معامل تحاليل مجهزة بكيماويات ما تتسابش فاضية

6- معاملة كريمة للأطباء والعاملين بالقطاع الصحي من اجل حياة كريمة تؤهلهم للتفرغ لخدمة المرضى بإنسانية

7- مراعاة مواعيد عمل انسانية بدل المرمطة الي فيها القطاع الصحي ده

إذا من كل ما سبق كام واحدة بقى من النقاط دي ممثلة في اضراب الأطباء...!!!؟؟؟؟؟؟؟؟؟؟؟؟؟

الحقيقة ولا واحدة...الأطباء حسب بيانهم الثوري جدا..الي عاملينه عشان الفقراء والغلابة...

اول مطالبهم اقالة وزير الصحة...ماشي مطلب رائع ويا ريت الراجل ده اصلا حزب وطني قديم يعني ان الاوان يتشال...بس ده مش محتاج اضراب..كفاية نحط اسمه على ورقة في مليونية ونقول الراجل ده حزب وطني وممسكينة الصحة وهي تبقى خرابة على دماغة

المطلب التاني رفع ميزانية الصحة من 3.5% الى 15%...معلش بقى..مين اداهم الحق يحددوا ميزانية الصحة كده بمزاجهم...هو مين قال ان ده طلب الشعب ولا دي اولويته الان....امال هنصرف كام عالتعليم ان شاء الله...وقد ايه على الجيش في الوقت الي اسرائيل يمينا بتهدد وليبيا شمالا بستبعط...وبتضرب في تونس يعني ضرب مصر احتمال وارد في ظل الفوضى دي

وهنصرف كام على الإقتصاد...وهنصرف كام على البنية التحتية...وهنصرف كام على اعادة توزيع العشوائيات والزراعة والبحث العلمي...

وهنشيل قد ايه احتياطي للسنين العجاف....مين اداهم الحق يقررولنا يا كده يا مش لاعبين!!!

وطبعا الفرشة الكبيرة الي فوق دي كلها بتمهد بقى للطلب الرئيس..الكادر الخاص للأطباء..حلو قوووووووووووي...زي ما هتاخدوا اعلى مرتبات...لازم يكون عليكوا اعلى رقابة...ولا يعني الشعب هيدفع دم قلبه للدكاترة وما يعرفش يحاسبهم....طيب والدكتور الي بيسيب فوطة في بطن العيان ده..,الي بيعمل عملية ملهاش لازمة للمريض عشان خاطر ياخد قرشين زيادة....والطبيب الي بيعمل عملية ويسيب النائب بتاعة يعك في المريض وبعدين يقبض عالجاهز

والي بيموت في ايده العيان ويطلع يستهبل وياخد اتعابه قبل ما اهل العيان يعرفوا ان قريبهم مات!!! الناس دي بقى الي عملت عمارات وبقت مليونيرات وبتقبض بالسبع والتمن الاف جنيه في ولادة قيصري عشان قرشين سبوبة كإن فجأة اكتشفنا ان الولاة الطبيعية موضة قديمة

الناس دي بقى هنراقبها ازاي ....؟؟؟؟؟ وهنراقب فلوسنا الي بياخدوها دي حلالا بلالا ازاي في المرحلة دي وفي الوقت ده وبالشكل ده...وأظن معروف كم المهازل الي كانت بتحصل وما كانش في حاجة بتحصل لأي طبيب عشان نقابة الاطباء تدبح الي يفتح بقه

هي دي كل مطالب الأطباء ..حد فيهم اتكلم عن التمريض؟؟؟؟؟؟؟؟؟

حد فيهم اتكلم عن العاملين بالقطاع الصحي عموما من فنيين او اخصائيين زي العلاج الطبيعي مثلا والتحاليل!!؟؟؟؟

اطلاقا...دول مش اطباء...نقاباتهم تدور عليهم...يعني مش عشان المرضى بقى..ماهو المريض الي بيشوفه طبيب مرة...بتشوفه الممرضة مرات..,اخصائي العلاج الطبيعي بيقعد معاه اكتر من اهله....والنتائج بتاعته بيطلعها اخصائي التحاليل

يعني حضراتكم شايفين المنظومة الصحية أطباء بس...مع انها تشمل الجميع...الكادر الخاص للأطباء مع ان كل دول في المنظومة!!!

ماشي هنسلم جدلا ان كل دول ليهم نقابات تدور عليهم....

هل اللحظة دي هي لحظة المكاشفة والحقيقة....الان بعد ان انهارت كل قوى الدولة من شرق وغرب....والجميع يخون الجميع والبلاد تمر بظروف كاحلة ولا احد يعلم كيف ستخرج منها....يخرج علينا الأطباء بإضراب

لإنهم اطباء...ولإنهم قضوا اطول فترات حياتهم في التعليم...ولإن ارواحنا بأيديهم

لا اسامحهم في اضرابهم....

حتى لا انسى

2011-05-18T02:16:00.003+03:00

صحيح ان المدونة شبه منتهية وميتة من ردح من الزمن

لكن مازالت اكثر مكان اقدر افتكر بيه الي حصل من ساعة ما تفتح وعيي على الدنيا حتى الأن

من حين لأخر سأذكر نفسي ببعض المشاهد القديمة حتى لا يسقط شئ للأبد :)

وقفة امبارح

2010-06-26T17:26:00.008+03:00

الناس في بلدي..يتباحثون...يتناقشون..ويهرجون...يخبطون كفا على كف..ويهرؤون...يعني ايه اهمية شوية عيال واقفين مديين ضهرهم للشارع ساعة؟؟؟؟

هي يعني البلد هتتهت منكوا....ثم ان اصلا مفيش فايدة

ينظر المواطن (الي هو الناس) في مراية بيتهم الي ورا باب الشقة..ويقول

مفيش فايدة..اه امال ايه...طبعا مفيش فايدة

هو يعني الحكومة هتتهت..لا يا خويا الحكومة مش هتتهت...هو يعني مبارك هيمشي

يمشي يروح فين..ومقام الحسين ما يمشي ابدا...ده رمسيس التاني ساب فرشته في وسط البلد لكن لا ممكن ابدا مبارك يسيب فرشته في شرم الشيخ

قال اقوله قال...انا هقوله وانا نازلة عالسلم..وقعت ورجلي اتكسرت..اقوله..اقوله اني خرجت من وراه ..اقوله ازاي..لا..لا ممكن اقوله ابدا..هو انا عبيطة..قال اقوله قال

قال يمشي قال...,قال الحكومة تتهت قال...ده عالم مطرقعة

هكذا تحدث الشعب....وهكذا فكر..وهكذا فكرت امينة مرات سي السيد...لكن من بعيد كده...وفي ظلمة الليل

طلع جيل...راضع صناعي اكيد.(عشان لبن الأم طبعا مغشوش زي مانتوا عارفين) وقرر ان شربة الجبن الي شاربها المصريين دي ما بقتش جايبة همها

جيل يتيم....ملوش حد من الكبار يدله على سكته

جيل مدقدق مش محتاس...مش ضارب لخمة...مش خايف على عمره...هو خايف اه..بس مش لدرجة انه يموت وهو حي

جيل اتعود انه يحتقر كل القيم بما فيها قيمة الدولة وهيبة الدولة وخيبة الدولة وامن الدولة

جيل قرر...انه يا يعيش حر...يا يهاجر بقى وكفاية كده

الجيل ده....الي خلى طالب عنده امتحان ينزل بورق مذاكرته ويقف وشه للنيل..يذاكر...ويعلن تضامنه مع خالد

الجيل الي خلى بنت فرحها كمان اسبوعين تسيب بيتها وتنزل عشان تقف...وتعرض نفسها لغضب خطيبها الي يفسخ خطوبتها لما يشوف صورتها في الوقفة (شفتوا المرجلة) االجيل الي خرج منه شباب...يبتكروا افكار تخلي الحكومة بتلف حوالين نفسها طول النهار في الشوارع

جيل لم يعد يحترم صمت اهله...ولا سكوت الجيران..,لا بقى خايف ان حد يقوله بتعمل ايه يا بني...جيل خرج من القمقم خلاص...

الجيل ده...مازال في مرحلة المراهقة..ولسة يا دوبك خارج امبارح لوش النور....الجيل ده محتاج ايدين تطبطب عليه

تقوله برافوا عليك...جدع يا واد...راجل يا حبيبي...انت ضهر ماما...انت سند بابا...انت حلم بكره

جيل محتاج يلاقي اخوات كبار يقفوا جنبوا..يدوروا عليه..ما يتسابش في الشارع للكلاب ياكلوه

الجيل ده اتولد يا مصر.....ودور كل واحد حظة العثر انه يكون من الأجيال الي نزل اسمها في كشف الوفيات بالاهرام انه يخلي فيه طاقة نور وامل في جيل لسة بيفتح

احلى شباب شفتهم امبارح...احلى رجالة واحلى بنات...كنتم في عيني زي القمر

كنتم في عيني اجمل شباب...احلى من كل ولاد وبنات الدنيا

صباح الفل على الورد الي فتح في جناين مصر

تحذيييييير هاااااااااام

2010-05-18T06:30:00.002+03:00

المية يا مؤمنين المية

هذه التدوينة هي نداء لكل المصريين....المياه اصبحت الحرب التي لن تحارب

الأفارقة هيقطعوا المية...,للعلم بس..انا تأكدت الأن بما لا يدع مجالا للشك ان محدش بيحبنا خردلة

انا الفترة الي فاتت قابلت ناس من اوغندا والسنغال واثيوبيا وكينيا ونيجريا

والمغرب..,كلهم اتفقوا على ان مصر هي اقل الدول الي بيحبوها في حياتهم

ولولا كسوفهم مني بس كانوا تفوا عليا..عشان انا من مصر

لدرجة ان مصر هي اخر دولة أفريقية مستعدين يشجعوها في كاس العالم وهيشجعوها بس عشان هي للأسف حسب كلامهم

أفريقيا..فانتماؤهم للقارة بس هو السبب ان هم يشجعوها...اصل منهم يعني مش اكتر

الناس كلها اتفقت على اننا ما نستاهلش اي نوع من التعاطف او الكرم

وبما ان الحكومة ايدنا منها والأرض

فاصبح الان الواجب علينا اننا نراعي حقنا بإيدينا

الإقتراحات دي من أجل توفير المياه من عند نوارة نجم

_______________________________________________________________

رجاء الانضمام لجروب الفيس بوك

تحديث

انا علقت ورقة في الاسانسيرات بتاعة العمارة وعلى مدخل العمارة
كتبت سريعا اننا حنواجه مشكلة مية وان كلنا نبدأ بنفسنا وكتبت خمس نقط:
1- ممنوع غسيل العربيات والاكتفاء بالتنظيف بالفوطة المبلولة
2- الاقتصاد في استخدام الماء المنزلي في الاستحمام والوضوء وغسيل الاواني
3- منع اي رش بالماء امام العمارات بدعوى تخفيف الحرارة لان ده اهدار للماء ولا يخفض الحرارة وانما يزيد الرطوبة
4- اعادة تدوير الماء المستعمل ولو لري الزرع امام العمارات
5- اتخاذ موقف ايجابي في حالة رؤية اي حد منا لشخص يهدر الماء وعدم السلبية
وحطيت حديث الرسول بتاع: لا تسرفوا في الماء ولو كنتم على نهر جار
ماليش دعوة باليائسين، انا باحاول ابقى براءة قدام ربنا على الاقل، ولو كل واحد قال مافيش فايدة يبقى ماحدش حيعمل حاجة، وبقية الناس برضه ما بيعملوش حاجة عشان هم كمان بيقولوا: مافيش فايدة

تحديث:
الوحيد اللي شارك لحد دلوقت على المدونات هي مدونة المقاومة المصرية
اللي بيقول مافيش فايدة يروح ينتحر بقى بدل ما يشوف بلده وهي بتخلص قدامه
على الاقل نبري ذمتنا قدام ربنا
2- مدونة انسانة شاركت برضه معانا في اقتراحات لترشيد المياه
-----------
احنا لازم نبتدي حملة شعبية عشان نوفر مية

ما تستنوش عوكل واللي معاه، مش حيعملوا حاجة ابدا، علي الغتيت قال ان الازمة دي قانونا اختصاص رئيس الجمهورية ومافيش اي حد ولا حتى رئيس الوزراء يصلح لحل الازمة دي

وزي ما انتوا شايفين، لو كنا حلفناهم على المصحف يضيعوا المية ما كانوش بذلوا كل الجهود المشكورة دي

دلوقت احنا علينا نعتمد على نفسنا كمواطنين

اساسي يعني مافيش غسيل عربيات، انا من زمان باقول كده للبواب وباطلب منه يطوقها بس، ومن زمان باعمل كده من قبل الازمة، هي طبعا معفنة، بس مش مهم

مافيش رش عشان الدنيا تطري

انا عارفة انك مش بترش اكيد، بس بتعدي قدام محل بيرش، وبتتكسف انك تتكلم

لا ما تتكسفش، ياروح ما بعدك روح، انا شخصيا بافتح جاعورتي عشان يقفلوا المية

ولازم نوفر في الكهربا، وده عيب فيا، دايما انسى النور، لا مش حانسى النور تاني

اي شكل من اشكال الهدر لازم تتصرف

انا قلت لهم على التويتر، وباقول لكوا اهو، اي حد عنده اقتراحات لتوفير المية، ما يكتبهاش تعليق هنا على المدونة

يكتبها على مدونته، ولو ما عندوش مدونة يعمل مدونة مخصوص عشان خاطر توفير المية

وانا حازود اللنكات هنا، ونبتدي الحملة وان شاء الله اكتب عنها كمان في الدستور وعلى قد ما نقدر نبذل مجهود شعبي وفردي

