Saturday, April 28, 2007

نهاية الفصل الاول

الساده الزملاء....
اسمحولي اخذكم في جولة سريعة و ملخصة لأحداث الشهرالماضي...
من حوالي شهر طرح الزميل العزيز حنتكلم اطروحة بعنوان اطلب اقتراحكم لنتعاون سويا..بمعنى اخر..هو ماكانش عارف احنا محتاجين ايه عشان حالنا ينصلح...لكن كان عنده قناعة ان ممكن يكون في حد في الكواليس عنده فكرة كويسة تنفعنا في الأيام العصيبه دي...التي نقع فيها بين شقي الرحى...ما بين امن الدولة او امن الأسرة...
المهم...حنتكلم اطلق الدعوة و لقيت وقتها مجموعة قليلة العدد من المؤيدين...و تم اول اجتماع بين المدونين بخصوص الافكار..الوارده والتي تراوحت ما بين الأعمال الخيرية التنموية ...متمثلة في الانشطة الإجتماعية والخيرية..أو الأعمال السياسية المباشرة متمثلة في التطاهرات والإعتصامات الخ من اعمال الدفاع عن الحريات بشكل مطلق...في اللقاء الأول...نجح دعاه الفريق الأول الراغب في اشراك الطبقات الفقيرة والمعدمة من ابناء الشعب المصري في انشطة تساعد على معاونتهم على الحياة في اجتذاب معظم الأصوات...في اللقاء الثاني مالت الكفة قليلا ناحية العمل السياسى المباشر...الا ان اوضاع البلد الراهنه لا تشجع على السير في هذا المضمار لذلك مالت الكفة مرة اخرى الى الأنشطة الإجتماعية التنموية.
طيب احنا في الاخر عايزين ايه؟؟
و طالبين ايه من المنضمين؟؟
اولا : احنا مقتنعين ان هدفنا هو التغيير السلمي المؤثر في حياة فقراء مصر..الذين هم وقود هذا البلد الحقيقي و قنابلة الموقوته
ثانيا: لا يوجد لدينا اي نوايا تخريبية او تحريضية تجاه البلد...هدفنا هو اتباع الطرق المباشرة والمشروعة تماما من اجل احداث تطويرفي مجتمعنا...( بمعنى احنا مش بتوع شتايم فش خلق, كل واحد حر تماما في راية ازاي ممكن يخدم البلد..بدون المصادرة على حق احد في ممارسة او ابداء هذا الراي طالما انه لا يضر اضرار مباشر باحد)
ثالثا: السياق العام لدينا يقوم على الديموقراطية الحقيقية...لا يوجد مصادرة على الأراء مهما كانت غرابتها..و سذاجتها..وفي النهاية راي الأغلبيه يسود بصرف النظر عن راي الفرد الشخصي.
هذه هي الخطوط العريضة...اما التفاصيل فسيتم الإعلان عنها في مدونة ابناء مصر عند الإنتهاء من بيانها الإفتتاحي انشاء الله...
اذا كنت من محبي المشاركة ...اما بالراي او بالفعل...فاهلا بك و مرحبا..كما ارجو تسجيل بريدك الإلكتروني لدي هنا حتى يتسنى لي الإتصال بك في اقرب فرصة ممكنة لنناقش الخطوة القادمة في اقرب فرصة.....

