Wednesday, June 27, 2007

ما بعد الإكتئاب

الحمد لله..مرت الغمة بسلام
النهاردة انا احسن كتير
اولا لإن الأخ العزيز صاحب البوابة والدة خرج من المعتقل امبارح...ثانيا..لإن ربنا عوضني بكنز من الناس
الي بحمد ربنا ليل و نهار انه هداني الى سبيلهم
جزاكم الله خيرا
ربنا يقعدهولكوا في عيالكو يا رب...حقيقي اشكر كل من قال كلمة خفف بها عني في وقت ضيق و محنة
حاليا..انا بتحسس خطواتي عشان نبدأ المراحل الأولى في مشروع الجمعية المدنية التابعة لحزب الجبهة
سامحوني ان كنت اتأخرت عليكو في الرد..وان كنت شغلتكو بيا..معلش بقى..
يومين كده..وربنا ما يجيبلكوا اكتئاب
ان شاء الله..هنقود حملة شرسة دفاعا عن الأخلاق
عايزين نتعلم فن الحوار و أدبة..ونتعلم ادب الإختلاف
أنا اول واحدة لازم اتعلم الإختلاف...بدليل ان عند اول نقطة التقاء مع مختلفين..فقدت القدرة
على التواصل الحقيقي..واصبح كلامي عن الحريات مجرد ادعاءات
اول خطوة على هذا الطريق..انا هبدأ بيها..هي ما قالة صاحب البوابة في مقال رائع...اسعدني حتى كدت اقف اما شاشة الكمبيوتر اصفق كالبلهاء..المقال بتفاصيلة هنا
وهو ان نتعلم ان لا احد يملك الحقيقة الكاملة...وان هدف النقاش مش ان كل واحد يقيم الحجة على الأخر..لأ
الهدف اننا جميعا نصل للحق
عمر خالد قال نقلا عن الإمام ابي حنيفة كلمة رائعة( العهدة في الرواية على عمر خالد
انا في بحثي عن الحق..كالباحث مع صاحبة عن بعير تاه في فلاه..لا يهم اينا يجده
هو دة شعاري في الفترة القادمة...اسمع اي كلام بتجريد..منغير قناعات سابقة ..وليكن المعيار هو منطقية الكلام
المهم الا يكون هناك تعصب لرأي ... فما ادرانا اين الحقيقة؟؟؟
كلامي صواب يحتمل الخطأ..وكلام غيري خطأ يحتمل الصواب
والقاعدة في النهاية بتقول..أما الزبد فيذهب جفاء..وأما ما ينفع الناس فيمكث في الأرض
قديما علمنى ابي..ان الحلم بالتحلم, والعلم بالتعلم.والصبر بالتصبر...سأبدأ بنفسي فلأتعلم..ولأتصبر ولأتحلم حتى اصل لما فيه خيري في الدنيا والأخرة
حتى تتابعوا نشاط ابناء مصر
راجعوا البوست السابق( الي قبل الإكتئاب
(
هتلاقوا فيه تغطية الجمعية العمومية الأولى
أما عن بداية نشاط ماجدة السعيد..فمازالوا يرشفون قطرات النجاح الأولى...اول ما يفوقوا هوصلها مباشرة
انا متابعة الموقف..
و يجعلة عامر بيكوا

Sunday, June 24, 2007

حتى لا يقتلني الهم

إحباط و غم شديدين يجتاحونني منذ الأمس, حالة من الكرب اذهبت عن عيني الكرى..و حرمتني لذه النوم.
أعترف اليوم انني حديثة العهد بعالم الحرية , و اعترف اكثر ان ما عرفته في الأيام القليلة الماضية فاق سنى عمري جميعها, بل اعترف اني اشعر الان بإحساس القروي الساذج القادم من قريته الى مدينة كبر ليرى لأول مرة أضاؤءها المبهرة فيصاب بفزع و ذعر و غربة بلا حدود, وحنين جارف الى ارضة و طينه و بقرته و قريته بسذاجتها و جهلها و ضيق رزقها. و لإنني اشعر الان اني على وشك المساومة على ديني و ما تربيت عليه من اخلاق أحببت-ان اقف مع نفسي اولا, كي اعرف الى اين اسير, و كيف اتجه, حتى لا اجد نفسي قد اصبحت بوقا من الأبواق يردد ما لا يفهم او يقول, او حتى لا تغلبني نفسي و ابتعد عن طريق الحق للحق, الى طريق الحق للشهرة او للدنيا سواء بعلم او بجهل.
منذ الأمس وتنهال علي دفعة من المعلومات التي اظنها توشك على قتلي غما و كمدا, قابلت احد المدونين صدفة و تحادثنا قليلا, و توسمت فيه الخير, بل دعوته مباشرة للإنضمام للحركة الوليدة, عله يضيف اليها الكثير, و تحادثت واسهبت عن مكاسب المجتمع والناس, من وجود تجمع قوي للشباب كحركة ابناء مصر, و بعد هذا اللقاء الصاخب, اطلعت لاحقا على ما يفيد ان هذا الزميل, عندما اتيحت له فرصة ان يعمل في مجال, تابع لقوى معارضة,كان اول من سرقة بأخذ جهاز اللاب توب الخاص بالجهة المعارضة ثم الإستقالة.!!!!!!!!!! والأعجب, اني اكتشفت ايضا, ان هذا النهج ما هو الا نهج عام, سبقة فيه ثلاث اخرون من كبار و مشاهير المدونين!!!!!!! اصبت بكمد شديد و غم ما بعده غم. هل هذه هي المعارضة المأمولة؟؟ هل هذؤلاء هم شباب الغد الطامحين الى انهاء حالة الفساد في البلد؟؟ عند اتاحة اول فرصة للسرقة, كانوا اول من يسرق, وعند وجود بارقة استغلال, أصبحوا الاوائل في طابور الوساطة والمحسوبية.
اذا صراعنا مع الوطني ما هو الا صراع الرافض ان يكون في نهاية الصف. نريد اذا ان نكون نحن من يسرق لا هم من يملك مفاتيح الجنه و نوزعها كيفما و على من نريد لا هم!!!
أي معارضة تلك التي اسعى لضمها و الوقوف بين صفوفها..؟؟!!!! معارضة لا يعرف افرادها الحلال والحرام, بل لا يتورعون عن اكل الحرام كلما سنح.
هالني اكثر ما علمته من بلطجة ابراهيم عيسى في جريدة الدستور. المقال عند مراقب مصري لمن يرغب في متابعته, هل هؤلاء هم صفوة المجتمع الداعين البسطاء من الناس لتصديقهم والوقوف خلفهم..الا لعنه الله على الفاسدين.
أما اكثر ما هالني بشده في عالم التدوني والمدونات فهو حالة الحرية العشوائية المتاحة..اعترف امامكم الان اني اجد صراعا مريرا مع نفسي في قبول الاخر. بل اني لأول مرة في تاريخي اجد اني في حالة من التخبط الشديد ما بين ما تربيت عليه من مبادئ احترام الفرد و ما وجدت نفسي انزلق اليه رويدا رويدا من احترام من كانوا في نظري سابقا لا يستحقون الا نظرات الإزدراء!!!
لا استطيع ان احترم شارب خمر او شارب سجائر او شارب مخدرات, حتى وان سجن من اجل الحرية والعدالة والديموقراطية. لا استطيع ان ابتلع ان شخصا بالغا مدركا لعواقب الأمور يختار غياب عقلة بإرادته الحرة, ثم يطالب الجماهير الغفيرة ان تسير خلفة طواعية!!!!
لا استطيع ان اهضم ان الحرية تستدعي ان نتحرر من روابط الأخلاق والقيم ( لا اقول الدين) فبدلا من ان نرتفع بمستوى العامة والبسطاء من ابناء الوطن ننزل لمستواهم بل و نباريهم في دنوهم, فنستخدم الفاظهم و مصطلحاتهم الهجومية الهمجية الفجة. كي نعبر عن معارضة الأخر مثلا. سامحوني لكني غير قادرة على هضم ان القتيات من ابناء وطني, يرون ان الحرية هي حرية السب والإيحاءات الجنسية الخليعة, بدعوى انه لا يوجد رقابة!!!
حتى لا تصبح ليبراليتي مثارا للغط..اوضح, انا لست ضد وجود ورؤية هؤلاء الشباب, فليكونوا على الساحة العنكبوتيه كما يشاؤون, لكن لا يدعوا قيادة الجماهير و صناعة الغد.
اي غد مأمول من شباب اهلك صدورهم السجائر والمخدرات, و هلكت صحتهم على خمرهم ونساءهم..لكأننا في الجاهلية الأولى!!!!
اللهم اني اتبرأ اليك من كل معصية تبعدني عن سبيلك.
لا سبيل الى اصلاح هذه الأمة الا بمجاهدة النفس. اللهم اني اعلن امام الأرض اني ارغب في الأجر والثواب من عندك و عندك فقط. لا يهمني شهرة ولا ابغي علوا في الأرض. ان لم يكن بك سخط علي فلا ابالي ولكن عافيتك هي اوسع لي. اللهم ارزقني الي ما فيه الخير والعافية في الدنيا والأخرة. اللهم ثبت خطاي على جادة الحق والصواب, وابعد عني رجز الشيطان وشركة. اللهم اني اعوذ بك من عمل قصدت به وجهك فخالطني فيه غيرك. اللهم قنا شر الفتن ما ظهر منها و ما بطن..ولله القصد من قبل و من بعد.

