فتحت قلبي النهاردة...
اكتشفت اني بشتغل مع 25 مسيحي...و كل يوم بنصبح و بنمسي..ونقضي اليوم في ضحك ولعب وجد وشغل..
منغير ما حد يتكلم عن حاجة من مشاكل الوطن الموجودة....كل يوم نقرا عن خبر حرق كنيسة...و تقاتل ما بين مسيحيين و مسلمين
واحنا في الشغل كإننا عايشين في تنزانيا...ولا حد جايب سيرة..الإبتسامة هي هي...والحوارات عن المكياج والأفلام والأغاني و قليل جدا من السياسة هو هو...من مدة وانا بتاعب الكلام عند نوارة و مراقب مصري...في موقع الحوار عيلكو حق...بخصوص الازمة...وازاي كل عيل عايز يتربى...ممكن يكون نتيجة قلة ادبة حرق كنيسة عالفيها...لما شفت الكلام عند مينا..وقريت عند نوارة..اتوجعت قوي....و قررت اني اخرج برة الوش البلاستك بتاع الشغل..ولأول مرة..ابق صادقة بجد...اتكلمت عن المشكلة..وقلت ان انا في شدة الأسف ان هم في بلدهم..ومش قادرين يتمتعوا بحق المواطنة الكامل...اعتذرت ان فيه جهلاء من ابناء ديني لا يدركون حقا..ان مواطنه المسيحي ليست فضلا نمنحة اياه...ولكن حق يكتسبة منذ ان يولد و في بطاقة ميلاده كلمة مصري
تكلمت واسهبت...قلت اني على استعداد لبذل جهد في رأب الصدع...ان اذهب مع العقلاء من ديني الى اماكن الصراع...
ابني بيدي المسلمة ما تهدم من الكنيسة...اقرأ بصوتي على الجهلاء من ابناء ديني...احاديث الرسول وايات القران..
التي تمنع الناس ان لا يعدلوا...ادعوا لعمل مدني حتى لو عشوائي يكون بداية الحل
ولأول مرة...ارى في وجوه زملائي المسيحين...شعاع حزن دفين...اخترق الطريق بين سحابات السعادة المصطنعة في اعينهم
لتظهر حسرة شديدة...
و لأول مرة من اربع سنين...اشوف القهر بجد الملفوف بالغضب..واحد من زملائي قال لي...انت عارفة ان الكنيسة الي اتحرقت دي..كنت بخدم فيها السنة الي فاتت..,كان فيه خطة معمولة عشان نخدم فيها السنه دي...لكن خلاص...انسي...و ضحك ضحكة عصبية ..
فضلنا نتكلم اكتر من ساعتين...نتكاشف ...نتعاتب..نتصارح...نواجه بعض بماشكلنا بجد...
دعوت الجميع ان يخرجوا من عباءة السلبية..الى ارض الواقع...الى المشاركة في اي حملة قد تنشأ لخدمة المجتمع بعييدا عن التمييز...وبعيدا عن التبشير الديني سواء الإسلامي او المسيحي..
كان فيه قدر من التشكك...خصوصا عندما يصدر الكلام عن فتاة محجبة..محسوبة على الفصيل الإسلامي المتزمت...
هذا الأمر اتضح عندما قالت زميلتي....انا الحقيقة من حقي اشك في اي حاجة حد بيقولها...وبعدين دي اول مرة اشوف واحدة مسلمة متدينة بتقول كلامك ده عن المواطنة...دايما الي عندهم الأفكار دي...بيكونوا فريش شوية..واخدينها كده..فنفنة
الكلام وجعني قوي....قد كده المسلمين الي المفروض انهم ملتزمين...عودوا الناس ان يكونوا ظلمة...يااااااااااااااااااه
بجد حاجة توجع....و رجعت تاني فكرت في حركة ابناء مصر...الي هتكون النواه الي اقدر اشتغل من خلالها...
