يا ولاد بهية

يا مدونين

يا ولاد بهية

اظن الوقت جه ان كل واحد بقى يقول لنفسة

العمر واحد والرب واحد...والي هيبيع مصر النهاردة يبقى عيل وابن عيل

الصورة المعروضة دي....صورة إسراء..

إسراء بنوته في العشرينات من عمرها, وعضوة بحزب الغد

كانت صاحبة فكرة عمل جروب على الفيس بوك اسمة إضراب ستة إبريل

و الحقيقة ان كل من سمع عن الإضراب من غير السياسيين سمع عنه عن طريق إسراء

يعن البنت الي بميت راجل دي هي الي وصلت الرسالة لشعب مصر الي نايم على ودانه

واخره ينزل صورة في مارينا بشورت وجنبة كام مايوه بكيني

انا شخصيا قابلت كام بنت وولد من الجامعة الأمريكية يعرفوا عن الإضراب من خلال إسراء

إسراء استطاعت انها تشجع ميت الف واحد انه يشارك في الإضراب

دلوقتي إسراء مرمية في سجن القناطر بتاع النساء..

مش بايته في سريرها...,ما بتغسلش سنانها بالليل و بتنام في عنبر مليان قمل و براغيث

الأمن لو ما كانش مرعوب لدرجة انه يعملها على روحة ما كانش حط واحدة زي إسراء في السجن

إسراء مش محتاجة اكل ولا شرب ولا هدوم.....لكن محتاجة دعم نفسي و دعم معنوي

اهلها كمان محتاجين دعم نفسي ودعم معنوي .....

انا اتصلت بالمحامية الخاصة بيها وابلغتني ان اهلها زاروها النهاردة

و هعرف منها ازاي ممكن نقدم الدعم المطلوب لأهلها

كمان عايزين كلنا نتكاتف ونتبرع للجنة الإعاشة بمركز هشام مبارك

لإنه هو المسؤول عن حماية و متابعة المعتقلين في قضايا الرأي

يا مصريين يا مدونيين...دقت ساعة العمل...وراح زمن النوم

يوم ستة إبريل

ومر يوم الإضراب بنجاح وسلام

شوارع القاهرة كانت فاضية زي ما نكون يوم الجمعة

رمسيس والتحرير كانوا حرير

مش هبالغ واقول ان ماكانش فيه ولا عربية في الشارع

طبعا كان فيه عربيات..اقلهم عربيتي..

لكن ما حدش يقولي انه ممكن يقطع المسافة من ميدان لبنان لحد التحرير مرورا بجامعة الدول في

فترة زمنية لا تتعدى الخمستاشر دقيقة الساعة واحدة الظهر

ده الي حصل معايا والي بناءا عليه بقول ان الشوارع كانت فاضية والدنيا كانت هادية

لم يكن هناك مظاهرات في ميدان التحرير نفسة..اللهمم الا تجمعات بسيطة امام هارديز

فضتها بسهولة و بكفاءة صراحة قوات الأمن المركزي

انا شخصيا ما شفتش تطاول من الشرطة..وده احقاقا للحق

انا ركنت قريب من نقابة الصحفيين

و نزلت مع بنوته من أبناء مصر ووقفنا امام نقابة المحاميين وصورنا تحت نن عين الظباط

ولا حد قالنا حاجة..بالعكس..العساكر كانوا هما الي بيتفرجوا علينا مش احنا الي بنتفرج عليهم

مريم بنت عمران بتحلف انها شافت سواق تاكسي واقف جنب عسكري امن مركزي

وعمال يقوله " يا حمار الي بيهتفوا دول بيهتفوا عشانك مش ضدك

عشان رغيف العيش الي مش لاقينه وكيلوا الزيت الي بقى بعشرة جنيه"