Saturday, June 23, 2007

بوست طوييييييييل بس مهم.

البوست طويييييييييييييييييييييييييييييل جدا...لكن يا جماعة ده مؤتمر يعني لازم يكون طويل..اشمعنى انا يعني الي ازهق لوحدي...يعني كل واحد كده ياخد نفس عميييييييق و يطلعة براحة..و يتفرج معايا على اول جميعة عمومية لحزب الجبهة..ويجعلة عامر.

اقيم المؤتمر بمسرح قصر النيل بوسط البلد..ولولا ان اليوم هو الجمعة لما استطاع احد اي يركن من الزحام

بالرغم من اعلان الحزب على الموقع الخاص به ان المؤتمر سينعقد في الساعة الثانية..الا ان برنامج الحفل الموزع على الحضور حدد الساعة الثالثة والنص كميعاد للبدء

و الحقيقة ان المؤتمر بالفعل بدأ في الثالثة والنصف تماما..( اول علامة صحية في اليوم)

القاعة كانت ممتلئة بالحضور على كافة الألوان والأشكال..اثار انتباهي بشده ان هناك من ضمن الحضور..فلاحين وصعايدة من مرتدي العمامات والجلاليب ممن اشك ان لديهم اي فهم او وعي بمعنى كلمة حزب من الأساس..اناس جالسين في مقاعدهم..ينظرون الى المنصة بأعين خاوية..والعجيب انهم يحملون بادجات اعضاء مؤسسين!!!!

حاول شباب الحزب المنظمين إظهار الحزب في اكثر صور الترتيب والنظام..الا ان الامر لم يفلح معهم دائما..فحسن توفيقهم في البداية السليمة..لم يستمر طوال اليوم..
ظل الشباب يتحركون في القاعة تقريبا طوال الوقت...اثناء القاء كلمة الدكتور يحي الجمل..او الأستاذ اسامة...او غيرهم من المرشحين...لدرجة جعلت متابعة ما يجري تستلزم جهدا اكثر مما ينبغي بذلة, كما ان وضع كاميرات التصوير بالقاعة كان حاجبا لنصف الأعضاء عن المتابعة لما يجري على المنصة

الامر الاخر الذي اثّر على تركيز الحضور...هم الأطفال..حيث كان من ضمن الحاضرين رضع و اطفال من عمر الأربع والخمس سنوات..تخيلوا بقى رضيع في مسرح يحمل اكثر من ستمئة فرد..!!! يطالب بحقة الطبيعي في وجبة الغداء....والتي قد يحرم منها لأسباب لا دخل له بها على الإطلاق..طبعا سيعبر عن ارادته الحية بأعلى صوته..ضاربا بكلام يحي الجمل بعرض الحائط ...المهم الرضعة.

بعيدا بقى عن جو اللقاء العام...نيجي بقى لفعاليات المؤتمر

بدأ الخطاب الأستاذ اسامة الغزالي حرب...بأكلاشية عادي نسبيا..كأنتم حماة مصر و رعاة المستقبل..يعني ديباجة قديمة نوعا..لا يوجد فيها جهد مبذول او ابتكار..وان كان الموقف لا يحتمل اي ابتكار..ثم اعلن ان مدير الجلسة سيكون الدكتور صلاح فضل ( الذي اقترح اسم الحزب قبل تأسيسة).
الدكتور صلاح فضل رجل شيخ اظنه جاوز الستين بسني معدودة...بعد ديباجة عادية اخرى..اعلن ان اعضاء الحزب من الاريحية الكافية ان ينسبوال الفضل لأهلة و يعطوا رئاسة الحزب للدكتور يحي الجمل..ومنصب نائب امين الحزب للأستاذ اسامة الغزالي حرب بالتزكية..على ان يكون الامر هكذا فقط في هذه الدورة حتى تسير السفينه بسلام..ثم تعقد جميعة عمومية اخرى...في الربع الأول من العام القادم..ثم اعطى الكلمة لرئيس الحزب

