انهم أناس يتطهرون

تصّر الحكومة أن تطير البرج الباقي في يافوخي

بغباء وإصرار أحمق تصر الحكومة على لا منطقة الوقائع و تقنعك بسماجة لزجة ان هذا هو المنطق السليم

و ما انت الا احمق و متخلف و غير مدرك لطبائع الأمور لهذا لا تدرك الحق حين تراه

تماما كما كان قوم لوط يقولون لشعبهم أخرجوا ال لوط من قريتكم انهم أناس يتطهرون

اصبحت الطهارة عيب و نقيصة تؤدي الى طرد صاحبها, في حين النجاسة هي القاعدة السليمة

كلما فتحت وسيلة اعلامية تمولها الحكومة النظيفة تنهال على أم رأسي دفقات من الكلام الفارغ

أفتح التلفاز فأجد إعلانا غريبا عن شاب جالس في قهوة يلعب الطاولة و يحدثة صوت مستفز جدا كأنه يربيه

" إنت يا بني قاعد بتعمل ايه

الشاب يا ولداه يقول ردا منطقيا جدا, انا مؤهل عالي و مش لاقي شغل

يرد الصوت يا أخي ما تقوم تشتغل اي حاجة مش احسن من قعدتك على القهوة

فيرد الشاب بقولك مؤهل عالييييييييييي انت عايزني اشتغل عامل في مصنع

يرد الصوت بأريحية و تحدى تثير الجنون, و ماله العامل في المصنع

مش احسن ما انت عاطل و بتاخد مصروفك من ابوك

فينظر الشاب بحسرة و يقول بس مين هيجوز بنته لعامل في مصنع

فيرد صاحب المنطق الفتاك, ومين هيجوز بنته لعاطل

و يصبح هذا هو حل الحكومة النظيفة المعزة لشعبها

بعد ان تصاعد الدم الى رأسي وخفت على عيني من الإحتقان

قررت غير مأسوف عليه ان اغلق هذا الجهاز الغبي

و قلت ليس أفضل من الراديو فهو أصل التميز الإعلامي المصري

فتحت الراديو يا سادة يا كرام على إذاعتي المفضلة

الشرق الأوسط, وبما أني شرق أوسطية قديمة

فإنتفخت اوداجي و إشرأبت اوصالي و نظرت للتلفاز بتعالي قائلة

حكومة نظيف لن تلوث هذه المحطة الرائدة

و كان بالراديو برنامج عن الهجرة

وكان الضيف شخصا من الحزن الوطني لا اعرفه

و بدأ هذا الفذ يتحدث الينا عن اسباب الهجرة فقال البطالة و سؤ الدخول

و إرتفاع الأسعار ثم قال الحل اللوذعي

من أسباب الهجرة الغيرة وان الشباب الحاصل على مؤهل عالي

يرفض ان يعمل في مهن بأقل من شهاداتهم

كعمال او سائقي ميكروباصات او فنيين وخلافة

فقالت المذيعة لكن يا أستاذ فلان دول معاهم شهادات عليا

فيرد العبقري سيد شباب بنها

بأن الشهادة دي شكل إجتماعي عشان يتجوز بيها

هما مش أهلة فرحوا بيه وهيصوا و زغرطوا وقالو خلاص ابنهم معاه شهادة كذا

خلاص بقى الشغل حاجة تانية

و انتهى رد هذا الفرد اللوذعي لإني إنتابتني وقتها حالة من الضحك الهستيري

أعقبه دخول الست الوالده بالبسملة والحوقلة

بعد أن رأتني في حالة الهبل السالفة الذكر

طيب حد يفهمني...هل الشهادة من مطلبات الزواج

هل مثلا لا يصح عقد الزواج الا بشهادة جامعية!!!

و هل تأخذ الحكومة من جيوبنا مئات الألوف لكي تعلمنا تعليما عاليا

عشان نتجوززززززززز!!!!!!!!1

طب ما كانوا وفروا الفلوس دي و بقينا كلنا من حملة الدبلومات و هنضطر برضة نتجوز من بعض

ولما هما عايزين عمال, بيدخلونا كليات اداب و حقوق وطب و تجارة ليه

ولا الحكومة عايزة سواقين ميكروباص بيقرأوا مسرحيات موليير و متطلعين على فلسفلة فولتير

او يمكن يكونوا دكاترة عشان الراكب من دول ياخد بحق الأجرة إستشارة طبية على الماشي

ويبقى كل ميكروباص مكتوب عليه بقى تخصص السواق

إمبابة-حقوق, او رمسيس طب و هكذا

يعني بيخرجوا سنويا مليون خريج جامعي, عشان يشغلوهم فنيين و حرفيين

طب ما كانوا خرجوا عشرة الاف خريج بس سنويا

والباقي يتوزعوا على التعليم المهني والحرفي

وفلوس ده تغطي ده

ولا هو ودنك منين يا جحا

يعني هو الحرفي ولا الفني مش هيتجوز

و ايه دخل الجواز أصلا بالموضوع

ما هو لو دكتور وبيشتغل بدل الطب فران

برضة محدش هيجوزه بنته

الحكومة اللوذعية حولت قضية البطالة و سوء إستخدام الكفاءات الى انها

ازمة طبقية في المجتمع المصري, إحنا الي متكبرين و متعالين ومش عايزين

نرضى بقليلنا, وعشان كده الحكومة مضطرة تجارينا عشان نتجوز

فيه واحد من الموظفين في الضرائب العقارية

قالي و هو بيغلي من الغضب

الحكومة الي بتحل مشاكلها بالتوك توك

مش هتنفع تحللنا مشكلتنا

الراجل ده.....عبقريييييي

كل عام وانتم بخير

بقالي كتيييييييير ما كتبتش في المدونة

اخدني شغل الأرض والعمل مع الفريق الرائع في أبناء مصر

الإحتقان الحاد الي كان جوايا والي كان بيتفرغ بضربات وخبطات سريعة وقوية على لوحة المفاتيح

والتي نفست من خلالها عن الغليان بداخلي في بوستات عديدة وملخبطة قل بشدة

قل واختفى..و بقى مكانة طاق بناءة شرهة للعمل الميداني

للإحتكاك بالناس ولمس معاناتهم

لتوحيد طاقة الغضب من اوضاع البلاد المتردية مع طاقتهم و خلق موجات خلاقة

السعادة الغامرة التي انتابتني بعد ما رأيت بعيني موظفي مصر يغيرون وجه مصر

بجرأة و انتظام وأناقة لا مثيل لها

اخذتني الحياة الميدانية, وانشغلت بسعادتي الجديدة عن الكتابة او التدوين

و حمدت الله اني لا امتهن الكتابة وإلا كان زماني على الرصيف من زماان

لكن المعايدات الرقيقة قوي الي جاتلي من الأحباء في التدوينة السابقة

ذكرتني ان لي احبة التقيت بهم على هذه المدونة

لم اعرفهم من قبل الا من خلال هذا العالم السحري الأخاذ

أحبة اشتقت اليهم, و افتقدتهم وليس لي منفذ اليهم سوى هذه المدونة

لهؤلاء أقول كل عام وانتم بخير

كل سنة وانتم بخير و سعادة وهناء و عطاء

كل سنة ونحن اصدقاء عبر الأثير

اصدقاء الى الأبد ان شاء الله

هما المصريين قلبهم قاسي علينا كده ليه!!!!!!!!!!!