ما يجيش حد يقول لي الحكومة تعمل ايه؟ لو عايزة تعمل كانت عملت، انسوها بقى، احنا مالناش غير ربنا، واهم حتى كرهوا فينا كل الناس ماحدش حيساعدنا

موضوع المية ده لا فيه مسلم ولا مسيحي ولا اخواني ولا يساري ولا ليبرالي ولا حتى نبيل شرف الدين - اللي ميزة الازمة الوحيدة في الموضوع ده انه حيموت معانا، اللهم الا اذا عمل لجوء مائي لاسرائيل صاحبته اللي بتخطط لإفناءنا - الموضوع ده كلنا لازم نتعاون فيه ولازم تعمل توعية حواليك

انا مستنية بوستات مدوناتكوا، عشان اعمل لها لنك هنا عندي وكل واحد فينا برضه يوزع على قد ما يقدر

انا بنشر الدعوة من هنا..وهعلق ورقة برضه عندي على الأسانسير...,الي هيقولي ما يهمنيش ومليش دعوة هطبق في زمارة رقبته....يا روح ما بعدك روح

ملائكة ذوات فكوك حديدية

2010-02-08T18:27:00.003+03:00

دائما تبهرني الأفلام الدراما وثائقية الأمريكية

أشعر أمامها اني عاجزة عن النطق, أولا لإنها دائما ما تحمل معلومات غاية في الدقة

عمري ما دورت على معلومات وردت في فيلم درامي وثائقي امريكي الا ووجدت التفاصيل الدقيقة غاية في الصحة

ومؤكده بعدة مراجع, لم اجد ابدا اي تلفيق او الدراما محتاجة كده, او اضطرينا نمشيها الله اكبر عشان حماسة الجمهور والكلام الهجص ده

دائما يذكر التاريخ بدقة, بصدق, بحذافيرة...فقط لتدرك كم استطاعت الشعوب ان تغير من ذاتها

اليوم شاهدت فيلما من هذا القبيل..هو ملائكة ذوات فكوك حديدية

Iron Jawed Angels

وهو فيلم وثائقي عن حركة نسائية هدفت انذاك من أجل حق النساء في الإنتخاب

نعم قبل عام 1920 لم يكن من حق المرأة الأمريكية الإنتخاب

كان ذلك حكرا على الرجال فقط...في عام 1915 حصل الزنوح على حق الإنتخاب والتمثيل البرلماني في حين

لم يسمح للنساء بالحصول على هذا الحق المماثل

إلا بعد خمس سنوات كاملة وبعد جهاد عنيف

وفي عام 1913 بدأت مجموعة من النسوة المعركة الشرسة من أجل إثبات هذا الحق

وحين أقول معركة شرسة, فأنا اعني شرسة بكل ما تحملة الكلمة من معان

فلم تكن معركة اللافتات والشعارات والأحاديث التلفزيونية

وسيدات المجتمع ذوات الحلي الذهبية النفيسة والماكياج الصارخ وهن ينظرن الى عدسات الكاميرات

ويتحدثن عن أهمية ودور المرأة في المجتمع ولازم يا جماحة نغيربقى النظرة الياي دي بتاعة الست تقعد في البيت

لا...انا اعني نساء زهدن في الزواج حتى لا يشغلهن عن قضية عمرهن, نساء قبلن ان يقفن أمام البيت الأبيض

ويزج بهن في السجون بتهمة عرقلة السير فترفضن دفع الغرامة لعدم اعترافهن بالذنب

نساء عذبن في السجن وعلقن من أيديهن بالقيود الى اسقف الزنازين من أجل ان تكسر عزيمتهن

نساء اعلن الإضراب عن الطعام في السجن فاجبروا على الإطعام من خلال خراطيم يبلغ طولها عدة امتار تدفع في حلوقهن ان انوفهن

من أجل اجبارهن على الأكل, وهو بالمناسبة الأسلوب المتبع حاليا في جوانتانمو

نساء قبلن ان يضربن ويؤذين ويعذبن من أجل أن يتساووا بشركاءهن الرجال في الحياة

نساء تركن حياة الدعة في بيوت ازواجهن لإنهن يردن لبناتهن مستقبلا افضل

امهات وزوجات وبنات ذكور متعصبين رأين ان التمرد هو السبيل للمساواة وان الإستكانة للخضوع لن تودي الى بالخراب

هؤلاء النسوه, صنعن تاريخ أمريكا, وتاريخ الأرض

الفيلم الرائع ملائكة ذوات فكوك حديدية جسد حياة هذه الحركة

الحركة الوطنية للنساء, بحيادية وامانة وتعاطف حقيقي مع من منح الأمهات حق التمثيل

الإسم بالمناسبة مأخوذ من مقال ساخر كان يستهزأ بالحركة ويصفهن بالبعد عن الأنوثة

لإنهن ذوات فكوك حديدية, إلا انه اصبح ملائما جدا للنتائج التي حصلن عليها.

المشاهد لهذا الفيلم, يرى أهمية القيادة وأهمية التدرج في القيادة

أهمية ان يكون هناك قائد له رؤية يؤمن الجميع بنزاهته

أهمية أن يكون هذا القائد مخلصا فعلا للقضية

وأهمية ان يكون هناك ادارة حقيقية لإنجاح اي قضية

واهمية الإخلاص

ثلاث عوامل ابدا لا نجدهم لدينا في قضايانا المعاصرة

يمكن عشان كده عمرنا ما بننجح

فيلم ملائكة ذوات فكوك حديدة يستحق ان يشاهد بحق

هو الإسلام المشكلة ام الحل

2010-01-16T13:12:00.002+03:00

للأسف تبني الإخوان لشعار الإسلام هو الحل فرغ الجملة الخبرية من معناها ومضمونها

خصوصا مع انتهاج الإخوان كل السبل التي تظهر ان ليس لديهم اي رؤية حقيقية عن الحل

فالإخوان غائبون تماما عن دائرة الحلول في بلادنا المنكوبة..فلا نسمع لهم صوتا ولا نرى لهم فعلا وقت الجد

يذكرونني بالمصريين في السودان بعد ماتش الجزائر

لما انضربوا خرجوا يصرخون ويولولون كالولايا...لكن بلا قوة حقيقية وبلا رد فعل حقيقي وبلا موقف رسمي يعمل له حساب

يبدو أن هذا هو حال المصريين دائما...جعجعة بلا طحن وقوة غير موجهة بلا قيمة

طيب نرجع للشعار الي الإخوان بوظوه...هل مشاكلنا القائمة لها حل

لدينا مشاكل في علاقتنا بالحاكم وعلاقتنا بالمحكومين

وعلاقة المواطن بالمواطن...,علاقة المواطن بالدولة كقانون

وعلاقة المواطن الأعداء وعلاقته بالأصدقاء

وكيفية تحديد الأعداء وكيفية تحديد الأصدقاء...

هل العدو هم العرب ام الغرب ام كليهما...وكيف يختار المرء عدوه ويمشي نحوه

هل السلطان المغتصب للأرض وللحكم المصطهد للرعاياه سواء مسلمين ام مسيحيين واجب لطاعة ام واجب الحرب

هل يحل لنا كمسلمين ان ندرس تاريخنا لنتعظ منه ام لا؟

إن القيمة الكبرى في الإسلام بعد التوحيد هي العدل ثم الحرية

وكلما تعارض مبدأ مع العدل والحرية نجد في تاريخ الإسلام الأول من يقف له بالمرصاد...

تكثر الان الدعوات الى ان العلمانية هي الحل...وان الفصل بين الطلبة في حصة الدين هي احدى علامات الفرقة بين الشعب

لأن المسلمين يقولون كلاما لا ينبغي ان يسمعة المسيحيون...

وتكثر الدعوات ان الحل هو سيبوكوا بقى من حصة الدين دي...وبعدها المنابر

اصل الناس بتقول في حصة الدين كلام ما ينفعش المسيحيين يسمعوه

إستمرار هذه المنظومة القائمة على عدم الحرية في المعتقد وتجاهل حق الأخر في التواجد والطرمخة على المعقتدات الحقيقية

مش هينتج عنها غير المزيد من التطرف

إن الإسلام يكفل حق الأخر في التواجد والبقاء والإختلاف...الإسلام لا يعترف بالمسيح الها بل يكفر الإدعاء

الا انه لا ينكر على صاحبه الوجود بل يحميه

ويحمي كنيسته وصليبه..ويحمي صلاته..ويمنع المسلمين من التضييق عليهم

ولو نظرنا قليلا في تاريخنا الإسلامي سنجد ان سيدنا عمر

رفض الصلاة في كنيسة القيامة حتى لا يقول المسملون نصلى حيث صلى عمر فيضيقوا على المسيحيين في الصلاة

ورفض الصلاة امامها جماعة حتى لا يضيقوا عليهم في الدخول والخروج

والإمام ان تيمية حين دخل التتار ديار المسلمين في الشام, ذهب الى زعيمهم من اجل التفاوض معه على الأسرى

فسمح بالعفو عن اسرى المسلمين دون اليهود والنصار

فرفض ابن تيمية ان يذهب بالمسلمين فقط وقال له هم اهل ذمتنا ولا يجوز لنا ان نخون عهد رسول الله

والرسول قديما قال من عادى ذميا فانا حجيجه يوم القيامة..

ان رفض الإسلام لمعتقدات اهل الكتاب بل وإنكارها لا يعني رفض الإسلام لحق الأخر في اتواجد والعبادة كما يرى هو انها الاصلح

والقاعدة الإسلامية تقول من شاء ان يؤمن ومن شاء ان يكفر

والكفر في اللغة هو الإنكار...اي من شاء ان يؤمن ومن شاء ان ينكر هذا الإمان فلينكر

هذا التناغم في الفكر الإسلامي القائم في الأساس على الحرية وحق التواجد

هو ما كفل للمسلمين الأوائل ان يشنغلوا بالقضايا الأهم وهي المعمار في الأرض

إننا نفتقر الأن الى المعرفة الحقيقية بديننا

فالإسلام لا يعرف الخسة ولا يعرف الجبن ولا يعرف النفاق

بل توعد المنافقون بالدرك الأسفل من النار...وذلهم وحقرهم واعطاهم ادنى المرتبات في الحياة الدنيا والأخرى

ولا ترى ننظر حولنا الا ونرى المنافقون في كل درب يتسابقون...

الإسلام الغى الإحتكار بل وجرمة والغى الربى ووضع تجارة الخمر والمخدرات لأنها تذهب العقل

الإسلام كفل للمرأة الحقوق والواجبات فقد كانت المسلمات الاوائل تقاتل مع النبي

بل ان من صمد حول النبي في غزوة احد مع كبار الصحابة إمرأة من الصحابيات كانت ملثمة

تذود عن النبي بنفسها...

وكان للنساء نصيب من العلم الشرعي بل والرأي السياسي

فمن يسنى دور السيدة اسماء بنت ابي بكر الصديق في مواجهة الحجاج

ومن ينسى كلمتها لإبنها عبد الله بن الزبير حين ودعته قبل معركته امام الحجاج فوجدته ملتحفا

درعه فقالت له ليس هذا فعل من يبغي الشهادة

ما الذي يدفع امرأة ان تلقي بإبنها فلذة كبدها الى الموت ( ليس امام احد من الكفار) وانما امام احد من المسلمين

ترى انه يفسد على الناس دينهم ويقوض الحريات ويريدها ملكا

ان هذا الموقف البطولي للمسلمات في القرن الاول الهجري يدل على ان الإسلام ما جاء ليحجم ولكن ليمنح

فالمرأة قبل هذا المشهد بمخمسين عاما فقط كانت تعال كالرقيق حتى وهي حرة

اما بعد الإسلام اصبح للنساء موقف سياسي يقبله الناس بل ويبحثوا عن الدعم منهن

الحرية يا سادة هي غاية الإسلام الأولى...الحرية والعدل...إن غياب هذه القيم الأصيلة من المجتمع ومن المناهج التعليمية ومن الخطب المساجد

في القرى والنجوع هي المبرر الحقيقي وراء ما يحدث الأن من فتن يستفيد منها طرف وحيد لا يعنيه بخردلة اسلام او مسيحية

وانما يعنيه فقط ان يظل متربعا على عرش مصر وهذه الانهار تجري من تحته

شكلي هغرق المدونة رغي

2010-01-10T00:42:00.007+03:00

زمااااااااااااااااان قوي....في القرن الأول الهجري..حدثت الفتنة الكبري التي فرقت بين المسلمين, ما بين مؤيد لعلي ومؤيد لمعاوية بن أبي سفيان...الفتنة التي صدّعت الدولة الإسلامية واخرجت كل الطوائف التي عرفت في التاريخ الإسلامي الحديث من خوارج وشيعة وروافض ومعتزلة ومرجئة وخلافه...

طيب الفتنة دي كان معروف فيها مين الصح ومين الغلط...اه..كان تقريبا معروف...مثال ذلك موقفين في التاريخ الإسلامي..أولهم قولة قالها الرسول عليه الصلاة والسلام لعمار بن ياسر حين قال..تقتلك الفئة الباغية..

وثانيهما موقف الزبير بن العوام من علي بن أبي طالب حين كان الزبير يسير مع الرسول صلى الله عليه وسلم فمر على علي بن ابي طالب فتبسم علي للرسول وتبسم الرسول له فغار الزبير وقال للرسول (لا يدع ابن أبي طالب زهوة) فغضب الرسول وقال له والله ما به زهوة تقاتله وانت له بظالم..

المشهد الأخير غاب في الأحداث عن الزبير بن العوام في أوج الفتنة ولكن علي ذكره به لاحقا وحزن الزبير حزنا شديدا ان نسي قولة الرسول فاعتزل الفتنة..بالمناسبة الزبير كان في جيش معاوية..