مع كلمة الدكتور يحي الجمل...بدأت استنهض همتي من حالة الملل التي اصابتني...و انتبهت...قال كلمة موجزة جدا..و مباشرة جدا..قال ان الدول لابد ان تسير على قدمين..قدم هي الديموقراطية وتداول السلطة وحقوق الإنسان الى اخرة..والقدم الاخرى هي القدم المنهجية التي تنظم هذه الأعمال, ثم قال اين مصر الان من هاتين القدمين!!؟؟
كان يتحدث ببساطة شديدة كإنه في بيته او في صالون ادبي بسيط يدير حوارا حول قدح من الشاي او القهوة..حتى ان احد الحاضرين الطاعنين في السن عند دخولة القاعة..لاحظ الدكتور يحي وهو على المنصة ان الرجل لا يجد مكانا للجلوس..فقال ( والنبي يا اسامة قعد فتحي جنبك على الكرسي الفاضي ده) من فوق المنصة!! و اثناء كلمته!!! و جميع الكاميرات مصلته عليه..لم يجد غضاضة في ان يجد كرسي لزميلة بين الحضور..لن انكر ان اللفته اثارت اعجابي..و زادتني احتراما للرجل الذي لا يعبأ بالكاميرات..ولكن يريد ان يكون على حريته بين محبيه...لم يقل كلاما منهجيا منظّرا..وان كان ممتلئ بحماسة ضاعت بين كثير من زملاء سنه..ثم قال ان رهانه القادم على الشباب..من ابناء الحزب...و ضرب مثالين على هذا
اولهما ان شباب الحزب بعد حادثة مأساه بهما زارا موقع الصراع و تقابلوا مع افراده ثم خرجوا بتقرير موضوعي ( على حد زعمة) تماما عن الأحداث ( نفس الفكرة الي كنت طرحتها في بوست سابق الا اني طرحتها مع التفعيل ايضا) . المثال الاخر ان شباب الحزب ذهبوا بجهودهم الذاتيه ايضا الى اقاصي سيناء كي يقابلوا بدوها بعد صدامهم بالأمن ثم خرجوا ايضا بدراسة محترمة ( من وجهة نظره كذلك) عن ابعاد المشكلة
بعد كلمة الدكتور يحيى الجمل قام بتقديم رئيس هذا الجناح من الأفكار الجريئة بين الشباب , و هو طبيب شاب لا يتجاوز الثلاثين بأي حال من الأحوال طرح في موضوعية و إيجاز شديدين الفكرتين و تنفيذهما..ثم نادى باهداف لجنه الشباب الأربعة وهي:
نشر رسالة الحزب
تنمية المهارات عند الشباب
رفع الوعي والثقافة عن الشباب
تفعيل المشاركة الإيجابية بينهم
بعد هذه الكلمة الموجزة بدأ المرشحون في تقديم انفسهم تباعا , مع اعطاء كل منهم ثلاث دقائق يعرف الحاضرين بنفسة..من هنا بدأت الكوميديا السوداء
كان عدد المرشحين 25 فلن اطيل عليكم كثيرا في وصفهم بدقة..لكن سأحدثكم فقط عن من استرعوا انتباهي اما بالإيجاب او السلب.
اول المرشحين ( بفتح الشين) كان انور السادات..الذي استقبل بوابل من التصفيق الحاد جدا...كان بجواري فتاه حسناء تبدو من اصول ريفية..( تعرفون الفتيات الريفيات بإبتسامتهن الخجول و شكل لفة الطرحة المميز) اللاتي يتعاملن كزهور الحائط في الأماكن المزدحمة..كانت تحمل بادج عضو مؤسس..اشتعل فضولي اكثر حتى اعرف كيف تسنى لفتاه ريفية ان تكون عضو مؤسس في حزب كحزب الجبهة لم يسمع عنه الكثيرين بين اواسط المفكرين الا في وقت متأخر ..شعرت ان حل لغز الفتاه..سيحل لغز الجلابيب والعمم التي تملأ بعض كراسي القاعة..ملت عليها و سالتها ان كانت عضو مؤسس فأجابت بخجل نعم..طب عرفتي منين الحزب...قالتلي اصل احنا في بلدنا كلنا بنحب سيادة النائب انور السادات عشان بيخدم كل الناس...ولما سمعت بالحزب جيت عشان اؤيده..طب انت ليكي نشاط سياسي؟؟ لا انا بس بروح ادي صوتي للاستاذ انور ساعة الإنتخابات..قلت انت بلدكو فين...قالت المنوفية..طب انت جاية من المنوفية لوحدك..؟؟؟ لا انا ساكنه في مصر..بس جيت عشان ادي صوتي للاستاذ انور!!!
طب هترشحي مين غيره في المناصب التانية؟؟؟ لا انا ماليش دعوة بحد انا هرشح الاستاذ انور بس...اصل كل اهل المنوفية كده جدعان رجالة وستات..نحب نقف ورا الي بيساعدنا!!!
طبعا غني عن الذكر ان لغز الجلابيب والعمم حل ( بضم الحاء..النهاردة هنقضيها حصة قراءة) تماما مع صعود انور السادات..حيث قامت كل الجلابيب تهتف و تشجع بحرارة
من ضمن المرشحين ايضا احمد حسن الخولي ( صاحب البوابة يعتقد انه سلفي) الذي القى علينا خطبة الجمعة ( كويس اصلي محضرتش الخطبة النهاردة) و اسهب و اطال في ان الرقي والتقدم يقوم على ساقين ( ركزوا معايا بقى في الساقين) الدين ( دي ساق) والنبي ( دي ساق اخرى). طيب نعم..لا الحقيقة كده خلاص.خلصت خطبة الجمعة. طيب ايه الفرق بين الرجل الأولى والثانية..الحقيقة انا مفهمتش..بس اكيد هو عارف.
مع نزول هذا العضو هزت القاعة موجه عاليه من الإحتجاج..كادت ان تشتعل بالشغب بس ربنا ستر. انتهت ببعض السيطرة على الأعصاب و ضبط النفس مع كلمة هادئة و قوية من الدكتور صلاح فضل..تخص بأن الديموقراطية كالسباحة..لا يمكن تعلمها على البر..بل يجب ان ننزل الى بحرها كي نحترفها..و ان من حق كل فرد ان يقول ما يشاء والفيصل النهائي لصندوق الإقتراع.
هذه الكلمة هي اشد الكلمات اتزانا لصلاح فضل..و قد دارت الى حد ما على دورة الغيرمهنى في ادارة الجمعية..حيث كان كالمعلقين الرياضيين..فلم يستطع اخفاء تعاطفة مع بعض المرشحين او رفضة لهم..مما يتناقض مع دورة المحايد تماما.
المرشحين ( برضة بفتح الشين) الكوميديين بقى فكانوا كتير اشدهم اضحاكا ( الحقيقة ما سمعتش صوته من الضحك) مسك الميكرفون و قعد يقول كلام من عينة الهيستريا..( فاكرين في مسرحية شاهد ماشافش حاجة لما الأستاذ خليفة خلف خلف الله قعد يبرر ان الدليل قالولوا..اهو كان كده بالظبط) والناسس تضحككككككك..واللذيذ ان عقدة الميكرفون تسلطت عليه في هذه اللحظة و رفض بشده تسليم الميكرفون بالرغم من المحاولات المستميته من الدكتور صلاح في الحصول عليه, هذه المحاولات التي تفاداها العضو بمهارة جسدية تنافس لاعبي الجمباز الدوليين, مما زاد من عاصفة الضحك في القاعة, وظن الحضور ان جو المسرح ربما اظهر مواهب الرجل التمثيلية!!
كان هناك مرشح اثار اعجابي بشده ( للأسف برضة معرفتش اسمع اسمة) الا انه حاصل على الدكتوراه من فيينا..قال المختصر المفيد..انا برشح نفسي بطريقة منهجية محترمة..هنحط خطة مجدولة بتوقيت زمني..لو متحققتش يبقى يا نستقيل يا نتغير في الإنتخابات التالية..و نزل.
و هكذا استمر الأمر طوال ثلاث ساعات متتاليه..عندما اعلنوا عن غلق الأبواب للتصويت..انسحبت من القاعة.
النتا يج هجيبهالكوا ان شاء الله بكرة.
طيب الخلاصة بقى...مازال رهاني قويا على هذا الحزب..تعرفت على ماجده السعيد و ان كان الوقت لم يسعفني للحديث المطول معها..غير اني اخذت منها وعدا بلقاء قريب ساسعى لتنظيمه ان شاء الله خلاص الإسبوع القادم..انا ادعو جميع المدونين المهتمين بالفكر بحضور هذا اللقاء حال الإعلان عنه..لإن دي هتكون بداية الحركة الفعلية..طولت عليكو قوي المرة دي...

