Thursday, August 23, 2007

بعيدا عن النكد

هل أنت أذكي من طالب في خامسة إبتدائي؟؟

ده مش سؤال بطرحة على حضراتكم لا سمح الله...طبعا كلنا بسم الله ما شاء الله


ذكاء و حلاوة يا بطيخ...و شعارنا في الحياة المقولة الشهيرة بتاعة الرائد العبقري الليمبي

" هو فيه حد في حلاوة الليمبي و ذكاوة الليمبي وطعامة الليمبي..ده كان فاضلة يومين و صورته تنزل عالجنية"

السؤال المذكور أعلاه يا سادة يا كرام ....هو إسم برنامج مسابقات جديد في دنيا العم سام

مسابقة فكرتها في منتهى البساطة...حاجة كده على غرار من سيربح المليون

المسابقة تعتمد على أن بديهيات التعليم..تنسى بالتبعية مع الزمن...لإنها لم تعد تستخدم في مفردات حياتنا اليومية

يعني مثلا مين فينا فاكر ... سليمان الحلبي قتل سنة كام..ولا الكيلومتر فيه كام إنش...ولا عاصمة توجو ايه

كلها أسئلة درسناها و حفظناها و نجحنا فيها و مسحناها من الميموري عشان نخلي مكان لحاجات أهم..زي سعر البنزين بقى كام..و فاتورة الكهربا هتزيد ولا لأ...يعني...حاجات مهمة كده تستاهل نحشي بيها دماغنا

المسابقة بقى معتمدة على الفكرة دي...تجيب ناس...خريجين جامعة...حاصلين على درجات أكثر من ممتازة...

يعني جهابذة في مجالاتهم....و تحطهم على المحك مع نفسهم إن كانوا يدركون البديهيات التي يعرفها أي طالب

عمرة عشر سنين....

وعشان زيادة الإحراج...تم جلب 8 من طلاب المرحلة الخامسة الإبتدائية..بالفعل عشان يعملوا كمساعدين للمتسابق

يعني لو المتسابق..عك في سؤال..وطلب الإستعانة بزميلة ( الي هو طفل عنده عشر سنين!!!) يقدر يستخدم 3 محاولات مختلفة...

يا إما يغش من زميلة ( شوفوا الإحراج بقى لما دكتور في الجامعة يغش من عيل عنده عشر سنين..عمال يعمل بلالين باللبانة الي في بقة)

أو..ينسخ الإجابة بتاعة زميلة زي ماهي..منغير ما يعرف هي إيه و يعتمد إن هذوها الطفل عارف كويس منهجة و مذاكر حبتين

أو يستغيث بالزميل..بمعنى انه يمشي ورا إجابته ولو طلعت غلط..يشوفوا إجابة الطفل..لو الطفل حلها صح.. ينقذ

المتسابق و ينتقل للمرحلة التالية

الفكرة شديدة العبقرية...ولكم أن تتخيلوا ان الإسئلة حقيقي محرجة خاصة لما الواحد يلاقي نفسة بيتهته
في سؤال نحو للصف الأول الإبتدائي مثلا .....
وكله كوم بقى والمقدم كوم تاني....الحقيقة هو برنامج لوحدة

في سؤال للقياسات خاص بالصف الثاني الإبتدائي...سأل المحاور إحدى خريجات جامعة هارفارد....كام قدم في الميل؟؟

الزميل الي كان معاها في السؤال كان طفل عنده 10 سنين...أول ما السؤال طرح..راح رازع الإجابة في ثانية

وهي بقى فضلت تفكر...تفكر...تفكر...وهو يقولها السؤال ده بيجاوب عليه عامة الأطفال من سن سبع سنين!!!!

أنا بصراحة كنت هموت من الضحك من سرعة بديهة المقدم...والأطفال كمان كانوا اكثر من رائعين..

طيب لو المتسابق بقى خسر في النهاية و خرج خالي الوفاض...عليه انه يقف يبص في وش الكاميرا و يقول بعلو

صوته..انا مش أذكى من طفل في الصف الخامس الإبتدائي!!!

الفكرة والتقديم كانوا فعلا يشدوا الإنتباه...و لقيت نفسي بعد ما خلص بسرح مع نفسي كده..يا ترى البرنامج ده لو

اتعمل في مصر....ولا حتى في الوطن العربي كله....هيبقى شكلة ايه؟؟؟

يا ترى هضحك من قلبي برضة على المذيع..لا على الضيوف و إجاباتهم..