Saturday, April 21, 2007

ما بين نبيل لوقا بباوي ومعاوية بن ابي سفيان

قبل ما اقول اي حاجة احب اقول اني ضد اي تشهير او اهانه لاي من صحابة الرسول صلى الله عليه وسلم...واني مؤمنه تماما انهم جميعا رضوان الله عليهم...لكن كذلك كلي ايمان بانهم بشر يخطئون ويصيبون...ارجو من جميع القراء وضع هذه البدايه في الاذهان قبل قراءة المقال.
طيب اش جاب نبيل لوقا بباوي لمعاوية بن ابي سفيان...الحكاية ليها اصل...و عشان اتبع المرجعية احب اقول ان العهده على ما اقول ترجع على الدكتور طارق السويدان..في مجموعته احداث الفتنه الكبرى الي تناول فيها حقبة من اشد حقب التاريخ الإسلامي جدلا و نزاعا...لكن انا مش هتوهكوا في تفاصيل كتيرة....بإختصار كده...حدث نزاع شديد الضراوة بين قطبين من اقطاب الإسلام...معاوية بن ابي سفيان وعلى بن ابي طالب..رضي الله عنهما...كل واحد فيهم له حجة واضحة و مقنعة...وبالتالي انقسم الشعب الإسلامي الي قسمين...كل تبع مؤيده...بما في ذلك الصحابة...مجموعة كانت مع معاوية زي الزبير بن العوام...زوج السيده اسماء بنت ابي بكر...والسيده عائشة نفسها كانت من مؤيدي معاوية ضد عليى...والجزء التاني من امثال عمار بن ياسر كان مع على كرم الله وجهة..طيب كل ده معروف..فين الجديد...تعالو بقى نرجع شوية لورا ... ايام ما كان الرسول لسه حي يرزق...وكان المسلميين في المدينة بيسابقوا الزمن عشان ينتهوا من بناء المسجد النبوي...و كل صحابي بيشيل طوبة طوبة معدا شاب يافع السن بيشيل طوبتين طوبتين...لحد ما ضهرة اتسلخ والتراب ملا وشة و راسة...الشاب الهمام ده كان عمار بن ياسر...بن سمية اول شهيدة في الإسلام...يعني مأصل من بيت اصول...الرسول لما راي همته و حماسة في العمل ...نظر اليه ضاحكا...و قال له...ويحك يا عمار...تقتلك الفئة الباغية!!!!
الكلمة الخطيرة دي هي محور الموضوع كله...نرجع بقى للصراع القائم بين على و معاوية...طيب عمار في جيش على...لكن السيده عائشة في جيش معاوية...فتنه دي ولا مش فتنه...المهم الجيوش عماله تتلاقي في حروب دموية رهيبه...مالهاش نهاية...عمار وقتها كان عنده 90 سنه...طبعا دي فحد ذاتها معجزة...تخيلوا بن تسعين ماسك سيف و بيحارب عشان مقتنع بمبدا....
الجيشين عارفين مقولة الرسول في حق عمار...و كل واحد مستني انه يشوف يا ترى مين الي هيقتل عمار...النهاية انه في احدى المعارك...اعتقد انها معركة الجمل...قتل عمار بن ياسر من قبل جيش معاوية...تاتتتا...اظن بقة محدش له حجة...الامور وضحت...واضح جدا مين الي على حق ومين الي على باطل...لكن الأمر كان خرج من زمام العقل...احتاس جيش معاوية و ضرب حيص بيص....لكن معاوية رجل داهية...طلع على الناس بمقولة من اغرب ما تكون...قال..انما قتل عمار من جاء به...فما دام على بن ابي طالب دعاه في شيبته الي القتال ...فقد قتله اذا جيش على....الأعجب ان جيش معاوية صدق...المؤرخين ساعتها قالو...فوالله ما علمنا ايهم اعجب..هو في قولته ام هم في تصديقها....طيب اش جاب ده للبباوي...امبارح قريت عند نوارة حاجة مشابهة بتتكلم فيها عن المزعوم انه بيقول..ان الموانطنين بيحبوا التعذيب...عشان كده بيتعذبوا طيب مش بالذمة شايفين شبه ما بين المقولتين...

Tuesday, April 17, 2007

اسمحولي انقطكوا بسكاتي

معنديش حاجة اقولها...
وعشان معنديش حاجة اقولها قررت اني اوفر عليكو و على نفسي رغي كتير مالوش داعي
من عينة انا مش عارف انا بقولكو الكلام الفاضي ده ليه....
وحاسس بإحساس غريب و مش عارف اوصفة...
الى اخر الكلام السخيف بتاع الناس الساديين الي غاويين يعذبوا الشعب بكلام فاضي...
الحقيقة المرة...اني فعلا معنديش حاجة اقولها بدون اي اسباب سواء محترمة او غير محترمة...
لذلك اسمحولي اطبق الحكمة الصينية المصرية البالغة...
الي معندوش كلمة حلوة يقولها..ينقطنا بسكاته.....