Monday, June 18, 2007

حوار مكاشفة

فتحت قلبي النهاردة...
اكتشفت اني بشتغل مع 25 مسيحي...و كل يوم بنصبح و بنمسي..ونقضي اليوم في ضحك ولعب وجد وشغل..
منغير ما حد يتكلم عن حاجة من مشاكل الوطن الموجودة....كل يوم نقرا عن خبر حرق كنيسة...و تقاتل ما بين مسيحيين و مسلمين
واحنا في الشغل كإننا عايشين في تنزانيا...ولا حد جايب سيرة..الإبتسامة هي هي...والحوارات عن المكياج والأفلام والأغاني و قليل جدا من السياسة هو هو...من مدة وانا بتاعب الكلام عند نوارة و مراقب مصري...في موقع الحوار عيلكو حق...بخصوص الازمة...وازاي كل عيل عايز يتربى...ممكن يكون نتيجة قلة ادبة حرق كنيسة عالفيها...لما شفت الكلام عند مينا..وقريت عند نوارة..اتوجعت قوي....و قررت اني اخرج برة الوش البلاستك بتاع الشغل..ولأول مرة..ابق صادقة بجد...اتكلمت عن المشكلة..وقلت ان انا في شدة الأسف ان هم في بلدهم..ومش قادرين يتمتعوا بحق المواطنة الكامل...اعتذرت ان فيه جهلاء من ابناء ديني لا يدركون حقا..ان مواطنه المسيحي ليست فضلا نمنحة اياه...ولكن حق يكتسبة منذ ان يولد و في بطاقة ميلاده كلمة مصري
تكلمت واسهبت...قلت اني على استعداد لبذل جهد في رأب الصدع...ان اذهب مع العقلاء من ديني الى اماكن الصراع...
ابني بيدي المسلمة ما تهدم من الكنيسة...اقرأ بصوتي على الجهلاء من ابناء ديني...احاديث الرسول وايات القران..
التي تمنع الناس ان لا يعدلوا...ادعوا لعمل مدني حتى لو عشوائي يكون بداية الحل
ولأول مرة...ارى في وجوه زملائي المسيحين...شعاع حزن دفين...اخترق الطريق بين سحابات السعادة المصطنعة في اعينهم
لتظهر حسرة شديدة...
و لأول مرة من اربع سنين...اشوف القهر بجد الملفوف بالغضب..واحد من زملائي قال لي...انت عارفة ان الكنيسة الي اتحرقت دي..كنت بخدم فيها السنة الي فاتت..,كان فيه خطة معمولة عشان نخدم فيها السنه دي...لكن خلاص...انسي...و ضحك ضحكة عصبية ..
فضلنا نتكلم اكتر من ساعتين...نتكاشف ...نتعاتب..نتصارح...نواجه بعض بماشكلنا بجد...
دعوت الجميع ان يخرجوا من عباءة السلبية..الى ارض الواقع...الى المشاركة في اي حملة قد تنشأ لخدمة المجتمع بعييدا عن التمييز...وبعيدا عن التبشير الديني سواء الإسلامي او المسيحي..
كان فيه قدر من التشكك...خصوصا عندما يصدر الكلام عن فتاة محجبة..محسوبة على الفصيل الإسلامي المتزمت...
هذا الأمر اتضح عندما قالت زميلتي....انا الحقيقة من حقي اشك في اي حاجة حد بيقولها...وبعدين دي اول مرة اشوف واحدة مسلمة متدينة بتقول كلامك ده عن المواطنة...دايما الي عندهم الأفكار دي...بيكونوا فريش شوية..واخدينها كده..فنفنة
الكلام وجعني قوي....قد كده المسلمين الي المفروض انهم ملتزمين...عودوا الناس ان يكونوا ظلمة...يااااااااااااااااااه
بجد حاجة توجع....و رجعت تاني فكرت في حركة ابناء مصر...الي هتكون النواه الي اقدر اشتغل من خلالها...
المشكلة ان لدينا ازدواجية في المعايير...يعني المسيحي..متطهد اه....عنده مشاكل اه...طيب مستعد ياخد خطوة عشان حقة...جايز...بس مش اكيد...طيب المسلم..مطهد اه...عنده مشاكل...اكيد..طيب مستعد ياخد خطوة عشان حل مشاكلة...ممكن....طيب الإتنين مضطهدين ...وعندهم مشاكل....مستعدين يقفوا جنب بعض عشان يحلوا مشاكلهم مع العدو المشترك سوا...مستحييييييييييل
هي دي بقى المشكلة...كل واحد شايف ان هو بس الي عنده مشكلة...ودي الوحيدة الأولى بالحل...لكن مشاكل الفصيل التاني...كلام فاضي
طيب يا خوانا....ما نتو كده بتلعبو لعبة النظام.....لازم تكون الحرية مكفولة للجميع....منغير تمييز او تفرقة
يعني من حق الإخواني انه يعمل زي بالظبط ما من حق المسيحي انه يعمل لخدمة دينه....لااااااااااااااااااا......الإخوان دول عايزين يموتونا...والمسيحيين ولاءهم للكنيسة مش للبلد...وكلام فاضي لا له راس من رجلين...
الوجع كبير....عند الطرفين..بس المشكلة...ان الطرفين مش عادلين مع انفسهم..وبالتالي عمرهم ما هيتنصفوا
لا سبيل الى حرية مجزأة...الحرية..تقتضي ان يقتل المرء في سبيل حقه او حق غيرة...ان ينشر رأية او فكرة أو مذهبة...والقاعدة بتقول
اما الزبد فيذهب جفاء..واما ما ينفع الناس فيمكث في الأرض

Friday, June 15, 2007

عن اللقاء الثالث


تم اللقاء الثالث..لحركة ابناء مص
كان لقااء طوييييييييييييييييييييييل..ومرهق جدا..

استغرق حوالي 4 ساعات و نصف..
الحضور كانو كتير في البداية...حوالي 14 مدون
تخيلوا بقى 14 مدون بيتقابلوا على مسنجر...منغير مدير للجلسة
و كل واحد عايز يعترض و يتكلم!!! ماساة
كان من ضمن الحضور
ابن ناصر
احمد المصري
فارس
عبقرينو
صاحب البوابة
ولاء صاحبة مدونة اتفضل عندنا
تخاريف المعادي
صاحب مدونة قصاقيص ورق
مش حسكت
و غيرهم....بس الحقيقة مش فاكرة اسماء مدوناتهم..و مش عايزة اذكر اساميهم
_______________________________________
الحركة..هي بوابة تلاقي الناشطين الفعالين, وبالتالي لازم تتضح اهدافها و اتجاهاتها عشان تجتذب شعبية و ارضية اكبر, وبالتالي يكون لها ثقل وتأثير يسمح بالتغيير

كان فيه رغبة في جعل نشاط المجموعة متنوع, بحيث ان محدش يحرم من العمل المدني او السياسي و يتقولب ضد ارادته

كان فيه قبول لفكرة العمل الحزبي بشكل عام..وان اختلفنا كالعادة على الأحزاب

هناك طلب بجعل الحركة مسجلة رسميا حتى لا تخضع لمساءلات امنية

هناك حاجة ملحة لتحديد ادرايات الحركة..عشان نتلافي الفوضى الخلاقة دي

كان فيه اقتراح من عبقرينو بإنشاء موقع يضم جميع الأخبار الخاصة بمصر في الصحف على الموقع
كان فيه اقتراح ثاني بإن المدونين يكون لهم جريدة ناطقة باسمهم...ثم انتهى على محاولة طرح الفكرة على جريدة مستقلة بالفعل..و/او ويبسايت
__________________________________________

طيب المحصلة بقى...انتهينا على ايه:

ناقشنا كل الافكار السابقة ... وخرجنا منها بالاتي

بن ناصر..صاحب فكرة البيان التأسيسي ..الي هيوضح للمهتمين الجدد احنا مين وعايزين ايه.هيصيغ البيان المقترح..او على افضل الحلول بنوده العريضة..ويطرحة على مدونتة و يتركه فترة للتعليقات..حتى نتمكن من سماع جميع المقترحات والافكار...ثم يوضع تصويت عليه في بلوج الحركة

***************
مريم و فارس ( المعجبين والمؤيدين لفكرة الجريدة) هيعملو بحث صغير عن رغبة الصحف المستقلة في قبول الفكرة..يعني مدى الإستعداد والمطلوب ايه بالظبط..الخ
***************
عبقرينو..صاحب فكرة الويبسايت..واخبار مصر العالمية..هيشرع في المشروع بتاعة..و يوافينا بالتتابعات على البلوج بتاعة لحد ما يكتمل الشكل النهائي...و في النهاية يتحط على موقع الحركة على شكل استفتاء..بعد اخذ الملاحظات بعين الإعتبار
***************
احمد المصري بقى مسؤول التنظيم الإداري مؤقتا...مسؤول يتلقى طلبات المنضمين لكي يكونوا اعضاء مؤسسين...و يحطهم على موقع الحركة, و كمان يتابع كل التطورات على البلوجز المختلفة وفي النهاية...يعمل الإستفتاءات..ويوافينا بالنتايج
***************
انا صاحبة فكرة المتابعة الحزبية مع حزب الجبهة...فانضم ليا صاحب البوابة...و هيكون النشاط الحالي هو تغطية معظم اخبار الحزب
بصفة حيادية...و محاولة المساهمة في انشاء عمل مدني ضخم يضم جميع فئات و طوائف المجتمع
****************
طيب فاضل ايه..فاضل بقى اقولكم ان شعارنا في الفترة الي جاية..الي عايز يعمل حاجة يعملها..بس يحطها على الحركة..عشان نتابعها..في النهاية الحركة هتجيب حركة...
والي عاجبة اي حاجة من النشاطات الي فوق دي...يسجل اسمة في التعليقات عند صاحب البلوج او عند الحركة...و هنبعتلة ميل...يقولة ازاي توصل لصاحب الفكرة..وتساعد معاه في التطوير او التنفيذ
اما الي عنده فكرة جديدة..فيحطها في كومنت برضة على الموقع المباشر للحركة...و هنناقش الفكرة مع صاحبها انشاء الله.و.اليه تنفيذها

لحد كده خلص الإجتماع

مستنيين بقى النتائج

Wednesday, June 13, 2007

حتى يتضح الهدف



هو احنا جايين بكرة نعمل ايه؟؟؟


اللقائين الي فاتوا..كنا مرتبين هنقول ايه...و كان عددنا قليل..

