Sunday, May 18, 2008

هشوفكو يوم الخميس الجاي ان شاء الله


تحديث: اولا فيما يتعلق بمحمد مرعي


احنا عرفنا هو في الفرقة الكام وجبنا جدول محاضراته


محمد من سكان ميت حبيب بسمنود


للأسف معرفناش نجيب عنوانة من شؤون الطلاب


شؤون الطلاب قالوا لرانيا زميلتنا في ابناء مصر وهي من سكان المنصورة


ان السجن بعت يخطر الجامعة بإن الطالب مسجون وهيتعمله لجنة خاصة


وهشام مبارك قالوا انهم عرفوا بوجودوا في السجن بالصدفة


وان السجن رفض يوديه الإمتحان يوم السبت


معرفش بقى معنى الكلام انهم رفضوا يعملوله لجنة خاصة ولا ايه بالظبط


على كل انا بتابع مع هشام مبارك وان كنت الحقيقة مش عارفة ايه الي ممكن اعملة


""""""""""""""""""""""""""""""


يوم الخميس القادم الموافق 22 من مايو 2008


هيكون حفل توقيع كتاب مدونات مصرية للجيب


اول خطوة في طريق سعة انتشار الصحافة الشعبية


و جعل كتابات المواطنين مباشرة في إيد القراء


منغير ما يتحكم فيها رئيس تحرير له توجه او كاتب مهم يختار


او بعد سياسي او ديني, كتابات من الشارع وللشارع


كتابات ناس ما اهتمتش مين الي هيقرالها بقدر ما اهتمت تخرج الي جواها


واتاري جواها كنوز, كنوز قدرت في مدة قصيرة تهز عرش وحوش لابدة


و تصحي شعب كنا فاكرينه مات, اتاري لسة فيه دم بينبض


و لإن البركة في الشباب على رأي إعلانات روتانا


فإن اتنين من شعراء المدونين الي في نظري الشخصي من اكثر الشعراء ابداعا


تحولوا من المتفرجين لعالم التدوين الى صناع الحدث


اخذوا زمام المبادرة و حطوا اول طوبة في طريق نشر ثقافة التدوين


استثمروا فكرة روايات مصرية للجيب والي موجهة في الأساس للشباب


و صنعت بحجم صغير كي يسهل حملها و نشروا على غرارها مدونات مصرية للجيب


أحمد مهني (واحب ان اناديه حزين) واحمد البوهي (صاحب مدونة انكسارات)


استثمروا ايام وشهور في نشر الفكرة بين المدونين بشكل شفهي


ثم الإطلاع والتصفح لمئات المدونات سواء الشخصية او السياسة او الفنية والأدبية


و استقروا في النهاية على تقسيم الكتيب الى ثلاث اجزاء


جزء سياسي وجزء فني وجزء شخصي


الفكرة مازالت وليدة, لكنه مولود غاية في الرقة والعذوبة والنقاء


مولود ان لم يحمل صفات الجمال الإبداعية الرسمية من عيون زرقاء وانف مستقيم


ولون مرمري, فهو بالتأكيد يحمل صفات الجدعنة الخالصة بتاعة ولاد البلد


يحمل خفة الدم المصرية وهي بتتريق على نفسها و تضحك لحد ما تدمع


يحمل البعد السياسي الي مش فارق معاه نفاق لإنه مش باقى على حاجة


يحمل التجرد الذاتي لناس بتستعرض حياتها الشخصية على الملأ لكن في السر


بعيدا عن الأقارب والأهل والأصحاب الي لو عرفوا خبايانا يجرحونا


و استبدلوا بيهم عالم افتراضي من القراء مش هيتكسفوا يشرحوا نفسهم قدامهم


الكتاب عبارة عن مشروع طفل عبقري وغاية في الشقاوة وخفة الدم


قادر على جذب مئات الشباب الى شاشات الكمبيوتر او الى المكتبات لمعرفة كلام الشارع


يوم 22 مايو هو يوم هام جدا وخاص جدا لكل مدون


فلو لم يجد انتاجه في هذا الكتاب (الكتيب) فهو على الأقل مشارك


في هذا الحدث لإنه لو لم يدون لما وجد من الأصل مدونات مصرية للجيب


انا شخصيا مليش بوست او تدوينة في هذا العدد


لكن اشعر بشدة ان هذا الكتيب هو جزء مني
يكفي انه يحوي بين طياته الكثير من العالم الذي بهرني
وأمتعني
يا ريت اشوفكو كلكو هناك

12 comments:

kol-eldonia said...
This comment has been removed by the author.
kol-eldonia said...

bgd wahsna kalmk ya maha we bgd haga gamda gedan en ykon fe ketab gamel zy da we ely bgd hayh22 nagah gamed 3lshan howa haga sahla we el nas bthb el haga el sahla 3lshan ehna et3wdna 3la el molkhsat khalas we da ely bgd ha22 nagah gamed le ketab (3lshan matdrbsh 3la afak)
we fe brdo video gamed ana hato 3andy 3la el blog 3yzek teshofeh we te2oly ray2ak feh
shbab gamed gedan ely 3mleno shofeh we mestany radk

مروة الزارع said...