نرجع بقى للمشهد الأول...بتاع عمار بن ياسر..عمار بن ياسر كان يقاتل في جيش علي ضد معاوية..والرسول قال تقتله الفئة الباغية..وكلا الجيشين يتحين عمار بن ياسر لكي يرى من يقتل عمار..لأن من يقتل عمار هو الباغي

كان عمار وقتها قد جاوز السبعين من العمر...مختصر القول ان عمار قتله جيش معاوية...وما ان قتل عمار وعرف ذلك في الجيشين حتى توقف القتال وانفض وعاد كل جيش لمقرة لكي يتدبروا امرهم

اهه...عمار قتل بجيش معاوية..والرسول قال تقتله الفئة الباغية...فهل هناك من شك أن فئة معاوية هي الفئة الباغية..

لكل ذي عقل سواء راجح او غير راجح يبدو ان المسألة لا تحتاج اصلا الى شرح..فالحديث ليس فيه لبس او تأويل

لكن ما ان انقضى اليوم حتى اشاع معاوية في جيشه ان من جاء بعمار هوالذي قتله..وبذلك يكون من قتل عمار هو علي وجيش علي هم الفئة الباغية

يقول المؤرخين فوالله لا ندري ايهم اعجب هو في قولته ام هم في تصديقه له...

طيب نرجع بقى لمشهد اليوم الحاضر

النهاردة الصبح في الراديو..(.الراديو الحكومي طبعا) ادانت الحكومة الإعتداء الغاشم من حكومة حماس على المجند المصري الذي اصيب برصاص على الحدود اثناء رد الإعتداءات الفلسطينية على المعبر المصري وقد اعرب وزير الخارجية احمد ابو الغيط ان للصبر حدود

وأن حماس بلا شك هي السبب الرئيسي في الحصار المفروض على قطاع غزة وغلق المعابر, وانه لولا غياب شرعية حماس لكانت المعابر الأن مفتوحة لعبور الأدوية والأغذية الى غزة !!!!!

نفس الجهاز الحكومي الي ضللنا وقت النكسة وفضل يذيع انباء انتصاراتنا واحنا بنتنش زي الدبان على الحدود...نفس الكلام بنفس السخف

نفس النظام الذي أغفل عمدا ان يقول لشعبه او يأخذ حتى موافقته المضمونة بأنه سيبني جدارا فولاذيا مانعا يحطم او وسيلة لأهالي غزة في الحصول على اساسيات حياتهم..وحين كشف الأمر عن طريق الأعداء ..لا بل ألد الأعداء...قال بمنتهى البجاحة الي في الدنيا

ايه ارضي وانا حر فيها ..وبعدين دي مسألة هامة للشأن القومي المصري..

يعني احنا بنحمي حدودنا من الغزاوية...

نفس الكلام بنفس السخف...يا ترى هل يذكرنا هذا المشهد بالمشهد الأول في عصر الإسلام الأول

والله لا ادري اهما اكثر غفلة النظام في قولته ان غزة هي العدو ام نحن في تصديقه

انا بقول كده عشان انا كل ما اكلم حد حوليا الاقيه بيقول نفس الكلام السخيف..بتاع ايوه احنا يعني هنسكت على حماس لحد امتى

كإن حماس دي هي الي مجوعانا ومغرقة عيالنا في البحر وهدمة بيوتنا في الهجاانة وبايعة ارض سينا الي ضحينا علشانها بدم اباءنا واجدادنا وولادنا بتراب الفلوس لإسرائيل..

يعني المصريين انضروا من حماس في ايه....انا الحقيقة مش مهتمة ابدا بحماس داخل غزة لإن ده شأن داخلي بيتهيألي ميخصش حد غير الغزاوية

حماس جت بإنتخابات شرعية..غير مزورة...يعني ده اختيار الشعب الفلسطيني...

بأمارة ايه بقى من حق مصر تتدخل في شؤونها وتقولها معلش انت كخة امشي مش عايزينك...

طب الحكومة بتاعتنا حكومة غير شرعية وطبيعي انها ترفض اي حكومة شرعية عربية لإن ده احراج لموقفها

طب الشعب بقى...ماله ومال الي بيحصل...منين مكذب الحكومة وبيسبلها في كل صغيرة وكبيرة ...ومنين مصدق الهجص بتاعها بتاع حماس هي العدو

.اكيد فيه حد لعب في الرامات بتاعتنا وخلانا بنفكر بعقلية الفرنساوين بتوع الإحتلال..

الي قتلوا مليوني جزائري وهما بيدعوا انهم بينضفوهم من الجهل والتخلف الي هما فيه....

اكيد كده....اكيد فيه حد بيتكلم في دماغنا فرنساوي او انجليزي...بس احنا بنسمعة عربي ومصدقين انه عربي

حد بيقولنا ان إسرائيل حبيبتنا وأمريكا مرات ابونا...ومرات ابويا عارفة مصلحتي...عاملة زي ام حميدة في فيلم ابن حميدو

انا افصل وانت تلبسي ...انا اطبخ وانت تاكلي...انا اخطب وانت تتجوزي...

امريكا بتكلمنا كده....انا احب وانت تتتجوزي...انا اهجم وانت تكملي...انا احاصر وانت تقفلي...كده يعني

مهو مش ممكن يكون الي بيحصل ده طبيعي...

انا نفسي كده الشعب المصري حد يمسكه واحد واحد و يفهمه

يفهمه ان الحكومة دي هي الي قبلت تحارب ورا امريكا في حرب العراق التانية

يعني الأمريكان كسبوا الحرب وحاصروا العراق والمصريين هما الي اتقلتوا..

امريكا مولت فلوس والمصريين هما الي حطوهم في الصفوف الأولية ليه بقى عشان ارخص..لإن مصرع امريكي واحد وقتها كان مشكلة

لكن مصرع الف مصري ما يسواش حاجة..

ووهي نفس الحكومة الي ادت ممدوح اسماعيل بتاع العبارة براءة...براءة يا ناس ..براءة..يعني مش حتى توبيخ

لا ...ممدوح عباس غبير مسؤول على الإطلاق لا هو ولا ولادة ولا اي حد من طرفه عن مصرع 1200 مصري في البحر الأحمر كلهم السمك

الناس لازم تفهم...الحكومة فاهمة كويس ان اغلبية الشعب جاهل ومش متعلم...واخرة بيفك الخط..ماهو ما تقنعنيش ان الي دخل مدارس حكومة في مصر متعلم...ده بيوصل لثانوية عامة ما بيعرفش يقرا عدل

انا كنت قاعدة في جامع في قرية في بني سويف...وقاعد جنبي بنوته عمرها 14 سنة..بقولها هي القرية دي اسمها ايه

بصتلي كده كإنه كلمتها انجليزي وقالته هه..قلتلها قريتكوا اسمها ايه...ضحكتلي كده بخجل وقالتلي معلش انا مش فاهمة انت بتقولي ايه..يعني جصدك الجامع..قلتلها لا يا بنتي القرية القرية..قالتلي يعني المنطقة ولا الحي..قلتلها لا..اقولك..بلدكوا اسمها ايه..قالتلي بليفيا..

يعني طالبة وصلت ل14 سنة ومش عارفة يعني ايه قرية..تفتكروا مين بيأثر على عقلية المواطن الي من هذا النوع

طبعا مصطفى عبدة واحمد شوبير

كنت راكبة مع سواق تاكس...لقيته بيقولي من غير مناسبة كده..انا نفسي نلعب مع الجزائر..والله ساعتها هنبعتلهم طيارات تاكلهم..انت عارفة حضرتك..دول نسوانهم كلهم ......اه والله حضرتك..اقوله هو حضرتك رحت الجزائر..يقولي لأ

اقوله امال عرفت منين لا مؤاخذة..يقولي يووووووووه ده احنا لينا ناس ياما هناك وقالولنا..

الراجل ده..اجدع واحد سمعة مصطفى عبدة..واحتمال احمد شوبير...ويمكن علاء مبارك بتاع روراوة وهوهاوة..

الحكومة للأسف ما يفرقش معاها غير الناس دي...الي تقدر تمشيهم زي ما هي عايزة..والي الإعلام الحكومي للأسف بيأثر فيهم جدا

لإن الإعلام قاعد فيه ناس ببدل ومتنورين ومتعلمين..وبيقولوا كلام كبير..وبيقولوا انهم بيحبوا مصر

ومش متخيلين ان الناس ممكن تكدب بالعنف ده..خاصة بقى ان الموضوع بعيد عنهم..هم مش شايفين حاجة

مش شايفين مثلا ان الحكومة هربت بولاد الريس وسابوا المصريين يتفرموا في السودان..فمش عارفين ان المفروض يغضبوا على الحكومة

لقوا الحكومة بتعيط قبلهم..وبتلطم في الشارع زيهم...فراحوا لفين بسرعة قالك يبقى هو بن اللذينة ده الي عايز الحرق..ولقوا انهم بيشتموا في الجزائر والحكومة تتبسط..يبقى انا اكيد بقول كلام صح

نفس القصة مع غزة...الحكومة بتقول ان غزة ضربت نار وقتلت مصري..والناس عمالة تولول وتعيط على مصر الأخت الكبرى الي طول عمرها خيرها على الكل..ومع ذلك محدش مقدر...عالم جاحدة ومعندهاش دم

عموما...انا نفسي اتفتحت على التدوين...وناوية اقول الي في نفسي...نلتقي بعد الفاصل

إش عرفك انت

2009-11-05T21:26:00.001+03:00

أنا كنت مقررة ما اكتبش حاجة لإني شايفة اني مش هضيف حاجة

الست نوارة اثاب الله خطاها مش مخليه في نفسي حاجة, كل ما ادخل عندها تشفي غليلي وزيادة

عشان كده قلت يا بت هو انت هتكتبي عشان هتسمعي صوتك وخلاص..طالما معندكيش حاجة اتهدي بقى واسكتي

والي يعرفوني شخصيا عارفين ان سكوتي في حد ذاته نوع من أنواع التعذيب الإنساني بالنسبة لي

لإني من الناس الي ربنا وهبهم لسانين في بق واحد

لكن اهه, مش عشان كله عشان مصر والله, قررت اني اجي على نفسي واتهد واسكت لعل وعسى ربنا يغفرلي ما تقدم من ذنبي

لكن بصراحة الي بيحصل ده كتير

كتير قوي بصراحة

انا كنت ماسكة نفسي

ماسكاها قوي يعني

وبحاول اتلم واخرس, لكن الحزن الهبلي مش مديني فرصة اتماسك

الناس دي لازم تتحرق في ميدان عام

لا مش كفاية تتحرق, دول محتاجين يتعالجوا في مصحة

لإن اكيد بن عوكل وصحابة مصابين بنوع من العته مخليهم مش فاهمين هم بيقولوا ايه

أكيد حد مغمي عينيهم ومفهمهم الدنيا غلط

قال جمال مبارك...جيمي ...جمال...بن الرئيس المفدى

قال ايه...اسمعوا كده وركزوا

قال جيمي بن عوكل بيقول إحنا عارفين الظلم الي وقع على الفلاح

والكلام ده هيتغير...قال جمال نزل للفلاحين عشان يرفع الظلم الي وقع عليهم

شوفوا ازاي....يا جدعان حد يقول للراجل ده إن الي ظلمة هو الحزق الوطني

حد يقوله ان مصر ما شافتش حكومة تانية طول عمرها

يا جدعان حد يهمس في ودنه لحسن ده ناسي...يعني تخيلوا كده واحد مسك كرباج بيضرب حد

و بعدين وقف فجأة وقال...أحنا عارفين ان ظهرك بيوجعك ...بس صدقني المستقبل هيتغير

احنا هننقل الكرباج مني لإبن...من هنا ورايح مش انا الي هضربك..،ننوس عين ماما هو الي هيضربك

ايه رأيك بقى..مرضي يا با

انا مش هكملكم فعاليات المؤتمر ولا تفاصيل اليوم...

انا هقول بس للسيد المبجل جمال مبارك

اش عرفك انت؟؟

ادعوكم جميعا زوار مدونتي الكرام...ده لو لسة حد بيزورها انه ينضم لجروب اش عرفك انت

"قال تعالى" لم تعظون قوما الله مهلكهم , قالوا معذرة الى ربنا ولعلهم يرجعون

هما العلمانين اتعدوا من الإسلامجية

2009-08-01T00:53:00.002+03:00

تنويه: البوست ده طووووووووووووويل قوي

*****************************************

مش عارفة ايه الي حصل في البلد دي

هي الناس ليه كارهة بعضها قوي كده

وليه محدش مستحمل يشوف حد مختلف عنه

يعني المحجبة مش طايقة الي مش محجبة

والمنتقبة مش طايقة الإتنين

المسلمين مش مستحملين ضل المسيحين على الأرض

والمسيحيين هينفجروا من المسلمين

انا من ساعة ما اتولدت في التمانينات ولحد النهاردة ما شفتش غير ناس بتهاجم الإسلامجية

انا طلعت على الإسلام السياسي وفيلم الإرهابي الي مازلت مصرة انه من افشل افلام السينما المصرية

لكن النهاردة بقى انا بصراحة مفرووووووووووسة من العلمانين

هطق من جنابي

يعني لما اشوف واحد ملتحي ولا واحدة منتقبة معترضين على المجتمع

اقول ماشي مفهومة شوية

لكن الاقي واحد فاقع مرارته ومرارتي كلام عن الحريات

واول ما يشوف خلقتي يفضل يقولي مسكينة انت اصلك ضحية

هي يعني والدتك كانت صايعة في الستينات

ولا يعني كل الستات الي بيشربوا سجاير ولابسين ميني جوب في حفلات ام كلثوم دول كانوا كفار

ما حنا طول عمرنا مسلمين...ما دمرناش غير المتخلفين بتوع الفكر الوهابي!!!