هما المصريين قلبهم قسى علينا كده ليه

الجملة القاتلة دي..قالتهالي نعمات سمير جبر من كفر العلو

نعمات ست معاها بكلريوس تجارة

و عندها ولدين زي القمر....كانت متجوزة راجل بيجري على اكل عيشة و عيشها..

حب يسترها و يستتها...قام اشترالها حتة ارض في كفر العلو من صاحب حيازة بالي معاه كله

باعت الي وراها والي قدامها و حبت تسكن و تتستر هي والعيلين في ارض بتاعتهم و بيت ملك

عشان لو جار عليها الزمن تلاقي حيطان تتاويها...و ضل راجل يحميها

استلفت من طوب الأرض عشان تشتري حتة الأرض...و دلت اخواتها على حلوان عشان تتونس بالأهل

و في ليلة من ذات الليالي جالهم رسول من رسل الموت يخبرهم ان بيتهم الحكومة عايزاه

هو حد يقدر يكسر للحكومة كلمة....الحكومة عايزه الأرض يبقى تتاخد الأرض

الراجل الي هو السند والضهر للست دي...لما عرف الخبر طب ساكت

بقى الأرض الي شقي و تعب و اتمرمط عشان يشتريها و تبقى سند ليه ضد غدر الأيام

تروح منه كده في غمضة عين..,يدوله بدالها 2500 جنية!!!!

الراجل ما استحملش و راح عند الي لا يغفل و لا ينام..و فات نعمات

لوحدها مع الطفلين اليتامى دول...الي اصبحوا مهددين بالطرد

لكن الحكومة ما كفهاش وفاة الراجل...و قررت انها تبعت موظف مهمل

موظف ما كلفش خاطرة انه يدخل بين غيطان القصب و يعد البيوت الي في الأرض الي هتاخدها الحكومة

و اسقط في العد بيت نعمات.....سهوا اوعمدا مش هتفرق

المهم انه معدوش...., و محدش عرف عن بيتها حاجة...

و في ساعة فجرية...و يا دوب عينيها بتغفل...و بدأت تدوق عينيها النوم بعد يوم شقا طويل قضته كله سعيا ورا

رزق العيلين الي طلعت بيهم من الدنيا

لقت زوا الفجر جولها مع انها لا عمرها اشتغلت في السياسة ولا تعرف عنها حاجة

فجأة....دخل بيتها و خدرها رجالة اغراب...شالوا ابنها من فرشتة ساعة فجرية في ليل رمضان

و رموه في الشارع....ببجامته...منغير حتى ما يمهلوه يلبس شبشبة

و جرجوا امه و رموها في الشارع جنبة

يصرخ الطفل بحثا عن اب يرعاه ولا عم يحوش عنه قسوة الحكومة...ما يلاقيش غير بلدوزرات هدت بيته و احلامة

قدام عينيه....

نعمات قالتلي لما نزلنالها مع وفد ابناء مصر بقى احنا لو يهود كانوا عملوا فينا كده

هما المصريين بقم بالقسوة دي.علينا ليه

هو احنا مش بشر زييهم....

نعمات صرخت فيا و قالت...يعني احنا نعمل ايه..انا طول الليل ابني يكح من النزلة الشعبية

البرد كل عضمة..., دق صدرة...,وانا لا حول ليا ولا قوة...

لا عارفة اعالجة..ولا قادرة اصرف عنه البرد...منك لله يالي ظلمتنا

كل مسؤول همة بس الكرسي الي قاعد عليه

يجي الريس يشوف شعبة...ده احنا لو يهود ما كانوش عملوا فينا كده

جمعية رسالة بالتنسيق مع ابناء مصر نزلوا لأهالي كفر العلو بقافلة طبية...

و حصروا الأمراض الموجودة و وفروا العلاج الي يقدروا عليه

نعمات قالتلي و عنيها مش مصدقة الي بيحصل و ان فيه ناس مش في السلطة جاينلهم

ده الواحد زي ما يكون لقى المصريين تاني

اتاري مصر لسة بخير

كلمتها خلتني مش عارفة اعيط و اخدها في حضني و اعتذرلها عن كل الي صابها

ولا اغضب من كل غاصب و ظالم و غاشم حط في زورها و صدرها المرارة دي

يا مصريين...الناس دول محتاجينكو...محتاجين طبطتكوا...

محتاجين حد يقولهم بردكوا واجعنا

قعدتكوا في الشارع قهرانا...و نفسنا لو نؤيكوا

الناس دول مكسوفين من قعدتهم في الشارع..

الي بيقعوا في الشارع هما الغجر الي كل شوية يتنقلوا في الموالد..لكن مش اصحاب الأطيان

و اصحاب الأملاك...الجيران كل ما يضيع منهم قرش

يجوا يفتشوهم...ما هم سبيل في الشارع

لو سكتنا على الي بيحصلهم...مش هنلوم الا نفسنا لو حصل منهم اي حاجة

الناس فاض بيهم....بلاش القسوة دي يا مصريين

دعوة للدعم

دعوة لمساعدة اللاجئين المصريين في كفر العلو

اه...اهالي كفر العلو اصبحوا زي اللاجئين السودانيين بالظبط


يعيشون تقريبا في نفس الظروف الغير ادمية


الا ان السودانيين كانوا يستوطنون احد الميادين الراقية بالقاهرة


والعالم كله شايفهم...و المفوضية الخاصة باللاجئين تحميهم و تدعمهم


لكن اللاجئين المصريين في حلوان...يا عيني حالهم زي حال كل المصريين


لا ليهم ضهر يحميهم...ولا دولة اجنبية تسهر عليهم


والإسم عايشين في بلدهم


سكان كفر العلو عشان الي مش عارف...للأسف الشديد

الحكومة خدت اراضيهم و هدت عليهم بيوتهم و تركتهم في العراء

وعدتهم بتعويضات ما شافوش منها حاجة


الناس دي في الشارع من رمضان الماضي

ابناء مصر صورت هناك و عملت فيديو سمته في العراء فيه شرح لحالتهم


الي عايز يعرف تفاصيل الموضوع التفاصيل هنا

دلوقتي يا شباب مصر....احنا مالناش الا بعض

لا الحكومة هتشفع ولا هتنفع

وكلنا معرضين في اي لحظة ان بيوتنا تتهد على نافوخنا


ولا حد هيحوش عنا ولا حد هينصفنا


مش هينصفنا غير وقفتنا جنب بعض....نقف بجد بدعم حقيقي




مش بوقفات احتجاجية لا هتودي ولا هتجيب


الناس الي في حلوان الي هما اهالينا و ناسنا

قعدين في الشارع في عز البرد محتاجين بطاطين تحميهم و عيالهم من البرد


محتاجين لبس شتوي بدل الهدوم الي اتبهدلت تحت الأنقاض


محتاجين اكل لإنهم بياكلو الكفاف



محتاجين رعاية طبية خاصة للأطفال...