الناس حولين النقابة كانوا بيقدموا رجل ويؤخروا عشرة

عدم اعتداء الأمن عليهم بالضرب الى حد ما مطمنهم انهم يفضلوا واقفين

لكن قلبهم مش مطاوعهم يدخلوا النقابة

كمان كان فيه على سطح النقابة ناس ياما

يجمي خمسين او ستين واحد فيهم ستات كتيير قوي

والمشهد الغريب انهم كانوا على كل لون با بطستا

واحدة منتقبة لابسة اسود كانت عمالة تشوح بإيديها بمنتهى القوة من فوق سطوح النقابة

عرفت وقتها انها بتهتف لإنها منتقبة فبقها مش باين

ما عدا شوية الناس الي عند النقابة دول ما كانش فيه حد في البلد

المحلات كانت هادئة تماما..بس أعتقد ان ده نهارا لكن بالليل الوضع هيتغير

ولا الغبار بقى...يا ساتر

كان لعنة النهاردة..الجو فجأة قلب قلبة سودا

بس ساعدت على ان الناس تفضل في بيوتها

التجربة كانت جيدة...او بدائية لكن ناجحة

حققت الغرض المطلوب منها في وقته

عقبال التجربة التالية..لكن بيتهيألي ان الشعب لسة شوية عليه

الرك دلوقتي على موظفين الحكومة...هما الي في ايدهم التغيير

لإنهم اكتر ناس مضرووين..القطاع الخاص الى حد ما مش حاسس بنفس القدر من الإستغلال

لذلك كان اقل انضماما...

لعل بكرة افضل من النهاردة

عموما يوم ستة ابريل خلص

و كل إضراب وانتو طيبين

6 إبريل يا قاتل يا مقتول

بصوا بقى على رأي رائدة الفكاهة والمجدعة المصرية نوارة نجم

هالله هالله على الجد والجد هالله هالله عليه

احنا بالصلاةُ على النبي كده محشورين في رقبة قزازة

مليانة قطران و زقت وبلا ازرق...

دماغنا محشورة في رقبتها ومش عارفن نطلع نتنفس هوا نضيف

الحكومة دي خلااااااااااااااااص جابت اخرها

مش كفاية انها فاشلة..وان فشلها مش بس بان ده خرب بيوتنا

لا كمان بجحة..والبجاحة والبكاسة دي بقت ظل يمشي جنبها على الأرض

البجحا هاريينا اعلانات على الدش...الدش يا عالم عن الضرايب..كإننا مش هنعرف نهرب من قرفهم

عايزين حتى سواق التاكس والحلاق يدفع ضرايب

والي عنده شقة عايش فيها مع الفاميليا ابوه جابهاله ايام العز

يقاسم الحكومة فيها ويعتبر روحة مأجرها منها (رغم انها تمليك)

