Friday, August 31, 2007

قدر من التفهم

مبدئيا كده...البوست ده مش تخلي عن مبادئي و ليس فيه إعادة لجدولة ارائي و أفكاري
هو فقط مشهد رأيتة و أشعر أن من واجبي تسجيلة...بصرف النظر عن قناعاتي...
ده تنويه بس..عشان محدش يتلخبط..
************************************************
الي يعرفوني كويس...هيعرفوا اني ما بحبش ضباط الشرطة كده لله في لله
ليس بسبب حوادث التعذيب و سوء المعاملة التي اراها و اسمع عنها ليلا و نهارا فقط
لكن بسبب إيماني العميق..ان ضباط الشرطة..لا يتمتعوا بالذكاء الكافي للتعامل معهم
ولا يدركون مدى ضعف إمكانياتهم العقلية, و التي غذتها فيهم سنوات من الدراسة العجماء التي
لا تؤهلهم لإحترام المجتمع, أو حتى لإحترام أنفسهم...و دعتني الظروف الى معاصرة حالة من حالات تكوين ضابط صغنتت
تربى على يدي...كنت أذاكر له في طفولتة..وأعلم جيدا مدى قدراتة العقلية والذهنية..يكفي ان انوه
ان أقسى طموحاته....وطموحاتي أن يحصل على بكالريوس تربية رياضية....و كنا على أمل ان يحصل على 4 درجات
تفوق رياضي حتى يلتحق بالتربية الرياضية...يعني ضياااااااااااااع....بعد الثانوية العامة..قدم في الشرطة و قبل
السؤال بقى....ايه الي في هذا الطالب الفاشل...والضعيف ذهنيا حتى يقبل في كلية الشرطة..المسؤولة عن حماية المجتمع
و حل شفرات المهربين و النصابين واللصوص الأذكياء؟؟؟
ولا أي حاجة...بيقيموا الناس بالجتة...يعني الواد سليم ..وجتتة سليمة...يبقى ينفع ان شاء الله
الجثة لا مؤاخذة فيها عيب كده ولا كده...يبقى مع السلامة...ثانيا...المستوى الإجتماعي...يعني مهواش إخوان من الأخر
و مالوش اقارب عليهم مشاكل مع الأمن...و دمتم
لذلك..في الغالب ضباط الشرطة..بنلاقيهم وسيمي الشكل..طويلوا القامة...و يتمتعوا بجثة ملو العين والبصر
لكل الأسباب السابق ذكرها...لم تستهوني أبدا مهنة الشرطة...و لم أجد حتى الأن ضابطا واحدا يغير قناعتي عن ضباط الشرطة
في كونهم مجرد طلبة فشلة محدودي الذكاء...انتقوا بالشكل الخاطئ للمكان الخاطئ...و اعطوا سلطات بلا مؤهلات حقيقية لذلك
ظل هذا انطباعي عن ضباط الشرطة (و مازال) و كلما سمعت عن حادث تنكيل او تعذيب او افترا منهم على حد...ارجع ذلك مباشرة
الى ضعف مستواهم العقلي الذي يجعلهم يظنون ان الإفترا المؤقت دائم...وأن الأرض لهم للأبد...
ثم استدعتني الظروف ان اتوجه لقسم شرطة لعمل محضر ... و لأول مرة..انظر لمهنة الشرطة بعين أخرى
في القسم..وجدت رائدا يجلس على مكتب مهترئ...و أمامة مجموعة من الأوراق الحقيرة جدا...متسخة ببقع الزيت
الي غالبا نشأ من الأكل عليها فول و طعمية لزوم الفطار...و جنب الرائد..3 ملازمين..ماسكين دفتر قديم و صفحاتة متشخبط فيها بالجاف