محتاجين ادوية و علاج...محتاجين ما يحتاجة اي لاجئ من اللاجئين في اي مكان


كمان محتاجين خيم لإنهم قاعدين في مكان على مجرى سيل


بيخرج عليهم افاعي وتعابين و حشرات و ذئاب


و حياتهم و حياة عيالهم طول الوقت مهددة بالموت


ما يقتل كمدا و غيظا...اننا بنشحت على ناس المفروض انهم مليونيرات


يعني الناس دي..ارضهم تسوى ملايين...الحكومة خدتها منهم بألفين و خمسمية جنيه

و بعدين اكتشفت انهم بنيين بيوتهم على الأرض الزراعية


فطلعت عليهم احكام و غرامات بعشرة الاف جنية و كام سنة سجن

فالناس في يوم وليلة بقى عندهم موت وخراب ديار


مع ان الحكومة بجلالة قدرها هتاخد الأرض و تبني عليها محطة مية


و كمان وراء مصنع اسمنت....


احنا محتاجين دعم كامل للناس دي


عشان ما تبقاش قلعة الكبش الجديدة


الناس دي محدش سائل فيهم




مالهومش غيرنا...و لو اديناهم ضهرنا دلوقتي



بكرة هيجي علينا الدور...., يكتشفوا ان بيوتنا تحتها مقبرة فرعونية




ولا صندوق الزبالة الي قدام العمارة بيطلع صراصير فهنهد العمارة


ولا اي حاجة..., نبقى شعب كله من اللاجئين




و الي يحب يجي يشوف بنفسة المأساة...


ويتصل بيا برضة وهنخليه يتفرج بي و على رأي نتانا سينما
مش هيقدر يغمض عينيه


الي بقى يقدر يوصل المشكلة لأي محامي يتولاها

فعندنا صور من كل الأوراق الخاصة بالمشكلة


من عقود مية لنور لعقود صورية ببيع و تنازل

والي يقدر يجيب دعم مادي من جمعيات خيرية...يا ريت



احنا محتاجين كل الدعم واي دعم

البلطجة و غياب الرجال

مشهدين متقاربين أثاروا انتباهي بشدة

الأول هو مشهد حضرته في عمارة لأحد الاصدقاء

مشادة كلامية بين ساكن وبواب العمارة,

المشاداة تطورت من مشاداه كلامية الى تشابك بالأيدي, وعندما رأي ابن البواب والده يضرب

فار الدم في عروقه وضرب الساكن

كل هذا عادي جدا الان ولا يثير الإنتباه, و مكانه الطبيعي قسم الشرطة الذي من المفروض ان يفك مثل هذا النزاع

الغريب ان الساكن قام بالإتصال بقريب له في أمن الدولة

فأرسل له هذا القريب مجموعة من البلطجية بأسلحتهم من شوم و عصي

تجمع هؤلاء البلطجية على البواب و قاموا بضربه ضربا مبرحا

ثم عسكروا امام بوابة العمارة في إنتظار ظهرو الإبن الذي لاذ بالفرار

و بعد ان انتهى عمل البلطجية, جاءت الشرطة فأخذت الساكن والبواب وهو ما كان من المفترض

ان يحدث بداية.

ايضا ليست هذه المشكلة, المشكلة ان السكان لم يجدوا غضاضة على الإطلاق فيما فعل الساكن

بل على العكس, يرون هذا الساكن رجلا دمث الخلق مهذبا بشدة

ثم ان هؤلاء البلطجية لم يؤذوا احدا من السكان

فعلام الغضب منهم

الغريب ايضا, انه في الوقت الذي كان فيه البواب يضرب في حوش العمارة

رفض جميع رجال العمارة الخروج

ولم يخرج سوى امرأة او إثنتين يحاولن ان ينهين الموقف و يدافعن عن موقف البواب

المتني بشدة مقولة احدى هؤلاء النساء "هما الرجالة راحوا فين

البلطجية امام العمارة( الصورة رديئة لإنها بالموبايل)

****************

المشهد الثاني ليس مصريا

المشهد الثاني امريكيا جدا

دراسة قام بها الدكتور فيل وهو أحد الملصحين الإجتماعيين في امريكا

عن أخلاقيات المجتمع الأمريكي

وهل تغيرت ام لا

الدراسة طويلة و بها العديد من الأركان

منها مثلا ان كان المواطن الأمريكي قد يبلغ عن

سارق يسرق امام عينيه

او مثلا يقبل ان يأخذ باقي في محل يعلم انه ليس من حقه

الخ

معظم النتائج فيما سبق جاءت إيجابية

اما ما صدم دكتور فيل

وصدم المجتمع الأمريكي

وصدمني انا ايضا

هو عندما قام فريق العمل

بتجربة قوامها ان رجلا وإمرأة

يشعلوا شجارا في الطريق العام

ثم يتطور الشجار بينهم الى تشابك بالأيدي

و يتطور الى ان الرجل يضرب المرأة

في عرض الطريق

الرجل ضخم الجثة

مرعب الشكل, والمرأة

رقيقة الجسد هادئة الملامح

شئ مستفز لأي إنسان في الدنيا

الغريب جدا

ان هذا المشهد لم يوقف رجلا واحدا في الطريق

من اجل الدفاع عن هذه المرأة

وعلى النقيض مباشرة, فإن العديد من النساء

توقفن

و تصرفن بحكمة عالية

وحاولن ان ينقذن هذه المرأة

فمنهن من إتصلت بالبوليس

ومنهن من جاءت بجانب الفتاة

وأمرتها بأن تسير معها حتى يحتمين ببعض

تعجب دكتور فيل كيف لم يتوقف رجل لمساعدة إمرأة تضرب

عندما علمت بهذه التجربة

أدركت ان اختفاء الرجال اصبح مشكلة عالمية

نهاية تستحق الإنتظار

عماد الكبير اثبت ان النظام اعور العين

أظن ان إسلام نبيه لم يكن ليتخيل يوما ان يده قد تورده هذا المهلك

بل لم يكن ليخطر في اسوأ كوابيسه ان ينتهي به الحال مدانا بما اقترفته يداه...و بشهادته هو

فالحقيقة ان كاميرا إسلام نبيه..هي من ادانته..وتوزيعه بنفسه لصور تعذيب و هتك عرض عماد الكبير

كان دليل الإدانة الوحيد ضده...

اليوم يمكننا ان نتنفس جميعا الصعداء...اليوم واليوم فقط..نستطيع ان نقول مازال هناك امل

كانت اليوم الجلسة الختامية واسدال الستار على محاكمة الضابط المتهم إسلام نبيه بتهمة هتك عرض و تعذيب مواطن وهو عماد الكبير...

هل لإسميهما اي دلالة ها هنا..حقا لا ادري..فهل كان إسلام نبيها بالفعل فيما فعل سواء بإرتكاب الجريمة او في نشرها بيده..بل هل مافعل يمت بأي صلة للإسلام؟؟

وهل كان عماد الكبير كبيرا حقا وقت ان اعتدي عليه, وهل الحكم اعاد اليه لقبه ؟؟

أيضا لست أدري ... كل الذي ادريه الأن..انه أصبح من الممكن ان نلتقط انفاسنا..و نقول يااااااااااااه اخيرا حاجة تفتح النفس

لا اخفي عليكم اني لم اتوقع هذا الحكم..بل كنت سأتفهم تماما موقف القاضي ان حكم على إسلام بستة اشهر مثلا مع إيقاف التنفيذ...

لكن الان...وبعد ان صدر الحكم بالسجن ثلاث سنوات مع الشغل والنفاذ و الزامهم بتعويض مدني بقيمة الفان جنيه لكل من الضابط وامين الشرطة...