يا ترى ممكن نكتشف التعليم بتاعنا فضيحة قد إيه؟؟؟

فكرة تستحق التجربة..و برنامج يستاهل ان ترفع له القبعة..

17 comments:

inksarat said...

فكرة تستحق التجربة..و برنامج يستاهل ان ترفع له القبعة
..وبوست هايل يستحق وقفة..

فكرة صياغتك لفكرة البوست عبقرية بالفعل لكنى بعد الانتهاء من القراءة تذكرت فساد المنظومة التعليمية مما قادنى للتفكير فى تلك الماساه و جعلنى( قريبا جدا من النكد)فانا شخصيا ناسى كل مواد المرحلة الابتدائية ولكن ده ليس لعيب شخصى.. بالطبع ولكن فقط لان الكادر الخاص لم يكن يطبق على المدرسين ايامنا

تحياتى لكى ولمدونتك الهادفة ولاسلوبك الذى يجعلنى دائمااشاركك القضية..تحياتى

عمرو فكرى said...

:D

فكرة مفتكسة بصراحة
فين بس البرنامج ده وعلي اي محطة واسمه ايه؟

عازف الناى said...

ابناء العم سام بعيدا عن السياسه دائما عقولهم شغاله
وابداعاتهم كثيره ومفيده
وهذا البرنامج الذى نوهتى عنه حضرتك
اعجبنى جدا على الورق فما بال الحقيقه
هذه افكار العم سام التى نتمنى ان نصل اليها بل ونتفوق عليها

Monzer said...

انتى عاوزة مننا ايه بأه :)
تعقدينا يعنى .. ولا ايه بالظبط فمهينى :))
طب ايه رايك
انا هابقى مقدم البورنامج ده
وانت هاتبقى أول متسابقة وهاخلى الواد مسعد يبقى المساعد بتاعك
واتحداكم ان لو حد فينا احنا التلاتة عرف يجاوب سؤال واحد سواء انا او انت أو الولا مسعد
هههههههههه
ده الى بيتميز بيه الشعب المصرى ان لا يمكن المقارنة مع الأطفال أصلا لا كبار ولا اطفال

فيه فكرة تانية هي فكرة الفتي او شغلة الكفتجية ان أي حد يجاوب على أي شيئ
لو جيبتى واحد عمره ما مسك قلم
وسالتيه عن الذرة ن ما شاء اله هايجاوب لبلب ، هو ده الى ياكل معانا بجد

وخلى بالك ده مالوش دعوة لا بتعليم حكومى ولا بتعليم خاص ماشى :))

آه صحيح البرونام ده بييجى ع النايل تي فى
ولا أشترك فى الوصلة بتاعة الواد محمود أبو العز :))

صاحب البوابــة said...

" هو فيه حد في حلاوة الليمبي و ذكاوة الليمبي وطعامة الليمبي..ده كان فاضلة يومين و صورته تنزل عالجنية"

----------------

تعرفين كيف تبهريني دائماً

:)

مستوى ثقافي فوق الممتاز

:)

شـــــهــــروزة said...

أنا فاكرة امتا قتلوا كليبر
سنة ما خوزقوا سليمان الحلبى
كان سنة 1800والله أعلم

نيااهااهاااا

يا بنتى دة خريج الامعة اول ما بيطلع من امتحان المادة بيبقا ابيض يا ورد بعد خمس دقايق

تقومى تقوليلهم من خمسة ابتدائى؟؟؟

احنا القاعدة الأساسية فى التعليم المصرى اللى تنفرد بيها مصر على مستوى العالم
هى
ذاكر علشان تنجح
ولو غشيت حتجيب مجموع


مش زى باقى خلق الله اللى بيذاكر علشان يتعلم وللعلم المجرد؟؟

العوافشى بقا

shams said...

واضح كدة انك تبنيتي قضية التعليم و فساده
طبعا انا هبدا بالبداية المعهودة
هو فيه حد في حلاوة شمس الزناتي و ذكاء شمس الزناتي وطعامته..ده كان فاضلة يومين و صورته تنزل عالجنية
بصي بقى يا سيتي هو باذن الله لو اتعمل البرنامج دة عندنا لا الدكتور و لا المذيع و لا العيل هيجاوبوا
كلهم لسانهم هيلحم في سنانهم
و يمكن كمان معد البرنامج ما يكنش عارف الاجابة
و تبقى مشكلة ان احنا نعرف اجابات الاسئلة و و الـــ
cnn
تشوف الفضيحة دي
و تعرضها و العالم كله يعرف ان احنا عالم جهله
و بعدين نعترف ان احنا عالم جهله
و نقعد نعيط شوية
و بعد كدة يمكن ربنا يكرمنا و نلاقي ناس تفكها من العياط شوية و تحاول تلاقي حل للمشكلة دي
و يجدوا الحل سنه
2080

مدونه انا بحبك يا مصر said...