و بيكتبوا شوية...ويلعبوا بالموبايلات شوياااااات....
مصلحتي كانت مع الرائد...و جلست اتجاذب معه اطراف الحديث...في ود..حاولت ان أجعلة صادقا
و أخبرتة اني اريد عمل محضر...فإذا به يخرج ورق فلوسكاب..و قلم جاف...وبدأ يكتب
أثناء كتبابتة...( والتي لم تتجاوز بطبيعة الحال 10 دقائق) حضر ما لا يقل عن عشرة مواطنين بشكاوى مختلفة
زي الست الي اتخانقت مع جوزها في المطبخ عشان اكلة محشي...فضربتة بالسكينة في قفاه..وبعدين طلعت على الدمرداش تثبت ان جوزها
ضربها في رجليها برجل الكرسي...و عايزة حد يروحلها هناك ياخد اقوالها!!!!!!!!!
والراجل الي اختة فلسطينية..وفقدت باسبورها و مامعاهاش اي اثبات شخصية..وعايزة تطلع بدل فاقد..فمحتاجة محضر
والراجل الي جاي بدل إبن مراتة..عشان جالة استدعاء على البيت .. لكن الولد في مارينا..فزوج والدتة راح يشوف الحكاية ايه
طلع جارة متهمة انه فك مرايات عربيتة من تحت البيت!!!!!!
والثلاث عيال الي اتخانقوا مع واد في الشارع الي وراهم فبطحوه بطوبة...وكلهم بينكر ان هو الي حدف الطوبة!!!!!
هذا الرائد...الذي هو رتبة المفروض...قاعد على مكتب مكسر...في مكان سئ التهوية...بيكتب بإيدة على ورق فلوسكاب مقرف..
و بيبيع فيش....!!!!!!!!!!! اه والله بيبيع فيش....تخيل انت بقى لما رائد..تبقى كل مهمتة يحصل 6 جنية من المواطنين
و يديهم قصادهم ورقة و طابعين بوسطة.....و يشوف فكة...و يرجع الفلوس و هكذا....
بقية الملازمين بقى...معرفش بيهببوا ايه...بس الي لاحظتة ان فيه بيه واحد بس...هو تقريبا العبد بتاع القسم
شاب لطيف كده شبه رجدي أباظة لو أن الأخير مصاب ببعض الحول في عينة اليمنى....هذا الملازم اللطيف...الذي لا
يرفض طلب للرائد...تقريبا هيتسبغ عبد قريب...لإن محدش غيرة بيشتغل هناك...كل ما تدخل حالة..تعدي على الرائد..يقوم محولها
لمحمد بيه..( الي شبه رجدي اباظة) محمد بيه بعد نهاية العشر دقائق...بقى معاه 10 افراد في غرفة مساحتها 3 متر في 2 متر...
وكلهم عندهم شكاوى وعايزين محاضر...وكلها محاضر مستفزة.....
أشد ما لفت انتباهي هو وجود يافطة كبيييييييييييييييييييييرة قوي في مقدمة القسم تعلن ان بناءا على تعليمات وزير الداخلية
ممنوع منعا باتا التدخين داخل اقسام الشرطة.....أكيد مش محتاجة اؤكد ان كل الضباط ( ماعدا العبد) كانوا ماسكين سجاير و بيدخنوا
جايز عشان العبد إيديه الإثنين ما كانوش فاضيين يمسكوا السيجارة...!!!!
الخلاصة...ان بكل تأكيد...لا يمكن ان ننتظر اكثر من هذا من ضباط الشرطة
اخترناهم خطأ...و علمناهم خطأ....و اعطيناهم صلاحيات خطأ....وعاملناهم خطأ....
يبقى لازم يكون النتيجة كارثة لا انكر اني بعد الزيارة دي للقسم
خالط شعوري العام بالنفور من ضباط الشرطة...قليل من الشفقة....و كثيرا من الأسى