Wednesday, April 11, 2007

عن لجنة المراجعة المؤسسية


اسمحولي النهاردة اخدكم في جولة ديموقراطية مبهرة على الأقل بالنسبة ليا...نتيجة لطبيعة عملي..حيث اعمل في جهة اجنبية تمارس البحث العلمي...ونتيجة لدراستي حيث اني من بتوع كلية العلوم..وطبعا انتو عارفين اننا بحكم الدراسة عالم لاسعة...فساعات بتبهرنا حاجات غريبة....للغير عالمين بطبيعة البحث العلمي..اسمحولي اشرحلكم بسرعة مبادؤه...اي تجربة علمية تقوم اساسا على التجربة فالمشاهدة فالإستنتاج...وطبعا اي تجربة علمية تقام على البشر...طبقا لنظم الدول المحترمة والتي تحترم شعوبها...فيجب ان يتم قيام الدراسة على الحيونات اولا...قبل اجراءها على البشر... بإستثناء التجارب الإجتماعية والتي يتم فيها دراسة السلوكيات الإجتماعية للأفراد فلا يحتاج الأمر الى تجربة الدراسة على الحيوانات...طيب فين المشكلة...المشكلة هي...ايه الي يخلى متطوع لا له في التور ولا في الطحين يقبل ان حد يجرب فيه اي حاجة بصرف النظر عن فايدتها للمجتمع؟؟ اساس الموضوع بدأ أثناء الحرب العالمية الثانية لما علماء هتلر بدؤوا يستغلوا المساجين واسرى الحرب في تجارب علمية مهينة للإنسان بدون مراعاة اي كرامة للبشر..فبعد الحرب و هزيمة هتلر قدم هؤلاء الأطباء الى محاكم عسكرية فيما عرف بمحاكم نورمبرج...و تم اعدام مجموعة من الأطباء..طيب فين الموضوع...الموضوع ان بعد المحاكم دي..
بدأ التوجه الى مراعاة حقوق البشر في البحث العلمي . و تم انشاء ما يعرف ب( institution review board) الي انا ترجمتة ترجمة معوقة الى لجنة القييم الؤسسي...طيب ايه دور اللجنه دي.؟؟؟ اللجنه دي المفروض انها تكون موجوده في اي مؤسسة بتمول البحث العلمي..عشان تضمن حقوق المتطوعين من البشر الاخلاقية...و بدا وضع نظم وقوانين للمتطوعين...يعني مثلا...لازم يكون فيه صيغة موافقة مكتوبة من المتطوع..تفيد انه فاهم كويس قوي ايه الي هيتم عليه و ايه نوع التجربة..و ايه هي الخطورة المتوقعة..الخ...كمان لازم يكون فيه تعويض للمتطوع مناسب...بدون ما يكون فيه استغلال..التعويض المادي لازم يكون على قد الألم الناتج...يعني مثلا لو هيتاخد من المتطوع عينة دم مرة..غير 5 مرات ..غير 10 و هكذا....كمان لازم يكون فيه احترام لخصوصية المتطوع...يعني مش المفروض ان اي حد و لا حتى الطبيب نفسة يعرف بيانات المتطوع..ولكن يتحول فورا الى رقم هو ده الي يتم التعامل من خلاله.... قائمة القوانيني الي بتحمي المتطوعين كبيرة لدرجة انها احتاجت مني الى شهر كامل 3 ساعات كل يوم عشان اراجعها...طيب فين الإبهار...المبهر اني حضرت اول اجتماع من اجتماعات اللجنه دي...شوفوا بقى الناس دي متحضرة ازاي.
اولا: انا كنت اصغر واحدة من المحكمين....و احدثهم تعيينا...يعني بيني و بين اصغر واحد بعدي على الأقل عشرين سنة
ثانيا: نظام الإجتماع الاتي ,,... اللجنه تكون من 15 فرد..من اتجاهات مختلفة..يعني اداريين على اطباء على سكرتيرات..الخ..الهدف هو تنوع الاراء والاتجاهات...فلا يدفع الحماس العلمي الأطباء مثلا الى هضم حقوق المتطوعين.
ثالثا : يتم اسناد كل دراسة مقدمة الى احد الاعضاء بالجنة يتم دراسة الملف حتى الإجتماع التالي ثم يطرح باختصار هدف التجربة و النقاط التي استرعت انتباهة في الملف..
رابعا: يتم عرض هذه النقط على اللجنه..و يفتح الباب للمناقشة...ثم يقوم فرد بتقديم اقتراح..مثلا زيادة مبلغ التعويض للمتطوع..يجب ان يدعم اي اقتراح من قبل فرد اخر في اللجنه قبل الموافقة على مناقشتة..فإن قبل عرض الإقتراح...يناقش ثم يعرض للتصويت ,,,ان قبل يبقى خلاص..و ان ما قبلش...ينطرح غيرة..لحد ما نوصل لحل.
بالبساطة دي....منغير ايه الي جاب العيلة دي هنا....او مش ناقص الا العيال كمان الي هيعدلوا علينا...ولا تضييع وقت فكلام فارغ...بجد كانت تجربة رائعة..وانا شخصيا استمتعت بيها جدا...استمتعت بحريتي كمواطن محترم بصرف النظر عن سني او مكاني...استمتعت جدا بنظرة الإحترام في نظر ناس انا شخصيا منبهرة بيهم...و الأهم اني اخيرا شفت يعني ايه ادارة الديموقراطية مش بس شكلها النظري....

