Saturday, August 11, 2007

التعليم والمقلب الكبير

يا ترى انت خريج مدرسة ايه؟؟
عمرك سألت حد السؤال ده؟؟
هل إسم المدرسة و نوع التعليم حدد في يوم إختيارك لمعارفك و أصدقائك؟؟
هل انت من خريجي التعليم الحكومي , أم الخاص؟؟
عندك فكرة في كام نوع تعليم في مصر؟؟
هل تتقن لغة واحدة أم أكثر؟؟
ما هي لغتك الثانية؟؟
ده مش استبيان حالة لا سمح الله
بس الفترة الأخيرة..إكتشفت خير اللهم اجعلة خير
ان احنا عايشيين في كذبة كبييييييييرة اسمها التعليم الخاص
طبعا الكل مدرك ان التعليم الحكومي مصاب بحالة من الكساح مع لمسة بسيطة
من التخلف العقلي..يؤدي لضعف حاد في الذاكرة و انعدام القدرة على التفكير
ماشي راضيين بالهم
طيب الأسر المتوسطة تعمل إيه عشان تحرم ولادها من كم الأمراض سالفة الذكر؟؟
تلجأ للمدارس الخاصة..وده طبعا هربا من تعليم ولادهم سكة البانجو والمخدرات
في المدارس التجريبية
المدارس التجريبية لمن لا يعلم هي مدارس حكومية بمصاريف اغلى شوية
و تقدم تعليم شبه خاص
طيب نيجي بقى على قائمة المدارس الخاصة..
عندك يا سيدي مدارس خاصة تبدأ من الف جنية لميت الف جنية
وانت و دخلك و عدد عيالك
لكن أهم المدارس الخاصة شهرة وجودة هي مدارس الرهبان والراهبات
ماشي لحد هنا معقول..المصاريف الى حد ما مقبولة
والخدمة مش بطالة
تعالى بقى للمدارس الفايف ستارز
خش بقى على الشويفات..الأمريكان كوليدج
دول بقى..مش معمولين للمصريين من أصلة..
دول معمولين للأجانب المقيمين في مصر
طيب يعني معنى كده ان كل الي فيها اجانب؟؟
أبدا..دي معظمها مصريين..
أمال يعني عايزين ولاد عز و جيمي يخشوا مدارس حكومة ولا اية؟؟
ما تفوق لنفسك منك له
ماشي..رضينا بالهم
المدارس دي بقى بتقدم ايه
المدارس دي بتقدم مستوى تعليم مشابه للي موجود في امريكا في المدارس الحكومية العادية
يعني الأب من دول بيدفع لإبنة ولا بتنة 90 الف جنية في السنة
عشان يتساوى بإبن الزبال في أمريكا!!!
ده غير ان المستوى الأخلاقي هذه المدارس
لا يختلف كثيرا عن مستوى المدارس التجريبية الا في نوع المواد المخدرة
ما هو مش معقول العيل الي مصروفة و هو في اعدادي خمسميت جنية
يشرب مخدرات شبه الواد بتاع مدرسة السعيدية بنين الي مصروفة
سندوتش جبنة نستو..ده حتى ما يرضيش ربنا
الي زاد وغطى بقى...اللغة
طبعا اللغة داخل المدرسة انجليزي او الماني او فرنساوي
حسب البلد الي عايز ابنك يكون منها
والمفاجأة بقى ان اللغة العربية هناك..مادة نجاح و سقوط
زي التربية القومية كده لبتوع المدارس البيئة..قصدي الحكومة
اللذيذ بقى..ان المدارس دي ااخرها اولى ثانوي
وبعد كده..تنقيلك نظام يا حلو
عايز امريكان دبلومة فيه
تحب ابنك يكون خريج الأي جي سي إس إي
ما يضرش
اما بقى لو ليك في الأوروبي ففي دلوقتي
الأي بي..ودي الدبلومة السويسرية
الي بتدرس باللغتين الإنجليزي والفرنسي
وطبعا كل واحدة من دول بمبلغ ما يقلش عن 40 الف جنية
أظن بقى بعد ده كله مش معقول تستخسر في ننوس عين امة
وتدخلة جامعة حكومية..تبقى بتهرج
ولا أكيد راجل بخيل
بقى بعد ما صرفت على اسم النبي حارسة وصاينة من عين عدوينة
الي ما يتسموش الفقرا..عايز تدخلة جامعة القاهرة ولا عين شمس
خليك لارج و دخلة الجامعة الأمريكية
ولا الجامعة الكندية