Thursday, August 23, 2007

بعيدا عن النكد

هل أنت أذكي من طالب في خامسة إبتدائي؟؟

ده مش سؤال بطرحة على حضراتكم لا سمح الله...طبعا كلنا بسم الله ما شاء الله


ذكاء و حلاوة يا بطيخ...و شعارنا في الحياة المقولة الشهيرة بتاعة الرائد العبقري الليمبي

" هو فيه حد في حلاوة الليمبي و ذكاوة الليمبي وطعامة الليمبي..ده كان فاضلة يومين و صورته تنزل عالجنية"

السؤال المذكور أعلاه يا سادة يا كرام ....هو إسم برنامج مسابقات جديد في دنيا العم سام

مسابقة فكرتها في منتهى البساطة...حاجة كده على غرار من سيربح المليون

المسابقة تعتمد على أن بديهيات التعليم..تنسى بالتبعية مع الزمن...لإنها لم تعد تستخدم في مفردات حياتنا اليومية

يعني مثلا مين فينا فاكر ... سليمان الحلبي قتل سنة كام..ولا الكيلومتر فيه كام إنش...ولا عاصمة توجو ايه

كلها أسئلة درسناها و حفظناها و نجحنا فيها و مسحناها من الميموري عشان نخلي مكان لحاجات أهم..زي سعر البنزين بقى كام..و فاتورة الكهربا هتزيد ولا لأ...يعني...حاجات مهمة كده تستاهل نحشي بيها دماغنا

المسابقة بقى معتمدة على الفكرة دي...تجيب ناس...خريجين جامعة...حاصلين على درجات أكثر من ممتازة...

يعني جهابذة في مجالاتهم....و تحطهم على المحك مع نفسهم إن كانوا يدركون البديهيات التي يعرفها أي طالب

عمرة عشر سنين....

وعشان زيادة الإحراج...تم جلب 8 من طلاب المرحلة الخامسة الإبتدائية..بالفعل عشان يعملوا كمساعدين للمتسابق

يعني لو المتسابق..عك في سؤال..وطلب الإستعانة بزميلة ( الي هو طفل عنده عشر سنين!!!) يقدر يستخدم 3 محاولات مختلفة...

يا إما يغش من زميلة ( شوفوا الإحراج بقى لما دكتور في الجامعة يغش من عيل عنده عشر سنين..عمال يعمل بلالين باللبانة الي في بقة)

أو..ينسخ الإجابة بتاعة زميلة زي ماهي..منغير ما يعرف هي إيه و يعتمد إن هذوها الطفل عارف كويس منهجة و مذاكر حبتين

أو يستغيث بالزميل..بمعنى انه يمشي ورا إجابته ولو طلعت غلط..يشوفوا إجابة الطفل..لو الطفل حلها صح.. ينقذ

المتسابق و ينتقل للمرحلة التالية

الفكرة شديدة العبقرية...ولكم أن تتخيلوا ان الإسئلة حقيقي محرجة خاصة لما الواحد يلاقي نفسة بيتهته
في سؤال نحو للصف الأول الإبتدائي مثلا .....
وكله كوم بقى والمقدم كوم تاني....الحقيقة هو برنامج لوحدة

في سؤال للقياسات خاص بالصف الثاني الإبتدائي...سأل المحاور إحدى خريجات جامعة هارفارد....كام قدم في الميل؟؟

الزميل الي كان معاها في السؤال كان طفل عنده 10 سنين...أول ما السؤال طرح..راح رازع الإجابة في ثانية

وهي بقى فضلت تفكر...تفكر...تفكر...وهو يقولها السؤال ده بيجاوب عليه عامة الأطفال من سن سبع سنين!!!!

أنا بصراحة كنت هموت من الضحك من سرعة بديهة المقدم...والأطفال كمان كانوا اكثر من رائعين..

طيب لو المتسابق بقى خسر في النهاية و خرج خالي الوفاض...عليه انه يقف يبص في وش الكاميرا و يقول بعلو

صوته..انا مش أذكى من طفل في الصف الخامس الإبتدائي!!!

الفكرة والتقديم كانوا فعلا يشدوا الإنتباه...و لقيت نفسي بعد ما خلص بسرح مع نفسي كده..يا ترى البرنامج ده لو

اتعمل في مصر....ولا حتى في الوطن العربي كله....هيبقى شكلة ايه؟؟؟

يا ترى هضحك من قلبي برضة على المذيع..لا على الضيوف و إجاباتهم..