بعد ان صدر هذا الحكم...نازعتني رغبة الطمع في عقوبة اشد..و تعويض اكبر

اليوم كان ممتلئا بالإنفعالات...احتشد المدونون جميعا..وكل وكالات الأنباء المعروفة بعدساتها و مصوريها و مراسليها..

كثافة امنية غير عادية متمثلة في عدة لواءات و عمداء شرطة..رأيت الكثير من السيوف الذهبية على الأكتاف..حتى ظننتهم من الإخوان المسلمين.

مدونون ومحاميون و صحفيون و ضباط..الكل جاء و هو يضع يده على قلبه من الحكم الصادر...يا ترى كيف سيكون

لم تستغرق الجلسة اكثر من 10 دقائق بعد ان دام انتظارنا لها لأكثر من ثلاث ساعات كاملة

إضغط هنا لتشاهد نص الحكم

احتشد رجال الأمن, و منعونا من المرور او الدخول والخروج..و جاء إسلام في قميص احمر زاهي اللون شديد الإستفزاز...يذكرني بنوع من اساليب التحدي في علم الحشرات تعرف بألوان الجراءة..حين تسعى الحشرة الى الإعلان عن نفسها بقوة بألوان صارخة, حتى توهم اعدائها الطبيعيين انها لا تهابهم فيهابوها هم.

جاء النبيه الى المحكمة سريعا, ودخل القفص في عجالة, وما ان دخل حتى سارع الأمن بإبعاد المصورين والصحفيين تميهدا لدخول القاضي الى القاعة

كنا اكثر حرصا على الهدوء حتى نسمع الحكم..وما ان بدأ القاضي حتى اصدر حكما بالسجن والغرامة..هنا

وهنا فقط...ارتعشت قدماي..و تسارعت ضربات قلبي بشدة...و خالجني احساس غريب بسعادة غامرة..و رغبة في ان اصرخ بأعلى صوتي..مبروك لمصر كلها..

اليوم انتصرت مصر, وانتصر عماد الكبير..صحيح ان الحكم مخفف..لكن على الأقل هو الأول من نوعه

نظرت الى عماد الكبير وكان جالسا خلفي, فوجدت الصرخة المحتبسة في حلقي من الإنفعال تظهر جليا في كل خلجة من خلجاته..وتعالى هتافه " انا خدت حقي, الله اكبر, انا كده ارتحت"

هنا فقط شعرت ان كل ما مر بي طوال اليوم يهون في مقابل هذه اللحظة...

دخان السجائر الذي أهاج حساسيتي منها والذي جعلني اسعل حتى كادت انفاسي ان تنقطع....الوقوف خارج القاعة في إنتظار ان يحن علينا الأمن و ندخلها...

القلق والإنتظار والترقب لمدة تقارب العام لحكم لا يعلم الا الله ما هو....

راح مني كل هذا في لحظة بعد ان رأيت الفرحة في عين عماد الكبير...و سعادته الحقة انه قد إنتصر على من اذله

و سيذيقه ذل الحبس و عار السجن

إضغط هنا لتشاهد فرحة عماد

دفق الدمع الى عين نوارة, و انتفضت مريم بجواري و ظلت تصرخ طويلا اصرخات فرحة هستيرية...

لم استطع ان اصرخ فظللت اصفق بكل طاقتي...

ثم دارت عناقات الإنتصار ما بيني و بين مريم و رغدة ونوارة...

و نظرات الإنتصار مع باقي المدونين اسد وحنتكلم و دماغ ماك و يساري مصري ولوبي و سبلز شيماء مهدي و إيناس و الجيزاوي و مصطفى كل الدنيا

والعجيب ان الصدف ساقت الينا ايضا مندهش صاحب مدونة رسالة من تحت الماء, والذي لم ينشغل قط بالسياسة ولم يسمع من قبل عن عماد الكبير, لكن تصادف وجوده بالجلسة بحكم عمله كمحامي, العجيب ان مندهش انتقلت اليه حمى الإنتصار فإمتلأ سعادة بالحكم الصادر ايضا دون ان يعلم ملابسات القضية كاملة.

بعد الجلسة قابلنا ناصر أمين, هذا الرجل الرائع الذي اكن له كل حب و تقدير وإحترام, الذي سارع بشكر نوارة على دورها في القضية, وقال بكل تواضع " انتو شباب مصر الي يفرح"

ثم التقطنا معه صورة تذكارية على سلم دار القضاء العالي, وداعبة اسد قائلا..."هه يا أستاذ تحب مين بقى الي يبقى عليه الدور سمؤل سحلة؟؟" فضحك امين بملئ فيه قائلا.." بتفكروني بكاريكاتير عمله بتوع حزب الله لما رسموا طابور من الإسرائيلين ميتين و في اخر السطر علامة استفهام كاتبين فوقها من التالي؟؟

ان أردت ان تشاهد هذا المشهد اضغط هنا"

ضحك و ضحكنا..بقلوب ملؤها الراحة الشديدة..قلوب لم تعد مثقلة بهم الظلم و غم القسوة ولو الى حين..

ثم سألناه عن الإستئناف فقال لا إستئناف هنا ولكن من حقهم النقض, فسألناه إن كان النقض من الممكن ان يخرج المتهم براءة, فقال لا يمكن, بإمكانه فقط ان يخفف الحكم لكن في حالتنا هذه, محكمة النقض قد تعيد القضية لزيادة مدة العقوبة, فقال أسد " طب نقدم احنا يا أستاذ طلب بالنقض" فتعالت ضحكات الأستاذ ناصر امين مرة اخرى..ثم سلم علينا و إستأذن بالإنصراف

انتهت فعاليات جلسة عماد الكبير وإسلام نبيه, وآن الآوان ان ننظر الى القضية التالية, فلنجهز كاميراتنا و نشحذ هممنا, فالأن اصبح الأمل ممكنا

الصورة الجماعية على سلم دار القضاء مع ناصر أمين

الأمن يحاوط المدونين والصحفيين حتى يمنعهم من المرور

جميل سعيد قبل النطق بالحكم وعلامات الثقة على وجهه



التواجد الأمني الكثيف قبل النطق بالحكم او حتى حضور المتهمين

مبرووووووووك يا شرقاوي

عمرالشرقاوي...

اسمة مرتبط معايا بوجع القلب

دائما وابدا كان واجع قلبي

عزائي الوحيد اني مش لوحدي الي قلبي وجعني على عمر

مصر كلها اتوجع قلبها

لما عمر اختفى فجأة و اتقبض عليه

نوارة وجعت قلب مصر كلها بالبوست ده

كنت اول مرة اسمع عن عمر الشرقاوي

منذر الله يباركله..كان همزة الوصل بينا وبينه

لحد ما خرج واطمنا عليه

بعدها انضم عمر لمنظومة ابناء مصر

وعشنا معاه مأساته مع الوحدة

والملل...والفراغ وغياب الونيس والأنيس

كنت كل ما أسألة عن اهله..يقولي ماليش اهل غيركو

انتو اهلي..انتو ناسي

النهاردة..عمر ربنا كرمة..و من عليه

بخطيبة زي القمر...

