Sunday, April 1, 2007

العبقري سمير غانم

انا من عشاق سمير غانم ...الراجل ده على قد تفاهته لكن بيطلع منه كلام جامد قوي اشك ان كان هو نفسة فاهمة...في مشهد في احدى مسرحياته مش فاكرة المتزوجون ولا لا ماسك نضارته وبيقول مش عارف مش شايف حاجة من النضارة دي ليه ...دكتور السنان كتبلي عليها..قالي عشان ضرس العقل يطلعلك لازم نظرك يتصلح..ومن يوميها لا انا شايف حاجة ولا ضرس العقل طلع ....اهوانا بحس ان الكلام الي مالهوش علاقة ببعضة ده هو بالظبط حال البلد...احنا كده بالظبط....عشان التعليم يتعدل يعينوا وزير تعليم كان اصلا دكتور اطفال فلا التعليم بيتعدل ولا العيال بتخف...وخد من ده على طول...الغريب ان في اصرار غريب على استمرار الغباء الإداري الغير مفهوم...رحت مرة الشهر العقاري الي في الجيزة..قضيت هناك حوالي 100 دقيقة عشان اعمل توكيل بيع...مريت فيهم على 6 موظفين...اللذيذ بقى ان الست موظفين دول يتراوح دورهم في الاتي...واحد يكتب بيانات البطاقة في الطلب...(على اعتبار اني امية وما بعرفش اكتب) الثاني ياخد الورقة الي كتبها الاولاني ويسجلها في دفتر..المره دي على اعتبار ان الموظف هو الي ما بيعرفش يكتب..التالت لما روحتلة على الخازنة قالي روحي للي بعدي يحسبلك التقدير..وطبعا التقدير ده يعني يسالني انتي هتبيعي ايه..اقولة عربية..اه يبقى 75 جنيه..يكتبهالي على الورقة وارجع للموظف رقم 3 تاني يبص بمنتهى الإمعان ويقولي أممممم خمسة وسبعين جنيه يا انسة...بعد كده بعبطي افتكر ان الامر انتهى اتاري الشقة الي قصادهم لسه فيها شوية موظفين ما عملوش حاجة لازم يحللواقرشهم....ده يجيبني لموظف رقم 5 اللي المفروض يديني التأشيرة...اروحلة اقولة ممكن تاشيرة منفضلك...يطلع واحد عند يجي 22 سنة يعني لسة متخرج..يمسك ورقتي ومنغير مايقرا كلمة يروح ماضي اسمة..ما اعرفش ايه اهمية اسمة على توكيل البيع بتاعي بس يظهر ان الحكومة بتتفاءل بيه ...مفيش داعي انحس البيعة. المهم على مااعرف الخطوة الي بعد كده كنت لفيت على الخمس موظفين تاني عشان اكتشف ان فاضل الختم...الختم بقى عند موظفة كل دورها انا تختم الورق منغير ما تبص عليه.... بالزمة دي مسالة امكانيات ولا غباء....طب ما كانوا وفروا علينا الميت دقيقه دول والموظف الواحد خلص كل حاجة ..لزمتها ايه البهدله دي...اكيد مدير الشهر العقاري بالجيزة كان خريج كليه الحقوق قسم زراعة..بس توزيعة الجغرافي بعته معهد البوسطة فطنطا...فمن ساعتها لا عارف يلعب كورة ولا نجح في الرسم

5 comments:

جبهة التهييس الشعبية said...

هههههههههههه

اوعي وشك

ده انا باموت فيه

ده عنده قفشات في منتهى الذكاء

طبعا هو الاول في التعبير عن حال البلد

امال انا مهيسة ليه؟

عشان الطين رواني والخير جواني

ههههههههههههههههههه

تحياتي على البوست الرائع ده

sokoothansawat said...

يا دي النور يا دي الهنا نوارة هانم عندنا...يا ستي ميرسي عالزيارة...و يا رب تكوني قريتي تعليقى على تعليقك الي كان عن تعليقى على تعليقك و تعليقات ناس تانية عالبوستات...انا بدات اهيس ولا ايه...يا دي النيلة...يلا المهم ان يكون سوء التفاهم زال...تحياتي

SoRsaRaa said...

كويس انه شرب الملوخيه بالرابسو ولسا على قيد الحياه:)
وبعدين انتى مش واخده بالك هما ليه بيمشورونا كدا.
الناس دى مش عبيطه هما عارفين ان المصريين بيكسلو على التمارين الرياضيه والايروبكسيه فلقو ان دا حل يخسسهم النص ويمكن يخلليهم يختفو واللا ينقرضوا حتى.
وكمان مش بتقولو فى بطاله؟؟ يبقى لما يدمجو اللى كل الناس دى بتعملو فى واحد واللا اتنين بس يبقى الباقى دا يروح فين سيادتك!!!
وعندى سؤال: هو المدام اللى معاها الختم كانت بتقطف ملوخيه واللا بتئور كوسه؟
وتحياتى لمدونتك العسوله دى:)

sokoothansawat said...

شكرا يا سارسورا على الزيارة الغالية دي...الحقيقة اني عمري ما اقترحت انهم يختصروا عدد الموظفين لموظف ولا اتنين...انا كان قصدي ان الستة يفضلوا سته..بس بدل ما امر عليهم في 100 دقيقة...اقف مع واحد بس يجي عشر دقايق كده..واتكل على الله...والباقي يخدم على بقيت الشعب...لكن بصراحة نظرية الرياضة دي جديدة عليا..عموما نفسي حد يقول للحكومة ان الشعب بيمارس رياضة الجري كل يوم الصبح ورا الاوتوبيس...ورياضة العاب القوي جوا الأوتوبيس...فمش ناقسين رياضة كمان جوا المصالح..كده هنختفي..

Anonymous said...

Wow that wаs oԁԁ. ӏ just wrote an incгedіbly lοng сommеnt but after I clickеd ѕubmit my
comment diԁn't appear. Grrrr... well I'm not wгiting all thаt ovеr аgain.
Anуhοw, just ωanteԁ to sау gгeat
blog!

Feel free to ѵіsit my ωeb page :: fitness.org.ua/index.php?do=/blog/23290/body-uri-copii/