ولا حتى الألمانية..حاجة كده تفرح العيال
بكام يا محترم..والله ما هي غالية
بتمن تسع تالاف دولار في السنة بس
يعني على ما اسم الله عليه يخلص تعليمة
تكون صرفت عليه حوالي مليون جنية في 16 سنة تعليم
أظن بقى يا بلاش..
طيب هذوها الطفل المعجزة..الي اتصرف عليه
وزنة تقريبا فلوس
خارج بيعرف ايه
اقولك يا مؤمن
خارج ما بيعرفش يقرا عربي خالص
وبيتكلمة مكسر
وحياه الله معاه لغة واحدة
وغير مجيد لأي مهارات حياتية يومية مفيدة
زي مهارة النط في الأتوبيس وهو ماشي
او مهارة القفز بين الحواجز ( قصدي الأرصفة)
ولا حتى مهارة الزحلقة على الدرابزين
يعني من الأخر..انت صرفت عليه دم قلبك
وطلع في الأخر افريدج..امريكان
زي اي عيل صابع في امريكا..
اي طفل مصري برقبته..
أظن هتقولولي شكل سعاتك خريجة مدارس عربي بنات
إش عرف جنابك بالناس الهاف لايف دول
الي صرفوا مليون جنية في تعليم عيالهم
اقولكوا..
اصل انا وانا قاعدة بشتغل في امان الله
لقيت الطالبة ( الي من الجامعة الأمريكية) الي بتتدرب معايا
بتقول لصحبتها الحوار الأتي
الأولى: نفسي اعرف اتكلم عربي بقى
الثانية: ايه ده يا (...) انت لسة ما اتعلمتيش
الأولى: انا حاولت والله..كان عندنا كويز في الجامعة عن محفوظ
حاولت كتير اقرا الكتاب وافهمة..بس ما فهمتش حاجة
قعدت اعيط كتير لحد ما مامي جت قعدت جنبي و قريته معانا
كلمة كلمة...وفضلت تشرحلي كل الكلام الصعب
الثانية: طب كويس ان مامي بتعرف عربي كويس
أنا(نطيت في الحوار منغير مناسبة مع علامات حادة من القرف على وجهي
ناجمة عن ارتفاع شديد في ضغط الدم و المرارة)
مامي مين يا حبيبتي..هو انتي يا ختي ما دخلتيش مدارس ولا ايه
الأولى بصوت مسهوك فرسني اكتر: لا دخلت طبعا
بس اصل انا كنت في الأميريكان سكول..والعربي كان
مادة نجاح و سقوط..فما كانش فارق معايا اتعلمة
وبعدين هو انا هستخدمة فين يعني
انا كل صحابي بيعرفوا انجليش
انا : يعني يا حبيبتي انت ما لكيش صحاب بيتكلموا عربي زينا كده
الاولى: لا خالص..مانا صحابي يا من المدرسة يا من الجامعة الأمريكية
طبعا لم استطع ان اتخيل ان هنا شخص عاقل قارب على سن
الرشد يعيش في دولة ناطقة باللغة العربية..طوال عمرة
ويرغب بكامل إرادته الحرة ان يتخلى عن لغتة الأم
و حتى تدركوا معي مدى المأساة...فإن هذه الفتاة اللطيفة
عندما قالت لها صديقتها يوما البنت دي شكلها مألوف
نظرت لها نظرة خاوية متسائلة يعني ايه مألوف
فضحكت الثانية و قالت يعني فاميليار
**********
تخيلوا معي إذا..ان هذا الأب الذكي
والد هذه الفتاة المسكينة..قد انفق ما يقارب المليون
جنيها..من أجل ان تصبح إبنتة أقل من مستوى الطالب العادي خريج المدارس التجريبية
على الأقل الأخير بيعرف عربي.. ثم إن أكتساب اللغات الأجنبية
أسهل بكثير من اكتساب اللغة العربية
يعني من الأخر كده..الراجل ده و بنته خدوا مقلب كبيييييير
و للأسف بيشرب المقلب ده شريحة ضخمة من المجتمع في مصر
بينفقوا ثروات طائلة..عشان يجعلوا من ابنائهم مجرد طالب متوسط في الدول المتقدمة
و تكون النتيجة ان هؤلاء الطلاب غير قادرين على المنافسة بين ابناء الدول المتقدمة
و في نفس الوقت...غير مؤهلين للعيش و الكفاح في مجتمعاتهم
و كم ذا بمصر من المضحكات ولكنة ضحك كبالبكاء

36 comments:

اسكندراني اوي said...

