بصوا بقى على رأي رائدة الفكاهة والمجدعة المصرية نوارة نجم
هالله هالله على الجد والجد هالله هالله عليه
احنا بالصلاةُ على النبي كده محشورين في رقبة قزازة
مليانة قطران و زقت وبلا ازرق...
دماغنا محشورة في رقبتها ومش عارفن نطلع نتنفس هوا نضيف
الحكومة دي خلااااااااااااااااص جابت اخرها
مش كفاية انها فاشلة..وان فشلها مش بس بان ده خرب بيوتنا
لا كمان بجحة..والبجاحة والبكاسة دي بقت ظل يمشي جنبها على الأرض
البجحا هاريينا اعلانات على الدش...الدش يا عالم عن الضرايب..كإننا مش هنعرف نهرب من قرفهم
عايزين حتى سواق التاكس والحلاق يدفع ضرايب
والي عنده شقة عايش فيها مع الفاميليا ابوه جابهاله ايام العز
يقاسم الحكومة فيها ويعتبر روحة مأجرها منها (رغم انها تمليك)
يعني ناقص يشاركونا في الهوا الي بنتنفسة
طيب وان حد فتح بقة يقولك ايه ما العالم كله على كده
ده اموريكا ..اموريكا يا عالم..بيدفعوا ضرايب 40%
واحنا يادوبك بنقولكوا عشرين في المية بس
طب يا سيدي خليك ورا الكداب
عمال تقولي هات هات هات..خدت انا بقى منكو ايه
خدنا الصلاة على النبي ومفيش احسن منها في الدنيا
طيب طالما انتو معتبرين امريكا دي هي القران الي نزل من عند ربنا
نمشي بقى وراها...ادونا خدمات زي امريكا
بلاش..وفرلي اكل زي امريكا
امريكا بتعفي المواد والسلع الغذائية لحياة الإنسان اليومية من الضرايب
يعني مفيش ضرايب على الزيت ولا اللبن ولا السكر ولا اللحمة ولا الفراخ
ولا الرز ولا العيش ولا اي اكل يومي وضروري للنمو
يعني ارخص حاجة فيها الأكل
احنا بقى رغيف العيش الي يتاكل بقى بخمسين قرش
وقزازة الزيت بقت ب12 جنيه
ملح كوكس ملح الطعام الي بنحطة على السفرا
مستورد من النمسا...مصر الي عندها بحرين بطول البلد وعرضها
بتستورد ملح...ملح يا ناس من النمسا
النمسا الي هي بلد معندهاش بحر اصلااااااااا
تخيلوا...بلد داخلية مفيهاش ريحة المية المالحة...تصدر لينا ملح
واحنا الي عندنا بحرين نستورد ملح من النمسا
طب اقول ايه بس حسبي الله ونعم الوكيل
بلاش...القمح الي النهاردة مش لاقيين منه نتفة
و هننزل الجيش عشان يحافظ على الأمن الغذائي
من كام سنة قالك احنا مش محتاجين نزرع قمح
يا جماعة القمح غالي..وتكلفته عالية..ومالوش لازمة
وامريكا بتعملة ارخص بكتير
احنا نزرع كنتلوب متسرطن..ونستورد القمح
الفواكه الي قرفونا بيها بتاخد مية بدينها..رغم ان القمح ما بيحتجش مية كتير
الحكومة الرشيدة بقى...بتشتري من الفلاحين اردب القمح بتلتميت جنيه