هحاول أجى عشان أشوفك يا جميل

البتاع said...

بغض النظر عن اللى انتى كاتبه عنه
تقريبا هو حد عاوزاه يطلع من السجن على حسب قرايتى السريعة ماجابت
بس انا حبيت اعدى ارمى السلام واجرىىىى



وحشتينى يامذة

- مدونة لساني هو القلم - عبدالرحمن فارس said...

شكرا على التحديث المهم جدا

ياسر سليم said...

بما انى راجل متغرب

عايز احصل على العدد الاول .. هيبقى نازل على مدونة معينه ؟

ولا استنى لما ارجع مصر بقه وخلاص ؟

Dr. Eyad Harfoush said...

عزيزتي سكوت هنصوت
أجمل الأمنيات بنجاح التجربة الرائدة ، للأسف عرفت عن موضوع الحفل متأخرا من الصديقة كلاكيت فلم أتمكن من الحضور، وفقكم الله جميعا في هذه المبادرة الطيبة
تحياتي و تقديري

سكوت هنصوت said...

كل الدنيا

مقصرة في حقك دايما يا مصطفى

امبارح شفت مندهش وكان نفسي اشوفك في الحفل...

عموما انا هبرشط عندك لحد لما اشوف الفيديو

منورني يا اخي الغالي
------------------------
مروة الزارع

انا كمان نفسي اشوفك

تسلمي

------------------------

البتاع

يظهر انك شفتي بس الجزء العلوي من البوست...

عموما انت كمان وحشتيني يا قمر

يا بت بطلي كلامك الي هيوديكي في داهية ده
:-)))))))))))))

وحشتني طولة لسانك

kol-eldonia said...

ana mahdesh aly 3la el ma3ad bet3 el hfla assn wla had sa2l feya law konot olto kont agy lakn ahm haga ana ba2a 3yzk thkly eiah ely hasl

سكوت هنصوت said...

عبد الرحمن فارس

لا شكر على واجب

-------------------

ياسر سليم

الطبعة الأولى نفدت من المكتبة يوم الإفتتاح

بس اكيد هتلاقي الطبعة التانية والتالتة موجودة في كل حتة في وسط البلد

عموما نسختك موجودة ومحجوزة ابعتلي بس لما تنزل مصر وهسلمهالك على طول موقعة كمان :-))

----------------------

د. إياد حرفوش...

كنت من اوائل الناس الي يهمني انهم يحضروا

لعله مفيش نصيب المرة دي

متأكدة انك لما تشوف العدد الأول من مدونات مصرية للجيب هيعجبك بشدة

و منتظرة قوي اسمع تعليقك وانطباعك

شهيدة said...

السلام عليكم
اول هام انا كتير كتير كتير اشتقتلك :)

تاني هام اشتقت كمان لكتاباتك

موضوع مدونات مصرية للجيب موضوع محمس كتير وصراحة غرت شوي لاننا هون ما عنا هالنشاط القوي بالتدوين، ولانو انا كمان مش عم بهتم كتير بالمدونة للأسف

على كل حال بتمنى كل التوفيق للمشروع ويارب العدد الجاي يكون فيه بوستات انت كاتبتها

على فكرة، تتذكرى القصة القصيرة اللي قلتلك عنها اني عم بكبتها اليوم حانشر جزء منها اذا بتحبي تنقدي اول تجربة الي بالموضوع

اما على الصعيد الشخصي :) فالحمدلله كل شي تمام ماشيين بقدر ما نستطيع حتى نخلص... التفاصيل منحكي فيها بس نلتقي ان شاء الله اونلاين

سلمي على اللي بالك بالك :)
سلااااام

أنا المقاوم said...

الأخ الكريم – الأخت الكريمة /

تدعوكم مدونة أنا المقاوم وفي أول أيامها على شاشات الحاسوب لمؤتمرها الأول
والذي بعناون:
غزة....إلى أين ونحن ....إلى متى!!؟؟
والذي سنناقش فيه الآتي :
لماذاغزة!!؟؟
غزة إلى أين.ونحن إلى متى.
وما واجبنا نحو غزة و الغزيين كمصريين و كعرب وكمسلمين.
بزايرتك أخي تدعم صمود غزة فلا تبخل على أخوك المسلم بهذه الزيارة.
موعدنا:اليوم الجمعه في تمام الساعة العاشرة مساءاًبتوقيت القاهرة.
تنويه:للإشتارك من فضلك سارع بإضافة هذا البريد على قائمتك حيث أن المؤتمر سيتم من خلاله
el.moqawem@yahoo.com
لكم جزيل الشكر و التقدير
حسن البنا
أنا المقاوم