يا ترى ممكن نكتشف التعليم بتاعنا فضيحة قد إيه؟؟؟

فكرة تستحق التجربة..و برنامج يستاهل ان ترفع له القبعة..

Saturday, August 11, 2007

التعليم والمقلب الكبير

يا ترى انت خريج مدرسة ايه؟؟
عمرك سألت حد السؤال ده؟؟
هل إسم المدرسة و نوع التعليم حدد في يوم إختيارك لمعارفك و أصدقائك؟؟
هل انت من خريجي التعليم الحكومي , أم الخاص؟؟
عندك فكرة في كام نوع تعليم في مصر؟؟
هل تتقن لغة واحدة أم أكثر؟؟
ما هي لغتك الثانية؟؟
ده مش استبيان حالة لا سمح الله
بس الفترة الأخيرة..إكتشفت خير اللهم اجعلة خير
ان احنا عايشيين في كذبة كبييييييييرة اسمها التعليم الخاص
طبعا الكل مدرك ان التعليم الحكومي مصاب بحالة من الكساح مع لمسة بسيطة
من التخلف العقلي..يؤدي لضعف حاد في الذاكرة و انعدام القدرة على التفكير
ماشي راضيين بالهم
طيب الأسر المتوسطة تعمل إيه عشان تحرم ولادها من كم الأمراض سالفة الذكر؟؟
تلجأ للمدارس الخاصة..وده طبعا هربا من تعليم ولادهم سكة البانجو والمخدرات
في المدارس التجريبية
المدارس التجريبية لمن لا يعلم هي مدارس حكومية بمصاريف اغلى شوية
و تقدم تعليم شبه خاص
طيب نيجي بقى على قائمة المدارس الخاصة..
عندك يا سيدي مدارس خاصة تبدأ من الف جنية لميت الف جنية
وانت و دخلك و عدد عيالك
لكن أهم المدارس الخاصة شهرة وجودة هي مدارس الرهبان والراهبات
ماشي لحد هنا معقول..المصاريف الى حد ما مقبولة
والخدمة مش بطالة
تعالى بقى للمدارس الفايف ستارز
خش بقى على الشويفات..الأمريكان كوليدج
دول بقى..مش معمولين للمصريين من أصلة..
دول معمولين للأجانب المقيمين في مصر
طيب يعني معنى كده ان كل الي فيها اجانب؟؟
أبدا..دي معظمها مصريين..
أمال يعني عايزين ولاد عز و جيمي يخشوا مدارس حكومة ولا اية؟؟
ما تفوق لنفسك منك له
ماشي..رضينا بالهم
المدارس دي بقى بتقدم ايه
المدارس دي بتقدم مستوى تعليم مشابه للي موجود في امريكا في المدارس الحكومية العادية
يعني الأب من دول بيدفع لإبنة ولا بتنة 90 الف جنية في السنة
عشان يتساوى بإبن الزبال في أمريكا!!!
ده غير ان المستوى الأخلاقي هذه المدارس
لا يختلف كثيرا عن مستوى المدارس التجريبية الا في نوع المواد المخدرة
ما هو مش معقول العيل الي مصروفة و هو في اعدادي خمسميت جنية
يشرب مخدرات شبه الواد بتاع مدرسة السعيدية بنين الي مصروفة
سندوتش جبنة نستو..ده حتى ما يرضيش ربنا
الي زاد وغطى بقى...اللغة
طبعا اللغة داخل المدرسة انجليزي او الماني او فرنساوي
حسب البلد الي عايز ابنك يكون منها
والمفاجأة بقى ان اللغة العربية هناك..مادة نجاح و سقوط
زي التربية القومية كده لبتوع المدارس البيئة..قصدي الحكومة
اللذيذ بقى..ان المدارس دي ااخرها اولى ثانوي
وبعد كده..تنقيلك نظام يا حلو
عايز امريكان دبلومة فيه
تحب ابنك يكون خريج الأي جي سي إس إي
ما يضرش
اما بقى لو ليك في الأوروبي ففي دلوقتي
الأي بي..ودي الدبلومة السويسرية
الي بتدرس باللغتين الإنجليزي والفرنسي
وطبعا كل واحدة من دول بمبلغ ما يقلش عن 40 الف جنية
أظن بقى بعد ده كله مش معقول تستخسر في ننوس عين امة
وتدخلة جامعة حكومية..تبقى بتهرج
ولا أكيد راجل بخيل
بقى بعد ما صرفت على اسم النبي حارسة وصاينة من عين عدوينة
الي ما يتسموش الفقرا..عايز تدخلة جامعة القاهرة ولا عين شمس