يعني ناقص يشاركونا في الهوا الي بنتنفسة

طيب وان حد فتح بقة يقولك ايه ما العالم كله على كده

ده اموريكا ..اموريكا يا عالم..بيدفعوا ضرايب 40%

واحنا يادوبك بنقولكوا عشرين في المية بس

طب يا سيدي خليك ورا الكداب

عمال تقولي هات هات هات..خدت انا بقى منكو ايه

خدنا الصلاة على النبي ومفيش احسن منها في الدنيا

طيب طالما انتو معتبرين امريكا دي هي القران الي نزل من عند ربنا

نمشي بقى وراها...ادونا خدمات زي امريكا

بلاش..وفرلي اكل زي امريكا

امريكا بتعفي المواد والسلع الغذائية لحياة الإنسان اليومية من الضرايب

يعني مفيش ضرايب على الزيت ولا اللبن ولا السكر ولا اللحمة ولا الفراخ

ولا الرز ولا العيش ولا اي اكل يومي وضروري للنمو

يعني ارخص حاجة فيها الأكل

احنا بقى رغيف العيش الي يتاكل بقى بخمسين قرش

وقزازة الزيت بقت ب12 جنيه

ملح كوكس ملح الطعام الي بنحطة على السفرا

مستورد من النمسا...مصر الي عندها بحرين بطول البلد وعرضها

بتستورد ملح...ملح يا ناس من النمسا

النمسا الي هي بلد معندهاش بحر اصلااااااااا

تخيلوا...بلد داخلية مفيهاش ريحة المية المالحة...تصدر لينا ملح

واحنا الي عندنا بحرين نستورد ملح من النمسا

طب اقول ايه بس حسبي الله ونعم الوكيل

بلاش...القمح الي النهاردة مش لاقيين منه نتفة

و هننزل الجيش عشان يحافظ على الأمن الغذائي

من كام سنة قالك احنا مش محتاجين نزرع قمح

يا جماعة القمح غالي..وتكلفته عالية..ومالوش لازمة

وامريكا بتعملة ارخص بكتير

احنا نزرع كنتلوب متسرطن..ونستورد القمح

الفواكه الي قرفونا بيها بتاخد مية بدينها..رغم ان القمح ما بيحتجش مية كتير

الحكومة الرشيدة بقى...بتشتري من الفلاحين اردب القمح بتلتميت جنيه

مع ان تكلفة استيراد القمح من امريكا بتقف بحوالي 100 دولار للشحن فقط

غير تمن الإردب نفسة

يعني جع بمصاريف نقل اردب القمح تساوي ضعف تمن زراعته في مصر

والحكومة تستخسر في الفلاح المصري انه يبيعه بسعر عدل

وتشتريه منه بالبخس..وترجع بعد كده تشتريه بالغلا والكوا من بره

لو قعدنا نتكلم عن اداء الحكومة

شرايين مخي هتضرب...بجد شرايين مخي هتضرب

اصل الواحد يستحمل فساد اه...لكن فساد وغباء ده بقى كتير قوي

اللذيذ بقى اني كل ما اكلم حد عن الإضراب يقولي يا شيخة ولا حد هييجي

هتلاقي في الأخر نفسك لوحدك

انا بقى هضرب ولو كنت اخر حد في مصر

الي مش هيقف النهاردة لنفسة يبقى يستاهل حسني مبارك يديلة على نافوخ الي جابوه

احنا عاملين زي اليهودي الي فضل يدعي ربنا انه يكسب اللوتريه منغير ما يشتري التذكرة

ربنا قال لا يغير الله ما بقوم حتى يغيروا ما بأنفسهم

العمر واحد والرب واحد..واحرص على الموت توهب لك الحياة

الكلام اللطيف ده بقى جه وقت استخدامة وتطبيقة

ونطلع برة كتاب المطالعة ده بقى

أشوفكوا ان شاء الله يوم ستة ابريل

عجبت لمن لا يجد قوت يومه ثم لا يخرج بين الناس شاهرا سيفه"ه"

كلمة لأبي ذر الغفاري

هوامش

تحديث: هغيب اسبوع لسفر طارئ

راجعالكم في اسرع وقت ان شاء الله

و لما ارجع هرد على التعليقات

أشوف وشكم بخير

************

ماذا حدث للمصريين

كتاب اكثر من رائع لكاتب و فيلسوف و محلل غاية في الإبداع هو جلال أمين

ملحمة لغوية وادبية و فلسفية لا نملك الا ان نتوقف امامها فاغري الفاه اندهاشا واعجابا

********

فيدل كاسترو تنحى عن السلطة كي ينصب اخاه بدلا منه

(هو كاسترو مالوش ولاد رجالة ولا ايه!!!)

كاسترو البالغ من العمر 85 سنة, و ظل يحارب منذ 53 دفاعا عن الدستور!!!

عمل مع جيفارا ثورة لطيفة تحت مسمى حركة 26 يوليو

(مش عارفة ليه الشهر ده ما بيريحنيش)

بعد ما بلغ من العمر ارذلة تنحي عن السلطة كي ينصب اخاه

البالغ من العمر اكثر من 75 سنة

هل حقا العرب فقط هم من لا يتعلمون؟؟؟؟

**********

شاب وجد جثة في صندوق القمامة فأبلغ عنه

ليتحول الى قاتلة ثم يمكث في السجن ثمان سنين

ليدخل القتيل الذي سُُجن لقتله نفس الزنزانة زميلا له

يا ترى ده فيلم هندي ولا انا الي بهييس؟؟؟

********

أعضاء مجلس الشعب يتبادلون الضرب تحت قبة البرلمان!!!

********

75% من الإستجوابات المقدمة من أعضاء مجلس الشعب لا تناقش

تحت قبة البرلمان بالمرة, والإستجوابات تتم اختيارها للنقاش انتقائيا!!!

********

سعر زجاجة الزيت بلغ 9 جنيه و نصف, كما سيتم الغاء العيش المدعم من فئة الخمسة قروش

ابتداء من يوليو القادم.

سعر البنزين سيرتفع مرة اخرى ابتداءا من شهر يونيو القادم

طبق الكشري اصبح بخمسة جنيهات

سندوتش الفول بلغ سعره خمسة و سبعون قرشا

*******

ثمن طن الحديد ارتفع من 1200 جنيه الى 4400 جنيه و يتوقع ان يصل الى 5000 في نهاية العام

********

أحمد عز عضو مجلس الشعب هو محتكر الحديد الأول

في مصر , و هو أيضا عضو الحزب الوطني الذي يمثل الحكومة

والتي تقوم بإستهلاك 80 في المئة من إجمالي انتاج الحديد في مصر

يا ترى فيه حد غيري في الحكومة الرشيدة ملاحظ ان الشعب له عنين!!!