بجد بوست ولا اروع ماساه كبيييييييييييييره هي ماساه التعليم في مصر
بس احنا ليه محسناش بيها لما كنا بتعلم يعني ماعنيناش من اللي بنسمع عنه دلوقتي

عموما ربنا يكون في عون الاجيال اللي جايه

تحياتي

أنونيمس said...

عزيزتي
هو انتي لسه مخأخديش بالك ان الموضوع اللي انت بتتكلمي فيه دا هو جزء من المجتمع الموازي؟؟
مجتمع آخر مالوش دعوة خالص بمصر و المصريين الأصليين
مواز في التعليم والكلام والأفكار والثقافة ومستوى المعيشة
و السادة أعضاء هذا المجتمع عايشيين أساسا في كانتونات ممنوع دخولها لأعضاء المجتمع الأساسي
..
الشئ الغريب ان هذا المجتمع الموازي يلتقى بالمجتمع الأصلي عند نقاط غريبة وشاذة
..
هل تعرفين أن في الغرب ممنوع تعليم أي لغة غير اللغة الأم قبل الخامسة من العمر
...
بصراحة الموضوع اللي انتي كتباه فكرني مرة باثنين من قرايبي واحدة عايشة طول عمرها في أمريكا وواحدة من خريجي التعليم الموازي اللي انتي شرحتيه
وجاء ذكر بعض الكلمات بالفصحى ففهمتها ربيبة أمريكا ولم تفهمها المصرية اللي عمرها ما خرجت برا البلد
خيــــبة .. والله العظيم
.
.
معلش طولت ..ســــــــــلام

zazooo said...

ابوست رائع
يبدواننا نحن المصريين أصبحنا في حالةمن اللا وعي حتى أصبحنا ندرس في مدارسنا لغة غير لغتنا لكنولا يهمكم ان وجود القرآن الكريم ضمان للحفاط على الغةاعربيةعلى مر العصور
الغريب ان غير العرب الآن يتعلمونالغةالعربيةلأنها لغة القرآن الكريم
يا خيبتنا لما غير العرب يتفوقوا علينا في الللغةالعربية وفي حفطالقرآن الكريم

شــــمـس الديـن said...

بقول لك ايه يا مها
متخلي الخطة القادمة ان ننشر بيننا ثقافة التحدث بالعربية ...

رغم اني خريجة مدارس لغات زي ما انت عارفة بس وريتك انا خنقت عليكي ازاي لما اتكلمتي في الاجتماع بالعنجليزي :)


بصي ... هبقي ابعت لك ميل احسن

تدوينة جميلة جدا علي فكرة

أدهم said...

ازيك يا مها معلش علي الغيبة كنت مشغول علي الاخر الاسبوعين دول موضوع جامد جداا , و احب قوي اقول رأيي فيه , أنا كنت في مدرسة اسلامية خاصة , المدرسين كانو بيشرحو و العيال كانت بتفهم و اللي كان بيشرب مخدرات و سجاير كان برة المدرسة نادر قوي لما تحصل جوة المدرسة كنت بسمع بلاوي عن المدارس التانية خصوصا الحكومة دول بيضربو المدرسين ,, دا في مدرسة قدام جامعة القاهرة كانو بيحطو قدامها عربيات امن مركزي عشان العيال بتهجم علي البنات بتوع الجامعة ,, أما بقي صياعة المدارس الأجنبية دي حاجة تانية خاااالص , انا كنت بقعد عندنا في النادي (نادي الجزيرة ) ناس عايشة الدور علي الاخر كل كلامهم انجلش كنت بفتكرهم اجانب و طبعا انا طلبت معيا اتسنط عليهم عشان اكتشف العالم ده لقيت كل كلامهم قلة ادب ولاد و بنات عادي و عندهم الاحضان و الحاجات دي عادي جدا بطريقة مستفزة و كلامهم كلو انتماء لأمريكا مش معترفين انهم مصريين و بيعملو علاقات حرام و مش حاسيين انهم بيغلطو و لو الواحد سألهم يقلوا لأ انا حياتي أميريكان مش بفكر التفكير ده . الخلاصة يعني في مجتمع تاني زباااالة احنا منسمعش عنه خالص السمة الرئيسية فيه التبرأ من الهوية العربية و الاسلامية و الحمد لله الحمد لله ان اهلي طلعوني بعرف عربي و ان شاء الله اربي ولادي علي الأسلام و القرأن.. اه نسيت اقلك الناس دي بتشرب ماريجوانا و بنجو و سعات حشيش و حاجات تانية معرفهاش

kol-eldonia said...