المشكلة ان لدينا ازدواجية في المعايير...يعني المسيحي..متطهد اه....عنده مشاكل اه...طيب مستعد ياخد خطوة عشان حقة...جايز...بس مش اكيد...طيب المسلم..مطهد اه...عنده مشاكل...اكيد..طيب مستعد ياخد خطوة عشان حل مشاكلة...ممكن....طيب الإتنين مضطهدين ...وعندهم مشاكل....مستعدين يقفوا جنب بعض عشان يحلوا مشاكلهم مع العدو المشترك سوا...مستحييييييييييل
هي دي بقى المشكلة...كل واحد شايف ان هو بس الي عنده مشكلة...ودي الوحيدة الأولى بالحل...لكن مشاكل الفصيل التاني...كلام فاضي
طيب يا خوانا....ما نتو كده بتلعبو لعبة النظام.....لازم تكون الحرية مكفولة للجميع....منغير تمييز او تفرقة
يعني من حق الإخواني انه يعمل زي بالظبط ما من حق المسيحي انه يعمل لخدمة دينه....لااااااااااااااااااا......الإخوان دول عايزين يموتونا...والمسيحيين ولاءهم للكنيسة مش للبلد...وكلام فاضي لا له راس من رجلين...
الوجع كبير....عند الطرفين..بس المشكلة...ان الطرفين مش عادلين مع انفسهم..وبالتالي عمرهم ما هيتنصفوا
لا سبيل الى حرية مجزأة...الحرية..تقتضي ان يقتل المرء في سبيل حقه او حق غيرة...ان ينشر رأية او فكرة أو مذهبة...والقاعدة بتقول
اما الزبد فيذهب جفاء..واما ما ينفع الناس فيمكث في الأرض
20 comments:
مع تقديري لطارحة الموضوع غير أن خاطرة أردت تسجيلها على هامش الموضوع هنا
أجدني محظوظا لأن هناك على الجانب الآخر فى المجتمع من يشاركني الإهتمام و أساسا المحبة لتلك القمم النبيلة الرائعة التي تجعلنا نعيد اكتشاف العالم من جديد
أريد أن يكون هناك مناخا ملائما للتوغل في أفكارالمتطرفين صناع مبادا الشر بحرق اماكن العبادة والتطاول على رجال الدين .
وونبدا بمقاومة الرجعية السائدة من المتعصبين
لهذا سوف أستأذنك في تأجيل طرح ما لدي أن أعود لهذا الموضع القيم لو توفر لديك و لدى زملائنا الأعزاء الوقت و الاهتمام .
انا على ثقة تامة بأن هناك الكثيرين من المصريين...الراغبين في خنق بؤر العصبية الجاهلية القديمة..و فتح المجال لأصحاب الرأي في نشر رأيهم مهما كان شذوذة و غربته..حتى لا تظل النار خامدة تحت الرماد...في انتظار كلامك و تعليقاتك يا تامر.. فأنا كلي شغف و اهتمام بمعرفة ما لديك ما اراء و اطروحات
زى مابتعملى عندى كل مرة اتكلم فيها فين الحلول:) مش عاوز مشاكل عاوز حلول
:)الحوار شىء ضرورى كلامك صح جدا بس يكون حوار بعقل واعى وقلب مفتوح وآذان صاغية ومحبة, حوار عقلاء مش حوار شاشات وكاميرات حوار من
أجل حل المرض وانتزاعه من جذوره مش حوار من أجل مداراة العرض
أدخلى عندى كنت كاتب 2 بوست عن الموضوع ده بعنوان
مشكلات المصريين ...ومشكلات المصريين والحلول؟
مصر بكرة أحسن بينا كلنا مريم وعائشة ومينا ومحمد وجورج ومها وباكينام ومنى وووووووووووووكل ومصرى وطنى شريف
تحياتى
عندك اصرار رهيب يا عبقرينو...انك تقرا الي عايز تقرا :-) ..مانا عارضة حلول..عارضة ان عقلاء المسلمين..ينزلوا بإيدهم..يداوو الجرح..يبنوا الي اتكسر من الكنيسة...و يطلبوا السماح من المسيحيين المضرورين..ينزلوا بحجابهم..وذقونهم..اليهم..يكلموا الجهلاء من ابناء الوطن قد ايه هم ظلمة بما فعلوا...الحل..طرحته نوارة بالفعل..وانا بدعوا الناس للمشاركة في تنفيذة...والمكاشفة الي تمت..في محل عملي..هو اول خطوة على الطريق..
