Saturday, June 2, 2007

عن الرشوة والهدية

تفقد مصر سنويا خمسين مليار جنية في الرشوة...
و لإن بلدنا ماشية بنظم الحل العصرية...قرر جهاز التنمية الإدارية ان يصدر كتيب اسمة...( سلامة النية في الفصل بين الرشوة والهدية في الوظيفة العمومية)
هذا الكتاب لم يكتبة ابي القيم الجوزية...ولا ابن عبد ربة...ولا حتى ابي الفرج الأصفهاني...وانما كتبة مفتي الديار المصرية علي جمعة ...
ده على اعتبار ان المواطن المصري...لا يعرف الفرق ما بين الرشوة والهدية...
إذا كانت الدولة تفقدخمسين مليون جنية بالحرام...اذا كم تكسب بالحلال؟؟؟...هذا ان افترضنا ان هناك جزء مازال حلال من اموال الدولة..
و ان كانت الدولة طبعت الالاف من النسخ..من هذا الكتيب القيم...ليوزع على الخمسة مليون موظف مصري...فهل روعي حساب الجهات السيادية...هل سياخذ زكريا عزمي...الذي ساعد بنفوذة في هروب من قتل الف من ابناء الوطن...نسخة من هذا الكتيب القيم...
هل اخذ وزير المواصلات السابق..صاحب فضيحة قطار الصعيد الذي قتل المئات حرقا في صباح العيد نصيبة
ان الدولة مازالت تتعاطى مع المشاكل بذات الغباء الإداري...هي تسرقنا
ونحن نعلم انها تسرقنا...هي تعلم اننا نعلم انها تسرقنا...و مع ذلك تحاول ان تمثل علينا انها لا تعلم...حد فهم حاجة...
طيب...ان كان الكتيب السابق لم يضحكم بما فيه الكفاية..خدوا دي بقى.....
مستثمر مصري ( يحمل جنسية اخرى) اراد شراء قطعة ارض ضخمة المساحة...ما بين طابا و شرم الشيخ
احنا هنا بنتكلم عن مساحة شاسعة من الامتار...و برغم التحذير الأمني من اهمية هذه الأرض
وخطرها على الأمني العام( الي فلقونا بيه)
الا ان احد مسؤولي الدولة ( الي اكيد عارف الفرق ما بين الرشوة والهدية)
باع هذه المساحة المترامية الأطراف من الارض الى المستثمر الأجنبي..
.فقط لنكتشف ان الجنسية الأخرى لهذا المشتثمر هي الجنسية الإسرائلية...
.لا مش بس كده...ده كمان معاه مجموعة من المستثمرين...اليهود....
.فما كان من المسؤولين...الي اكيد عمرهم ما سمعوا عن كلمة رشوة في حياتهم...ان رفضوا تسليم الأرض
لكن المستثمر الشيك ابو جنسية اجنبية..
.رفع قضية على البلد في محكمة العدل الدولية...وكسب القضية..
.مصر دلوقتي مقدمهاش غير التسليم...او دفع مبلغ قدرة خمسين مليون دولار...
ولسة بيتكلموا عن رشوة الموظف الصغير.
.الي بياخد خمسة ولا عشرة جنية عشان يمشيلك مصلحتك في المرور ولا في السجل المدني..
(لقد اهلك الذين من قبلكم انهم ان سرق فيهم الشريف تركوه...وان سرق فيهم الفقير اقاموا عليه الحد)
صدق رسول الله صلى الله علية وسلم

10 comments:

Amr Ahmed said...

انا اول مرة اسمع عن الكتاب ده للدكتور علي جمعة

ممكن تقولي سمعتي عنه فين

وهل قراتيه لتحكمي عليه؟

انا لا استطيع الحكم
بدون خلفية
تحياتي

عبقرينو said...

السلام عليكم
أنا سمعت
انى فى كتاب هيتعمل بالشكل ده؟ بغض النظر أكد هيبقى كتاب مفيد ولكن أنى الدولة مش لاقية حل غير كتب الدين يبقى مع السلامة على الدولة
مصر تعيش فى مظاهر دينية كاذبة لو كان عندنا دين ماقبل أحد منا أن يدفع الرشوة أو يتقبلها, الرشوة هنا لاتعنى المال فقط تعنى كل شى ءتقدمه للحصول على حق ليس ملكك
ثانيا دولة أيه وأمن أيه فين المخابرات اللى فالقنا بيها كل شويه وأحنا أقوى جهاز مخابرات وووو
لو المخابرات صاحية وأمن الدولة اللى فاضى للمظاهرات ومشاكل الأقباط مع المسلمين اللى بتدخلوا فيها هيولع البلد ,كانوا أكتشفوا القصة دى
طيب اللى أكبر من كده بقى سرقة المعلومات والأفكار اللى بيحصل كل يوم على سيرة المعونة الأمريكية والمعونة الإيطالية والمعونة الفنلندية ومعونة بلاد جزر القمر بقينا سلة للمعونات بالظبط شحاتة فى الشارع ومعورة أبنها وقاعدة بيه على الناصية وكله بيرمى فى حجرها بس مش علشان يساعدها لأ؟ علشان كل واحد من اللى بيساعدوها عاوز غرض منها ....والحدق يفهم
مصر باللى باشوفوا بيحصل فيها كل يوم والصورة بقت بالنسبة ليا أوضح دون الدخول فى التفاصيل والتوهان فيها, مصر بتضيع
فيه مشاكل لإخواننا الأقباط وأنا معاهم بس مش إضطهاد لأن مشاكلهم هى نموذج لكل مشاكل المصريين بالظبط بس مضافا لها كلمة قبطى
الحل فى أن توجد آليه لممارسة الديموقراطيه وفتح الحريات وبداية ده كله أنه يمشى كل الفاسدين واللى قاعدين على قلبنا بقالهم ردح من الزمان وأكلوا وشربوا على أجسادنا ومن عرقنا وكدنا
متأسف للإطالة بس بجد بقالى كتييير فى دماغى حاجات ومش عارف أكتبها بس مجرد مابدأت اعلق كتبت وعبرت وربنا الموفق لما فيه الخير والثواب

مصر هى أمى said...