صوابع الايدى ليست مثل بعضهاو الدنيا مليانا تناقضات اشى تعليم خاص و اشى تعليم حكومى و اشى تعليم امريكانى مفيش حاجة زى التانية و على فكرة دى سياسة متبع فيها فكرة الى معاه قرش و محيرة يجيب حمام و يطيرة و فعلا معاك جنية و عايز تعلم ولادك ادفع معاك دولار و عايز تعلم ولادك بردة ادفع و فى الاخر العيب مش فى التعليم العيب فى العقل لا كل المدارس الحكومية بيشربو مخدرات و لا كل المدارس الاجنبية مبيعرفوش عربى و انا ايام ما كنت فى المدرسة كان المدرسين و احنا صفيرين يقولو لنا الكلام جوا الفصل بالانجلش و لما كبرنا بقى الكلام دا فى حصص المواد العلمية و بس و حصص اللفات و عجبى عليكى يا ام الدنيا

عمرو فكرى said...

لذيذ جدا البوست ده :D
معاكى حق والله
انونيمس برضه رأيه عجبنى

Monzer said...

تماشيا مع هذا البوست
وانا راجل دولتقى مش أي حاجة
آه انا باش محاسب قد الدنيا
بتعامل بأرقام وملايين وبلاوى زرقة آه بعيد عنك يعنى

انا حضرت المريلة فى ابتدائى
وتقريبا المصاريف كانت اتنين وعشرين جنيه بالكتب والمجموعة المدرسية خمسة جنيه وستين قرش علشان وقعوا منى قبل كده وانا بلعب بالزلطة فى الشارع كأنها كورة مع الفرنيدز بتوعى ـ الله يرحمه جدى ماسمعنيش ـ
المهم وضاعوا واخدت علقة لووووووووووز فمش ناسى الرقم ده أبدا

اما إعدادى فكنت فى مدرسة الحرية ما شاء الله يعنى ييجى ستين واحد فى الفصل والمصاريف كانت غلية شوية بأت بحاجة وتلاتين جنيه بالكتب وكان المدرس بيعملنا خصم ع المجموعات المدرسية لو اخدنا معاه اكتر من مادة امال ايه
أصل مش أي عائلات هناك

اما فى الثانوية فاتعملت باتنين وأربعين جنيه وسبعين قرش بالكتب
بس كانت الدروس الخصوصية عرفت طريقها إلى جيب الحاج الوالد

أما فى الكلية فكانت تجارة عين شمس على سن ورمح مسكور ومتبهدل وطالع عين عينه


فى سنة اولى أخدت منحة تفوق عبارة عن خمسة وتمانين جنيه عقدا ونقدا .. ومصاريف كل سنة لا تتعدى 39 جنيه مصرى
فيبقى كده دفعت فى الكلية كلها مايجيش خمسين جنيه
وباه معايا بكالوريوس

اما عن الكتاب المدرسى فلو صورناه هايبقى أغلى
وبالرغم من كده ما كناش بنشتريه بالرغم من سعره تلاتاشر جنيه
أصله غية ومزاج مش حاجة تانية يعنى

احب أعرف انطباعك عنى دلوقتى
هههههههههههههههههههههههههههههه

sokoothansawat said...

أسكندراني اوي

على رأيك دي هتبقى أجيال ما يعلم بيها الا ربنا

شرفتني بالزيارة والحضور

أنونيمس

الحقيقة انا كنت فاكرة ان التعليم الخاص..هيحل مشاكل و عيوب التعليم الحكومي..لإن الناس داخلة بفلوسها..ما كنتش اعرف ان مصر أم الإختراع..وزي ما اخترعنا التعليم الخاص...اخترعنا برضة مشاكلة..عشان احنا ببساطة استوردناه زي ماهو بشوكة منغير ما نحاول نغير فيه بصلة..وعجبي..