********

يا ترى الحرافيش لما يثوروا ستكون ثورتهم ضد من ظلمهم حقا

ام ضدنا نحن؟؟؟

{و ما كان ربك بمهلك القرى بظلم وأهلها مصلحون}

صدق الله العظيم

انهم أناس يتطهرون

تصّر الحكومة أن تطير البرج الباقي في يافوخي

بغباء وإصرار أحمق تصر الحكومة على لا منطقة الوقائع و تقنعك بسماجة لزجة ان هذا هو المنطق السليم

و ما انت الا احمق و متخلف و غير مدرك لطبائع الأمور لهذا لا تدرك الحق حين تراه

تماما كما كان قوم لوط يقولون لشعبهم أخرجوا ال لوط من قريتكم انهم أناس يتطهرون

اصبحت الطهارة عيب و نقيصة تؤدي الى طرد صاحبها, في حين النجاسة هي القاعدة السليمة

كلما فتحت وسيلة اعلامية تمولها الحكومة النظيفة تنهال على أم رأسي دفقات من الكلام الفارغ

أفتح التلفاز فأجد إعلانا غريبا عن شاب جالس في قهوة يلعب الطاولة و يحدثة صوت مستفز جدا كأنه يربيه

" إنت يا بني قاعد بتعمل ايه

الشاب يا ولداه يقول ردا منطقيا جدا, انا مؤهل عالي و مش لاقي شغل

يرد الصوت يا أخي ما تقوم تشتغل اي حاجة مش احسن من قعدتك على القهوة

فيرد الشاب بقولك مؤهل عالييييييييييي انت عايزني اشتغل عامل في مصنع

يرد الصوت بأريحية و تحدى تثير الجنون, و ماله العامل في المصنع

مش احسن ما انت عاطل و بتاخد مصروفك من ابوك

فينظر الشاب بحسرة و يقول بس مين هيجوز بنته لعامل في مصنع

فيرد صاحب المنطق الفتاك, ومين هيجوز بنته لعاطل

و يصبح هذا هو حل الحكومة النظيفة المعزة لشعبها

بعد ان تصاعد الدم الى رأسي وخفت على عيني من الإحتقان

قررت غير مأسوف عليه ان اغلق هذا الجهاز الغبي

و قلت ليس أفضل من الراديو فهو أصل التميز الإعلامي المصري

فتحت الراديو يا سادة يا كرام على إذاعتي المفضلة

الشرق الأوسط, وبما أني شرق أوسطية قديمة

فإنتفخت اوداجي و إشرأبت اوصالي و نظرت للتلفاز بتعالي قائلة

حكومة نظيف لن تلوث هذه المحطة الرائدة

و كان بالراديو برنامج عن الهجرة

وكان الضيف شخصا من الحزن الوطني لا اعرفه

و بدأ هذا الفذ يتحدث الينا عن اسباب الهجرة فقال البطالة و سؤ الدخول

و إرتفاع الأسعار ثم قال الحل اللوذعي

من أسباب الهجرة الغيرة وان الشباب الحاصل على مؤهل عالي

يرفض ان يعمل في مهن بأقل من شهاداتهم

كعمال او سائقي ميكروباصات او فنيين وخلافة

فقالت المذيعة لكن يا أستاذ فلان دول معاهم شهادات عليا

فيرد العبقري سيد شباب بنها

بأن الشهادة دي شكل إجتماعي عشان يتجوز بيها

هما مش أهلة فرحوا بيه وهيصوا و زغرطوا وقالو خلاص ابنهم معاه شهادة كذا

خلاص بقى الشغل حاجة تانية

و انتهى رد هذا الفرد اللوذعي لإني إنتابتني وقتها حالة من الضحك الهستيري

أعقبه دخول الست الوالده بالبسملة والحوقلة

بعد أن رأتني في حالة الهبل السالفة الذكر

طيب حد يفهمني...هل الشهادة من مطلبات الزواج

هل مثلا لا يصح عقد الزواج الا بشهادة جامعية!!!