انا بقالى فطرة طويله مدخلتش عندك
بس بصراحه فكرة رائعهتستحق التفكير
احمد الجيزاوى

سكوت هنصوت said...

إنكسارات

انا كمان لقيت نفسي ناسية نص المعلومات الأساسية...زي إسم المثلث الي زواياه كلها مختلفة...إني افتكر اسمة..أبدا...يعني بديهيات كتيرة اتمسحت من عالهارد من زمان...
ميرسي على زيارتك يا فندم..ويار ما تقطعلك زيارة

سكوت هنصوت said...

عمرو فكري

البرنامج إسمة "هل انت اذكى من طفل في الصف الخامس الإبتدائي؟؟

" are you smarter than a fifth grader??"

و هو بيجي على mbc 4

بس مش فاكرة بقى المواعيد لإني فتحتة بالصدفة

enjoy my friend

و ماتنساش تقولي عملت سكور كام؟؟

سكوت هنصوت said...

عازف الناي

إشتقت لسماع نغماتك على مدونتي

المشكلة يا صديقي ان ابناء العم سام..ما بيقلدوش...دائما مبتكرين..يا ترى احنا ماعندناش مبتكرين..ولا احنا بس الي غاويين تقليد؟؟

منذر ( الي هو مش منذر ولا حاجة)

بقى عاوز تبقى مقدم البرنامج و تجيبني قدام الناس و تحرجني...طب اثنين زينا خريجين مدارس حكومة..ما يعضوش في بعض..

و بعدين تعالى هنا...انا بقى هعملك امتحان في ثالثة إبتدائي بس...ولما نشوف هتنجح فيه ولا هتفضحنا..

بخصوص الأستاذ محمود ابو العز الحرامي..الي بيبع الوصلات أغلى من على كمبورة...قولة المعلم بيسلم عليك و بيقولك تسلم إيدك بس سيب العدة و ماتجيش هنا تاني...للإستعلام عن البرنام..إنظر تعليق عمرو فكري صفحة 9

سكوت هنصوت said...

صاحب البوابة

أبهرك..أم اصدمك...

:-)))
تحياتي على الزيارة..برغم التلبيخ الي في الأخر

سكوت هنصوت said...

شهروزة

دائما عندك الخلاصة والبهاريز

ذاكر تنجح غش تجيب مجموع....فعلا ده كان شعار الجيل على أيامي...بالإضافة بقى لقائمة الشعارات الفاشلة..بتاعة العلم نور..والنور كهربا..والكهربا بتموت..يبقى العلم بيموت...حاجات كده تليق تماما بجيل روبي و نانسي

عموما..يا رب نسرق الفكرة..ونتفرج على نفسنا بحق و حقيق

شرفتيني يا جميلة

سكوت هنصوت said...

شمس

تفتكر هيجدوا الحل سنة 2080؟؟؟

والله لو كلامك ده جد....كنا استنينا

دي كلها فركة كعب

بس يا خوفي لا سنة 2080 السيد تامر هيثم جمال مبارك..يجمع المسؤولين الي في مراكز قيادية..ويسألهم عن التعليم..ثم يكتشف ان المسؤولين..الي هما في مراكز قيادية..غير مسؤولين...و نفضل في نفس الدايرة هي هي

خلينا انا في التعليم...وانت في الأثار..وقابلني بقى سنة 2080

تحياتي

سكوت هنصوت said...

أحمد الجيزاوي


زورونا تجدوا ما يسركم..هدفنا سعادة العميل...شرفت يا فندم

عمر الشرقاوى said...

التعليم بتاعنا الطالب من دول يدخل فى الابتدائى عادى شخص عادى ويطلع من المرحله الابتدائيه ودانه طويله شويه وكل ما يخش مرحله ودانه تطول الى ان يتم التعليم فيصبح ودانه اطول من ودان الارنب ودا نظام عالمى والتطور الطبيعى للمنظومه التعلميه انا مدرس ثانوى زراعى نسيت كل اللى تعلمته وفيه منهج جديد جدا حسيت فعلا انى ولا بلاش اصلها طولت قوى

سكوت هنصوت said...

عمر الشرقاوي

ههههههههههههههه

أرنب!!!....ماشي...همشيها ارنب...!!!

بس انا اول مرة اعرف انك مدرس!!!

شرفت يا عمر