وهاتك يا محاضرات على قد ايه انا واحدة يا عيني مضحوك عليا ولولا مية النار الي اترمت في وش مامتي في الستينات

كان زماني طبيعية زي بقيت الخلق ولابسة زي اي ست محترمة ميني جوب؟؟؟!!!!

احلفلهم ميت يمين على ميت عظيم ان انا لا عمري شفت مية نار ولا عمر حد كلمني عن الحجاب

وان ده اختياري بإرادتي الحرة...,ان من حقي اني اعمل اختيار

وان الملكة رانيا قالت تقاس الست بما في رأسها لا ما على رأسها

يتصعبوا عليا قوي ويوقلولي معلش....ما هو انتم اصلكم الضحية احنا السبب

كنت هطق من جنابي وانا بسمع الكلام ده

اقولهم يا عالم.....انا أستاذي كان ملحد و عمر اختلافنا ما غير من نظرتي ليه او نظرته ليا

يتصاعد الزبد من شدقيه ويحمر عينه ويوقلي يعني ما كنتيش بتقولي عليه في سرك كافر

اقوله طب وايه المشكلة ما الكفر حق يكفله الإسلام...يقولي امال فيه ايه مالك لابسة كده ليه بقى

لا حول ولا قوة الا بالله

انا بصراحة مش فاهمة...هو كان ايه موجود في الستينات حلو عشان الناس تتصعب عليه قوي كده

يعني هي الستات لما لبست ميني جوب في الستينات على غرار اوروبا...

وحطت مكياج صارخ ولبست جزمة ارتفاع عمارة مصر كانت احسن في ايه

ايه الإنجاز الي اتحقق في الستينات الي صعبان علينا قوي اننا ما نشوفوش غير ان الستات قلعت هدومها ولبست مايوهات

ثم ان الإسلاميين بكل اشكالهم موجودين طول عمرهم في مصر

حسن البنا ماهو موجود من قبل الحركة الوهابية...وطول عمر الإسلاميين مسموع صوتهم

وليهم تأثير في المجتمع وفي الحركة السياسية

بالعكس بقى....الإسلاميين والمسييحين كمان حققوا كتير

يعني لو حطينا الإتنين في قائمة اليمينيين هنلاقي مدارس محترمة

تعلم بجد طلع منها قادات المجتمع الوطني

ونوادي ودور رعاية ومراكز شباب

لو تفتكروا فيلم النمر الأسود احمد زكي الي هو محمد حسن كان بيتدرب ملاكمة

في نادي الشبان المسلمين

أحمد حسين زعيم حزب الأحرار الي عمل انجازات تاريخية في مصر

كلها للصالح العام وفي صالح الشعب المصري كان خريج مدارس الجمعية الخيرية الإسلامية

الراهبات والرهبان المسيحين عملوا قطاع عريض من المدارس مازال حتى الأن منارة رائدة في التعليم

هما العلمانيين بقى عملوا ايه غير حرية التدخين والجنس

ومهاجمة الدين عمال على بطال

وبعدين كل ما حد من اخونا العلمانيين يشوفني بعباية

يقولي اه هنسيب بقى أشغالنا ونقعد نتكلم هنخش الحمام برجلنا اليمين ولا رجلنا الشمال

يا سلاااااااااااااام

يعني هو ده الي شافوه هيهد الأمة ويدمرها

طب انا مرة فتحت التلفزيون على القناة التانية الأرضية

واحب اكرر انها التانية الأرضية

ولقيت برنامج لطيف قوي عن موضة المايوه السنة دي

وعرضين ديفيلية عن احدث صيحات البيكيني والوان بيس والكاش مايوه

وماسكينهالنا ذلة ان فيه شيخ قال رضاع الكبير ومش عارف مين قال خش برجلك اليمين ولا الشمال

طيب يعني لا مؤاخذة مانتوا شايفين الفساد في كل ناحية

سبتوا كل حاجة ومسكتوا انتو في الشيخ وقعدتوا تهربدوه في كل القنوات الفضائية

طب بالذمة مين الي صنع النجومية هنا

وايه الي يفرق الشيخ عن الي بيناظره

الغريبة بقى....ان الكلام ده كله بيشعرني قد ايه الجيل ده لا يمكن تقوم منه نهضة

وانا بأعني بالضبط جيل السبعينات

الجيل الي لم يحقق أي إنجاز يذكر ...

بل على العكس كان عامل رئيسي على ضياع البلد

ما حدش يقولي بقى مظاهرات الطلبة ومش عارف ايه..

ما الناس بتتظاهر طول الوقت...لكن عملوا حاجة

طلعنا من الهوسة دي كلها بشوية اغاني رائعة ربنا يخليهالنا

لكن المحصلة الحقيقية...صففففففففررررررررررر متيييييييييييين

انا كل يوم بتأكد ان الإسلام ده دين عظيم

يعني الإسلام كان حريص قوي انه يعلم الناس الروتين

ويمشيهم في سيستم لو لاحظتم دي اكتر حاجة نفتقدها كمسلمين

الإسلام فرض علينا صلوات خمس مرات في اليوم...قصيره جدا لكن مفروضة

بكده يضمن ان المسلم شخص ملتزم...وفرضها في مواعيد متفرقة بدري جدا في النهار

ومعتدلة التأخير عشان يجبر الناس تنام بدري وتصحى بدري

ما هو لو مانمش بدري مش هيقوم للفجر

وبعدين نصح المسلمين انه بعد الفجر ما ينمش يخرج على اكل عيشة

لإن في البكور بركه وده عشان يستفيد بساعات النهار كاملة

فرض عليهم صلاة الجمعة مرة كل اسبوع

عشان يخلق حالة مهمة جدا من التمازج الإجتماعي

وده مهم ان الناس تعرف بعض

وضع قواعد للخطبة في الجمعة انها ماتكونش طويلة وانها تكون مرتبطة بيوميات المواطن

يعني المفروض ان الخطيب في كل منطقة يكون من اهلها عشان يعرف مشاكلها ويطرحها

يفكر مع الناس في حلها

وده في حد ذاته بيخلق في الناس الديموقراطية والترابط

وانه عضو مؤثر مش مجرد رقم بيعد

الجيوش بالمناسبة كانت بتخرج من الجوامع

يعني الجوامع كانت قوة مؤثرة

الإسلام علم الناس حاجة عبقرية اسمها الطابور

لو نظر الناس كده للحرم تلاقي قدامك ملايين من البشر

اول ما الراجل يقول حي على الصلاة

في خلال دقيقتين يكون الملايين دول اصطفوا سويا في ثواني

في صفوف منتظمة ما تخرش المية

يعني المفروض ان المسلمين هما اول امة تقدر تقف في طوابير

اذا اكانوا بيعملوا كده خمس مرات في اليوم يبقى ازاي مهرجلين في طابور العيش

وازاي يرفضوا النظام

اذا كان النظام فرض عليهم في كل شئ في حياتهم

الإمامة دائما للأفضل

ووضع قواعد للأفضل

ان يكون اكثرنا علما بكتاب الله

ثم اكثرنا علما بسنة رسول الله

لو تساوا كل ده يبقى اكبرهم سنا

لو مجموعة فيها عشرة فوق الستين وعيل عنده 17 سنة حافظ اكتر منهم

يبقى هو الي يقود

طب بالذمة فيه ديموقراطية واحترام للعلم اكتر من كده

الحجاب الي مصدعين دماغنا عليه طول النهار

اتفرض عشان يكسب الست إحتراما اكبر

طب بذمتكو...,انا بذممكوا اهه

يعني لو ماشيين في الشارع كلنا وكل واحدة فينا لابسة فستان شفتشي يبين كل اشي

على رأي الست صباح....وبنقول للناس خلي بالك

اوعى تبص واوعى تلمس واوعى تحلم واوعى تفكر واوعى تهرش في شعرك

فيه حد هيعرف يشتغل

يقولك بقى ماحنا كنا في السبعينات كل البنات قالعة ومحدش كان بيبص

ابقى عايزة اولع في نفسي.....يعني ايه بالظبط...هما الرجالة في السبعينات ماكانوش رجالة

على رأي واحدة أمريكانية...كانت شارية جيبة محزقة وعمالة تكلمنا عليها انها رايحة بيها حفلة بعد الضهر وبتقول على الله الاقي راجل حلو في الحفلة دي يستاهل الجيبة دي

بنقولها يعني انت لابساها عشان تجيبي بيها ديت ( يعني ميعاد غرامي) قالت طبعا

مانا لو لبستهاا ومحدش عبرني هروح اولع في روحي

العالم كله بيتكلم لغة واحدة ما عدا العلمانيين

هما لوحدهم عندهم قانون خاص محدش فاهمة

كان فيه دكتورة في صيدلة عين شمس من طائفة الإخوة العلمانيين المتطرفين

بتمتحن بنات شفوي فدخلوا اتنين محجبات ولابسين عبايات واحدة فيهم عطست

فالتانية قالتلها شفاك الله وعافاك

الدكتورة اتنفضت واترعشت وقعدت تصرخ في البت

ماهو الهبل ده هو الي جايبنا ورا

جتكوا القرف عليكو وعلى جيلكو....رجعتونا خمسميت سنة ورا

هتبطلوا امتى بقى التخلف الي انتو فيه ده

منهم لله الوهابيين الي عملوا فينا كده

البنت بقت تبص حواليها وهتعيط...هو انا قلت ايه يا دكتورة عشان ده كله!!!

الرجل المذكور اعلاه....يبصلي قوي كده ويقولي الوهابيين غزوا البلد

النهاردة بقينا نستورد اصوات تقرف من بره

وطول النهار القران السعودي شغال في الميكروباصات

احناااااااااااااااااا

بلد القرااااااااااااااااااااان

بنستورد قراااااااااااااااااااااان

اقول في عقل بالي...هو القران اتغير

يقولي بقى احنا شيوخ المقرئين كانوا عندنا نسيبهم ونسمع لشوية العيال بتوع الخليج دول

اقول في عقلي هو الإرهاب الفكري وصل لحد كده

يعني احنا وصلنا للحالة دي من العنصرية

هو العيال لما سابت ام كلثوم وسمعت تامر حسني

العلمانيين صرخوا كده على ضياع الفن!!!!

ولا هو عشان قران يبقى يستاهل الصريخ

حسيت بالعنصرية الشديدة ان الناس دي امتلأ قلبها بالحقد

فعمرها ما هتشوف جمال وعمرها ما هتصلح

ابص بقى على حال الواحد من دول

الاقي خمرة تلاقي....ستات تلاقي

علاقات مفتوحة تلاقي

سجاير ما يضرش

وغالبا بينهي بيهم الحال يا مطلقين وعزاب

طب بالذمة ايه الي يخلي حد في الدنيا عايز يمشي على خطاهم

ايه الي حققوه في حياتهم عشان نقول ياااااااااااه ده صحيح احنا تخلفنا قوي

يعني انا محجبة ومضيعة نص الأسبوع لف في الشوارع وشغل بعد ما اروح عشان مشروع مؤمنة بيه

وطول الوقت حاسة بالإطهاد عشان محجبة

هما العلمانيين دول بيفكروا ازاي

ضد الدين للدين؟؟

يعني ايه الي مش عاجبهم في الألولف المؤلفة من النشطاء المحجبات في ان هما محجبات

ليه دول كخة والي بيقفوا في المظاهرات بالميني جوب والكعب العالي والشعر المكوي على سنجة عشرة دول دحة

يعني ايه الفرق

الراجل المذكور اعلاه.....كان قرب بطبق في زمارة رقبتي انا عشان عميد كلية الفنون شال تمثلا عريان من مدخل الكلية

احتراما لمشاعر الملتزمين

بيقولهالي والشرر يتطاير من عينه

كان على طرف لساني اقوله...طب والله كويس راجل ذوق

ماهو اصل يعني الفن مش هيقف على تمثال عريان

هو يعني لما احنا هنعمل تماثيل عريانة امال اوروبا هتعمل ايه

وفين لا مؤاخذة يعني التجديد والهوية والإنتماء

ولا الفنون انحسرت في التماثيل العريانة وغيرها لأ

وبعدين ما المسلمين سابوا تراث فني لا يقدر بثمن من غير ما يرسموا ولا ينحتوا تماثيل عريانة

وهو فيه في مصر حد عمل تحف روائع فنية زي الي اتعلمت في عصور ازدهار الإسلام

والرسامين العباقرة الي بيتغزلوا بيهم أضافوا أي إضافة مميزة لينا كشعوب غير إن هما استوردوا فنون

وما شفتش يعني حد فتح بقه من الإخوة العلمانيين لما رئيس جامعة الزقازيق

حلق لأحمد عرابي ذقنة مغازلة لمشاعر العلمانيين

يعني زور التاريخ كده عيني عينك وماتهزتش شعرة في نافوخ حد

كان فيه مقولة رائعة لحد مش فاكره اسمه بتقول ان الفضيلة وسط بين رذيلتين

والإسلام بيقول وجعلناكم امة وسطا....

الوسط يعني لا موغل في التطرف ولا موغل في الإنحلال

أحد العلمانين الي احتكيت بيهم بكثرة مؤخرة...