دلوقتي واضح ان احتمال العدد يزيد..وعشان احنا بنتكلم على مسنجر..يعني كلام في كلام..ساعات الكلام بيضيع و الأفكار تتوه

الهدف الي منشور على الحركة هو خطة العمل هذا الصيف

طيب ده هيجرنا لوضع خطة مطروحة

من خلال اللقائين السابقين...انتهينا على اختلاف مهم..هو ان نصنا ( احنا كنا حوالي ستة) عايز يشتغل من خلال حزب

والنص التاني عايز يظل غير محزب...و كان رأي يحي( اصغر الأعضاء المنضمين) ان كل واحد ممكن يشتغل في مكانة

والى حد ما ارى حاليا ان ده اصوب شيئ

المهم بقى ان ده يكون من خلال قاعدة واحدة

يعني البلد دلوقتي مهرية اعتصامات و اضرابات..اخرها اضرابات مدرسين الثانوية العامة

عن التصحيح..

و في مجموعة من المحاكمات..شغالة بالفعل..زي محاكمة إسلام نبية ....وهاني سرور...وعصمت السادات.. وقضايا الرأي

اخيرا بقى العمل الحزبي...انا شخصيا مازال رهاني على حزب الجبهة( ذو الليبرالية المشروطة)..برغم بعض احباطات الزيارة الأولى...

الي شايف ان حزب الكرامة سيكون انجح..هايل..يتفضل يدعم حزب الكرامة...و نفضل جميعا على اتصال..

زيادة التنافس هتخلق حالة من الإنتعاش...حتى لا نظل في حالة الركود دي

السؤال بقى الي مؤرقني بشدة..يا ترى اي حزب من الأحزاب دي..يقدر يحشد مظاهرات مليونية؟؟؟

الإجابة مش محتاجة سؤال..طبعا مفيش

مفيش غير الوطني...إذا الخطوة الجاية هي دراسة اشمعنى الإخوان الي استطاعوا ان هم يكسروا حاجز الخوف والذعر عند المواطن و يخرج مضحيا بكل شئ في سبيل الجماعة

ما اعتقدش ان استخدام الشعارات الدينية هو وحدة السبب...اعتقد ان المسألة اكبر من كده بكتير..المسألة ممكن تكون

الخدمات المدنية في صورة دعم المساجد مثلا الي بتدي للجماعة مصداقية عند رجل الشارع ان هي الوحيدة الي بتحبة
الوظائف الخالية الي بتوفرها الجماعة من خلال كتيبة رجال الأعمال المنضمين..بالمناسبة دي وظائف محترمة جدا
و بيتعيين فيها كل الفئات ..بدون تمييز طبقي..يعني الي بالدبلوم عنده نفس فرصة حامل البكالريوس او الليسانس
جايز من خلال كاريزمة رجال الجماعة البارزين
احنا محتاجين ندرس نجاحات الجماعة دي كويس...قبل اخفاقاتها..ونشوف ازام ممكن نستفيد من تجربتها
عشان نخلق احزاب فاعلة...
أنا عن نفسي..هيكون نشاطي الإسبوعين القادمين في تغطية اجتماع اللجنة العمومية
و محاولة مقابلة السيدة ماجدة السعيدة..ومعرفة اسم الجمعية الي هي اسستها قبل كده
ومحاولة مساعدتها في انشاء نشاطها الخيري...انشاء الله
الي عنده افكار يضيفها على المجموعة دي..يتفضل يحطها عندي على الكومنتس او يبعتها في ايميلي
الي على البلوج...وانا انشاء الله..هحاول اصيغهم في عدة نقاط..لعل ده يسهل في
المحافظة على وقت اللقاء..
...غني عن الذكران الأعضاء الجداد.لازم يراجعوا اللقائيين السابقين..قبل الحضور عشان ما نعدش من الأول
عندي بقى اقتراح مهم...احنا محتاجين مدير لللقاء..وللبلوج..بحيث انه يكون مسؤول عن تنظيم
اللقاءات..و المراسلات..والإنجازات....و متابعة الأعضاء وخلافة..
بإختصار محتاجين ادارة للمجموعة
انا بقترح ان ده يتم من خلال استفتاء على الموقع..يطرح بأسماء الأعضاء
و اعلى الأعضاء صوتا...( بالإنتخاب مش بالصوت الحياني)
يتولى ادارة الموقع لمدة لا تزيد في رايي على الثلاث شهور..
ثم يتم تغييرة بإستفتاء جديد...
اخر حاجة بقى و همشي على طول..
اللقاء بكرة منغير استفتاء..يتولى الأمر حنتكلم لحد ما يتم الإستفتاء
و ممكن يكون اقتراع لو عايزين
بس انا خلصت
شكرا