وان شاء الله ربنا هيبدلة بعد الوحدة والمعاناة

برفيقة درب و شريكة حياة..تسعده و تعينة على امر دينه و دنيته

عمر بلغني بالخبر النهاردة...و قالي

المدونين دول اهلي...بلغي الناس..مش هفرح

غير لو شفت لمة حواليا

دي مدونة عمر...

يا ريت لو تباركوله هناك..و تحسسوه ان له اهل و ناس

وان المتغطي بينا مش بالضرورة عريان

مبروك يا عمر..الف مبروك

ربنا يتمم بخير

التاج التاج

تاج جديد جالي المرة دي من الجميلة رانيا, و شمس الزناتي
زملائي الأعزاء في مجموعة أبناء مصر
نخش في المفيد..و نرد على التاج
****************************
لو قالولك تختار اي عصر او عهد تعيش فيه تختار اي عصر و ليه؟؟؟

ممم...سؤال لوذعي..بما اني من كارهي التغريب, فأنا هشعر بغربة في أي عصر غير عصرنا ده
لكن لو عندي فرصة اني اختار عصر معين, فأظن اني هختار عصر النبوة في أخر خمس سنوات من حياة النبي,
و هخد معايا ورقة و قلم فيها كل الأسئلة الي ممكن تخطر على بالي عشان اعرف إجابات نهائية ليها
هعرض على الرسول كل الشؤون المحيرة الي عمالة تلف في نافوخي و مش عارفة ان كانت صواب ام خطأ
هتعرف على سيدنا عمر بن الخطاب, و اكتب عنه مجلدات كاملة..ادفنها في الرمال حتى تحفظ للعصر الحديث
فنعرف إجابات كل الأسئلة المحيرة في حياتنا..

أول اولوية في حياتك عيلتك ولا شغلك ولا صحابك؟؟

من الصعب ان احكم...كلهم اولويات..انا بعتبر الأصحاب من العائلة
لإني اخترتهم بنفسي, و على مزاجي الخاص
أعتقد ان المسألة تخضع لنوع الأولوية..يعني لو شغلي في ورطة ولا عيلتي في ورطة..يتحرق الشغل
المهم العيلة..لكن لو هخرج مع صحابي ولا هخرج مع اقاربي, لا يبقى صحابي اولى
حسب الظروف يعني

إيه اكتر حاجة بتحبها في رمضان؟؟؟؟؟

رجعت بقى لذكريات رمضان, وصوت الشيخ رفعت, القطايف والكنافة الي بتتعمل في الشارع
وانا بنبهر بالكنافة الي عمالة تتلف عند الكنفاني...الأطفال الي بيفضلوا يجروا في الشارع لحد الفجر
الزينات الي بتتعلق بين البيوت, يفضلوا العيال طول الليل يظبطوا الحبل من البلكونات عشان يعلقوا الفانوس
المدارس الي كنا نروحها الصبح في قمة النشاط عشان متسحرين قريب وعلى اخر اليوم نبقى زي الرنجة
مقددين من الجفاف...صلاة التراويح الي نروحها عشان نفرح اهالينا اننا واقفين جنبهم واحنا مستنيين الفرصة عشان نزوغ
و نجري بين المصلين و نستغل ان هما مش قادرين يخرجوا برة الصلاة و يزعقوا
كفاية رغي بقى عن رمضان...لحسن هعيط

الي بيبوظ الحكام نفسهم ولا شعوبهم ولا الحاشية المقربة؟؟

سؤال معقد شوية, يرجعنا لفرضية البيضة ولا الفرخة...
الحاكم هو إفراز الشعب, فإن كان الشعب خانع كان الحاكم طاغي, وإن لم يثر الشعب على الظلم
بغى الحاكم و تجبر, لكن إصلاح امر الشعب لا يتم إلا بيد الحاكم الذي يملك مقاليد الأمور
الحاشية هي وسيلة الإتصال بين الحاكم الفرد والشعب, لذا غالبا ما تكون من عينة الشعب,
فإن كان الشعب جبانا كانت الحاشية خسيسة, و إن كان الشعب حرا و أبيا كانت الحاشية شجاعة
وهكذا...هذا سؤال يحتاج الى مقالات لإجابته وليس تاج

مين أكتر إعلامي بتحترمة؟؟؟

طارق السويدان و حمدي قنديل

لو نفسك تشتغل شغلانة تانية غير شغلك نفسك تبقى إيه؟؟؟

ياااااااااااااااااه كان نفسي ابقى حاجات كتيرة قوي
كنت احب ابقى دبلوماسية في الخارجية
و كنت احب ابقى مترجمة فورية, ومترجمة محترفة
وكنت احب ابقى مدربة كلاب
و مربية خيول
و كنت احب ابقى مديرة لمزرعة بها الكثير جدا من الحيوانات المختلفة
كنت احب أبقى أخصائية علاج طبيعي
و محامية
و متخصصة في الأدب العربي والعالمي
كنت احب ادرس فلسفة
و علم نفس و منطق
كنت احب اجيد ستة لغات و أعمل في مجال السياحة
مرشدة للأثار العربية والإسلامية
مم...كفاية كده مؤقتا

إيه تاني بلد تتمنى تعيشي فيها بعد مصر؟؟؟

عمري ما اتمنيت اعيش في أي بلد غير مصر, و عمري ما ظنيت للحظة اني ممكن اكون
سعيدة خارج مصر, بل بتضايق لما بخرج برة مصر عشان بحس انها تعبانة و مرهقة قوي
و مش قادرة ازعل منها, وهي ممالهاش ذنب
انا بحبها كده, زي ما هي, منغير مبررات, ولا أسباب..بحبها برقة و بعنف و على إستحياء

أوصفي ترتيبات اجمل فرح تحضريه؟؟؟

مم...الأفراح كلها مملة في العموم, لإنها بقت تقليدية والراجل الرخم بتاع البوفية
الي تحس انه عايش في علاقة من طرف تالت مع العريس والعروسة...
واحد بيحب واحدة و هو جاي يقعد معاهم كده.. بس أجمل فرح
هو الي بيجمع بين اتنين بيحبوا بعض ...و اهاليهم حوليهم فرحانة

...
بتراعي كلام الناس والقيل والقال, ولو اه قولي ليه؟؟

نعم اراعي كلام الناس والقيل والقال, لإني مؤمنة ان الإنسان
لا يمكن ان يعيش ان اصطدم بالمجتمع
والمجتمع متمثلا في مجموعة من الأعراف والقوانين تحدد طبيعة التعاملات بين البشر
فتكسب المرء اهم ما يملك وهي السمعة..والإسم والتي بيها بيتعامل الشرفاء

.
لو صحيت من النوم ومالقتش الموبايل ولا الكومبيوتر ولا التلفزيون والتواصل بالحمام الزاجل هعمل ايه؟؟

اكيد مش هتبسط, لإن مفدرات حياتي مش هتكون موجودة...لكن هتعايش

السعادة هي؟؟؟؟

الرضا عن النفس و عن الحال

عندك أمل؟؟ أسبابك؟؟

دائما عندي أمل, اما لما, فلإن الأمل هو ما يدفع المرء للأمام
بالأمل تتحرك الأمم, وباليأس تهزم الشعوب

لما بتحب الهرب من كل شئ بتروح فين؟

لو عندي القدرة و الفرصة, هروح اقعد ادام اي بحر مفيهوش ناس

امتى مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟

كتييييييييير, تقريبا كل يوم, أكتر أغنية بتعبر عن إحساسي ده هو كلام على سلامة و صوت وجيه عزيز
في غنوة قلت أبص في المراية