و هل تأخذ الحكومة من جيوبنا مئات الألوف لكي تعلمنا تعليما عاليا

عشان نتجوززززززززز!!!!!!!!1

طب ما كانوا وفروا الفلوس دي و بقينا كلنا من حملة الدبلومات و هنضطر برضة نتجوز من بعض

ولما هما عايزين عمال, بيدخلونا كليات اداب و حقوق وطب و تجارة ليه

ولا الحكومة عايزة سواقين ميكروباص بيقرأوا مسرحيات موليير و متطلعين على فلسفلة فولتير

او يمكن يكونوا دكاترة عشان الراكب من دول ياخد بحق الأجرة إستشارة طبية على الماشي

ويبقى كل ميكروباص مكتوب عليه بقى تخصص السواق

إمبابة-حقوق, او رمسيس طب و هكذا

يعني بيخرجوا سنويا مليون خريج جامعي, عشان يشغلوهم فنيين و حرفيين

طب ما كانوا خرجوا عشرة الاف خريج بس سنويا

والباقي يتوزعوا على التعليم المهني والحرفي

وفلوس ده تغطي ده

ولا هو ودنك منين يا جحا

يعني هو الحرفي ولا الفني مش هيتجوز

و ايه دخل الجواز أصلا بالموضوع

ما هو لو دكتور وبيشتغل بدل الطب فران

برضة محدش هيجوزه بنته

الحكومة اللوذعية حولت قضية البطالة و سوء إستخدام الكفاءات الى انها

ازمة طبقية في المجتمع المصري, إحنا الي متكبرين و متعالين ومش عايزين

نرضى بقليلنا, وعشان كده الحكومة مضطرة تجارينا عشان نتجوز

فيه واحد من الموظفين في الضرائب العقارية

قالي و هو بيغلي من الغضب

الحكومة الي بتحل مشاكلها بالتوك توك

مش هتنفع تحللنا مشكلتنا

الراجل ده.....عبقريييييي

كل عام وانتم بخير

بقالي كتيييييييير ما كتبتش في المدونة

اخدني شغل الأرض والعمل مع الفريق الرائع في أبناء مصر

الإحتقان الحاد الي كان جوايا والي كان بيتفرغ بضربات وخبطات سريعة وقوية على لوحة المفاتيح

والتي نفست من خلالها عن الغليان بداخلي في بوستات عديدة وملخبطة قل بشدة

قل واختفى..و بقى مكانة طاق بناءة شرهة للعمل الميداني

للإحتكاك بالناس ولمس معاناتهم

لتوحيد طاقة الغضب من اوضاع البلاد المتردية مع طاقتهم و خلق موجات خلاقة

السعادة الغامرة التي انتابتني بعد ما رأيت بعيني موظفي مصر يغيرون وجه مصر

بجرأة و انتظام وأناقة لا مثيل لها

اخذتني الحياة الميدانية, وانشغلت بسعادتي الجديدة عن الكتابة او التدوين

و حمدت الله اني لا امتهن الكتابة وإلا كان زماني على الرصيف من زماان

لكن المعايدات الرقيقة قوي الي جاتلي من الأحباء في التدوينة السابقة

ذكرتني ان لي احبة التقيت بهم على هذه المدونة

لم اعرفهم من قبل الا من خلال هذا العالم السحري الأخاذ

أحبة اشتقت اليهم, و افتقدتهم وليس لي منفذ اليهم سوى هذه المدونة

لهؤلاء أقول كل عام وانتم بخير

كل سنة وانتم بخير و سعادة وهناء و عطاء

كل سنة ونحن اصدقاء عبر الأثير

اصدقاء الى الأبد ان شاء الله

هما المصريين قلبهم قاسي علينا كده ليه!!!!!!!!!!!

هما المصريين قلبهم قسى علينا كده ليه

الجملة القاتلة دي..قالتهالي نعمات سمير جبر من كفر العلو

نعمات ست معاها بكلريوس تجارة

و عندها ولدين زي القمر....كانت متجوزة راجل بيجري على اكل عيشة و عيشها..