Monday, April 9, 2007

بيت شعر عبقري

ذو العقل يشقى في النعيم بعقله و أخو الجهالة في الشقاوة ينعم
كل ما أتأمل البيت ده من الشعر أحس بجميل العرفان للشاعر الي الحقيقة مش عارفه هو مين... لكن اقول يااااااااااااااه ادي واحد عارف يوصف حالنا بصدق شديد...الناس الفقيرة الغلبانة...الي مش لاقية اللضا...بلاقي الواحد من دول عايش في خرابة..وعيالة حفيانين...وبياكل لقمة وعشرة لأ...يقعد طول النهار في سوق عشان حزمتين جرجير يبعهم وفي الأخر تيجي البلدية ترميله كل بضاعتة في الشارع و تبهدلة في الاقسام ضرب و مرمطة ويدفعوة كل الي كسبه طول الإسبوع غرامة عشان الجبان استجرى يقعد في الشارع يبيع...فاكر البعيد ان البلد كانت عزبة ابوه..من حقة انه ياكل فيها عيش....والجميل بقى ان الناس دي لما تسألهم ايه شكوتكم يبلموا ويتنحوا و يقولو مستورة الحمد لله....يا ترى ده رضا ولا غباء....في فيلم الإرهاب والكباب...المشهد العبقري الي عادل امام خلاص اقنع الحكومة بالإستجابة لطلباته...طيب ايه طلباتك.....يقوم يبص للمواطنين...هه طلباتكم ايه.....و فجأة بإقتدار...رائع ...تطلع اجمل نظرة غباء ممكنه.....احنا مالناش طلبات....حتى هو...الي كفران من كل حاجة في حياتة....مش لاقي حاجة يطلبها......امال انا مش عارفة اعيش حالة الرضا دي ليه....سؤال بجد محيرني
الواحد عايش مرتاح...ومعندوش ازمات طاحنة والحمد لله...قادرة اكل كيلو اللحمة الي بتلاتين جنيه...واقدر اقعد في كوفي شوب عشان اشرب فنجان قهوة بعشرة جنيه...و كل ما افكر في احوال البلد الاقي نفسي مش قادرة انفصل واعيش....احس بحالة غريبة من القهر....انا...الي المفروض في بقى معلقة دهب مقهورة...والغلابة الي مش لاقيين العيش الحاف....حاسييين بالرضا...توصفوا بإيه ده غير بالبيت العبقري الي كتبته في الأول....
ذو العقل يشقى في النعيم بعقله وأخو الجهالة في الشقاوة ينعم
....يا اما مويل الهوا يا اما موايليا ...طعم الخناجر ولا حكم الخسيس فيا ..

