Saturday, April 7, 2007

الساده الأفاضل..تم اول لقاء بين المدونين المحبطين من الاعيب السياسة عند حنتكلم..انا كتبت تقرير صفير عن الأحداث هنشره هنا برضة...وهيبقى ليا تعليقات تانية بعدين..بس الأمانة تقتضر اي انشر نفس الكلام بدون تحريف على الأقل في الوقت الحالي..
1. لسادة الافاضل زوار مدونة حنتكلم...بما ان معظم الحاضرين في البوست الي فات محضروش اللقاء من اصله...فاسمحولي الخصلكم الأحداث بإيجاز. الي حضروا اللقاء تقريبا كله كانو :
1. حنتكلم
2. بن ناصر
3. فارس
4. سكوت هنصوت
5. شارم
6. احمد المصري
بالإضافة لمجموعة دخلت سياحة وخرجت تاني..زي المريب ...احترت معاك معاك انا..الي حيرنا كلنا معاه منغير مناسبه...سارة دخلت دقايق وخرجت..يبدو انها مشكلة شبكة..اما اماني فإعتذرت تماما من البداية...اذا صفصف اللقاء على السته الي فوق...طبعا كان في شويه امور تنظيمية تولاها بجدارة العزيز حنتكلم...من حيث شروط الكلام...و طريقة عرض الافكار...ما هو زي ما نتو عارفين احنا ملوك الهزار والفرفشة...وساعة الحظ ماتتعوضش...فطبعا اي كلمة تحتمل معنيين كانت بتدخلنا فقافية نكت....لولا حنتكلم ماكناش خرجنا منها ابدا ...وكنا قضينا الساعتين فساعة لقلبك...والملك الكبير في القصة دي هو العزيز ابن ناصر...الي ماطلعش لأبوه ناصر كشري وكلامة قليل..لا ربنا نفخ فغدة اللطافة عنده للصبح...بس الشهاده لله هو فعلا عنده حس دعابي عالي..وقدر يكسر شويه جديه الموضوع...وطبعا حنتكلم..ماداش فرصة للهزار انه يستشري...بإستثناء كده ...نقدر نقول ان التجربة كانت الى حد كبير ديموقراطيا ناجحة...قدرنا نقول اراء مختلفة منغير تجريح في اي حد...كمان كان فيه اختزال في عرض الأراء وده شئ رائع..يعني الي كان بيمسك الميكروفون...كان بيعرض رايه بسرعة واختزال ويسيبه للي بعده...حنتكلم كان اقلنا كلاما لكن اكثرنا تنظميا...كل ده عن الموضوع اما الإقتراحات نفسها فتراوحت ما بين الأتي...
• العمل الإجتماعي الخالص بدون اي شبهة سياسية...زي اي عمل خيري وخلاص..والفلسفة وراه ان الخير الخاص هيأدي في النهاية لخير عام..وبكده مش هنستفز السلطة فهيسيبونا نشتغل...نسبة الموافقة عليه كانت حوالي 20% فقط .و كان الإعتراض إزاي ننضف علبه كبريت جوة زريبة
• الإقتراح الثاني كان العمل الإجتماعي من خلال مؤسسة فعالة بالفعل..زي صحفيون بلا حدود او اي حزب موجود بالفعل..والموافقة عليه كانت حوالي 75% لكن بس على المبدأ اما اختيار الجهة المنظمة الي هننضملها فكان محل خلاف..انتهى بإننا اتفقنا نعمل بحث خلال الإسبوع عن الرموز الرئيسية المقترحة عشان نشوف ايها تناسب الأجندة الخاصة بينا
• اما الإقتراح الأخير..قكان اننا نظل مدونين بدون الإنخراط في اي جهة ممكن تسيسنا..ونمارس برضة العمل الإجتماعي منغير قولبة...ومش مهم التبعات..يعني مش مهم الحكومة تراقبنا او تقبض علينا مادمنا مؤمنين بالي بنعملة, وطبعا الإقتراح ده مالاقاش استحسان قوي..قكان نسبة الممؤيدين ليه برضة حوالي 20%.
إذا خلصنا في النهاية ان كلنا متفقين على الأتي
1. حكم الإغلبية هو الي هيسود بصرف النظر عاجبنا ولا لا...ده اساس الديموقراطية
2. فيه هامش واسع من حريه الحركة لكل فرد طالما انه في اطار المضمون العام
3. العمل الإجتماعي هو اساس الفتره الي جايه.
4. السياسة الهادئة اقرب الطرق لقلوب الجميع .
طبعا اجمل حاجة ان اللقاء اخد حوالي 160 دقيقة قلنا فيهم كلام كتير..فمحسناش ان الوقت ضاع هباء..المره الي جايه يكون نسبه الحضور اعلى وبالتالي افكار واراء اكتبر.....ده تصوري عن نتائج اللقاء..اتمنى اني اكون نقلتلكم صورة صادقة و محايده عنه..واشكرك يا تامر على الفرصة دي الي خلتنا نشوف نماذج مشرفة من الشباب...يا جماعة الي فعلا عايز يغير...دي فرصته انه يقول كلمة
سلام

2 comments:

أمــانــى said...

انشاء الله ححاول المرة اللى جاية اكون معاكم يا قمر ومش هأسيبك ابدا لوحدك
اشوفك على خير

سكوت هنصوت said...

أماني...بنت الجنوب الجميلة...شرفتييني بالزيارة الغالية..واكيد هنقدر نتقابل انشاء الله على خير..المهم تنزيلي برنامج البالتوك...عشان نتقابل عليه انشاء الله...تحياتي يا جميلة