خليك لارج و دخلة الجامعة الأمريكية
ولا الجامعة الكندية
ولا حتى الألمانية..حاجة كده تفرح العيال
بكام يا محترم..والله ما هي غالية
بتمن تسع تالاف دولار في السنة بس
يعني على ما اسم الله عليه يخلص تعليمة
تكون صرفت عليه حوالي مليون جنية في 16 سنة تعليم
أظن بقى يا بلاش..
طيب هذوها الطفل المعجزة..الي اتصرف عليه
وزنة تقريبا فلوس
خارج بيعرف ايه
اقولك يا مؤمن
خارج ما بيعرفش يقرا عربي خالص
وبيتكلمة مكسر
وحياه الله معاه لغة واحدة
وغير مجيد لأي مهارات حياتية يومية مفيدة
زي مهارة النط في الأتوبيس وهو ماشي
او مهارة القفز بين الحواجز ( قصدي الأرصفة)
ولا حتى مهارة الزحلقة على الدرابزين
يعني من الأخر..انت صرفت عليه دم قلبك
وطلع في الأخر افريدج..امريكان
زي اي عيل صابع في امريكا..
اي طفل مصري برقبته..
أظن هتقولولي شكل سعاتك خريجة مدارس عربي بنات
إش عرف جنابك بالناس الهاف لايف دول
الي صرفوا مليون جنية في تعليم عيالهم
اقولكوا..
اصل انا وانا قاعدة بشتغل في امان الله
لقيت الطالبة ( الي من الجامعة الأمريكية) الي بتتدرب معايا
بتقول لصحبتها الحوار الأتي
الأولى: نفسي اعرف اتكلم عربي بقى
الثانية: ايه ده يا (...) انت لسة ما اتعلمتيش
الأولى: انا حاولت والله..كان عندنا كويز في الجامعة عن محفوظ
حاولت كتير اقرا الكتاب وافهمة..بس ما فهمتش حاجة
قعدت اعيط كتير لحد ما مامي جت قعدت جنبي و قريته معانا
كلمة كلمة...وفضلت تشرحلي كل الكلام الصعب
الثانية: طب كويس ان مامي بتعرف عربي كويس
أنا(نطيت في الحوار منغير مناسبة مع علامات حادة من القرف على وجهي
ناجمة عن ارتفاع شديد في ضغط الدم و المرارة)
مامي مين يا حبيبتي..هو انتي يا ختي ما دخلتيش مدارس ولا ايه
الأولى بصوت مسهوك فرسني اكتر: لا دخلت طبعا
بس اصل انا كنت في الأميريكان سكول..والعربي كان
مادة نجاح و سقوط..فما كانش فارق معايا اتعلمة
وبعدين هو انا هستخدمة فين يعني
انا كل صحابي بيعرفوا انجليش
انا : يعني يا حبيبتي انت ما لكيش صحاب بيتكلموا عربي زينا كده
الاولى: لا خالص..مانا صحابي يا من المدرسة يا من الجامعة الأمريكية
طبعا لم استطع ان اتخيل ان هنا شخص عاقل قارب على سن
الرشد يعيش في دولة ناطقة باللغة العربية..طوال عمرة
ويرغب بكامل إرادته الحرة ان يتخلى عن لغتة الأم
و حتى تدركوا معي مدى المأساة...فإن هذه الفتاة اللطيفة
عندما قالت لها صديقتها يوما البنت دي شكلها مألوف
نظرت لها نظرة خاوية متسائلة يعني ايه مألوف
فضحكت الثانية و قالت يعني فاميليار
**********
تخيلوا معي إذا..ان هذا الأب الذكي
والد هذه الفتاة المسكينة..قد انفق ما يقارب المليون
جنيها..من أجل ان تصبح إبنتة أقل من مستوى الطالب العادي خريج المدارس التجريبية
على الأقل الأخير بيعرف عربي.. ثم إن أكتساب اللغات الأجنبية
أسهل بكثير من اكتساب اللغة العربية
يعني من الأخر كده..الراجل ده و بنته خدوا مقلب كبيييييير
و للأسف بيشرب المقلب ده شريحة ضخمة من المجتمع في مصر
بينفقوا ثروات طائلة..عشان يجعلوا من ابنائهم مجرد طالب متوسط في الدول المتقدمة
و تكون النتيجة ان هؤلاء الطلاب غير قادرين على المنافسة بين ابناء الدول المتقدمة
و في نفس الوقت...غير مؤهلين للعيش و الكفاح في مجتمعاتهم
و كم ذا بمصر من المضحكات ولكنة ضحك كبالبكاء