Saturday, April 7, 2007

حتى لا ننسى النكد

انا ملاحظة ان حس النكد عند الناس مش الي هو..زي ما يكون كده في شوية ناس (خونة) عندهم شوية سعاده..حاجة تقرف...طيب انا بقترح بقة اننا نقف قصاد القله القليلة المندسة دي ونعمل مؤتمر اسمه المنكدون الجدد...ونعملة دعاية تلفزيونية جامده قوي يكون شعارها..المنكدون يلتقون يتحاورون .. يولولون...من اجل مستقبل اطول للنكد..ونخلي رئيس المؤتمر المنكّد الأعظم ابراهيم عيسى حيث انه اصبح يتحفنا يوميا بمقال نكدي من ارفع طراز....يصول فيه و يجول بقلمة بين اوجة النحيب والولوه ولا اجدع ندابه فترب...وطبعا ده كله من اجل إثراء و تغذية جانب النكد عند الشعب المصري حتى لا ينسى دورة الرئيسي كمؤسس لفن النكد ... بالظبط كده زي ما زهير بن ابي سلمى اسس فن الإعتذار في الشعر...ونحافظ على دور الريادة وسط شعوب العالم المفرفشة الي ربنا ما اكرمهاش بالإطلاع على ثقافة النكد...احنا من الشعوب النادرة الي عملت للنكد نكت..عشان لما نمل من العياط...ننكد على روحنا واحنا بنضحك..كلنا فاكرين طبعا الست النكديه الي اتفقت مع جوزها يوم تنكد ويوم لأ فبقت تيجي على اليوم الي مفيهوش نكد و تجيب طبله وتلبس خيشة مرقعة و تطبل في البيت و عنيها بتطق شرار و تغني و تقول....بكرة النكد بكرة..يعني عاملة احتفال بحالة النكد الأصيل....عموما انا لما بحس ان شيطان النكد تملكني بتفرج على فيلم عربي مهيس...فقط لأكتشف ان الفيلم كله قفشات بتفكرني بحالة النكد الي سهوا نسيتها..كمان حكومتنا دايما مراعيه البعد النفسي الخاص بشخصية المصري..وان حياته لا يمكن تستقيم منغير الجرعة اليومية من الشاي والنكد..فعشان الحكومة تساعدنا اننا تحافظ على توازنا النفسي منغير ما نتعب...وفرتلنا اسباب دائمة للنكد...كده ما يبقلكوش حجة....اظن نكدت عليكو شويه...يلا اديكو خدتو بريك عشان تعرفوا ترجعوا للنكد بذهن صافي فتنكدوا صح....
الساده الأفاضل..تم اول لقاء بين المدونين المحبطين من الاعيب السياسة عند حنتكلم..انا كتبت تقرير صفير عن الأحداث هنشره هنا برضة...وهيبقى ليا تعليقات تانية بعدين..بس الأمانة تقتضر اي انشر نفس الكلام بدون تحريف على الأقل في الوقت الحالي..
1. لسادة الافاضل زوار مدونة حنتكلم...بما ان معظم الحاضرين في البوست الي فات محضروش اللقاء من اصله...فاسمحولي الخصلكم الأحداث بإيجاز. الي حضروا اللقاء تقريبا كله كانو :
1. حنتكلم
2. بن ناصر
3. فارس
4. سكوت هنصوت
5. شارم
6. احمد المصري
بالإضافة لمجموعة دخلت سياحة وخرجت تاني..زي المريب ...احترت معاك معاك انا..الي حيرنا كلنا معاه منغير مناسبه...سارة دخلت دقايق وخرجت..يبدو انها مشكلة شبكة..اما اماني فإعتذرت تماما من البداية...اذا صفصف اللقاء على السته الي فوق...طبعا كان في شويه امور تنظيمية تولاها بجدارة العزيز حنتكلم...من حيث شروط الكلام...و طريقة عرض الافكار...ما هو زي ما نتو عارفين احنا ملوك الهزار والفرفشة...وساعة الحظ ماتتعوضش...فطبعا اي كلمة تحتمل معنيين كانت بتدخلنا فقافية نكت....لولا حنتكلم ماكناش خرجنا منها ابدا ...وكنا قضينا الساعتين فساعة لقلبك...والملك الكبير في القصة دي هو العزيز ابن ناصر...الي ماطلعش لأبوه ناصر كشري وكلامة قليل..لا ربنا نفخ فغدة اللطافة عنده للصبح...بس الشهاده لله هو فعلا عنده حس دعابي عالي..وقدر يكسر شويه جديه الموضوع...وطبعا حنتكلم..ماداش فرصة للهزار انه يستشري...بإستثناء كده ...نقدر نقول ان التجربة كانت الى حد كبير ديموقراطيا ناجحة...قدرنا نقول اراء مختلفة منغير تجريح في اي حد...كمان كان فيه اختزال في عرض الأراء وده شئ رائع..يعني الي كان بيمسك الميكروفون...كان بيعرض رايه بسرعة واختزال ويسيبه للي بعده...حنتكلم كان اقلنا كلاما لكن اكثرنا تنظميا...كل ده عن الموضوع اما الإقتراحات نفسها فتراوحت ما بين الأتي...
• العمل الإجتماعي الخالص بدون اي شبهة سياسية...زي اي عمل خيري وخلاص..والفلسفة وراه ان الخير الخاص هيأدي في النهاية لخير عام..وبكده مش هنستفز السلطة فهيسيبونا نشتغل...نسبة الموافقة عليه كانت حوالي 20% فقط .و كان الإعتراض إزاي ننضف علبه كبريت جوة زريبة
• الإقتراح الثاني كان العمل الإجتماعي من خلال مؤسسة فعالة بالفعل..زي صحفيون بلا حدود او اي حزب موجود بالفعل..والموافقة عليه كانت حوالي 75% لكن بس على المبدأ اما اختيار الجهة المنظمة الي هننضملها فكان محل خلاف..انتهى بإننا اتفقنا نعمل بحث خلال الإسبوع عن الرموز الرئيسية المقترحة عشان نشوف ايها تناسب الأجندة الخاصة بينا
• اما الإقتراح الأخير..قكان اننا نظل مدونين بدون الإنخراط في اي جهة ممكن تسيسنا..ونمارس برضة العمل الإجتماعي منغير قولبة...ومش مهم التبعات..يعني مش مهم الحكومة تراقبنا او تقبض علينا مادمنا مؤمنين بالي بنعملة, وطبعا الإقتراح ده مالاقاش استحسان قوي..قكان نسبة الممؤيدين ليه برضة حوالي 20%.
إذا خلصنا في النهاية ان كلنا متفقين على الأتي
1. حكم الإغلبية هو الي هيسود بصرف النظر عاجبنا ولا لا...ده اساس الديموقراطية
2. فيه هامش واسع من حريه الحركة لكل فرد طالما انه في اطار المضمون العام
3. العمل الإجتماعي هو اساس الفتره الي جايه.
4. السياسة الهادئة اقرب الطرق لقلوب الجميع .
طبعا اجمل حاجة ان اللقاء اخد حوالي 160 دقيقة قلنا فيهم كلام كتير..فمحسناش ان الوقت ضاع هباء..المره الي جايه يكون نسبه الحضور اعلى وبالتالي افكار واراء اكتبر.....ده تصوري عن نتائج اللقاء..اتمنى اني اكون نقلتلكم صورة صادقة و محايده عنه..واشكرك يا تامر على الفرصة دي الي خلتنا نشوف نماذج مشرفة من الشباب...يا جماعة الي فعلا عايز يغير...دي فرصته انه يقول كلمة
سلام