زازووو

هو أكيد القران هيحمي اللغة..بس يا ترى هنشوف الأجيال الي مش عارفة تقرا مكتوب ايه فيه..ويا ترى هنوصل للمرحلة الي الناس بتقول كان عندنا زمان كتاب لطيف قوي بس مش فاكرة اسمة بيقولوا انه كان بتاع ربنا و الناس الكويسين....يا ترى بنوته مش فاهمة يعني ايه مألوف..ممكن تفهم وفاكهة وأبا...و يا ترى لو هو ده شكل التعليم المأمول الي بنطمح نوصلة بعد الخصخصة...اه..ماهم اكيد هيخصخصوه رسمي...يعني إشمعنا هو..احسن من الصحة في إيه؟؟,,,ساعتها هنلاقي حد بيعرف اي حاجة من الكلام البيئة ده؟؟؟

sokoothansawat said...

شمس الدين

بالفعل انا اخلط ما بين العربية والإنجليزية..مع العلم اني مش خريجة مدارس لغات ... إلا اني فخورة اني أجيد لغتي العربية تماما..المشكلة يا شمس..مش فإنهم بيجيدوا لغة و بيكثروا في إستخدامها ( رغم انها مشكلة طبعا) لكن المشكلة ان اللغة الثانية..اصبحت تحل محل اللغة الأولى..و محدش بقى شايف اهمية انه يجيد لغتة الام..وحتى تدركي حجم المأساة اكثر..كان ليا زميل في إحدى مدارس الرهبان..يقرأ رواية زقاق المدق لمحفوظ بالفرنسية...تخيلي!!!

سأنتظر ميلك..و حضورك في القريب العاجل

sokoothansawat said...

أدهم

كنت اعلم ان هذا الموضوع سيلاقي هوى عندك..بالفعل المدارس الإسلامية كمدارس الراهبات حلت أزمة في وقت من الأوقات..لكن لا يمكن ان نغفل ان قلة عدد هذه المدارس مع ضعف المستوى العلمي والتحصيلي في معظمها..أدى الى انخفاض شعبيتها و ارتفاع شعبية المدارس الخاصة ذات المصاريف المتميزة في غلوها فقط..عموما ملف المدارس الخاصة يحتاج الى وقفة طويلة قد لا يتسع المجال هنا لطرحة...

ـــــــــــــــــــ


فعلا يا مصطفى صوابعك مش زي بعضها..ومش كل المدارس الخاصة فيها مخدرات ولا كل المدارس الحكومية فيها تعليم...وانا مش مختلفة معاك في كده..لكن الغير مقبول او منطقي يا صديقي العزيز..ان تجد المدارس الخمس نجوم..التي تنقلك نقلة نوعية في نوع التعليم...تحولك الى مسخ مجرد الهوية
من غير المعقول ان نجد مدرسة مصاريفها 90 الف جنية في العام لطالب الصف الثاني الإبتدائي...كي يصبح هذا الطالب مجرد مجيد للغة الإنجليزية و لا يقرأ او يكتب بلغتة الأم..التي هي اصعب بمراحل من اي لغة ثانية..و تحتاج الى وقت اطول و مجهود اكبر في تحصيلها..هنا يتحول الأم الى خدعة..لإن الناتج هو طالب عادي تماما..بمعايير التعليم في الدول المحترمة..طب يبقى معلش يعني...الأب ده انضحك عليه ولا لأ؟؟

ـــــــــــــــــــ

عمرو فكري

انا كمان عجبني رأي انونيمس...وسعيدة اوي بمدونتك..شرفتني يا فندم..و يا رب اشوفك هنا على طول

ــــــــــــــــــ
منذر المشاغب العزيز

بقى انت اتصرف عليك ما لا يزيد عن الفين جنية في 16 سنة تعليم و جاي تتكلم عن الناس الهاف لايف دول...يا اخي ارحموا بقى...شكلنا انا وانت حقدة و مش واخدين بالنا...
وبعدين ايه الكومنت الحزب وطني قوي ده..قصدك تقول من كده انك بتشجع الحكومة..لإنها صرفت عليك و انك من المستفيدين بالدعم...بدليل ان الكتاب لو اتصور تمنة هيبقى اغلى من النسخة الموزعة..لا لا لا لا يا منذر..انت كده بتخل من اتجاه المدونة المعارض...ارجع بالتي هي احسن...
بس سيبك انت ايه رأيك في النظام

shams said...

بصراحة البوست رائع جدا
و واضح انك وعدتي تكتبي البوست و كتبتيه بس بصراحة مكنتش متوقع يبقى شامل و رائع كدة

خالد منصور said...

بوست جاي من القلب
مش عهلق على الموضوع
دة مجرد مرور

sokoothansawat said...

شمس

شكرا على المجاملة

والحضور

sokoothansawat said...