.
لما بتعمل عمل إجتماعي بيكون ايه هو دافعك الأول؟؟

أولا و أخيرا وجه الله, بقول يمكن دي تكون الفسيلة الي تنقذني من النار
و عشان اكون تركت للجيل الي بعدي متر جديد عُـــبِّـــدَ على طريق الخير

بتشرب سجاير؟؟ إيه شعورك لو شفت ست بتشرب سجاير؟

انا ما بشربش سجاير والحمد لله و عمرها ما خطرت على بالي
ولما بشوف ست بتشرب سجاير ببقى عايزة اضربها, بحس انها غبيه
بتقتل روحها بإيدها, و بتحدد حياة ابنها او بنتها منغير اي مبرر محترم..
انا عامة بشعر ان المدخنين أشخاص غير مسؤولين وضعاف الإرادة..
و بتعجب إزاي مش قادرين يخدوا موقف من مسألة شديدة الوضوح بالشكل ده

..
بتعرف إيدك اليمين من الشمال ازاي؟؟

سؤال عبيط بصراحة, ولو جاوبته ابقى انا كمان عبيطة

إيه اكتر الة موسيقية بتحبيها؟؟

انا بحب الناي قوي, لإنه حزين جدا وشرقي قوي
كل الالات الوترية بالنسبة لي حساسة قوي, وفيها رقي, العود القانون
كمان الطبلة هي الشريك الرئيسي في الزيطة

في رأيك ليه الذوق والنخوة اتعدموا؟؟؟

لإنهم اتعدموا من عند الحكومة, انا مؤمنة جدا بالقاعدة الي بتقول ان كان رب البيت بالدف ضارب
فشيمة اهل البيت كلهم الرقص
يعني الحكومة لما بدأت سياسة ضرب المواطنين
بقوا الناس بيضربوا بعد في الشوارع
ولما الحكومة جت في المظاهرات و بدأت تهاجم النساء بصفة خاصة و تتحرش بيهم جنسيا
لقينا تاني سنة احداث وسط البلد والشعب بيتحرش بالبنات في الشارع في العيد
وهكذا...لما الحكومة تبقى شريفة و نزيهة
الشعب بالتبعية هيبقى شريف و نزيه

ايه الحاجة الي لو حصلتلك هتبقى سعيد قوي؟؟

لو استطعت كمان عشرة سنوات ان احتفظ بكل الصداقات التي انتقيتها و اخترتها
حولي, و في أسرتي

تختاري يبقى عندك ارض زراعية ولا كام عمارة ولا اجنس عربيات ولا فلوس في البنك؟؟

انا شخصيا افضل الأرض الزراعية, انا بحب الفلاحة بطبعي
اهي فرصة ازرعهم حشرات

. :-))))))

البحر ولا النيل؟؟؟؟

البحر
عاقلة ام مجنونة؟؟؟
عاقلة جدااااااااا
تقري كتاب ولا تتفرجي على فيلم؟؟
الكتاب
تمرري التاج ده لمين
تامر حنتكلم

حين البأس
صاحب البوابة
في الصميم
بحبك يا مصر
ابن ناصر
انكسارات
شاعر إخوان

مكان في القلب
ولأ حد عايز يخده

نحن اولى بعبد الرحمن منهم

أفجعني اليوم نبأ القبض على المدون

عبد الرحمن فارس صاحب مدونة ( لساني هو القلم)

ورغم أني لا اعرفة شخصيا ولم أدخل يوما الى مدونتة

لكن فكرة ان يقضي احدا أول أيام العيد في الحبس..فكرة مقيتة للغاية

ما علمتة ان عبد الرحمن فارس متهما بتوزيع منشورات تهدف الى قلب نظام الحكم

والواقع ان عبد الرحمن صاحب فكرة مراقبة رجال أمن الدولة

بتسجيل نمر سياراتهم و مراقبتهم...الفكرة قوية للغاية...لكن مصيرها لازم يكون الحبس

حبس مدون لم يعد يثير ذعر أحد كما كان يحدث فيما مضى..

فقد أصبح من الطبيعي ان تنكد علينا الحكومة في المناسبات والأعياد الرسمية والقومية

بأخبار القبض على المدونين...ما أحنقني و أثار سخطي و غضبي بشدة

هو اللامبالاة الغير مفهومة من قبل مدوني الإخوان

مدوني الإخوان لا يكلون ولا يملون من الإعلان عن أنفسهم ليل و نهار..

و شعارات السيفين و أعدوا ظاهرة لكل متصفح حتى لا تخطئهم عين

اليس المؤمن للمؤمن كالبنيات يشد بعضه بعضا

لماذا هذا الصمت الرهيب

لم ارى بانارا واحدا...او حتى محاولة لتدشين حملة دعم كما حدث مع منعم اثناء حبسة

لماذا ينتظر الإخوان دائما ان تأتي المبادرة من غيرهم

انا شخصيا كمدونة...لا يهمني ملة او شكل او جنس المدون المحبوس

طالما هو إنسان...وطالما يشاركني هذا الفضاء..فحقة علي ان انصرة

ضد من اعلم علم اليقين انه ظالم...

مراقب مصرى أحرج الإخوان تماما..حين بدأ بالتضامن مع عبد الرحمن

و انا شخصيا منضمة الى مينا..و أعلن من مدونتي تضامني الكامل مع عبد الرحمن

سنتابع أخبار عبد الرحمن و ننشرها في موقع أبناء مصر

بالرغم من كثرة اعداد الضحايا من الإخوان...الا اني لا استطيع

ان اتعاطف معهم كما ينبغي كتنظيم..حين ارى ان هذا التنظيم يترك ضحاياه

بل ولا يسعى حتى لجمع الدعم المعنوي لهم

وما عبد الفتوح شوشة منكم ببعيد..هذا الرجل الذي تركوه في المعتقل سنوات طوال..

اخرها كان عام 2007 و هو ابن 86 سنة

ولم يبذل الإخوان جهدا يذكر في الدفاع عن أحد مشايخهم..ممن افنوا عمرهم في الدعوة للجماعة

و تركوه لأمن الدولة تعتقلة و تهينه كيف تشاء...حتى افرجوا عنه حين خشوا ان يموت

من يملك صورة لعبد الرحمن يوافينا بها حتى نصنع بانارا نعلقة في مدوناتنا

مادام الإخوان لا يلقون بالا لزملائهم...فهو أيضا زميلنا في هذه الشبكة

و نحن اولى بمموسى منهم...

كل سنة وانتو طيبين

المدونة وحشتني قوي

شهر بحالة وانا تقريبا مهملاها تماما

بالعافية بفتح, و كتير بكسل

و ماكانش عندي وقت اقرا او اكتب حاجة عليها

كمان انشغالي بالعمل في موقع ابناء مصر

خلاني اهملت مدونتي , الي كانت متنفس رائع بالنسبة لي

عشان اخرج فيه اي فكرة تخطر على بالي

منغير ما اقعد افكر لها واحسب لها....نوع من الفضفضة المجانية

و برغم انه لسة فاضل يوم على العيد...لكن حبيت اشارككم معايا يوم لطيف جدا

قضيتة مع مجموعة من المدونين الأكثر لطفا

منذ فترة, دعيت الى حفل إفطار تنظمة الدينامو عاليا حليم

مع الأستاذ خالد الصاوي في ساقية الصاوي.....