Thursday, April 5, 2007

تصوري عن الحل

طيب محتاجة افكر بهدوء...حنتكلم اقترح كلام في منتهى الأهمية...لكن مش عارفة نبدأ منين...احنا محتاجين دراسات جاده و موضوعية لكل شئ مش هينفع نمشي بطريقة الهواه لازم نكون محترفين...انا مش مقتنعة بفلسفة الاهداف الشريفة انا رايي ان الي تغلب بيه العب بيه...يعني الغاية تبرر الوسيلة...من رايي ان المساله دلوقتي لازم تتلعب صح....التعديلات اتطبخت...والوريث اصبح قاب قوسين او ادنى...انا رايي ان لازم الشعب كله يتكاتف ورا حزب...مليان رموز حقيقة ...تقف قصاد الحزب الوطني...بحيث ان يكون فيه بديل حقيقي ملموس ومطروح على الجماهير...مش لازم يكون حزب مثالي بس المهم انه يكون حزب منضبط وفعال....الوضع الحالي يخلينا امام قلة من الاحزاب المطروحة...يا اما الغد...يا اما الجبهة الديموقراطية...يا امه الوفد..يا اما الإخوان...كل واحد من دول له ميزة وله عيب لازم يدرس بشكل تفصيلي المميزات والعيو ب وتقييمهم قبل ما ناخد اي خطوة...العمل الإجتماعي لازم يكون وراه هدف رئيسي انه يدعم بيه الحزب المختار....فيوصل للناس...يعني الحزب الي ننقية...ننضم للجان داخليه فيه تقوم بنشاطات محو اميه و طبق الخير...و رعايه مكفوفوي وخلافة...بحيث ان المواطن البسيط..يبدا يحس ان الحزب ده عمله حاجة...مش كمالة عدد....ده كله ممكن يتم من خلال كتيبة من المتطوعين زي جمعية رسالة الي انا منضمالها بالظبط...لازم كمان يكون فية كتيبة من الكتاب مغرقين البلد بانشطة الحزب...بحيث ان الشعب يسمع عن حزبين الوطني والحزب ده....بعد كده يجي دور قيادات الحزب...في انهم يدعو لأنفسهم بشكل موزع...و بعد خمس شهور نقيم النتيجة...ده تصوري عن الحل...يا ترى في نموذج تاني ..؟؟