كان بيشرحلي نظرية هامة جدا عن الطبقات في مصر

فقال ان المجتمع ينقسم لثلاث طبقات

طبقة عليا ودي الأرستقراط وعندها الخمرة مقبولة والحشيش مرفوض

وطبقى دنيا ودول شديدوا الفقر عندهم الخمرة حرام ومرفوضة والحشيش مقبول

وطبقى متوسطة...لا عايزة تنزل ولا قادرة تطلع رفضت الإتنين

وعلى الرغم من طبقية الكلام ( اخذا في الإعتبار انه من الطبقة الأولى) ن

لقيت ان الكلام ده حقيقي يتماشي بشدة مع الإسلام ونظرية الوسطية

وأكدلي ان الوسطية دائما أصح وأفضل

لذلك المفترض ان الطبقة الوسطى هي الي تسود وتنتشر

بس الي شايفاه بصراحة ان الإنتشار للعلمانية مش للوسطية

الأسوأ ان ممارسات العلمانيين لا يمكن تفسيرها غير إنها إرهاب

ولكن من نوع جديد

ربنا يستر

بوسبوس ودخان السجائر

2009-06-24T20:19:00.002+03:00

نازعتني بعض الأفكار الوساوسة بدخول فيلم سينما

ليه معرفش....طيب فيلم ايه برضه معرفش

مليش اي طقطان على افلام خالد يوسف كلها دم وكابة وانا مش ناقصة

سألت العالمين في أحوال الأفلام الصيفية هو أخبار أفلام السنة دي إيه

فكان الجواب فااااااااااااااكس

طب احمد عز...فاكس....طب تامر حسني فاكس

طب عادي امام..فاكس...

طب وبعدين يا رجالة....المهم ساقتني قدماي الى سيتي ستارز

واتلميت على زميلة عزيزة هتطرشق هي الأخرى من مشاغل العمل والحياة

وقررنا ان نضحك حتى نستلقي على قفانا...على رأي العرب

وقلنا بما ان سيتي ستارز سينماتها غالية ومليانة دور عرض يبقى العين عليها

ان شاء الله واكيد هنلاقي فيها حاجة عدلة

رحنا واتكلنا على الله فلم نجد غير عمر وسلمى وبوسبوس

وبدل فاقد...ولأسباب يطول شرحها قررنا ان نختار بوسبوس

على اعتبار ان الأمل موجود للضحك ولتغيير حالة الكابة والملل المخيمة على كلتينا

حجزنا التذاكر وقلنا نحتسي قدحا من القهوة في اي مكان...

وفجأة شعرت كأني في مطار القاهرة

ارتفع الإيقاع المميز تان تان تان تاااااه

تعلن ادارة مول سيتي ستارز ان المول اصبح خاليا من التدخين

تان تان تان تاااااااااااه

ثم يتكرر النداء مرة اخرى بالإنجليزية

طبعا احتجت الى اكثر من عشر دقائق ولخمس مرات استمع الى النداء حتى أميز ما يقال

ثم غرقت في نوبة من السعال الحاد لإن دخان السجائر لجميع من حولي كان هيموتني

طبعا العرق بتاع الإعتراض الي عندي نفر...ولإن صحبتي عقرب زيي

فعرقي لمّس مع عرقها وهبينا احنا الإتنين نضمر الإعتراض والدفاع عن تطبيق القانون بأي شكل

نادينا للنادل...لو سمحت يا أخت...هي السنيورة دي بتقول ايه

ينظر الينا النادل ببلاهة مع ابتسامة سمجة ويقول بتقول مفيش تدخين في المول حضرتك

احم احم...لا مؤاخذة يا بني العتب على النظر بس هو الدخان الي هيموتنا ده من ايه

لا يا فندم الكوفي شوبس مستثناه

بصتله بغباء كده وقلتله مش فاهمة حضرتك اشمعنا.؟؟

والله دي تعليمات...احنا عندنا استثناء عشان ااحنا مكان خاص للتدخين!!!

طيب ميرسي...نظرت الي صديقتي بعد ان رفعت حاجبها الأيسر قائلا

هو الي غبي ولا احنا الي متخلفين....قلت لها والله يا بنتي ما نا شايفه

ثم نقح عليا العرق الأحمق الخاص بالإعتراض وذهبت الى المدير ويسمونه المانجر على سبيل الحذلقة ليس إلا

لو سمحت يا أخ....هو حضرتك ليه سعادتك انتو مستثنين من النداء بتاع السنيورة

بإبتسامة تكاد تبتلع وجهه وتنم في الحقيقة عن سماجة غير مبررة...احنا عندنا ترخيص يا فندم

ايوة بس انتو مفتوحين على المول يعني الي واقف جنب الكرسي بتاعكو ما يدخنش والي قاعد يدخن

"أيوه يا فندم هو ده النظام"

بدأ عرق الغباوة (و بسمية غباوة عشان لما بينقح قوي ايدي بتطول) هو حضرتك شايف ان كلامك ده منطقي

اه يا فندم دي سياسة المحل واحنا بنطبقها

قلت في عقل بالي يا بت ده حتت نادل ولا رئيس الأندال ومش فاهم حاجة روحي لمدير المول

هو الي في ايده انه يحل الموضوع ده نهائيا

لكن يا ترى اين مدير المول؟؟

طيب نسأل حد من العساكر الي لابسن ابيض دول احيانا بيعرفوا هما واقفين فين

وجايز يدلونا

دخلنا على احدهم ببراءة

" مساء الخير يا أخ"

"أهلا يا فندم"

"والله هو بالنسبة للمدام الي حسها اتبنح دي بتتكلم منين"

" ده كمبيوتر يا فندم"

" أيوه يعني هي قاعدة فين انا عايزة اكلمها"

" ليه حضرتك فيه حاجة"

" اه اصل محدش سامع كلامها لإنه كل الناس عمالة تدخن كإننا في مركز شباب الشيشة"

يتأملنا انا وصديقتي الحارس الأمين ثم يقول

الله انا معجب قوي بصراحة حضرتك"

بس حضرتك لو عايزة مدام مرام الي بتتكلم دي هتلاقيها بتشيش عند الاموس

نظرت له صديقتي بتعالي ارستقراطي يبهرني فيها

من فضلك يا أخ....لما نحب نعمل كومبلين ( على سبيل الحذلقة ايضا) نعمله عند مين

سعاتك روحي لللواء طلعت في الدور الرابع

من اطراف مناخيرها قالت

"ميرسي"

انطلقنا سويا الى الدور الرابع وبحثنا حتى وصلنا لغرفة اللوا

طلعت فإذا هو رجل في اواخر الأربعينيات يبدو على قدر من الوسامة لو تجاوزنا الصفار الذي يكسو اسنانه من التدخين

وامامه طبقا فنجان ممتلئ على اخره بأعقاب السجائر

سألته بوضوح..." من فضلك انا عايزة اعمل كومبلين "

ابتسم ابتسامة عريضة كإني جاية اخطب بنته لأخويا مثلا

وقال ليه يا فندم خير ان شاء الله

قلت ابدا بس الهانم الي قلبها اتنبح دي مخليه شكلنا زبالة قدام الأجانب لما عمالة

تذيع بكل لغات العالم ان التدخين ممنوع في سيتي ستارز واحنا رئتنا هتنفجر من التدخين

فأجاب والله انا معجب جدا بإيجابيتكم...بس احب اوضح لكم نقطة مهمة جدا

التدخين فعلا ممنوع في سيتي ستارز ما عدا الكافيهات

تسألوني لييييييييييييه...إسألوني ليه اتفضلوا

طبعا ببراءة الخرفان سألنا...ليه يا فندم

قال اقولكم انا بقى..لإنه حضرتك فيه ماكينات شفط خاصة في الكافيهات

تمنع تماما خروج الدخان من داخل الكافيه لخارجه وعشان كده نقدر نقول ان سيتي ستارز خالي من الدخان

طبعا مش عايزة احاول افتكر تعبيرات وشي كانت عاملة ازاي

لكني فوجئت بصديقتي الساذجة تقول لكن يا فندم المكان مفتوح

فإذا بي اصرخ فيها " انت هتستهبلي انت كمان, انت هتمشي ورا كلام الهجص ده"

ثم نظرت ليه وشياطين الغضب تتقافز امام عيني

لو سمحت عايزة اعمل شكوى رسمية...

تحت امرك يا فندم...يا محمد هات يا بني ورقة فاضية من عندك

واعطاني ورقة بيضاء وقلم...قلت ما هذا

قالي اكتبي الي انت عايزاه...

قلتله بس ده مش شكوى رسمية..انت معندكش نموذج شكاوي في دفتر يتسجل فيه الشكوى

قالي لأ

احنا هنا امن المول حضرتك كده عايزة الإستعلامات

قلتله ميرسي وسبته ومشيت

طيب حد يقولي السينما...راحت فين اقوله معلش مصر اولا

والواحد لازم يكون ايجابي كان لسة فاضل تلت ساعة على الفيلم قلت يا بت امشي ورا المشوار للأخر

نزلت مع صديقتي المخلصة دوما للحق...الى استعلامات المول

طبعا عارفين الراجل الي قاعد في دايرة ده قدام استقبال

" مساء الخير يا بشمهندس"

" أهلا يا فندم"

طيب حضرتك هو ايه النداء الي بيتقال ده

ساب بقى الي وراه والي قدامه وركز قوي معانا

شوفي يا فندم....سيبك انت بقى من حكاية حقوق الإنسان والبيئة النظيفة والكلام ده كله

انا هجيب لحضرتك من الأخر...اصل إدارة المول اكتشفت ان المول فيه

ناس كتيرة قوي بتيجي وما بتشتريش منه ببصلة

معندهاش عربيات فما بتركنش وبتفضل قاعدة كده عند النافورة يشربوا سجاير وخلاص

فقرر المول بقى انه يمنع التدخين في المول ما عدا الكافيهات

ليه بقى حضرتك...عشان الناس الي بتيجي دي لما تلاق ان كل ما تحب تشرب سيجارة

هتطلع تقف بره...هتلاقي انها مضطرة تقعد في كافيه عشان تدخن

تقوم تنفع الكافيه وبيكده المول يروج لنفسه

حمدت ربنا ساعتها ان صاحبتي كانت موجوده لإنها لحقتني في اخر لحظة وانا بنط على الكاونتر امسك في زمارة رقبته

يعني حضرتك كل الي بتعملوه انكو تبتبزوا الناس اكتر

مش مكفيكم كل الفلوس الي داخلة للمول ليل نهار دي كمان عايزين تبتبزوا المواطن العادي

وبعدين ايه المنطق الأهبل ده...فيه في الدنيا منطق اهبل بالشكل ده

يعني هو مين ده ان شاء الله الي هيدب مشوار قد كده عشان يجي ستارز يقف وخلاص

وافرض فين بقى مصداقية المكان وسمعته

ازاي يبقى عندكوا ماركات عالمية مكلفاكوا ملايين عشان تجيبوها وفي الأخر تبهدلوا صورتنا بالشكل ده

يعني الأجانب يقولوا علينا ايه دلوقتي متخلفين

ينظر الى الرجل في تعالي قائلا...يا فندم فيه ناس كتير ةقوي

بتشكر في المول وفي اناقته وبتقول ان احنا فخورين ان مصر فيها حاجة زي كده

اردت ان القي عليه بصقة من العيار الثقيل لكن للاسف ريقي كان نشف من كتر الكلام ولم اجد

لعابا كافيا للبصق

لفيت وانا هموت من الغضب ومشيت

ومعرفتش برضه لما احب اشتكي اروح لمين

كان ميعاد السينما اوشك

فطلعت استنى مع صديقتي صديقة ثالثة مازالت في الجراج

كان الجدال قد انهكني فأردت ان اجلس قليلا على الأرض حتى تأتي مريم

لا داعي لذكر ان جميع الشباب امام دار السينما بيدخن لكن انا تعبت من محاربة طواحين الهوا

قلت يا بت خلي لسانك في بقك وكفاية كده اذا كنت بقالي ساعة بطلع من الأول للتالت للرابع للتاني للأول ومعرفتش اوصل

لحد مسؤول هعمل ايه اكتر من كده خلاص بقى...كل واحد يشيل مسؤوليته

فما ان جلست حتى فوجئت برجل امن قادما في سرعة البرق

يا فندم معلش انا اسف بس ممنوع الجلوس على الأرض

لم اتمالك نفسي من الضحك

وقلت بين دموعي ( الي غلبتني من كتر الضحك)

ليه ان شاء الله

قالي اصل لقينا فيه شباب بيجوا هنا يقعدوا وبيشتموا بألفاظ نابية فحفاظا على سمعة المكان

منعنا الجلوس على الأرض

قلت بين ضحكاتي...يعني حضرتك ما شفتش الألف وخمسميت واحد الي بيدخن وشفتني انا بس لما قعدت

قالي اصل حضرتك القعدة ممنوعة الارض لإن كان فيه شباب بتقعد على الأرض وبتقول الفاظ خارجه

ايوه يعني هو ده بس الي ممنوع ما التدخين ممنوع وكل الناس بتدخن وما شفتش حضرتك اتهزيت لحظة عشان تمنعهم

اصل حضرتك كان فيه شباب بيقعد.............