و بالأمس عقد هذا الإفطار....الحاضرين كانو نخبة من الطف المدونين

من مختلفي الإتجاه والأفكار, من مدونين لمدونات شخصية

و خواطر, و مدونات فنية, و بعض المدونين السياسيين......

تباين الإتجاهات .... والأفكار كان اكثر من رائع

كان شئ لطيف جدا ان الواحد يتعرف انسانيا على ناس

معجب بيهم من بعيد من خلال كتباتهم....و يكتشف فجأة انه كإنه عارفهم من زمان

محمد صاحب مدونة غمض عينيك, و زوجتة سارة و بنتة الجميلة فرح

بنتة دي بقى..بونبوناية صغيرة....الطف بنت شفتها في حياتي

هادية جدا...و بتروح لأي حد يشيلها, ولا سمعنالها صوت, ولا حسينا بيها..نسمة يا ناس

المفاجأة التانية بالنسبة لي, كانت رشا صاحبة مدونة مكان في القلب....

شخصية مشعة الى اقصى مدى تأسر الحاضرين دونا عن إرادتهم

و عندها بسم الله ما شاء الله...ولدين زي القمر

بس شياطين...محتاجين سبعة الاف جول من الطاقة عشان تلاحق عليهم...

ياسمين اختهم على النقيض تماما....سوسة...بس هادية جدا

شعلة النشاط عاليا حليم صاحبة مدونة عندليبيات..قامت بدور المضيفة على اجمل وجه

كانت حريصة على ان الكل يكون راضي و سعيد...و مستمتع بوقته..
....
وينكي...اكتشاف جديد من اكتشافات الطاقة البناءة..كتلة من المرح والصخب

و حب الحياة...شخصية تتحب..وتفوت عالقلب من اول لحظة

كانت اجمل فرصة ان مجلسي يجي جنبها في الإفطار

منى صاحبة مدونة نبضات...نموذج كامل للأنثى الرقيقة

رقيقة الصوت, مرهفة الإحساس...حسيت وهي بتتكلم

ان كل كلمة خارجة من قلبها بجد...حتى لما بتسلم علينا..سلام بجد

من القلب..مش مجرد هز للرؤوس....

أشرف حمدي رسام الكاريكاتير والمدون امتعنا بخفة ظل و حضور

و شرفت اني اتعرف على زوجتة الرقيقة هند

من ضمن الحضور ايضا كان مندهش صاحب مدونة رسالة من تحت الماء

و حورس صاحب مدونة جيفارا مات و أمة الله صاحبة مدونة إيميز و مصطفى الحسيني صاحب البوابة

كان من الحضور ايضا فاطمة واحمد...و هما من غير مدونين..لكن ليهم نشاطات مدنية

و غادة ايضا من غير المدونين..لكن حضورها كان إثراء للجلسة لإنهم برغم

انها من غير المدونين....لكنها من متابعي المدونات بشدة

أخيرا بقى....خالد الصاوي نفسة...

اولا فوجئت انه مش طويل زي ما كنت متخيلة....بالعكس..طلع متوسط القامة الى حد بعيد

رشيق...و مهذب الى اقصى درجة

رجل محترم بحق...جاء في موعدة بدقة...

سلم على الجميع في اماكنهم, لف على الترابيزة واحد واحد وواحدة واحدة

عشان يسلم على كل واحد بنفسة....

حوارة شيق, ولا يوجد اي شبهة تكلف في حديثة...لم اشعر للحظة

اني مع شخص مشهور او مدرك لنجوميتة

بعد الإفطار....الي تعارفنا فيه على بعضنا البعض بسرعة

انتقلت الجلسة الى ركن جانبي...و بدأنا نتجاذب اطراف الحديث

كالعادة, ونتيجة لوجود صاحب البوابة...تحولت الجلسة الى حوار سياسي بحت

و كان معظم الحديث سجالا بين الصاوي, والذي اعرب عن مواقفة السياسية بجرأة و قوة

و احترام شديد, للأخر وللإختلاف....و بين باقي المدونين

الي كل منهم يحمل رؤية سياسية مختلفة...او لا رؤية على الإطلاق

اسهبنا و اطلنا في الحلول السياسية للأزمة الراهنة..,احتمالية قيام ثورة

او عصيان مدني على اقل تقدير, و استمر النقاش قرابة الساعة و نصف

ثم إضطر الصاوي ان يرحل لإرتباطة بتصوير

ثم جلسنا نحن المدونين سويا ....نتجاذب اطراف الحديث قرابة ساعة اخرى

و روحت وانا في قمة السعادة...شكرا لكل من حضر..وكل من ساعد عن انجاح هذا اليوم

الصور في سبيلها للتحميل...لا تيأسوا يا شباب

القمرين دول هما ادم ويوسف,..الي هدوا حيلنا من اللعب والجري( ربنا يحميهم يا رب)

خالد الصاوي والمدونون ساعة الإفطار

الي في الوش هو اشرف حمدي و بجواره زوجتة ثم وينكي)ا الحاضرين من اليمين الى اليسار ( ياسمين بنت مكان في القلب, الي لابسة احمر تبقى فاطمة والي وراها وينكي

أحمد مش مدون صاحب البوابة الطويل ثم مندهش المندهش)
والشقية الي قاعدة على ركبها تبقى مكان في القلب أوشة)

رسول الله

جاءتني دعوة من العزيز شمس عن مدونة كلام عيال

بأن نخصص يوم السابع والعشرين للحديث عن الحبيب المصطفى

صلى الله عليه وسلم
============

اللهم اني ابتغي ان ارسل الى حبيبك و نبيك محمد رسالة

فصلها اليه يا رب العالمين...

يا رسول الله, جزاك عنا الله خيرا

و تقبل منك و غفر لك ما تقدم من ذنبك و ما تأخر

يا رسول الله, اشتقنا اليك, واشتقنا الى لقياك

تعاظمت علينا الذنوب. وقصرنا في حقك
تركنا سنتك, و اهملنا طريقك

و تقاعسنا عن نشر دينك...الذي تأذيت و تعبت و تحملت حتى يصل الينا

يا رسول الله....نعتذر اليك عن تصيرنا

فسامحنا

الإحتجاب

المدونة محتجبة عن الظهور غدا...



تضامنا مع الصحفيين الشرفاء



اعلنت احتجاب المدونة لمدة اربعة وعشرين ساعة



بدأ من اليوم الأحد 7 أكتوبر وحتى الإثنين 8 اكتوبر

خبر حلو اهه...يا مسهل

صاحب البوابة ابلغني اليوم

ان أبو الفتوح شوشة, أكبر معتقل سياسي فيكي يا مصر

والبالغ من العمر 86 سنة قد تم الإفراج عنه أخيرا اليوم

نتيجة لسوء حالتة الصحية

لا تعليق عندي غير..حمد لله على سلامة هذا الرجل العظيم

الي بالرغم من اني لا أعرفه

لكن يكفي انه رجل ظل يدفع ثمن مواقفة حتى اخر ايام عمره

كل التحية والتقدير والإجلال للسيد أبو الفتوح شوشة

الذي احرجنا جميعا بجهاده حتى اخر العمر

و كل التحية والتقدير لأهلة الصابرين على بلائهم

لو كل الشباب المصري في ثبات الراجل ده

كان زمان مصر دلوقتي بقت جنة

من دقنة و إفتلة

الحكومة دائما تتعامل معانا من مبدأ من دقنة وافتلة

يعني دلوقتي الإعتصام والإضراب خلص على إيه

العمال في المحلة خرجوا بسبيعن يوم سلفة!!!