Monday, April 2, 2007

رأفت الميهي...الفيلسوف الحشاش

امبارح دريم اتحفتنا بفيلم قنبلة من افلام رأفت الميهي...الفيلم قديم وشفتة زمان...بس معرفش ليه امبارح بالذات كنت بشوفة بعين جديدة...الفيلم هو خلطبيطة....الي ماشافش الفيلم لازم يشوفة والي شافة وزهقان منه...يا يستحملني يا يقراله حاجة تانيه على البلوج لحد ما ارغي عليه شوية ......ايوه...عندك بوست عن سمير غانم لو غاوي هلس...و لو ما لكش في سمير...روح اقرا بتاع الجامعة..كلام كبير كده و دمة تقيل...ولو مش عاجبك برده...يبقى استناني عند نوارة لحد لما اخلص كلام عن رافت الميهي..هتلاقي اللينك بتاعها تحت على ايدك الشمال....نرجع للميهي ...الراجل ده تخصص افلام مالهاش راس من رجلين...لكن كل مشهد فيها قنبلةضحك مالوش نهاية....يخليك تحس انه يا اما فيلسوف كبير قوي و فلسفته اكبر من مفهوم المواطن العادي الغلبان فمبنفهمش افلامة...يا اما حشاش كبير قوي شارب بالقرش كله كابوتشينو على راي احمد حلمي...المهم..الفيلم الجبار ده...كله بيدور حوالين جهاز امني اسمة الإدارة المركزية لمكافحة شؤون القضايا الداخلية...طبعا الإسم الطويل الغتت ده..تلقيح على امن الدولة...الفيلم بطولة الجبار محمود عبد العزيز...الي طالع فيه امين مكتبة خريج كليه الزراعة...و شغال معاه واحده عانس الي هي ماجده زكي...يظهر ان الميهي كان حاسس بمشكله العنوسة من بدري...الراجل الغلبان ده..كل مشكلته انه راح حضر سبوع وطهور واحد صحبه هو واتنين من زمايلة في المكتبه...رجع البيت لقى ناس غريبة فية....بيسالهم انتو مين قالولوا احنا الإدارة العامة لمكا...الراجل يا عيني اتسرع مين الزمارة العامة دي.....نهايته خدوة في حته غريبة مغمينله عنية..وقعدوه في اوضة كبيييييييييييييييرةةةةةةةةة مفيهاش الا مكتب واحد....وعمال يسمع اصوات ناس بتصرخ...شوية ودخلة الظابط الزغنتت..وده نسبة لحجمة طبعا...كل شوية يقوله انت متورط في قضية كبيرة فيها اعدام يا احسان...يا بيه ايه القضية دي مش شغلك...قولي كنت فين يوم الخميس..طبعا كل ردوده مشكوك فيها...الظابط بقى سألة انت روحت عند صاحبك ومعاك زمايلك ليه..قالة عشان سبوع حماده ابنه...قالة هههه وعملتوا ايه هناك...قالة قعدنا نغني حالاقاتك برجالاتك....وايه كمان...يا ام المطاهر رش الملح سبع مرات....فالظابط قالة مش ملاحظ انها حاجة غريبة...قالة هي ايه يا بيه...قاله ان هتستعبط...تفتكر ايه الي خلى صالح...ده صحبة..يعمل المناسبتين في يوم واحد...سبوع ابنه وطهورة....طبعا في الاول المواطن يفتكروا بيهزر..المهم انه طلع بجد الموضوع ليه علاقة بطهور حمادة ابن صالح...المهم المواطن الصالح ده..خرج من المكان المريب وراح مكلم صالح ابو حماده...وقالة الحكومة قلقانة من حكاية طهور ابنك وسبوعة فيوم واحد....مش قلتلك يا صالح..بلاش التهور ده..اديك فتحت عين الحكومة علينا....و يستمر المسلسل....المواطن صدق انه غلطان وبدا يحاول يثبت للحكومة انه مالوش دعوة بالموضوع وان ابو حماده هو الي المفروض يتحاسب على طهور حماده...لإن البلد كها حريصة على طهور المواطنين الشرفاء من امثال حمادة وابوه....المهم انه في مشهد جامد موت..قاعد فيه المواطن مع الظابط بيقولة ايه الي قدامك ده يا فندم قالة ده ملفك ..ما كل واحد من المواطنين له ملف.. زي كل الدول المتقدمة الي عندها نظام امني محترم...قالة طيب قضية حماده دي هتتحسب على مين بالظبط أنا ولا ابوه ولا الإتنين زمايلى الي كانوا معانا..انا رايي اننا نفتح ملف لحماده شخصيا عشان يتحمل نتيجه افعالة....الظابط بصلة منتهى الغرابة وقالة انت ايه رايك في البلد...قاله فل الفل يا بيه..قاله بزمتك ده رأيك...المواطن قال للظابط..انت ليك راي تاني فالظابط قال انا الي بسال والمواطن قال وانا الي هتسجن....المهم ان الفيلم كله يهلك من الضحك...ساعات تحس ان فيه فكر في منتهى العمق...وساعات تحس ان المسال مسالة تحشيش مخرجين وخلاص...لكن الأكيد ان كل مشهد فيه يستحق ندوات دراسة...الي انا مفهمتهوش بقى هي دريم عرضة الفيلم ده دلوقتي ليه..يا ترى بمناسبة قانون الإرهاب...ولا هما كمان كانو محششيين.....