طبعا كنت زهقت من الكلام وزهقت من خلق الناس واتخنقت من ريحة السجاير الي خنقتني

وتعبت من كل حاجة وقلت لعل عادل امام يمتعني بقليل من الضحك

فوجئت ان عادل امام ختمها معايا ختام العقارب

فكما لم يرى احدا عيبا في السجاير التي تملأ المول

لم يرى عادل امام عيبا في ان رجلا في السبعين كرشه يمتد امامه مترين

وباروكته تفضحة و التجاعيد على وجهه تكاد تنطق بسنه الحقيقي عيبا في ان يتصرف كمراهق

او كشباب في ريعان شبابه تتهافت عليه النساء كي يحظين بنصيب في مهارته البارعة في الحب

ولم تدرك يسرى ان الفساتين العارية انما خلقت للنساء اللواتي يملكن شيئا جميلا يظهرنه

وليس لإظهار تجاعيد وترهلات

كل الي طلع عليا في اخر الفيلم المثل الشهير بتاع جدتي

دلع الكبارة يفقع المرارة

والمقولة الخالده لمحمد صبحي

انا جمعت المسؤولين وسألتهم....قالوا ان احنا كمسؤولين و في مراكز قياديه مش مسؤولين"

وثيقة التوقيع على تفكيك اسرائيل

2009-02-28T17:38:00.001+03:00

بمختصر القول كده

وعشان ما نرغيش كتير...يا ريت الكل يوقع على الوثيقة دي

مش مقتنعين بأهمية التوقيع...اتفضلوا زوروا نوارة واقروا كلامها

الست دي بتقول كلام زي الفل

واعتقد انه بعد ما تقروا كلامها هتنقتنعوا

بس عشان توفروا الوقت...وقعوا وخلاص

سلام مؤقت

عزازيل...وقهوة سادة

2009-02-23T22:48:00.002+03:00

بقالي فترة طوييييييييييييلة قوي ما قريتش كتاب يشدني

يمكن لإني بتعامل مع الكتب على انها بني ادمين...بتتفس وبتحس...بوحشها وبتوحشني

كان بقالي فترة طويلة مقريتش حاجة تعيد العلاقة المقطوعة بيني و بين الكتب

اخيرا صديق عزيز دلني على عزازيل..ليوسف زيدان...قالي بالنص وهمية

الكتاب غلافة ما يدلش على شئ..مجرد صورة بيضاء عليها رسم تشكيلي غير متضح

ومكتوب بالبنط العريض رواية!!!

منذ المقدمة تستشعر رقي الأسلوب

الكتاب يقع بين الواقع والخيال...الحقيقة لا اعرف ان كان الكاتب صادق في ادعائه انها مذكرات راهب مصري

عاش في القرن الرابع الميلادي في مدينة الإسكندرية ..... ام ان ما في الرواية محض خيال من المؤلف

اراد ان يكسبه طابعا انسانيا محببا عن طريق ادعاء واقعيته

فقط اعلم تماما ان كل ما جاء بها من احداث واقعي وحقيقي....تماما

من اول سطر في المقدمة يجد القارئ نفسه مشدودا بروعة ورقي الأسلوب

ذكرني بكتابات محفوظ....حيث لا عامية..وان وجدت...تبدو راقية ورائعة كالفصحى

تحكي الرواية عن راهب مصري تائه....عاصر عصر الوثنية المصري القديمة..حيث ترى في مصر ديانات المصريين القدماء والإغريق

والمسيحية في بداية انشقاقها وتغير مسارها

التاريخ في الرواية هو خلفية تتحرك بخفة وسرعة لا تشتت نظرك ولا تحيدك عن انسانية الرواية

هيبا الطبيب والراهب التائه في ضلالات الفكر...الباحث عن الحق اينما كان وحيثما كان

يبهرك بعدم تعصبة وشدة ادبة....وسهولة سقوطة في المعاصي

هيبا...هذا الراهب القادم من العصر الرابع الميلادي....يناقش الأفكار الدينية والمعتقدات بمنطق

يحاجج ويناقش بالمنطق...المنطق الذي ما عاد احدا يعلم عنه شئ او يستخدمه في عصر العلم القمئ هذا

لا يجد غضاضة ان يتبع كل ما يراه منطقي...غير انه (كديدن المصريين جميعا) جبانا..لا يستطيع ان يقف امام ما يظن او يتوهم

لا يملك الجرأة على الوقوف في وجه الحق الذي يراه...لكنه يتعذب به في كل لحظة

هيبا الذي اجد في كل مصر ظله...غير اني لا اجد فينا نقاءه

الرواية متعددة الأبعاد...قرأتها وقرأها نخبة من اصدقائي...ووجدت لكل منا رؤية مختلفة عنها

جميعها صحيح...ولكنها متباينة..أظنها ترجع لأن هيبا هذا الراهب الطبيب يملك من ثراء الشخصية ما يتسع ان يمثل كل المصريين

من لم يقرأ عزازيل فقد فاته الكثير!!!

****************************

أخيرا رحت الأوبرا..

والمرة دي رحتها في عرض مسرحي غاية في الجمال

قهوة سادة..اسكتشات صنعها مصريون هم الدليل الحي على خفة الظل المصرية الأصيلة

انتقاد بسيط وسلس ومباشر...وان كان جذاب عالي الحضور للواقع المصري المعاصر

عشرون شابا وفتاة...غاية في الإبداع والحضور....واخراج مسرحي عالي الجودة

قهوة سادة الدليل الحي على ان الموهبة لا تحتاج الى امكانات....فبدون ملابس او ديكورات استطاع هؤلاء الشباب ان

يصنعوا حالة من الجمال والجاذبية ستبقى نكهتها في وجدان الحضور طويلا...

عن التاريخ نحكي

2009-01-10T15:35:00.005+03:00

في حديث دار بيني وبين أحد الأصدقاء حول أزمة غزة

ذكرني بحادثة وقعت في تاريخ مصر في أيام العز بن عبد السلام

يروى أنه حين اشتد خطر المغول على العالم الإسلامي, وفتكوا بالعراق والشام ولم يبقى سوى مصر كبوابة للشمال الأفريقي وباقي العالم الإسلامي

أزمع قطز أن يعد العدة لمقاتلة هذه الوحوش الكاسرة التي لا تعرف الرحمة والتي احالت انهار العراق الى دماء وأحبار

فوجد ان التمويل أولي العقبات امامه. وقرر ان يجمع الضرائب من الشعب كي يجهز بها الجيش

لكن كيف بإمكانه ان يقنع المصريين البسطاء أن يدفعوا من أموالهم

فذهب الى الإمام العز بن عبد السلام, كي يستأذنه ان يفتيه في أن يفرض ضرائب على الشعب كي يجهز بها جيش المسلمين

فقال العز, أفتيك بشرط, ان تخرج انت أولا كل اموالك واموال مماليكك وامرائك في سبيل الله, فإن لم تكف لتجهيز الجيش

افتيك بفرض ضرائب على عامة المسلمين!!!!

فقال قطز, كلمة....لو عقلها الحكام...لما كنا في هذا الهوان

قال قطز, وما قيمة الأموال إن ضاعت الديار!!!! هذه أموالي جميعا أضعها في سبيل الله

ثم جمع مماليكه وخطب فيهم خطبة عصماء مفادها ان الخطر القادم لن يقف امامه اموال ولا قصور

فلما انتهى من جمع المال رجع الى العز وقال له مازال ينقصنا الكثير

فشمر العز عن ساعديه وجاب انحاء المحروسة كلها

يخطب في الجماهير, ويحثهم على الإنفاق في سبيل الله بأموالهم وانفسهم

و يحثهم على الدعاء بالنصر والقنوط

يحكى ان المصريين في ذلك العصر كانوا يلتقون بعضهم بعضا كل صباح

فلا يتسائلون عن المال والعيال بل يسأل كل منهم أخاه كم ركعة صليت بالأمس

قنوطا لله وطلبا للنصر

كان المصريين يتصورون المغول وحوشا كاسرة...اسودا لا قبل لهم بها...

فقد فتكوا بالدولة العباسية عن بكرة ابيها

كسروا العظام, وسفكوا الدماء, وهتكوا الأعراض وبقروا البطون

فعلوا ما لم يفعلة محتل من قبله..

علم المصريين ان لاسبيل للنجاة سوى بالصلاة والدعاء والعمل المستمر

وكانت السلطة والشعب على قدم وساق

نحو هدف واحد...سنحارب هذا العدو

قد نهزم..فنموت على أرجلنا شهداء في الجنة مدافعين عن ديننا ودنيانا

او ننتصر فنرحم العالم الإسلامي من هذا الخطر الدامي

كانت الجنة متمثلة في احلام المصريين جميعا في ذاك الوقت

فقط كانوا يأملون ان قتلوا ان يقتلوا سريعا دون الم كثير

فكانت النتيجة ان انتصر المصريين انتصارا ساحقا...وكسرت شوكة التتار

وأنقذ العالم الإسلامي...

إن للعز بن عبد السلام في تاريخ الإسلام مواقف غاية في الشجاعة والقوة

لكن قوته كانت تستمد من إحترام الحكام لهم...واحترام الحكام

مستمد من احترام الشعب لعلمائه

واحترام الشعب نابع من إيمانهم ان هؤلاء العلماء ليسوا طلاب دنيا

وإنما طلاب اخرة..لا يبغون الا وجه الله

يا ترى...من يصلح اليوم كي يكون عزا بن عبد السلام...

وهل يدرك الحكام ان التاريخ سيظل يذكر قطز بمنتهى الفخر والإحترام رغم كونه مملوكا وعبدا

وسيذكرهم بكل ذل وعار رغم انهم لم يستعبدوا يوما...

و ياترى هل يعلم العرب والمسلمون اسباب النصر

ان للنصر اسبابا واضحا..لا بد ان يعلمها ويعمل بها الناس

لو فقط نقرأ تاريخنا...لإنتهت إسرائيل منذ خمسون عاما

فقط لو نقرأ

عن اخبار مرعي

2008-05-28T00:37:00.003+03:00

محمد مرعي

الطالب بتاع كلية الطب البيطري الي كان بيعمل تطوعا مترجما لجيمس بك

الصحفي الأمريكي في تغطية احداث المحلة

محمد كان مسجون في سجن برج العرب في إسكندرية

مع المتهمين جنائي, و ماحدش كان عارف عنه حاجة

لحد ما بالصدفة مركز هشام مبارك عرف بوجودة

الأستاذ خالد علي من مركز هشام مبارك الحقوقي

بلغني امبارح ان محمد عمل إضراب عن الطعام عشان ينقل من عنبر الجنائي

ويتحول لعنبر السياسي

و ان اخيرا تمت الإستجابة لإضرابه ونقلوه سياسي

ودي في حد ذاتها حسب كلاام الأستاذ خالد خطوة إيجابية لإن معاملة السياسي افضل من الجنائي

حاجة غريبة قوي....لما إسراء اتسجنت وخرجت من المعتقل

كانت عمالة تشكر المسؤولين على انها بنت واتصانت

يعني بتشكرهم ان الحمد لله محدش اتعرض لشرفها ولا حاول يعتدي عليها او يغتصبها

كانت بتصلي كل يوم شكر لله انها خرجت بنت من السجن

و دلوقتي احنا بنحمد ربنا ان محمد مرعي خرج من الجنائي للسياسي عشان المعاملة افضل

الحمد والشكر لله في السراء والضراء

بس يعني لما نوصل للمرحلة دي من الذل

نوصل اننا نقبل الذل وراضيين بيه, و بنحمد ربنا ونشكر فضلة انه لحد كده بس

اه يا بلد مالهاش عزيز ولا غالي

قد كده بقينا ضعفا وهانت علينا روحنا

معلش لك الله يا محمد يا مرعي

ولك الله يا مصر.....

محمد مرعي مازال في سجن برج العرب

الي حابب يزورة من اجل الدعم النفسي والمعنوي يقولي

و بحاول حاليا اجيب تليفون اهله عشان نحاول نتواصل معاهم نفسيا و معنويا

جايز نوفيهم حقهم

هشوفكو يوم الخميس الجاي ان شاء الله

2008-05-18T23:53:00.004+03:00

تحديث: اولا فيما يتعلق بمحمد مرعي

احنا عرفنا هو في الفرقة الكام وجبنا جدول محاضراته

محمد من سكان ميت حبيب بسمنود

للأسف معرفناش نجيب عنوانة من شؤون الطلاب

شؤون الطلاب قالوا لرانيا زميلتنا في ابناء مصر وهي من سكان المنصورة

ان السجن بعت يخطر الجامعة بإن الطالب مسجون وهيتعمله لجنة خاصة

وهشام مبارك قالوا انهم عرفوا بوجودوا في السجن بالصدفة

وان السجن رفض يوديه الإمتحان يوم السبت

معرفش بقى معنى الكلام انهم رفضوا يعملوله لجنة خاصة ولا ايه بالظبط

على كل انا بتابع مع هشام مبارك وان كنت الحقيقة مش عارفة ايه الي ممكن اعملة

""""""""""""""""""""""""""""""

يوم الخميس القادم الموافق 22 من مايو 2008

هيكون حفل توقيع كتاب مدونات مصرية للجيب

اول خطوة في طريق سعة انتشار الصحافة الشعبية

و جعل كتابات المواطنين مباشرة في إيد القراء

منغير ما يتحكم فيها رئيس تحرير له توجه او كاتب مهم يختار

او بعد سياسي او ديني, كتابات من الشارع وللشارع

كتابات ناس ما اهتمتش مين الي هيقرالها بقدر ما اهتمت تخرج الي جواها

واتاري جواها كنوز, كنوز قدرت في مدة قصيرة تهز عرش وحوش لابدة

و تصحي شعب كنا فاكرينه مات, اتاري لسة فيه دم بينبض

و لإن البركة في الشباب على رأي إعلانات روتانا

فإن اتنين من شعراء المدونين الي في نظري الشخصي من اكثر الشعراء ابداعا

تحولوا من المتفرجين لعالم التدوين الى صناع الحدث

اخذوا زمام المبادرة و حطوا اول طوبة في طريق نشر ثقافة التدوين

استثمروا فكرة روايات مصرية للجيب والي موجهة في الأساس للشباب

و صنعت بحجم صغير كي يسهل حملها و نشروا على غرارها مدونات مصرية للجيب

أحمد مهني (واحب ان اناديه حزين) واحمد البوهي (صاحب مدونة انكسارات)