سلفة!!!! يعني اخرة المتمة...خدو سبعين يوم سلفة!!!!

أربعين واجبة الصرف حالا, وثلاثين مؤجلين لحد العيد

و الأموال دي..هتتجدول عليهم...والجيلاني زي ما هو

والأساسيات طرح الدراسة

والمصنع رجع اشتغل تاني

و بدل الطعام هننظر فيه

وبدل المواصلات انسوه

طيب يعني هم خدوا ايه بقى...خدوا سلفة سبعين يوم

خدوا مقلب ببساطة...الناس قعدت في الشارع والامن اتلم و هز طولة من مصر

لحد المحلة, عشان سبعين يوم سلفة

عمار يا مصر...

يا ترى الفترة الي جاية دي...هتبقى أجازة لعمال المحلة

يريحوا زورهم و حناجرهم من الهتافات..

و يقوموا تاني

ولا الحكاية كده خلاص

نامت و ماتت

هنشووووف

زغروتة للرجالة

أسمع بقى أحلى سلام و احلى تحية لعمال الغزل لمحلاوية

و أخيرا شفنا بوادر نصر...

الرسالة دي جتلي من ساهر جاد عضو حركة مصريين ضد التعذيب

والخبر برضة منشور في موقع كفاية الرسمي و أبناء مصر

=======================

اذا الشعب يوما اراد الحياة.. فلابد ان يستجيب القدر
وانتصر عمال المحلة
راجع من المحلة الان (4 صباح يوم السبت) من عند احسن ناس ممكن تقابلهم فى زماننا الاغبر ..راجع من المحلة
· التفصيلات كتيرة.. و البطولات رائعة .. و الدروس متاحة بس اللى يفهم.
· انتصرت ارادة العمال ورضخت حكومة راس المال .. حضر وفد حكومى برئاسة حسين مجاور و الجيلانى واتفقوا على تنفيذ مطالب العمال .. تم التفاق على :

صرف ارباح فورية
· زيادة الحافز إلى 30%
· اعادة هيكلة مجلس الادارة و اللجنة النقابية
· تحسين المرافق الخدمية للعمال
· بالنسبة لبدل الوجبة وطبيعة العمل سوف تحسم فى خلال 48 ساعة وسوف يصدر بذلك منشور رسمى لينهى بعدها العمال اضرابهم منتصرين ويكسب الرهان علىالنضال كطريق وحيد لانتزاع الحقوق من النظم الفاسدة الديكتاتورية

===============

سمعوني بقى سلام خلي السلاح صاحي

و عقبال من نسمع اخبار كده عن حبس الصحفيين

يظهر ان دعانا هيستجاب يا ولاااااد

رجعنا للنكد

عدة أخبار متتالية اخذتني من إجازتي الرمضانية

و ارتأيت ان اشارككم فيهم ... اولا المدونة في حالة حداد رسمي تضامنا مع نوارة و صاحبة مدونة كلام

و هو الحداد الذي ادعوكم جميعا للمشاركة فيه حزنا على وضع الصحافة والجمعيات المدنية الحالي


============

بالأمس الخميس, عقدت كفاية مظاهرة حاولت ان تجعلها حاشدة

خصوصا مع تضامن العديد من الجمعيات الأهلية والمدنية

أبناء مصر غطت المظاهرة بشكل جيد , و كل أعضاءها ( من الرجال) تقريبا كانوا هناك

هتلاقوا التغطية هناك في الموقع

المظاهرة لم تحصد نجاحا حقيقيا لا لكفاية ولا لأي جهة سياسية

المكسب الوحيد ان محدش اتضرب بجد ولا اتحبس بجد

الضرب كان بس للتهويش, وما كانش فيه اوامر بالقبض على حد

فالناس روحت مبسوطة, وقالوا الحمد لله...احنا كمان في البيوت قلنا الحمد لله

ماهو اصلة مش حلو نلف ورا المقبوض عليهم في الأقسام في رمضان

==================

من الأخبار الحزينة والمحبطة الي حصلت اخيرا

هو خبر الحالة الصحية لأكبر معتقل سياسي سنا في مصر

أبو الفتوح شوشة, رجل في السادسة والثمانين...ايوة الرقم سليم

86 سنة, و برغم سنة المتقدمة و حالتة الصحية المتأخرة

فهو مازال معتقلا, ولا يوجد نية للإفراج عنه

طب معتقلينة ليه...؟؟؟ الله و أمن الدولة اعلم

طيب ايه الخطر الي ممكن يسببة رجل في هذا العمر؟؟

لا أجد إجابة منطقية واحدة ترضيني

الخبر نقلا عن مدونة صاحب البوابة

إن كانوا سيضيعون سنوات الشباب, فليرحموا سنوات الشيخوخة

من هم في هذه السن, يحتاجون لرعاية خاصة و عناية خاصة

لا لظلمات السجن, ووحشية السجانين

انا اعلن حدادي في المدونة على كل سجين رأي شاب شعره في السجون

ولم ترحمة الدول في كبره فزادت عليه تعبا بتعب

بلا عنوان

كنت أنتوى ان اكتب بوست عن رمضان

و احكي عن بعض الذكريات الخاصة بهذا الشهر الكريم

لكن يبدو ان الحكومة مش عايزة تسيبنا نفرح بشهر واحد طول السنة

فاجأتنا بإحالة إبراهي عيسى لمحكمة الجنح!!!

زية زي ممدوح إسماعيل بالظبط...

هناك عريضة بالفعل تجمع من أجل الإفراج عن إبراهيم عيسى

العريضة بها 340 توقيع..وهو رقم اكثر من الهزيل

ارجو من الجميع نشر أمر العريضة و التوقيع..

العريضة هاهنا

تفاصيل الإحالة موجودة في أبناء مصر

لمن يريد المتابعة

كل عام وانتم الى الله اقرب

وعلى طاعته أدوم

أخيرا بقى عايزة اقول لكل زائر طل عليا هنا

أمانة في عنقك يا أخي الزائر الكريم

ان تدعو لمصر في قيامك هذا العام

ادعوا لهذا البلد الذي لم يعد امينا على اهلة و ناسة

إدعوا لمصر ان يخلصها الله من هذه الغمة وان يبث في أهلها الشجاعة والجرأة

ادعوا لمصر كي يفك الله اسر اهلها من سلاسل الخوف على لقمة العيش و الجبن

كي يعلم الجميع ان الرزاق هو الله , وانه لا راد لقضائة..

وان للحرية ثمن لابد ان يدفع..

وان شهدائنا في الجنة حقا..وان الجنة سلعة غالية

لابد ان يبذل في سبيلها كل نفيس و غالي

يا مصر..أشهد الله اني احبك..ويعز علي فراقك

و يؤلمني رؤياكي جريحة مهترئة الثياب

اللهم هون علينا مصائب الدنيا

و ارزقنا من حيث لا ندري ولا نحتسب