خالد منصور

طب سعاتك مش هتعلق على الموضوع ليه يعني, عمومك اسمك اتسجل في كشف الحاضرين..وهنشوفك ان شاء الله في علاوة رمضان..

تحياتي

عبقرينو said...

بلوج مسخرة بجد حلو قوى
بس حابب أقولك حاجة بقى مهمة جدا لازم تعرفينى على البنت ديه أصل انا بقى مش نافع فى الانجليزى خالص فقدت الأمل أصل أبويا جزاه الله عنى كل خير علمنى تعليم زى منذر كده بس الحمد لله باتكلم عربى
فقولت أعلمها انا عربى واخليها تجاوب الكويز عن نجيب وهيا تعلمنى اجاوب عن بوش ويبقى فيدنا بعض وفرصة اشوف الناس للى فى الفتارين ديه
فيه فئة تنظر للمجتمع من خلف الزجاج فئه الارسنال وريال مدريد فى الكورة والجامعة الامريكية وماشابهها فى التعليم نهاية بالعربة اللكزس علشان كده لا تستغربى

عمر الشرقاوى said...

مافيا التعليم الخاص والتى يشجعها رجال الاعمال والتى تجزب الطبقات الارستقراطيه حيث فى مصر لا يوجد وسط ياغنى غنى فاحش يافقير مش لاقى حته الدقه مها سعدت جدت بمعرفتك فى القاهره مع ابناء مصر وفقك الله

kol-eldonia said...

المشكلة كمان الى نسيت اقولها سوق العمل و متطلباطة يعنى انتى لازم تكونى كويسة جدا فى الانجليزى علشان تشتغلى و المشكلة دى قابلت ناس كتير و الى عمل كدة فى التعليم هو سوق العمل

kol-eldonia said...

صحيح انا عايز اخود رائيك فى حاجة مهمة ......تفتكرى ان كريم الشرقاوى ضحية زى ما بيقول وائل عباس؟
الموضوع بجهزة دلوقتى و قريب عندى فى البلوج و يهمنى رائيك انتى و كل زوارك الاعزاء
مصطفى

kol-eldonia said...

http://kol-eldonia.blogspot.com/2007/08/blog-post.html
ده لينك الموضوع منتظر رأيك

sokoothansawat said...

عبقرينو

للأسف البنت دي مش هتنفعك لأسباب عدة..هبقى اقولك عليها بيني و بينك..وبعدين يا عمنا انت الي اتصرف عليها قرب المليون جنية ولسة ما خلصتش تعليهما..هتكفيها انت منين مهر و شبكة..اقولك..خليك في العربي اسلم
شرفتني يا فندم

sokoothansawat said...

عمر الشرقاوي

انا كمان سعدت جدا بلقائك في ابناء مصر

وأشعر انك ستكون إضافة حقيقية للمجموعة..,أنتظر منك الكثير بيننا

اما عن التعليل..الي هو التعليم..فمش هقول غير هيييييييييييييييه دنيا

sokoothansawat said...

مصطفى


أشكرك بشدة على المرور والإهتمام..

أنا بالفعل أزور مدونتك دائما..وان

كان لا يسعفني الوقت بالتعليق المستمر

لكن هذه المرة..قد علقت..وقلت ما أرى انه الصواب

تحياتي اخي الكريم

inksarat said...

اسلوبك كان غاية فى الروعة اولا لانه يجبر القرىء ان يكمل قرائته للنهاية وثانيا لانه تناول اكثر من موضوع فى ان واحد موضوع مأساة التعليم الحكومى وما ينتجه من بشرية معذبه مستقبلها ينحصر بين الضياع واللاامل
وتناولتى بذكاء شديد الفوارق الطبقية وانها ليست دائمافى صالح الاغنياءوكيف ان ثقافة هؤلاء جعلتهم بمنتهى السهولة يتخلون عن لغتهم وربما ارغمهم غناهم
الفاحش ان يغيرو هميتهم ويمتثلون الغرب
******
ببساطة احييكى بشدة على هذا البوست ..لا بلاش بوست عايزين حاجة عربى
احييكى على كلماتك القوية والمعبرة تحياتى

شـــــهــــروزة said...