استثمروا ايام وشهور في نشر الفكرة بين المدونين بشكل شفهي

ثم الإطلاع والتصفح لمئات المدونات سواء الشخصية او السياسة او الفنية والأدبية

و استقروا في النهاية على تقسيم الكتيب الى ثلاث اجزاء

جزء سياسي وجزء فني وجزء شخصي

الفكرة مازالت وليدة, لكنه مولود غاية في الرقة والعذوبة والنقاء

مولود ان لم يحمل صفات الجمال الإبداعية الرسمية من عيون زرقاء وانف مستقيم

ولون مرمري, فهو بالتأكيد يحمل صفات الجدعنة الخالصة بتاعة ولاد البلد

يحمل خفة الدم المصرية وهي بتتريق على نفسها و تضحك لحد ما تدمع

يحمل البعد السياسي الي مش فارق معاه نفاق لإنه مش باقى على حاجة

يحمل التجرد الذاتي لناس بتستعرض حياتها الشخصية على الملأ لكن في السر

بعيدا عن الأقارب والأهل والأصحاب الي لو عرفوا خبايانا يجرحونا

و استبدلوا بيهم عالم افتراضي من القراء مش هيتكسفوا يشرحوا نفسهم قدامهم

الكتاب عبارة عن مشروع طفل عبقري وغاية في الشقاوة وخفة الدم

قادر على جذب مئات الشباب الى شاشات الكمبيوتر او الى المكتبات لمعرفة كلام الشارع

يوم 22 مايو هو يوم هام جدا وخاص جدا لكل مدون

فلو لم يجد انتاجه في هذا الكتاب (الكتيب) فهو على الأقل مشارك

في هذا الحدث لإنه لو لم يدون لما وجد من الأصل مدونات مصرية للجيب

انا شخصيا مليش بوست او تدوينة في هذا العدد

لكن اشعر بشدة ان هذا الكتيب هو جزء مني

يكفي انه يحوي بين طياته الكثير من العالم الذي بهرني

وأمتعني

يا ريت اشوفكو كلكو هناك

الحقوا محمد يا مدونين

2008-05-11T22:11:00.003+03:00

محمد صالح مرعي

طالب عمرة 23 سنة في كلية طب بيطري جامعة المنصورة

دي كل المعلومات الي اعرفها عنه

محمد كان ملازم للصحفي الأمريكي جيمس بك الي كان نازل مصر عشان يدرس مدى تأثير الإنترنت على الحراك السياسي في مصر

ممثلا في دور المدونين ونشطاء الإنترنت

جيمس اتعرف على محمد بشكل او بأخر والأخير تطوع انه يكون المترجم الشخصي لجيمس يلف معاه

شوارع مصر وحواريها و قهاويها يحاول يختصرله تاريخ 7000 سنة في مدة قصيرة

و بكلمات اقرب لعقلية الأمريكي المتحمس

جيمس عن طريق محمد تابع الدعوة لإضراب 6 إبريل

ونزل معاه المحلة الكبرى عشان يحضر المظاهرات والوقفات الي دعوا العمال ليها

و فوجئ بالإنفلات الأمني والهيجان الي حصل

و كان شاهد حقيقي و صادق على العنف الأمني المستعمل

اتقبض عليه هو ومحمد من وسط شوارع المحلة

في محاولة من جيمس للحفاظ على حياة رفيقه و مترجمة تمسك بيه ورفض تركه

جيمس حسب روايته شبك ايده في دراع محمد عشان ما يعرفوش يفصلوهم

و بحيلة استطاع العساكر فصلهم لثواني كانت كافية انهم يخدوا محمد على زنزانة تانية

و عرضوا على جيمس العرض الأخير...عايز تخرج اتفضل بس مالكش دعوة بمحمد

في البداية رفض وبعدين ادرك ان العند مالوش معنى

فخرج...و في خلال 24 ساعة كان مسافر على بلده مصرا على دعم المتظاهرين بكل ما يملك من قوى

اما محمد فظل مصيره مجهول لحد ما مركز هشام مبارك بالصدفة وجده ضمن المعتقلين في سجن برج العرب

محمد صالح مرعي

ما نعرفش حاليا هو في الفرقة الكام

السجن رفض خروجه

فيه 24 معتقل تاني مش عارفين ان كانوا طلبة ولا لأ

لا السجن راضي يقول هما مين ولا حد عارف يجيب عنهم حاجة

فين بقى اتحادات الطلاب الي المفروض تسأل عن طلبتها

فين الطلبة الي غايبين وزمايلهم يبلغوا عنهم

لو فيه حد من كلية طب بيطري جامعة المنصورة يبعتلي على الميل

و نحاول نوصل لأهله

أعتقد ان محمد صالح مرعي هو اجدر الناس بالإهتمام في الوقت الحالي

ربنا يرجعه لأهله بالسلامة

اخبار وتحديثات

2008-04-16T21:06:00.002+03:00

انا لسة دلوقتي مكلمة المحامية الخاصة بإسراء

و سألتها عن خبر إختفاء إسراء و نادية مبروك وهل هو صحيح ام لأ

و طمنتني ان ده إجراء مؤقت ومعروف لإن البوليس

ما بيفرجش عن الناس بالساهل

هو دخول الحمام زي خروجه....لازم تلف كعب داير شوية ما بين امن الدولة

للداخلية الخ الخ

المهم انا في إنتظار اني اسمع اي خبر عنها و هطمنكو ان شاء الله

**************************

امبارح وانا بسمع خبر الأحكام على الإخوان دعوت الله من كل قلبي

أن لا يكون الدكتور محمود ابو زيد من ضمن المحكوم عليهم

وذلك لإحساس بعيد لدي بأن هذا الرجل قريب لي..رغم اني ابدا لم اميز شكله يوم ان حضرت جلسة المحكمة العسكرية

الوحيدة...لكن لهذا الرجل زوجة عظيمة كنت قد افردت لها(هنا) مساحة على مدونتي

كي انقل ما رأيته منها من صبر و ثبات و تفهم واعي تماما لدورها في هذه الدنيا

السيدة شاهيناز بشكل او بأخر اصبحت تهمني بصفة شخصية

ولكم وددت لو استطعت ان ادون رقمها في هذا اليوم حتى ازورها وانقل اليها تعازي الحارة

فمهما اختلفنا مع الإخوان لا يمكن ان نقبل ان يحاكموا مثل هذه المحاكمات المهينة

الى السيدة العظيمة شاهيناز...عزائي الخالص لك على ما اصابك من مصاب

و تقبل الله منك ومن كل من اوذي بغير حق

يا ولاد بهية

2008-04-12T15:36:00.003+03:00

يا مدونين

يا ولاد بهية

اظن الوقت جه ان كل واحد بقى يقول لنفسة

العمر واحد والرب واحد...والي هيبيع مصر النهاردة يبقى عيل وابن عيل

الصورة المعروضة دي....صورة إسراء..

إسراء بنوته في العشرينات من عمرها, وعضوة بحزب الغد

كانت صاحبة فكرة عمل جروب على الفيس بوك اسمة إضراب ستة إبريل

و الحقيقة ان كل من سمع عن الإضراب من غير السياسيين سمع عنه عن طريق إسراء

يعن البنت الي بميت راجل دي هي الي وصلت الرسالة لشعب مصر الي نايم على ودانه

واخره ينزل صورة في مارينا بشورت وجنبة كام مايوه بكيني

انا شخصيا قابلت كام بنت وولد من الجامعة الأمريكية يعرفوا عن الإضراب من خلال إسراء

إسراء استطاعت انها تشجع ميت الف واحد انه يشارك في الإضراب

دلوقتي إسراء مرمية في سجن القناطر بتاع النساء..

مش بايته في سريرها...,ما بتغسلش سنانها بالليل و بتنام في عنبر مليان قمل و براغيث

الأمن لو ما كانش مرعوب لدرجة انه يعملها على روحة ما كانش حط واحدة زي إسراء في السجن

إسراء مش محتاجة اكل ولا شرب ولا هدوم.....لكن محتاجة دعم نفسي و دعم معنوي

اهلها كمان محتاجين دعم نفسي ودعم معنوي .....

انا اتصلت بالمحامية الخاصة بيها وابلغتني ان اهلها زاروها النهاردة

و هعرف منها ازاي ممكن نقدم الدعم المطلوب لأهلها

كمان عايزين كلنا نتكاتف ونتبرع للجنة الإعاشة بمركز هشام مبارك

لإنه هو المسؤول عن حماية و متابعة المعتقلين في قضايا الرأي

يا مصريين يا مدونيين...دقت ساعة العمل...وراح زمن النوم

يوم ستة إبريل

2008-04-06T22:17:00.004+03:00

ومر يوم الإضراب بنجاح وسلام

شوارع القاهرة كانت فاضية زي ما نكون يوم الجمعة

رمسيس والتحرير كانوا حرير

مش هبالغ واقول ان ماكانش فيه ولا عربية في الشارع

طبعا كان فيه عربيات..اقلهم عربيتي..

لكن ما حدش يقولي انه ممكن يقطع المسافة من ميدان لبنان لحد التحرير مرورا بجامعة الدول في

فترة زمنية لا تتعدى الخمستاشر دقيقة الساعة واحدة الظهر

ده الي حصل معايا والي بناءا عليه بقول ان الشوارع كانت فاضية والدنيا كانت هادية

لم يكن هناك مظاهرات في ميدان التحرير نفسة..اللهمم الا تجمعات بسيطة امام هارديز

فضتها بسهولة و بكفاءة صراحة قوات الأمن المركزي

انا شخصيا ما شفتش تطاول من الشرطة..وده احقاقا للحق

انا ركنت قريب من نقابة الصحفيين

و نزلت مع بنوته من أبناء مصر ووقفنا امام نقابة المحاميين وصورنا تحت نن عين الظباط

ولا حد قالنا حاجة..بالعكس..العساكر كانوا هما الي بيتفرجوا علينا مش احنا الي بنتفرج عليهم

مريم بنت عمران بتحلف انها شافت سواق تاكسي واقف جنب عسكري امن مركزي

وعمال يقوله " يا حمار الي بيهتفوا دول بيهتفوا عشانك مش ضدك

عشان رغيف العيش الي مش لاقينه وكيلوا الزيت الي بقى بعشرة جنيه"

الناس حولين النقابة كانوا بيقدموا رجل ويؤخروا عشرة

عدم اعتداء الأمن عليهم بالضرب الى حد ما مطمنهم انهم يفضلوا واقفين

لكن قلبهم مش مطاوعهم يدخلوا النقابة

كمان كان فيه على سطح النقابة ناس ياما

يجمي خمسين او ستين واحد فيهم ستات كتيير قوي

والمشهد الغريب انهم كانوا على كل لون با بطستا

واحدة منتقبة لابسة اسود كانت عمالة تشوح بإيديها بمنتهى القوة من فوق سطوح النقابة

عرفت وقتها انها بتهتف لإنها منتقبة فبقها مش باين

ما عدا شوية الناس الي عند النقابة دول ما كانش فيه حد في البلد

المحلات كانت هادئة تماما..بس أعتقد ان ده نهارا لكن بالليل الوضع هيتغير

ولا الغبار بقى...يا ساتر

كان لعنة النهاردة..الجو فجأة قلب قلبة سودا

بس ساعدت على ان الناس تفضل في بيوتها

التجربة كانت جيدة...او بدائية لكن ناجحة

حققت الغرض المطلوب منها في وقته

عقبال التجربة التالية..لكن بيتهيألي ان الشعب لسة شوية عليه

الرك دلوقتي على موظفين الحكومة...هما الي في ايدهم التغيير

لإنهم اكتر ناس مضرووين..القطاع الخاص الى حد ما مش حاسس بنفس القدر من الإستغلال

لذلك كان اقل انضماما...

لعل بكرة افضل من النهاردة

عموما يوم ستة ابريل خلص

و كل إضراب وانتو طيبين

6 إبريل يا قاتل يا مقتول

2008-03-30T22:36:00.004+03:00

بصوا بقى على رأي رائدة الفكاهة والمجدعة المصرية نوارة نجم

هالله هالله على الجد والجد هالله هالله عليه

احنا بالصلاةُ على النبي كده محشورين في رقبة قزازة

مليانة قطران و زقت وبلا ازرق...