حب يسترها و يستتها...قام اشترالها حتة ارض في كفر العلو من صاحب حيازة بالي معاه كله

باعت الي وراها والي قدامها و حبت تسكن و تتستر هي والعيلين في ارض بتاعتهم و بيت ملك

عشان لو جار عليها الزمن تلاقي حيطان تتاويها...و ضل راجل يحميها

استلفت من طوب الأرض عشان تشتري حتة الأرض...و دلت اخواتها على حلوان عشان تتونس بالأهل

و في ليلة من ذات الليالي جالهم رسول من رسل الموت يخبرهم ان بيتهم الحكومة عايزاه

هو حد يقدر يكسر للحكومة كلمة....الحكومة عايزه الأرض يبقى تتاخد الأرض

الراجل الي هو السند والضهر للست دي...لما عرف الخبر طب ساكت

بقى الأرض الي شقي و تعب و اتمرمط عشان يشتريها و تبقى سند ليه ضد غدر الأيام

تروح منه كده في غمضة عين..,يدوله بدالها 2500 جنية!!!!

الراجل ما استحملش و راح عند الي لا يغفل و لا ينام..و فات نعمات

لوحدها مع الطفلين اليتامى دول...الي اصبحوا مهددين بالطرد

لكن الحكومة ما كفهاش وفاة الراجل...و قررت انها تبعت موظف مهمل

موظف ما كلفش خاطرة انه يدخل بين غيطان القصب و يعد البيوت الي في الأرض الي هتاخدها الحكومة

و اسقط في العد بيت نعمات.....سهوا اوعمدا مش هتفرق

المهم انه معدوش...., و محدش عرف عن بيتها حاجة...

و في ساعة فجرية...و يا دوب عينيها بتغفل...و بدأت تدوق عينيها النوم بعد يوم شقا طويل قضته كله سعيا ورا

رزق العيلين الي طلعت بيهم من الدنيا

لقت زوا الفجر جولها مع انها لا عمرها اشتغلت في السياسة ولا تعرف عنها حاجة

فجأة....دخل بيتها و خدرها رجالة اغراب...شالوا ابنها من فرشتة ساعة فجرية في ليل رمضان

و رموه في الشارع....ببجامته...منغير حتى ما يمهلوه يلبس شبشبة

و جرجوا امه و رموها في الشارع جنبة

يصرخ الطفل بحثا عن اب يرعاه ولا عم يحوش عنه قسوة الحكومة...ما يلاقيش غير بلدوزرات هدت بيته و احلامة

قدام عينيه....

نعمات قالتلي لما نزلنالها مع وفد ابناء مصر بقى احنا لو يهود كانوا عملوا فينا كده

هما المصريين بقم بالقسوة دي.علينا ليه

هو احنا مش بشر زييهم....

نعمات صرخت فيا و قالت...يعني احنا نعمل ايه..انا طول الليل ابني يكح من النزلة الشعبية

البرد كل عضمة..., دق صدرة...,وانا لا حول ليا ولا قوة...

لا عارفة اعالجة..ولا قادرة اصرف عنه البرد...منك لله يالي ظلمتنا

كل مسؤول همة بس الكرسي الي قاعد عليه

يجي الريس يشوف شعبة...ده احنا لو يهود ما كانوش عملوا فينا كده

جمعية رسالة بالتنسيق مع ابناء مصر نزلوا لأهالي كفر العلو بقافلة طبية...

و حصروا الأمراض الموجودة و وفروا العلاج الي يقدروا عليه

نعمات قالتلي و عنيها مش مصدقة الي بيحصل و ان فيه ناس مش في السلطة جاينلهم

ده الواحد زي ما يكون لقى المصريين تاني

اتاري مصر لسة بخير

كلمتها خلتني مش عارفة اعيط و اخدها في حضني و اعتذرلها عن كل الي صابها

ولا اغضب من كل غاصب و ظالم و غاشم حط في زورها و صدرها المرارة دي

يا مصريين...الناس دول محتاجينكو...محتاجين طبطتكوا...

محتاجين حد يقولهم بردكوا واجعنا

قعدتكوا في الشارع قهرانا...و نفسنا لو نؤيكوا

الناس دول مكسوفين من قعدتهم في الشارع..

الي بيقعوا في الشارع هما الغجر الي كل شوية يتنقلوا في الموالد..لكن مش اصحاب الأطيان

و اصحاب الأملاك...الجيران كل ما يضيع منهم قرش

يجوا يفتشوهم...ما هم سبيل في الشارع

لو سكتنا على الي بيحصلهم...مش هنلوم الا نفسنا لو حصل منهم اي حاجة

الناس فاض بيهم....بلاش القسوة دي يا مصريين