Monday, June 11, 2007

زيارة .. أخيرا عملتها..ويل يا ويل

اخيرا زرت حزب الجبهة الديموقراطية..
أخدت القرار بعد اللقاء الي عملة الدكتور يحي الجمل على العاشرة مساءا...
واتكلم فيه كلام من القلب..عن النوايا الطيبة الي وراء الحزب..
بس كان فاضل اني اتأكد ان وراء النوايا الصالحة فيه عمل صالح..اتصلت بداية عشان اعرف إمكانية حضور الجمعية العمومية الأولى
الي هتنعقد يوم الجمعة 22 يونيو القادم بمسرح قصر النيل
الكلام هنا موجه بالأخص لحركة ابناء مصر...بما اننا كنا طارحين فكرة ممارسة عمل إجتماعي من خلال حزب
الي عايز يراجع ( حلوة يراجع دي..بتفكرني بالإمتحانات) المراحل الي فاتت..يقدر يتفضل هنا و هنا عند حنتكلم...فيه اختصار اللقائيين اليتيمين الي فاتو
صحيح ان النتيجة انتهت في غير صالح الحزب....لكن انا كنت اتفقت مع تامر( حنتكلم) انه من المهم اننا ندرس خطواتنا و نقدم برنامج
مدروس بدلا من الجعجعة الي منغير طحن..
والنهاردة..كانت اول خطوة على الطريق ده..انا اتجهت للمقر الرئيسي للحزب بالمهندسين..المكان زحمة جدا..والركن فيه شبه مستحيل
بس ربنا سهل و ركنت جنب السفارة التنزانية...
مقر الحزب صغير نسبيا...الحقيقة هو صغير قوي..بس الشهادة لله ... انيق و مريح للأعصاب...قابلت احد اعضاء اللجنة الإعلامية..شاب كده يجي في اواخر العشرينات..متحمس بشدة....و ان كان غير ممّرس في خدمة الجمهور..يعني من الناس الي بتزهق لما تلاقي السؤال بيتسألها للمرة الألف..مع ان الألف واحد الي سألوا دول مختلفين...يعني هما مش مسؤولين ان هو زهق من السؤال..و بعدين ما دي شغلتة...يعني ماهو بياخد مرتب عشان يجاوب على الأسئلة الي من الطبيعي انها تكون مكررة...بصرف النظر عن النقطة دي...هو كان متعاون جدا و متحمس بشدة...انه يدافع عن مبادئ واراء حزبة بمنتهى القوة..( احب اوضح انه كان بيدافع عن حزبة مش بيدعوله)
طبعا كان فيه نقطة مكبلة كل الأسئلة الي وجهتهالة وهي ان الهيكل البنائي للحزب لسة ماتشكلش...وبالتالي..مقدرش اقيم..او اوجه حتى أو حتى احسن في عمارة لسة ما ترملهاش اساسات اصلا...
لكن كان عندي كام نقطة يهموني...أولا تمويل الحزب..الموقع الإلكتروني ( الي ابديت استيائي الشديد من فقرة الشديد في عرض نشاطات الحزب و اراءة) ما وضحش اكتر من رقم تليفون محاسب...يعني مفيش رقم حساب في بنك..بس كان رده ان ده كان غير مسموح بيه الا عند استيفاء اوراق اشهار الحزب...و ده جاري حاليا
ده جرني لسؤال تاني...التمويل ده هيروح فين..وازاي ممكن لدافع الدعم يراقب ان فلوسة بتتصرف صح..الحقيقة ان رده هنا كان الى حد ما ضعيف...كان قرارة ان دي مسألة ثقة..العضو بيثق في المسؤول الموجود وبالتبعية هيثق في اوجه صرفة...ولو معجبهوش الأداء يقدر ما ينتخبش العضو ده في الفترة الي بعد كده...قلتلة طيب وانا هعرف منين مصادر الصرف..قالي ماهي الميزانية العامة دي بتطرح في الجمعية العمومية العامة.. الي لكافة الأعضاء..و بالتالي من حق كل واحد يعرف فلوسة اتصرفت في ايه..انا ساعتها اقترحت ان الكلام ده يكون موجود على بانر شغال طول الوقت على الموقع...بحيث ان كل قرش وارد و صادر يبان فنكسب شوية شفافية...
النقطة الثانية..هو موقف الحزب من الإخوان..كان الرد واضح جدا..ان الحزب ضد تكوين احزاب ذات مرجعية دينية...وبالتالي هم ضد حزبنة الإخوان( الموقف ده اكتر حاجة ضايقتني النهاردة) هم بيعتبروا ده جزء من الليبرالية...مش مشكلة..نبقى نتكلم في الأمر ده بعدين
اكثر النقاط سخونة بقى...هو موقف الحزب من انشاء جريدة...لإن ده كان مطلب رئيسي بالنسبة ليا...لكن الحقيقة ان مبدأ الأعضاء المؤسسين هو ان مفيش حاجة اسمها صحافة حزبية...في حاجة اسمها صحافة مستقلة...الدول المتخلفة فقط هي الي عندها صحافة حزبية..الواقع اني معرفش ايه مدى صحة المعلومة دي...لكن انا شفت انها نقطة ضعف رئيسية...ولا كيف يمكن ضم ال 77 % ان مكنش فيه وسائل مخاطبة تقولهم الحزب مين...رامي( عضو اللجنة الإعلامية) كان متفق معايا تماما في النقطة ديي...و قالي انا اؤيدك بشدة..وناوي اعيد طرح المسألة دي تاني على اللجنة الإعلامية بس بعد ما يتحدد رئيسها الحالي
اما بقى عن النشاط الإجتماعي..الي كان هدف حركة ابناء مصر في الأساس...فأنا سألتة عليه..قالي ان الحزب ناوي يتزعم مؤسسة اجتماعية ضخمة جدا بقيادة الأستاذة ماجدة السعيد..( انا معرفهاش بس حسب كلام رامي هي احدى العضوات المؤسسات لإحدى الجمعيات الخيرية الي هو ميعرفش اسمها ايه)
فيه بقى نقط ماكانش ليها إجابة واضحة..إما لإن رامي ميعرفش و اتكسف يقول...وإما لإن الأعضاء المؤسسين برضة ميعرفوش و اتكسفوا هما كمان يقولة...وإما انها ما اطرحتش..وقابلة للتفاوض...زي موقف الحزب مثلا من حركة كفاية..و سيناريو الحزب في حالة تزوير الإنتخابات البرلمانية القادمة..و موقف الحزب ان حدث التوريث قريبا بعد ما الي بالي بالكو ياخد استمارة ستة و يخلع...الخ
رامي رد بلباقة و قال احنا مع الشارع( طبعا الرد مالوش معنى..لإن المفروض ان الحزب هو الي بيقود الشارع مش العكس) بس انا منعا
للسخافة والغلاسة مرزلتش في النقط دي
السؤال الأهم بقى..لو حد عنده اراء..ازاي يطرحها على الأعضاء المؤسسين..هل فيه الية لكده..فكان الرد ان الدكتور اسامة الغزالي حرب والدكتور يحي الجمل بيجتمعوا مع الأعضاء كل يوم اربع الساعة السابعة مساء في مقر الحزب الرئيسي بالمهندسين...صحيح الغرفة بتاعة الإجتماعات ما تسعش اكتر من ميت فرد...بس اكيد هما دول بس المية الناشطين
أخيرا بقى....موقف الحزب من المدونين..بعد ما هريت الراجل اسئلة..و عملت فيه كل حركات مفيد فوزي القرعة..على غرار تسمحلي ارزل عليك..وأسألك...قالي انت من الصبح هارياني اسئلة احب اسألك بقى ايه سر اهتمامك ده...قلتلة انا مدونة...ما تتخيلوش يا جماعة نظرة الإنبهار..تقولش قلتلة سفيرة موريتانيا...الراجل قالي اهلا و سهلا...( اهلا و سهلا بعد ساعة و نص رغي) والله دي فرصة سعيدة جدا جدا..احنا مهتمين جدا بنشاط المدونين...و كنا دعينا مرة وائل عباس و محمد الشرقاوي..بس هما ما كانوش مهتمين..
و طلب مني موقعنا عشان يقدر يتابع الحركة...( الحقيقة كنت على وشك اني اديلة عنوان حركة ابناء مصر) و بعدين شعرت ان ده خرق لقانون الديموقراطية حيث ان احنا لسة ما اتفقناش على فكرة العمل الحزبي ده..عشان كده رفضت اديلة البلوج بتاع الحركة..و قلتلة هبقى ابعتلك بلوجز الناس المهتمين فقط
عن رايي النهائي بقى..انا شايفة ان الحزب لسة بيتولد...و سهل تشكيلة..و هيتسع للجميع ( الا الإخوان الي مش هيساعهم يظهر الا بطن الأرض) بالمناسبة انا سألتة عن راية في ان الإخوان ينضموا ..قالي اهلا و سهلا..الا ان مبادئ الحزب مش هتتغير
طبعا ده كلام وارد فيه الأخذ والرد...المحصلة ان دي خبرة سياسية مهمة...و نافذة نقدر نجرب فيها مدى قدرة الشباب الحقيقي على التغيير
الإنطباع الأكيد هيجي بعد الجمعية العمومية القادمة انشاء الله...انا اخدت دعوة بالحضور..الي حابب يجي...أهلا وسهلا..أهي برضة فرصة اننا نشاهد الحدث من طرق مختلفة..و بكده
..هاخد رأي قطعي و نهائي انا عايزة اعمل ايه السنة دي

Friday, June 8, 2007

إسلاك نبية..مش هنخلص من المحاكمة دي بقة

القضية اتأجلت ليوم 4 يوليو...معرفتش اروح الجلسة يوم الخميس..لإن كان عندي ارتباط عمل مهم جدا..كان صعب عليا اني افوتة...بس نوارة...و زنزانة...و مراقب مصري...ووائل عباس قاموا بالواجب...بصرف النظر بقى عن تفاصيل المحاكمة..ايه العلة في التطويل ده..القضية منظورة من شهور..وشهر يجر شهر يجر شهر...و مفيش جديد....يا ترى الجلسة الي جاية دي هتكون للنطق بالحكم...ولا لسة هتتأجل تاني؟؟
و يا ترى القاضي هيكون حكمة النهائي ايه...السؤال الأهم...ايه الحكم العادل في القضية دي..؟؟
في رواية نجيب محفوظ اولاد حارتنا...جبل الي هو سيدنا موسى..فقع عين قصاد عين..عملا بقاعدة العين بالعين والسن بالسن والجروح قصاص...يا ترى لو خد إسلاك ست اشهر مع ايقاف التنفيذ....زي مما بعض المحامين متوقعين..يبقى الحل ايه..هل ده هيكون بداية الفوضى؟؟؟
ربنا يستر..ويعدي المرحلة الي جاية على خير...ويجعل القضاء المصري عند حسن ظننا...