بصراحة حاجة جديدة على اعتبار ان المصريين دول ناس هبل وملبعرفوش يفرقوا بين الهدية والرشوة

انتى ادخلى اى مصلحة هتلاقى الناس كلها بتتعامل على ان الرشوة هدية وكلهم معتبرينها حلال حلال

اما بالنسبة لزكريا عزمى
هوا الراجل عمل ايه
ايه يعنى مات الف وخمسمائة واحد اهوا بيقلل الشعب علشا حضرتك واللى زيك يلاقى شغل

zenzana said...

طب انا ممكن الاقي نسخة منه فين؟
عشان اذاكر بس
هههه رغم انى مش موظفة حكومة

اظن زكريا عزمي وغيره مش محتاجين نسخة لانهم هم اللي بدعوا النظرية

sokoothansawat said...

عمر احمد...الكتاب عبارة عن كتيب ارشادي...تم توزيعة بالفعل على عشرين الف موظف مصري..( غالبا دول عدد الموظفين الي ما بياخدوش رشوة) ...و الكلام ده كان موضوع حلقة العاشرة مساء يوم الاحد الموافق 2 يونيو...
انا ما حكمتش على الكتاب...مؤكد فيه معلومات قيمة...انا بسخر من الحكومة...الي اكبر راس فيها...غرقان لزورة في الفساد الإداري...لدرجة ان كوارثهم مالية السمع والبصر والفؤاد...ما يخفاش عليك مثلا..ان ازمة اكياس الدم الفاسدة..بتاعة شركة هايدلينا...( اكيد سمعت عنها) والي اتسببت بأزمة طاحنة في اكياس الدم في مصر...طلع هاني سرور..عضو مجلس الشعب عن الحزب الوطني..ورئيس الشركة..برئ...والدكتورة الي بلغت عن المشكلة..حاليا..محولة للتحقيق...اما عضو مجلس الشعب...حيدر بغدادي...الي ساعد في تفجير القضية تحت قبة البرلمان..هوب طلعت سيديهات مصوراه في اماكن مشبوهة مع فتيات ليل...بالذمة دولة رؤسها الكبار...و اصحاب الأمر والنهى فيها...أحوالهم كده..ينفع يطلعوا كتاب عن الرشوة...عشان خاطر الموظف الي مرتبة 250 جنية...ما ياخدش منك عشرة ولا عشرين جنية و انت بتطلع رخصة عربيتك ولا بطاقتك الشخصية...!!!!اه الفساد في مصر وفي الوظائف للركب...لكن يا ترى الحكومة دي..اهل انها تحاربة...تحياتي و اسفة للإطالة

sokoothansawat said...

عبقرينو...كلامك مشابة جدا لكلامي...و ان كان من زاوية اخرى...شكرا للزيارة

مصر هي امي

اخيرا نفسيتك اتصلحت...يااااااه قلقتنا عليك يا راجل...على رايك..زكريا عزمي اكيد مش محتاج نسخة...ده راجل بتاع ربنا..منة لعزرائيل على طول

زنزانة...ما تخافيش يا ستي...الحكومة برضة مخلصهاش انك ما تاخديش نسخة...كل واحد هياخد نسختة..عشان ربنا يفتح علينا..ونبقى مرتشين بقى ونعوم على وش الفتة..نورتيني

7ntklm said...

تانى مفتى الديار


ألف سلامة.. يا حسن النية

البتاع said...

ههههههههههه
مفتى ايه بس ياسكوت يااختى؟؟

ده لعبة فى ايديهم هو والازهر كله
انتى بيخيل عليكى برضه الكلام الفارغ ده؟؟؟
والنبى ياختى انا بجد بجد مش ناقصة الدنيا سوواااااااد قدامى

صحيح
انتى ليه مش ينخشى عالهوت ميل؟؟

تحياتى ياقمر

sokoothansawat said...

حنتكلم...والله يسلمك يا سيدي...العقبى عندكم في المسرات

بتاع...

انا لو اعرف انك على الهوت ميل..اجي على طول...اليومين دول بس عندي كربسة شغل غبية كده بس انشاء الله قريبا في اسواق النت هتلاقيني متوفرة بكثرة...ميرسيييييين ليكي على الزيارة ...و متزعليش قوي كده...بكرة السوادد يبقى كحلي غامق..( بحاول اسري عنك بس معرفش ليه الكلام طالع غامق كده)...

Anonymous said...

Its liκe you rеaԁ my mind! Yοu seem to know a
lot аbout this, like yοu ωrоte the bоok in
it or something. I think that you can do with a feω piсs to
dгive thе messаge home a bit,
but other than that, thіs is excellent blog.
Αn excellеnt read. Ӏ will cегtainly be back.



Also νiѕit my blog ... http://www.hainuteminunate.ro/