شوفى يا عزيزتى

التعليم الأجنبى فى مصر نوع من الفصامية فى المجتمع المصرى


يعنى تلاقى الناس بالملايين طافحة الكوتة علشان تعلم عيالها لحد الدابلون بعيد عنك

وعلى الجهة الأخرى ناس لا تتعدى الكام ألف واحد تصرف بالآلاف على عيل الله أعلم حيفلح ولا لاء وفى الآخر يطلع لسانه معووج
وكل جملة ينطقها يحشرلك فيها ألفين كلمة اجليزى او فرنساوى لمجرد التباهى والناس تقول يااااى دة مثقف وبتاع لغات

اللى بتتكلمى عليهم دول مصر تانية غير مصرنا احنا
أنا افتكر ان أنا أخر دفعة التعليم المحترم
كنت فى رابعة ابتدائى يا بنتى وبأدرس تاريخ مصر الفرعونية ومينا وتحوتمس ورمسيس وكلام كبير اوى
وفى سنة سادسة كنا خلصنا على تاريخ مصر القديم وصولا للى بيسموها ثورة يوليو وانتهاءا بحرب اكتوبر واتفاقية طاباااا


جة الواد اخويا الصغير لما دخل الابتدائى
لقيتهم فى رابعة ابتدائى لسة بيعلموه البحرالمتوسط فين والأحمر فين
وأن مصر هبة البطيخ وزعازيع القصب
والمسلم بيصلى فى جامع والمسيحى بيصلى فى كنيسة

وقتها أيقنت أن أخويا واللى زيه حيطلع عندهم عتة مزمن وتخلف عقلى مركب على شوية هطل استثنائى
وقد كان
لحد ما اتخرج من الكلية ولله الحمد
ميح


اسحبى كل دة بقا على الدفعات المتتالية وراه

يعنى سواء تعليم مجانى متدمر
أو تعليم أجنبى مهدوم الأساس

مفيش حل الا اننا نرجع الكتاتيب تاااااااانى
وسيدنا والفلكة
طلع من تحت ايديهم أجدع ناس وأحسن ناس

وسمعينى سلام خللى الدماغ صاحى

sokoothansawat said...

أنكسارات

أخجلتني بإطرائك...أشكرك على كلامك شديد الرقة...

sokoothansawat said...

شهروزة

ييييييااااااه...شوفي..هو من جهة التعليم مضروب..فهو مضروب..ولا ينكر هذا الا جاحد...لكن اهو اسمة ببلاش...لكن الي يفقع مرارتك.ويشل حركتك..لما تلاقي التعليم ابو الوفات..هو كمان مضروب بالنار...لما تلاقي العيال في المدارس الخاصة..بيحتفلوا بالهالويين...طيب يعني لا مؤاخذة في دي الكلمة..هو حد في بلدنا الحبيبة دي..عارف ايه هو عيد اسم النبي حارسة الحاج هالويين..ولا ده يمثل ايه في ثقافتنا..ولا هو الناظر والمدرسين هما كمان بيستقوا خبراتهم من التلفزيون...اهو عشان ابنك يركب قرع عسلي في دماغة..ويمشي زي الأهبل في المدرسة يقول تريك اور ترييت..تكعي انت يا عيني عليكي دم قلبك..ويقولك التعليم الأجنبي...و البجاحة ان فيه ناس بتدفع....كان فيه مرة مؤتمر للمجمع المدارس الخاصة..اقل مدرسة فيهم..مصاريفها لأي فعصة في أولى إبتدائي فوق الثلاثين ألف جنية..طيب ده بعد 16 سنة تعليم..هيخرج بيعرف ايه؟؟؟؟ و هو اسم النبي حارسة..هيقدر يجيب الفلوس الي اتصرفت عليه..؟؟؟

منك لله يا شهروزة..سخنتيني على الكلام تاني اهة

شرفتيني بالزيارة يا قمر

ibn nasser - ابن ناصر said...

ههه والله موضوع جميل جدا جدا جدا
يا سكوت وفي حاجه جامدة
قولتيها قالك ندخلو التعليم ونصرف عليه دم قلبنا ويطلع زي عيل صايع في أمريكا !!!!
هههه
تحياتي علي المقال الجميل

inksarat said...

فى انتظار زيارتك

sokoothansawat said...

إبن ناصر

شرفتني بالزيارة

شهيدة said...