Tuesday, June 5, 2007

اكتئاب ما بعد المحاكمة

تحذير: ..البوست ده طويل قوي..الي عايز المختصر المفيد...نوارة مغطية الجلسة كاملة...اما بقى الي غاوي تفاصيل..يحضر مشروب سخن..و كيس لب..و يكمل معايا


أول مرة اخش قاعة محكمة النهاردة


كل فكرتي عن المحاكم كانت مستقاة من فيلمي المفضل ضد الحكومة...كنت منبهرة..بأداء احمد زكي

بالذات لما قال...اننا نستغيث بكم..كي تنقذوا المستقبل.....
النهاردة شفت احمد زكي...بل شفت احمد زكي كان بيجسد مين...اول مرة احس بالفخر والسعادة بالمحامي
...وصلت الجلسة الساعة 11 بالظبط..زي ما مينا قالي..عشان الحق مكان قدام..وفعلا..لقيت مكان في تاني صف...سألت الأول هو ده صف عماد ولا إسلام..فواحد من المحاميين الشباب....قالي..عماد..قعدت في صمت...و رميت ودني عند المحاميين الشباب..مخبيش عليكم..كان لازم اعمل حاجة بدل ما ضيع وقت... المحاكمة ما بدأتش قبل الساعة 2..فقضيت بتاع 3 ساعات كده في الفراغ...لكن ما راحوش بلاش...مجموعة المحامين الحاضرين دول سلوني جدا...فضلوا يتكلموا عن حالة الفساد...و قضية عماد..وكان رأي احد المحامين الأكبر سنا..ان الحكم هيكون مخفف الى اقصى درجة....فضلوا يتطرقوا لمواضيع سياسية مختلفة...نمّت..عن خبرة الاكبر سنا..وضعف معرفة و ان كان حماس الاصغر سنا..يعني مثلا الراجل الكبير يكلمهم عن الصحافة المستقلة...يقوم الصغير يقولة دي كلها نفاق..الراجل يبصلة بغباء كده و يقولة ازاي يعني....فيقوم المحامي الشاب يقول...ده لسة اسامة سرايا كاتب مقال كلة نفاق في الريس...الراجل يبصلة بإحباط و يقولة دي الصحافة القومية مش المستقلة...المستقلة زي الدستور والمصري اليوم ..الخ
وجودي بعلامات الإنبهار والإندهاش اثار استغراب شباب المحاميين لدرجة انهم افتركوني امن دولة...فلما قلتلة اني مواطنة عادية جاية اساند عماد...راح جايب عماد...و قالة الست دي..جاية النهاردة مخصوص عشان تقف جنبك...ما تتخيلوش كان سعيد وفرحان قد ايه..مع ان وقفتي جنبة..تشبة كده وقفة ناني جنب قاسم في مسرحية الهمجي...لكن اهو برضة انبسط

...
بما اني جديدة على الكار..فكنت خايفة من كل حاجة...خايفة اطلع الكاميرا لواحد من الرتب الي مليا القاعة يطردني برة..( غشيمة

بقى)....على 12:30 كده حضر نوارة ووائل عباس..دول الي انا عرفت شكلهم عشان الشهرة....و ساعتها عرفت رندا( زنزانة) و مينا ( الحاج جرجس) و بعد الجلسة...قابلت( زينفل انجل) - يا رب اكون بنطق اسمها صح- و أسد...
المهم قعدت جنب واحد راجل ابن حلال اسمة هيثم..مصور في جريدة الجمهورية...لقيتة بيقولي انت صحفية فين...قلتلة صحافة حرة ..ايوة يعني تبع انهي جرنال...الصراحة احرجت قوي...قلتلةبألاطة كده(قال يعني) على النت...قالي اهلا وسهلا..حسيت انه مفهمش...بس تخيلت انه فكر ان طالما قالت نت...تبقى اكيد واصلة...( اه لو عرف اني بتكب في الشارع).....الراجل ده كان ظريف جدا...ورغاي قوي..لقيتها فرصة طالما قعدين فاضيين..والمحكمة مش باينلها انعقاد...اننا نرغي شوية...سألتة عن سمير رجب ياللعجب...و قلت بس...هيشهد شاهد من اهلها...لقيت الراجل بيتحسر على ايام سمير رجب..وبيقول ده كان ادارجي ممتاز!!!!! بس مشكلتة انه كان دني شوية...بياخد الرشاوى كلها لنفسة...مش زي ايهاب نافع...الي كان يحب يمنجه الي معاه و ينوبهم برضة من الحب جانب...الراجل ده( المصور) انقذني من الطرد برة قاعة المحكمة...لما القاضي اعلن انها جلسة سرية...فأنا رحت واقفة عشان اطلع برة..قالي انت رايحة فين..مش انتي صحافة..قلتلة اه..قالي طب اقعدي...احنا بس الي نحضر...جه الأمين عشان يشوف الكارنيهات...( على اعتبار ان كل علامات البلاهة ظاهرة عليا) زي ما قال الشاعر...يكاد المريب ان يقول خذوني...فقالة دي متدربة معانا ....تنفست الصعداء و كملت رغي...استمر الامر على هذا الحال...لحد لما دخل القاضي...و دخل اسلاك القفص...

إسلاك ده بقى...عايز وقفة لوحدة...شاب..حديث السن..وعلى قدر كبير من الوسامة...لكن في عينية و تعبيرات وجهة كمية غير عادية من الصلف .. والعجرفة...بيتعامل مع الحدث كلة..وكإنها تجربة خارج الجسد...كان بيسلم على المحامين و ابتسامة عريضة على وشة...و جايب معاه جرنال يقراه عشان الباشا ما يزهقش...لما دخل القفص ... دخل معاه عساكر كتير عشان يوسعولة السكة...
وقائع الجلسة بقى..

الدفاع( عن اسلاك) قدم شريط اهبل كده يفيد انة من الممكن استبدال اي صوت على صورة موجودة بالفعل...عن طريق ازالة صوت اسلاك...و ووضع موسيقى هادئة على الخلفية...
المحكمة قبلت الشريط..والحقتة بمستندات الدفاع...ثم بدأت مرافعة النيابة

يا الله...كان هاين عليا اقوم ابوس ايد وكيل النيابة...و اقولة ربنا يحميك لشبابك...الفيدو موجود بمرافعة النيابة كاملة...بس الصورة مش حلوة قوي...سامحوني المرة دي...وائل عباس مصور احسن...اجمل حتة في المرافعة...لما وكيل النيابة...وجة كلامة للضابط بمنتهى العنف والحدة...وقالة اين انت من الشهيد المتناوي الذي مات فداء لعرض مواطنة...و انت الان في القفص لإنتهاكك عرض مواطن...كنت عايزة اسقف..بس خفت ليطلوعني برة ... مانا غشيمة بقى...كل شوية ابص لنوارة الاقيها بتسقف بهدوؤ بينها و بين نفسها...ووائل كمان كان عايز يسقف لوكيل النيابة...على المرافعة..بس اثر السلامة....

ثم بدأت مرافعة الدفاع...( للأسف حجمها عندي 107 ميجا...وانا فاشلة في اللعب في الفيديوز) فمعرفتش احملها على اليوتيوب...بس اول ما اظبطها..هحطها على طول...المحامي صال و جال... واتكلم بإيدة ..و جسمة..و عينة...و مشاعرة...كنت خايفة علية...و من احساسي بصدقة..حسيت اني هعيط...المفاجأة بقى...ان بعد انتهاء مرافعة النيابة...و قبل المحامي ما يترافع...لقينا واحد من القفص رافع ايده...وطالب انه يتكلم...بيقول انا اتعذبت يا حضرة القاضي...والله العظيم..دخلّة امين شرطة..وطلعة برة الجلسة...المهم بعد انتهاء مرافعة الأستاذ نصر امين..رفعت الجلسة...و عرفنا انها اتأجلت ليوم الخميس القادم لإستكمال المرافعات..ليه معرفش...

المهم الكل اندفع ناحية القفص يشوف ايه حكاية الراجل الي جوا ده...زنزانة قالتلي ان هي كانت قاعدة جنب ام واحدة مسجونة لفقولها قضية مخدرات عشان ابنها اتخانق مع ظابط...الست اسمها الحقيقي عطاو اسم الشهرة عفاف عبد المنعم ابراهيم...ابنها كريم كان واقف برة القفص و عمال يعيط...انا ملحقتش اسجل معاها...لإني كنت خايفة الميموري بتاعت الكاميرا تخلص ... و كنت فاكرة ان الجلسة هتستمر...بس نوارة مسجله معاها..الراجل بقى الي رفع ايده يشتكي للقاضي..اسمة حسني محى الدين محمد خليفة الدمرداش...محاسب على المعاش...و صاحب محل فاكهة حاليا...عندة حوالي ستين سنة...ساكن في شارع سليمان جوهر بالدقي...الراجل ده...اسلاك نبية و عمرو صلاح...عذبوه و ضربوه بالجزم على عمود الفقري و في انحاء متفرقة من جسمة...لدرجة ان اضراسة اتخلعت...( ان صحت روايتة) اول ما شاف اسلاك في القفص جنبة...جاتلة نوبة شجاعة جبارة..وقعد يصرخ...و يقول...ربنا جابهولي عشان اشوفة..ربنا جابهولي عشان اشفي غليلي....هو مكنش يعرف موضوع جلسة عماد الكبير...ولا كان متخيل ان الحيوان اسلاك ده هيدخل جنبة القفص...فبدأ يدلي بأحاديث لكل الناس...و قعد يصرخ فينا...ابوس ايديكو ما تسيبوناش...ابوس ايديكو الحقونا...حسيت بعجز رهيييييييييييب...طب وانا في ايدي ايه بس يا حاج....الأعجب والأغرب ان الست عطا الشهيرة بعفاف...كانت شاهدة على واقعة تعذيب الحاج حسني في القسم...و بردة جاية صدفة...النهاردة....
أنا خدت جرعة اكتئاب فظيعة النهاردة...وان كنت حسيت ان لسة في أمل...حسيت بأمل لما شفت زنزانة بتتحرك بمنتهى الخفة والنشاط بعكازها في وسط قاعة المحكمة...