مع ان تكلفة استيراد القمح من امريكا بتقف بحوالي 100 دولار للشحن فقط
غير تمن الإردب نفسة
يعني جع بمصاريف نقل اردب القمح تساوي ضعف تمن زراعته في مصر
والحكومة تستخسر في الفلاح المصري انه يبيعه بسعر عدل
وتشتريه منه بالبخس..وترجع بعد كده تشتريه بالغلا والكوا من بره
لو قعدنا نتكلم عن اداء الحكومة
شرايين مخي هتضرب...بجد شرايين مخي هتضرب
اصل الواحد يستحمل فساد اه...لكن فساد وغباء ده بقى كتير قوي
اللذيذ بقى اني كل ما اكلم حد عن الإضراب يقولي يا شيخة ولا حد هييجي
هتلاقي في الأخر نفسك لوحدك
انا بقى هضرب ولو كنت اخر حد في مصر
الي مش هيقف النهاردة لنفسة يبقى يستاهل حسني مبارك يديلة على نافوخ الي جابوه
احنا عاملين زي اليهودي الي فضل يدعي ربنا انه يكسب اللوتريه منغير ما يشتري التذكرة
ربنا قال لا يغير الله ما بقوم حتى يغيروا ما بأنفسهم
العمر واحد والرب واحد..واحرص على الموت توهب لك الحياة
الكلام اللطيف ده بقى جه وقت استخدامة وتطبيقة
ونطلع برة كتاب المطالعة ده بقى
أشوفكوا ان شاء الله يوم ستة ابريل
عجبت لمن لا يجد قوت يومه ثم لا يخرج بين الناس شاهرا سيفه"ه"
كلمة لأبي ذر الغفاري
11 comments:
السلام عليكم ورحمة الله
ازيك يا مها
اولا يسعدني انك وأخيرا طلعت من القوقعة وكتبت بوست جديد
ويسعدني كمان اني اول من يعلق عندك
تانيا بالنسبة لحكاية اعلانات الضرايب انا بشوف الاعلانات دي، وبالفعل غريبة انهم بيحطوها عالفضائيات
بس بتضحكني فعلا
اللي يشوفها يقول ماشاء الله البلد دي ماشية زي الساعة ما بتلخبطش فحاجة أبدا
اما حكاية امريكا والقمح والخ الخ، يعني هي تفصيلات بقت مملة بصراحة، هي الحكومات الغبية بتاعتنا تمسحت خلاص ما ينفعش معاها ولا أي شرح ولا أي تفصيل
ومش لازم تتعبي شرايين دماغك الجميلة والغالية علينا وتعرضيها لخطر الانفجار
بعدين تعالي هنا، انتي ازاي ما أصريتيش على عمو حسني يجي يحضر القمة
مش عيب كدة بردو، دي القعدة ما تحلوش من غيرو
يللا بسيطة ان شاء الله القعدة، قصدي القمة الجاية ينورنا بوجودو
تحياتي بقى
وريحي نفسك شوية
ملحوظة عجبني قول أبي ذر رضي الله عنه
ربنا يستر على شرايين دماغك
طب ولما تفرقع شرايين دماغك هنجى احنا هنا نقرا ايه
لأ بصى ... العبى فى اى حاجه الا شرايين دماغك
انا ناوى اضرب بس مش حابب اضرب لوحدى فى البيت كان افضل لو كلنا ضربنا فى ميدان التحرير فى قلب الجنينه اللى فى نص الميدان ونصرخ كلنا ونقول اااااااااااه
زى عادل امام ما عمل
سعيد جدا ان حضرتك رجعتي تدويني تاني
وازددت سعاده بمروركم الكريم عندي
......