هههههه

بقالي زمااااان ما قريتش كلام زي كلامك يا سكوت

بس انا تأكدت من صحة كلامك عن اللغة الأم وكدة في آخر مقطع تقريبا

لما ابتدت الفصحة بتاعتك تتفجر وتنهمر كلاما وسطورا على المدونة
تفتكري مثلا بنت لطيفة زي اللي حكيتي عنها حتقد تبدع زي ابداعك ده؟

ابدا واطلاقا وابسولوتلي (على رأي اخونا اللمبي) المهم كلامك صح وفيه وجهة نظر

يعني الراجل المسكين يوفر على نفسو الصرف ده كلو ويقعد ولادو في مدارس زي الناس العادية يعني اللي في النهاية حتحس انها متلائمة مع بيئة البلد اللي من العالم التالت

ربنا يهيديهم بقى

تحياتي

sokoothansawat said...

شهيدة

ياااااااااااااه والله زمان يا بنتي

فينك و فين اراضيكي..كده تطولي الغيبة دي عليا...وانتي عارفة اني بنتظر زيارتك من السنة للسنة..يا ستي...يسلم ذوقك..دايما تخجلي تواضعي كده...كيف لبنان..وأهل لبنان..يا رب يكونوا بخير..سلامي ليهم فرد فرد..عايزة اشوفك هنا على طول...ما تطوليش الغيبة

الفكر السجين said...

عزيزتى مها أنتى فتحتى باب نقاش لموضوع جميل جدا أحيك علية دا بيعتبر أساس تطور مصر مستقبليا من خلال أبنائها وعندك حق فى كل اللى قلتية دا حتى مصر لما بتخش أى مسابقة على مستوى العالم بنطلع أخر ناس ههههه ومبقناش نستغرب من الموضوع دة وعلى فكرة فى مشكلة دلوقتى بيعانوا منها أولياء الأمور اللى بيدخلوا ولادهم مدارس أمريكية أو ألمانية بالنسبة للشهادة ودول بيبقوا زى مقلتى اللى بعد ميصرفوا على ولادهم دم قلبهم بيجوا ويبخلوا عليهم وبيبقوا عايزين جامعات مصرية وللأسف مجاميعهم بتختلف بالنسبة للثانوى العام يعنى لو حد من المدارس الأمريكية أو أى مدرسة أخرة جايب مجموع عالى نسبتة بتقل فى التقديم للجامعات المصرية وكانوا عاملين مشكلة على الموضوع دة.... أنا بقى يا سيتى ولا كنت فى مدارس حكومية ولاكنت فى مدارس لغات أنا كنت فى مدرسة خاصة أسمها براعم مودرن سكول فى الحلمية على فكرة دى مش مدرسة لغات مستواها جميل من ناحية التعليم ومن ناحية الترفية وكل حاجة وكانت أدارتها ممتازة وكنت بتكرم وبجيب مجاميع كويسة بس فى موضوع ثانى خطر فى دماغى وأن شاء الله هنزلة فى البوست اللى جاى وهو كوسة النتائج فى الثانوية العامة فى مصر أنا بقى بعد جبت النتيجة أتو همت المفروض بعد التعليم الممتاز وبعد الدرجات اللى كنت بجيبها ورأى المدرسين جبت 70% ودى كمان بعد مارحت وكشفت على الورق كان مجموعى 65 % لقيت خمسة فى المية مش حاسيبنهم وناس كثير كانت زى وأنا مكشفتش فى كل المواد لأنى رحت على الأخر كشفت فى مادتين بس و رفضت أدخل حقوق كلية الشعب كله ولأنى كمان بكرهها عمى أضطريت دخلت معهد حاسب ألى علشان قبقى بعيدة عن مجال المحاماة خالص
أنا طولت عليكى جدا بس معرفشى لقيت نفسى بكتب لوحدى أعتبريها أرهاصات
شعب هههههههه وأتمنى ك التوفيق

ايناس

سكوت هنصوت said...

عزيزتي إيناس

يسعدني ان علقتي على بوست قديم, فهذا يعني ان هناك من مازال يبحث في الإدراجات القديمة...

سأنتظر بوستك عن التعليم...

أسعدني المرور بمدونتك...

و شكرا على الإرهاصات الرائعة

Anonymous said...

If you aгe gοing for finеst contentѕ like I do, οnly ѵiѕіt thіs website all thе
time bеcause іt pгesentѕ feаture cоntеntѕ, thankѕ

my blog :: hainuteminunate.ro

Anonymous said...

Have you ever сonsidered publishing an е-book or guest authοring on other wеbsites?
I havе a blog based upon on the samе information уou dіscusѕ and wоuld really like to have you sharе
sοme ѕtories/information. I know my subscribеrs wοuld
apprеciate your work. If you're even remotely interested, feel free to send me an e-mail.

Feel free to surf to my webpage: our website