Sunday, April 1, 2007

العبقري سمير غانم

انا من عشاق سمير غانم ...الراجل ده على قد تفاهته لكن بيطلع منه كلام جامد قوي اشك ان كان هو نفسة فاهمة...في مشهد في احدى مسرحياته مش فاكرة المتزوجون ولا لا ماسك نضارته وبيقول مش عارف مش شايف حاجة من النضارة دي ليه ...دكتور السنان كتبلي عليها..قالي عشان ضرس العقل يطلعلك لازم نظرك يتصلح..ومن يوميها لا انا شايف حاجة ولا ضرس العقل طلع ....اهوانا بحس ان الكلام الي مالهوش علاقة ببعضة ده هو بالظبط حال البلد...احنا كده بالظبط....عشان التعليم يتعدل يعينوا وزير تعليم كان اصلا دكتور اطفال فلا التعليم بيتعدل ولا العيال بتخف...وخد من ده على طول...الغريب ان في اصرار غريب على استمرار الغباء الإداري الغير مفهوم...رحت مرة الشهر العقاري الي في الجيزة..قضيت هناك حوالي 100 دقيقة عشان اعمل توكيل بيع...مريت فيهم على 6 موظفين...اللذيذ بقى ان الست موظفين دول يتراوح دورهم في الاتي...واحد يكتب بيانات البطاقة في الطلب...(على اعتبار اني امية وما بعرفش اكتب) الثاني ياخد الورقة الي كتبها الاولاني ويسجلها في دفتر..المره دي على اعتبار ان الموظف هو الي ما بيعرفش يكتب..التالت لما روحتلة على الخازنة قالي روحي للي بعدي يحسبلك التقدير..وطبعا التقدير ده يعني يسالني انتي هتبيعي ايه..اقولة عربية..اه يبقى 75 جنيه..يكتبهالي على الورقة وارجع للموظف رقم 3 تاني يبص بمنتهى الإمعان ويقولي أممممم خمسة وسبعين جنيه يا انسة...بعد كده بعبطي افتكر ان الامر انتهى اتاري الشقة الي قصادهم لسه فيها شوية موظفين ما عملوش حاجة لازم يحللواقرشهم....ده يجيبني لموظف رقم 5 اللي المفروض يديني التأشيرة...اروحلة اقولة ممكن تاشيرة منفضلك...يطلع واحد عند يجي 22 سنة يعني لسة متخرج..يمسك ورقتي ومنغير مايقرا كلمة يروح ماضي اسمة..ما اعرفش ايه اهمية اسمة على توكيل البيع بتاعي بس يظهر ان الحكومة بتتفاءل بيه ...مفيش داعي انحس البيعة. المهم على مااعرف الخطوة الي بعد كده كنت لفيت على الخمس موظفين تاني عشان اكتشف ان فاضل الختم...الختم بقى عند موظفة كل دورها انا تختم الورق منغير ما تبص عليه.... بالزمة دي مسالة امكانيات ولا غباء....طب ما كانوا وفروا علينا الميت دقيقه دول والموظف الواحد خلص كل حاجة ..لزمتها ايه البهدله دي...اكيد مدير الشهر العقاري بالجيزة كان خريج كليه الحقوق قسم زراعة..بس توزيعة الجغرافي بعته معهد البوسطة فطنطا...فمن ساعتها لا عارف يلعب كورة ولا نجح في الرسم