دماغنا محشورة في رقبتها ومش عارفن نطلع نتنفس هوا نضيف

الحكومة دي خلااااااااااااااااص جابت اخرها

مش كفاية انها فاشلة..وان فشلها مش بس بان ده خرب بيوتنا

لا كمان بجحة..والبجاحة والبكاسة دي بقت ظل يمشي جنبها على الأرض

البجحا هاريينا اعلانات على الدش...الدش يا عالم عن الضرايب..كإننا مش هنعرف نهرب من قرفهم

عايزين حتى سواق التاكس والحلاق يدفع ضرايب

والي عنده شقة عايش فيها مع الفاميليا ابوه جابهاله ايام العز

يقاسم الحكومة فيها ويعتبر روحة مأجرها منها (رغم انها تمليك)

يعني ناقص يشاركونا في الهوا الي بنتنفسة

طيب وان حد فتح بقة يقولك ايه ما العالم كله على كده

ده اموريكا ..اموريكا يا عالم..بيدفعوا ضرايب 40%

واحنا يادوبك بنقولكوا عشرين في المية بس

طب يا سيدي خليك ورا الكداب

عمال تقولي هات هات هات..خدت انا بقى منكو ايه

خدنا الصلاة على النبي ومفيش احسن منها في الدنيا

طيب طالما انتو معتبرين امريكا دي هي القران الي نزل من عند ربنا

نمشي بقى وراها...ادونا خدمات زي امريكا

بلاش..وفرلي اكل زي امريكا

امريكا بتعفي المواد والسلع الغذائية لحياة الإنسان اليومية من الضرايب

يعني مفيش ضرايب على الزيت ولا اللبن ولا السكر ولا اللحمة ولا الفراخ

ولا الرز ولا العيش ولا اي اكل يومي وضروري للنمو

يعني ارخص حاجة فيها الأكل

احنا بقى رغيف العيش الي يتاكل بقى بخمسين قرش

وقزازة الزيت بقت ب12 جنيه

ملح كوكس ملح الطعام الي بنحطة على السفرا

مستورد من النمسا...مصر الي عندها بحرين بطول البلد وعرضها

بتستورد ملح...ملح يا ناس من النمسا

النمسا الي هي بلد معندهاش بحر اصلااااااااا

تخيلوا...بلد داخلية مفيهاش ريحة المية المالحة...تصدر لينا ملح

واحنا الي عندنا بحرين نستورد ملح من النمسا

طب اقول ايه بس حسبي الله ونعم الوكيل

بلاش...القمح الي النهاردة مش لاقيين منه نتفة

و هننزل الجيش عشان يحافظ على الأمن الغذائي

من كام سنة قالك احنا مش محتاجين نزرع قمح

يا جماعة القمح غالي..وتكلفته عالية..ومالوش لازمة

وامريكا بتعملة ارخص بكتير

احنا نزرع كنتلوب متسرطن..ونستورد القمح

الفواكه الي قرفونا بيها بتاخد مية بدينها..رغم ان القمح ما بيحتجش مية كتير

الحكومة الرشيدة بقى...بتشتري من الفلاحين اردب القمح بتلتميت جنيه

مع ان تكلفة استيراد القمح من امريكا بتقف بحوالي 100 دولار للشحن فقط

غير تمن الإردب نفسة

يعني جع بمصاريف نقل اردب القمح تساوي ضعف تمن زراعته في مصر

والحكومة تستخسر في الفلاح المصري انه يبيعه بسعر عدل

وتشتريه منه بالبخس..وترجع بعد كده تشتريه بالغلا والكوا من بره

لو قعدنا نتكلم عن اداء الحكومة

شرايين مخي هتضرب...بجد شرايين مخي هتضرب

اصل الواحد يستحمل فساد اه...لكن فساد وغباء ده بقى كتير قوي

اللذيذ بقى اني كل ما اكلم حد عن الإضراب يقولي يا شيخة ولا حد هييجي

هتلاقي في الأخر نفسك لوحدك

انا بقى هضرب ولو كنت اخر حد في مصر

الي مش هيقف النهاردة لنفسة يبقى يستاهل حسني مبارك يديلة على نافوخ الي جابوه

احنا عاملين زي اليهودي الي فضل يدعي ربنا انه يكسب اللوتريه منغير ما يشتري التذكرة

ربنا قال لا يغير الله ما بقوم حتى يغيروا ما بأنفسهم

العمر واحد والرب واحد..واحرص على الموت توهب لك الحياة

الكلام اللطيف ده بقى جه وقت استخدامة وتطبيقة

ونطلع برة كتاب المطالعة ده بقى

أشوفكوا ان شاء الله يوم ستة ابريل

عجبت لمن لا يجد قوت يومه ثم لا يخرج بين الناس شاهرا سيفه"ه"

كلمة لأبي ذر الغفاري

هوامش

2008-02-19T23:20:00.004+03:00

تحديث: هغيب اسبوع لسفر طارئ

راجعالكم في اسرع وقت ان شاء الله

و لما ارجع هرد على التعليقات

أشوف وشكم بخير

************

ماذا حدث للمصريين

كتاب اكثر من رائع لكاتب و فيلسوف و محلل غاية في الإبداع هو جلال أمين

ملحمة لغوية وادبية و فلسفية لا نملك الا ان نتوقف امامها فاغري الفاه اندهاشا واعجابا

********

فيدل كاسترو تنحى عن السلطة كي ينصب اخاه بدلا منه

(هو كاسترو مالوش ولاد رجالة ولا ايه!!!)

كاسترو البالغ من العمر 85 سنة, و ظل يحارب منذ 53 دفاعا عن الدستور!!!

عمل مع جيفارا ثورة لطيفة تحت مسمى حركة 26 يوليو

(مش عارفة ليه الشهر ده ما بيريحنيش)

بعد ما بلغ من العمر ارذلة تنحي عن السلطة كي ينصب اخاه

البالغ من العمر اكثر من 75 سنة

هل حقا العرب فقط هم من لا يتعلمون؟؟؟؟

**********

شاب وجد جثة في صندوق القمامة فأبلغ عنه

ليتحول الى قاتلة ثم يمكث في السجن ثمان سنين

ليدخل القتيل الذي سُُجن لقتله نفس الزنزانة زميلا له

يا ترى ده فيلم هندي ولا انا الي بهييس؟؟؟

********

أعضاء مجلس الشعب يتبادلون الضرب تحت قبة البرلمان!!!

********

75% من الإستجوابات المقدمة من أعضاء مجلس الشعب لا تناقش

تحت قبة البرلمان بالمرة, والإستجوابات تتم اختيارها للنقاش انتقائيا!!!

********

سعر زجاجة الزيت بلغ 9 جنيه و نصف, كما سيتم الغاء العيش المدعم من فئة الخمسة قروش

ابتداء من يوليو القادم.

سعر البنزين سيرتفع مرة اخرى ابتداءا من شهر يونيو القادم

طبق الكشري اصبح بخمسة جنيهات

سندوتش الفول بلغ سعره خمسة و سبعون قرشا

*******

ثمن طن الحديد ارتفع من 1200 جنيه الى 4400 جنيه و يتوقع ان يصل الى 5000 في نهاية العام

********

أحمد عز عضو مجلس الشعب هو محتكر الحديد الأول

في مصر , و هو أيضا عضو الحزب الوطني الذي يمثل الحكومة

والتي تقوم بإستهلاك 80 في المئة من إجمالي انتاج الحديد في مصر

يا ترى فيه حد غيري في الحكومة الرشيدة ملاحظ ان الشعب له عنين!!!

********

يا ترى الحرافيش لما يثوروا ستكون ثورتهم ضد من ظلمهم حقا

ام ضدنا نحن؟؟؟

{و ما كان ربك بمهلك القرى بظلم وأهلها مصلحون}

صدق الله العظيم

انهم أناس يتطهرون

2007-12-24T19:43:00.000+03:00

تصّر الحكومة أن تطير البرج الباقي في يافوخي

بغباء وإصرار أحمق تصر الحكومة على لا منطقة الوقائع و تقنعك بسماجة لزجة ان هذا هو المنطق السليم

و ما انت الا احمق و متخلف و غير مدرك لطبائع الأمور لهذا لا تدرك الحق حين تراه

تماما كما كان قوم لوط يقولون لشعبهم أخرجوا ال لوط من قريتكم انهم أناس يتطهرون

اصبحت الطهارة عيب و نقيصة تؤدي الى طرد صاحبها, في حين النجاسة هي القاعدة السليمة

كلما فتحت وسيلة اعلامية تمولها الحكومة النظيفة تنهال على أم رأسي دفقات من الكلام الفارغ

أفتح التلفاز فأجد إعلانا غريبا عن شاب جالس في قهوة يلعب الطاولة و يحدثة صوت مستفز جدا كأنه يربيه

" إنت يا بني قاعد بتعمل ايه

الشاب يا ولداه يقول ردا منطقيا جدا, انا مؤهل عالي و مش لاقي شغل

يرد الصوت يا أخي ما تقوم تشتغل اي حاجة مش احسن من قعدتك على القهوة

فيرد الشاب بقولك مؤهل عالييييييييييي انت عايزني اشتغل عامل في مصنع

يرد الصوت بأريحية و تحدى تثير الجنون, و ماله العامل في المصنع

مش احسن ما انت عاطل و بتاخد مصروفك من ابوك

فينظر الشاب بحسرة و يقول بس مين هيجوز بنته لعامل في مصنع

فيرد صاحب المنطق الفتاك, ومين هيجوز بنته لعاطل

و يصبح هذا هو حل الحكومة النظيفة المعزة لشعبها

بعد ان تصاعد الدم الى رأسي وخفت على عيني من الإحتقان

قررت غير مأسوف عليه ان اغلق هذا الجهاز الغبي

و قلت ليس أفضل من الراديو فهو أصل التميز الإعلامي المصري

فتحت الراديو يا سادة يا كرام على إذاعتي المفضلة

الشرق الأوسط, وبما أني شرق أوسطية قديمة

فإنتفخت اوداجي و إشرأبت اوصالي و نظرت للتلفاز بتعالي قائلة

حكومة نظيف لن تلوث هذه المحطة الرائدة

و كان بالراديو برنامج عن الهجرة

وكان الضيف شخصا من الحزن الوطني لا اعرفه

و بدأ هذا الفذ يتحدث الينا عن اسباب الهجرة فقال البطالة و سؤ الدخول

و إرتفاع الأسعار ثم قال الحل اللوذعي

من أسباب الهجرة الغيرة وان الشباب الحاصل على مؤهل عالي

يرفض ان يعمل في مهن بأقل من شهاداتهم

كعمال او سائقي ميكروباصات او فنيين وخلافة

فقالت المذيعة لكن يا أستاذ فلان دول معاهم شهادات عليا

فيرد العبقري سيد شباب بنها

بأن الشهادة دي شكل إجتماعي عشان يتجوز بيها

هما مش أهلة فرحوا بيه وهيصوا و زغرطوا وقالو خلاص ابنهم معاه شهادة كذا

خلاص بقى الشغل حاجة تانية

و انتهى رد هذا الفرد اللوذعي لإني إنتابتني وقتها حالة من الضحك الهستيري

أعقبه دخول الست الوالده بالبسملة والحوقلة

بعد أن رأتني في حالة الهبل السالفة الذكر

طيب حد يفهمني...هل الشهادة من مطلبات الزواج

هل مثلا لا يصح عقد الزواج الا بشهادة جامعية!!!

و هل تأخذ الحكومة من جيوبنا مئات الألوف لكي تعلمنا تعليما عاليا

عشان نتجوززززززززز!!!!!!!!1

طب ما كانوا وفروا الفلوس دي و بقينا كلنا من حملة الدبلومات و هنضطر برضة نتجوز من بعض

ولما هما عايزين عمال, بيدخلونا كليات اداب و حقوق وطب و تجارة ليه

ولا الحكومة عايزة سواقين ميكروباص بيقرأوا مسرحيات موليير و متطلعين على فلسفلة فولتير

او يمكن يكونوا دكاترة عشان الراكب من دول ياخد بحق الأجرة إستشارة طبية على الماشي

ويبقى كل ميكروباص مكتوب عليه بقى تخصص السواق

إمبابة-حقوق, او رمسيس طب و هكذا

يعني بيخرجوا سنويا مليون خريج جامعي, عشان يشغلوهم فنيين و حرفيين

طب ما كانوا خرجوا عشرة الاف خريج بس سنويا

والباقي يتوزعوا على التعليم المهني والحرفي

وفلوس ده تغطي ده

ولا هو ودنك منين يا جحا

يعني هو الحرفي ولا الفني مش هيتجوز

و ايه دخل الجواز أصلا بالموضوع

ما هو لو دكتور وبيشتغل بدل الطب فران

برضة محدش هيجوزه بنته

الحكومة اللوذعية حولت قضية البطالة و سوء إستخدام الكفاءات الى انها

ازمة طبقية في المجتمع المصري, إحنا الي متكبرين و متعالين ومش عايزين

نرضى بقليلنا, وعشان كده الحكومة مضطرة تجارينا عشان نتجوز

فيه واحد من الموظفين في الضرائب العقارية

قالي و هو بيغلي من الغضب

الحكومة الي بتحل مشاكلها بالتوك توك

مش هتنفع تحللنا مشكلتنا

الراجل ده.....عبقريييييي

كل عام وانتم بخير

2007-12-18T01:49:00.000+03:00

بقالي كتيييييييير ما كتبتش في المدونة

اخدني شغل الأرض والعمل مع الفريق الرائع في أبناء مصر

الإحتقان الحاد الي كان جوايا والي كان بيتفرغ بضربات وخبطات سريعة وقوية على لوحة المفاتيح

والتي نفست من خلالها عن الغليان بداخلي في بوستات عديدة وملخبطة قل بشدة

قل واختفى..و بقى مكانة طاق بناءة شرهة للعمل الميداني

للإحتكاك بالناس ولمس معاناتهم

لتوحيد طاقة الغضب من اوضاع البلاد المتردية مع طاقتهم و خلق موجات خلاقة

السعادة الغامرة التي انتابتني بعد ما رأيت بعيني موظفي مصر يغيرون وجه مصر

بجرأة و انتظام وأناقة لا مثيل لها

اخذتني الحياة الميدانية, وانشغلت بسعادتي الجديدة عن الكتابة او التدوين

و حمدت الله اني لا امتهن الكتابة وإلا كان زماني على الرصيف من زماان

لكن المعايدات الرقيقة قوي الي جاتلي من الأحباء في التدوينة السابقة

ذكرتني ان لي احبة التقيت بهم على هذه المدونة

لم اعرفهم من قبل الا من خلال هذا العالم السحري الأخاذ

أحبة اشتقت اليهم, و افتقدتهم وليس لي منفذ اليهم سوى هذه المدونة

لهؤلاء أقول كل عام وانتم بخير

كل سنة وانتم بخير و سعادة وهناء و عطاء

كل سنة ونحن اصدقاء عبر الأثير

اصدقاء الى الأبد ان شاء الله