Thursday, August 9, 2007

وداعا شيماء

كنت انوي ان اكتب موضوعا مطولا عن مقال قيم كتبه أخي
شمس الزناتي..لكن طالعني و هالني خبر وفاة المونة شيماء
والتي ارسل لي صديق مدونتها..فوجدت بوستا نقول فيه إدعو لي
فدخلت على التعليقات وإذا بأخيها ينعيها لقارئيها
من الصعب ان يتخيل المرء ان سطورا كتبها شخص
يعلق عليها افراد...الى روح صاحبتها
شيماء..لم اعرفك..ولم ادخل عندك قبل اليوم
..ظننت اني سأترك تعليق أتمنى لك فيه الشفاء
لم اعرف اني سأدعو لك بالرحمة
اللهم ارحمها واغفر لها
و ثبتها عند السؤال..و ارزقها رفقة حبيبك و نبيك محمد
واسقها من بين يديه شربة هنيئة مريئة لا تظمأ بعدها ابدا
اللهم ثبت اهلها و ثبتنا وارزقنا رفقتها في الجنة
أخوة شيماء...طالبين مننا الدعاء لها
لم يعد باق لنا منك يا شيماء الا الدعاء
اللهم تقبل منا انك انت السميع العليم

Thursday, August 2, 2007

ابناء مصر..البداية الفعلية


وأخيرا بدأ موقع أبناء مصر


بشوية جهود ذاتية وبعض الأخلاص و حسن النية



تم تدشين موقع أبناء مصر ( تدشين دي بتاعة الحسيني انا معرفهاش(


والي زي حالاتي ما لوش في الكلام الكبير


يتفضل مباشرة على الموقع هنا


ويقولنا رأية ايه


كمان من دلوقتي وجاي


محدش من المتحمسين للفكرة يقعد يتفرج


يلا يا شباب..يا مدونين..عايزين شغل


حبة نشاط على شوية إخلاص هنحقق حاجة ان شاء الله


الي له في الكتابة وحابب يكتب


يبعت اسمة و ايميلة على ميل الموقع


و يقدر يرسل تدويناتة و ننشرها مباشرة على الموقع


والي حابب يشتغل على الأرض


يتفضل معانا في الحملات القائمة واهلا باي فكرة جديدة


الخطوة القادمة حاليا هي اللقاء الميداني بكل الراغبين في الإنضمام


اهلا بيكو ايا ما كان اتجاهكم او انتمائكم


سواء كنت يسار او يمين..ليبرالي او ناصر

المهم انك بتحب البلد دي بجد


ومخلص ليها بجد


يبقى لازم تيجي عشان نعرفك


ونقدر نستفيد من الحب ده و نوظفة صح


و نخرج بيه طاقة بناءة و إيجابية


اللقاء القادم هيكون يوم السبت


11 أغسطس


المعاد والمكان لم يحددوا بعد

منتظرينكم هناك في الموقع الرسمي للأبناء مصر