اللهم لا تؤاخذنا بما فعل السفهاء منا....

طولت عليكو...سامحوني
حبة صور بقى على ما اسم
محامي عماد الكبير الأستاذ نصر أمين

إسلاك أفندي جوا القفص

عم حسني الي كان مش مصدق نفسة...ان الظابط الي ضربة في القسم...واقف جنبة في القفص

وكلاء النيابة الشرفاء...مشاريع قضاة المستقبل

عماد الكبير...مع المحامي الشاب..الي جابة عشان يفرحة ان حد جاي مخصوص عشانة



Monday, June 4, 2007

عن الغردقة...والشذوذ

هل اصبحنا دولة تنظم و تدعم الشذوذ علانية؟؟؟؟

في زيارة سابقة للغردقة...بالأخص في قرية مجاويش....

بعد ما نشاطات اليوم كلها خلصت...حبيت اتفرج على الشو الي بيقدمة الفندق...على اعتبار ان جايز يكون بيقدم فقرة الساحر الي انا بحبها...

بالذات لما يطلع بيضة من قفا اي راجل تخين قاعد في الصالة..

المهم و عشان ما طولش عليكو...خدت كام واحدة من صحباتي..واخويا..ورحنا نتفرج على المرسح...و فجأة لقيت....رقاصة...أصابتني حالة من القرف..و قمت عشان اخرج...لقيت..صحبتي بتشدني و بتقولي يا بتني دي مش رقاصة..ده راجل لابس رقاصة...لولهة مصدقتش...و بعدين ركزت شوية..اكتشفت فعلا انه واحد راجل لابس باروكة...وبدلة رقص شبة مقفولة و بيرقص...!!!!

الحقيقة مفهمتش...طب ما يجيبوا رقاصة...ايه لازمة ان راجل هو الي يقدم ده...و فمصر...طيب لحد كده وصلة الإستهبال مخلصتش...دي يا دوب ابتدت....الأخ ( مجازا يعني أخ) بعد ما عمل وصلة رقص من الي هي..بما يتطلب ذلك من ليونة...غير هدومة و لبس قميص نوم حريمي احمر...اه... وربنا احمر....و طلع يقدم سكتش فرانكو اراب مكسر و مدشدش ستميت حتة....هو وواحد راجل تخيين قوي يظهر انه معجب بملابسة الداخلية....طيب عادي مش مشكلة...مهم على البحر بمايوة...مش هتفرق بقى الخامة....نهايتة...قلت يا واد طنث خاااااااااالص و شوف الناس دي عايزة ايه...لقيت موضوع الرواية...ان الراجل اي عامل راجل...متجوز الراجل ابو ملابس داخلية...شوية كدا...و بداوا يمارسوا علاقة حب ساخنة على المسرح....تخيلوا...واحد راجل لابس ست...بيبوس واحد راجل بملابس داخلية..على مسرح في الغردقة...المهم ان الموضوع الملهم للرواية..كان كلة عن خيانة زوجة لزوجها..فبعد ما الزوج ( الي طلع طباخ في الفندق) خرج برة المسرح...دخل عيل كده عنده يجي 25 سنة...على اساس ان ده العشيق...ثم بدأ بمغازلة الراجل الي عامل ست...وهكذا طول العرض...

الي زعلانين على بناتنا انهم هيشتغلوا خدامين وجايز ينتهك عرضهم..يجي يشوفوا رجالة مصر الي لبسوا الطرح بمزاجهم عشان خاطر قرشين...انا كنت فاكرة ان المشكلة دي مشكلة خاصة بقرية مجاويش...لكن طلع الموضوع منتشر في معظم فنادق الغردقة...

الفيديو ده صورتة واحدة صحبتي من فندق سندباد...في الغردقة...اتفرجوا بقى على واحد راجل بيرقص بلدي ببدلة رقص شفافة...

يا ترى لو سكتنا على الكلام ده ممكن في يوم نصحى نلاقي منبتلنا قرون

Saturday, June 2, 2007

عن الرشوة والهدية

تفقد مصر سنويا خمسين مليار جنية في الرشوة...
و لإن بلدنا ماشية بنظم الحل العصرية...قرر جهاز التنمية الإدارية ان يصدر كتيب اسمة...( سلامة النية في الفصل بين الرشوة والهدية في الوظيفة العمومية)
هذا الكتاب لم يكتبة ابي القيم الجوزية...ولا ابن عبد ربة...ولا حتى ابي الفرج الأصفهاني...وانما كتبة مفتي الديار المصرية علي جمعة ...
ده على اعتبار ان المواطن المصري...لا يعرف الفرق ما بين الرشوة والهدية...
إذا كانت الدولة تفقدخمسين مليون جنية بالحرام...اذا كم تكسب بالحلال؟؟؟...هذا ان افترضنا ان هناك جزء مازال حلال من اموال الدولة..
و ان كانت الدولة طبعت الالاف من النسخ..من هذا الكتيب القيم...ليوزع على الخمسة مليون موظف مصري...فهل روعي حساب الجهات السيادية...هل سياخذ زكريا عزمي...الذي ساعد بنفوذة في هروب من قتل الف من ابناء الوطن...نسخة من هذا الكتيب القيم...
هل اخذ وزير المواصلات السابق..صاحب فضيحة قطار الصعيد الذي قتل المئات حرقا في صباح العيد نصيبة
ان الدولة مازالت تتعاطى مع المشاكل بذات الغباء الإداري...هي تسرقنا
ونحن نعلم انها تسرقنا...هي تعلم اننا نعلم انها تسرقنا...و مع ذلك تحاول ان تمثل علينا انها لا تعلم...حد فهم حاجة...
طيب...ان كان الكتيب السابق لم يضحكم بما فيه الكفاية..خدوا دي بقى.....
مستثمر مصري ( يحمل جنسية اخرى) اراد شراء قطعة ارض ضخمة المساحة...ما بين طابا و شرم الشيخ
احنا هنا بنتكلم عن مساحة شاسعة من الامتار...و برغم التحذير الأمني من اهمية هذه الأرض
وخطرها على الأمني العام( الي فلقونا بيه)
الا ان احد مسؤولي الدولة ( الي اكيد عارف الفرق ما بين الرشوة والهدية)
باع هذه المساحة المترامية الأطراف من الارض الى المستثمر الأجنبي..
.فقط لنكتشف ان الجنسية الأخرى لهذا المشتثمر هي الجنسية الإسرائلية...
.لا مش بس كده...ده كمان معاه مجموعة من المستثمرين...اليهود....
.فما كان من المسؤولين...الي اكيد عمرهم ما سمعوا عن كلمة رشوة في حياتهم...ان رفضوا تسليم الأرض
لكن المستثمر الشيك ابو جنسية اجنبية..
.رفع قضية على البلد في محكمة العدل الدولية...وكسب القضية..
.مصر دلوقتي مقدمهاش غير التسليم...او دفع مبلغ قدرة خمسين مليون دولار...
ولسة بيتكلموا عن رشوة الموظف الصغير.
.الي بياخد خمسة ولا عشرة جنية عشان يمشيلك مصلحتك في المرور ولا في السجل المدني..
(لقد اهلك الذين من قبلكم انهم ان سرق فيهم الشريف تركوه...وان سرق فيهم الفقير اقاموا عليه الحد)
صدق رسول الله صلى الله علية وسلم