حضرتك جبتي الخلاصه في مقولة ابو ذر
تحياتي
و
محبتي
بوست متوقع منك يا ألفا الجيل
ان شاء الله مش هاتكوني لوحدك ، بس عاوز أعرف المكان فين؟
تحياتي و تقديري الدائمين
هههههههههههههههههههههههههههههههههه
مين الى بيكلم بالأسلوب ده
أكيد كتبتبى البوست ده فى الطالبية صح
ههههههههههههههههه
بس برده احرص ع الموت توهب لك الحياة دى مها
وقول أبى ذر برده دى مها
لكن الى فوق والى تحت دى الحاجة مها الى بتقف بحرنكش على ناصية الطالبية
ههههههههه
المهم
بالرغم من انى مش متفائل وحاسس ان مافيش فايدة من يوم 6 أبريل لانه حوار فاكسان للعشوائية المستفحلة فى الموضوع ده
ولكن هاعتبره طرق لباب لم يطرق من قبل وخوض لتجربة جديدة
وأخذ بسبب من الأسباب
المهم الحكومة مش غبية الحكومة متبلدة مش خايفة مننا ولا احنا بنخوف
لازم نكون بنخوف وشكلنا وحش ومش باقيين على حاجة
مش باقيين على وظائف لا تليق
ولا بقايين على مرتبات لا تكفى
ولا باقيين على بيوت دون المستوى
ولا باقيين على ازواج وزوجات فقدوا الخصوبة
ولا باقيين على أبناء فشلة ومستقبلهم أفشل
علشان نخوف لازم يكون قلبنا ميت والدنيا تحت رجلينا مش فى ايدينا حتى
علشان يحصل حاجة لازم الحكومة تبقبى عارفة ان أي قرار أو حتى تصريح ممكن يولع البلد ويخرجها بره اللعبة
غير كده انسى
والشعب مش هايعمل حاجة ولا هايشارك فى الإضراب
نفس المناظر هما هما هايكونوا موجودين يوم الاحد
كان عنده حق الى بالى بالك
أو نشوف طريق وطريقة نجبر بيه الناس جبر وغصبانية انها تشارك فى العصيان المدنى
تحياتى يا أقوى عنكبوت قصدى يا سكوت
ههههههه
6ابريل حتى لو معملش حاجة للاسعار هو عمل حاجة واحدة انه قدر يجمع الناس على حاجة واحدة و هى تعنى ان الناس بدات تفوق و احذرو من ده لان دى معناها بداية تغير شامل للفكر و الوعى
حمد الله ع السلامة الاول
انا مخرجتش يا مها لما نشوف يحصل حاجة و لا لا
مودتى و احترامى
السلام علايكم
هي فعلا الحكومه فشلت في كل حاجة
حتي ازمة الخبز فشلت فيها
فعلا ربنا يكون في عون الشعب المصري
بيتهيألى مصر راجعة تانى لمكانها الطبيعى بعد مالناس بدأت تعرف معنى التعبير السلمى, سبنا بأه من أيام مظاهرات التخريب بتاعة زمان وبدأنا الحياة اليمقراطية السليمه
مش محتاجين كدب الوطنى أو نفاق الإخوان
عجبت لمن لا يجد قوت يومه ثم لا يخرج بين) الناس شاهرا سيفه)
والله الجملة دي معناها كبير قوي
شهيدة
شرايين دماغي هتروح خلاص
اجيب منين شرايين بعد كده...الشريان الواحد بقى بخمستاشر جنيه
يلا هيروحوا من ربنا فين
تسلمي يا اجمل شهيدة في الدنيا
---------------------
حزين
انا نزلت عشان اضرب في الشارع...
ما لقتش غير عفار وغبار و امطار
عموما الإضراب مجرد بداية الشارع جاي جاي
ربنا يستر بس من اليوم الي هيجي فيه يا عم حزين
----------------
عبد الرحمن فارس
احد فرسان هذا الزمان القلائل
عندك حق..قول ابا ذر جاب الخلاصة
بس يا ترى حد فينا سمعة او قراه..
يا ترى محتاجين حد ينشر قول ابا ذر في الشارع ولا لأ....
مدونتك من ارحب الأماكن يا اخي الفاضل
لذلك ستجدني دائما هناك
تحياتي و شكرا على المرور
---------------0
د. إياد حرفوش
اكيد انا مش لوحدي..كفاية ان فيه
ناس زي حضرتك..و زي كتير غيرهم
قادرين يشتروا اللحمة...و عايزين ينزلوا يتظاهروا عشان رغيف العيش يبقى حق للغلابة
طول ما فيه ناس كده يا دكتور اياد
هيبقى فيه امل
تحياتي وشكرا لمرورك
--------------
منذر الجن
انا برضة ببيع حرنكش على ناصية الشارع
اه يا ظلومتي ياني معاكو يا ولاد مصر
ماشي ماشي
يا سيدي انا مها بتاعة الحرنكش وانا مها الي بتتكلم بالنحوي
هو البني ادم ايه غير شوية حاجا فوق بعضها
عموما يوم ستة ابريل هو الي هيحدد ان كان فيه امل ولا لأ...وان كنا بنخوف الحكومة ولا لأ
وان غدا لناظره قريب
Post a Comment