مقال قيم
يحمل رؤى مبشرة رغم اختلافي مع عدة افكار وردت فيه
تحياتي
كلها محاولات لاشعال الفتنة
لا حقيقة لها و لكنها لاسه موجهة بدقة
والله الدوله تتحمل المسئوليه كامله فأنا معظم اصدقائي مسيحين ونسافر مع بعض دون التطرق الي هذه الاحداث الا قليل يعني واحد صحبي كان بيكلمني علي ليه بيقصرو البنطلون وكلام من ده ... وانا لي رأي مش زي ما بيقول تامر في افكار المتطرفين دي حاجه اساسيه طبعا لكن لابد ان يندمج المسحيين في المجتمع ولا ينفصلو عن المجتمع
تحياتي علي المقال الرائع
مقالك رائع .ولكن عندى ملاحظه صغيره
انتى تقولين ان زملاءك فى العمل 25 مسيحيا..وانا زملائى فى العمل 4 مسيحيين وجيرانى مسيحيين والمهندس الاستشارى للمشروع الاسكانى الذى اعمل فيه مسيحى واعرف اعدادا هائله من الاطباء والمهندسين والمحاسبين ورجال الاعمال..وووووو
كلهم مسيحيين ياخذون كامل حقوقهم ولهم احترامهم ومكانتهم مثلهم مثل اقرانهم المسلمين
يا اختى لا يوجد تعصب ولا فتنه طائفيه شامله فى مصر
الحكايه ان دول خارجيه تريد المساس من الوحده الوطنيه فى مصر ويشاركها فى ذلك بقصد او بدون قصد الله اعلم رابطه اقباط المهجر الذين يتحدثون عن مصر وكانهم ليس من ابناءها
نحن نقدر المسيحيين الموجودين بين صفوفنا ايديهم متشابكه مع ايدينا لبناء مصر لا لهدمها او تقسيمها مسلمه او مسيحيه
مصر وحده الهلال مع الصليب وستظل الى الابد رغم كيد الكائدين
حركه ابناء مصر
اولا يشرفنى الانضمام الى الحركه
ثانيا.عندى اقتراح واريد مناقشته
حركه ابناء مصر او حزب ابناء مصر
اولا يجب ان يكون لها رئيس
ثانيا-يجب ان يكون لها هدف واضح المعالم
وتكون اهدافها بموافقه الاعضاء
ثالثا-يجب ان يكون لها اعضاء دائمين بمعنى..ان هناك 6 أعضاء واتشرف ان اكون السابع لا يستطيعون الحديث والنقاش عبر الماسنجر لان الاعضاء من المحتمل زيادتهم وحوارهم عبر الماسنجر ضياع للوقت ..الحل هو ان يقوم الرئيس بعمل بريد الكترونى جديد يعرف الاعضاء الدائمين اسم المستخدم والرقم السرى له وبذلك يستطيع الاعضاء ارسال تدويناتهم واخبارهم والحديث مع الاعضاء بعضهم البعض ويستطيع كل عضو الدخول الى الاميل وقراءه ما فيه وقتما يشاء ..ويقوم الرئيس او احد الاعضاء باقتراح موضوع للحديث عنه فى المدونه الخاصه بالحركه وبعدموافقه الاعضاء على موضوع معين بالاغلبيه يقوم الاعضاء او من يشاء منهم بالكتابه فى الموضوع ويرسل كلا ما كتبه الى البريد الالكترونى الخاص وبعد ذلك يقوم الرئيس بجمع كل الكتابات وكتابتها فى مقال واحد كل عضواسمه تحت كتابته .ولا يحق للرئيس اهمال اى مقال او حذف اى جزء منه او اضافه اى شىء له ..اما فى حاله ان وجد الرئيس مقال او جمله او كلمه تضر بالمدونه او فيها خروج عن اداب المدونه او اهدافها..يقوم بشرح الموقف للعضو ويستاذنه فى حذف ما يرى وفى حاله رفض العضو يقوم الرئيس باخذ اصوات الاعضاء على الحذف ..الرئيس وحده هو الذى يعرف اسم المستخدم والرقم السرى للمدونه ويمكن للرئيس اذا وجد ان هناك اعباء عليه يمكنه الاستعانه بعضو اخر معه لتحرير المدونه
رابعا-يتم انتخاب الرئيس كل عام ويلتزم الرئيس باعطاء من سيحل محله الرقم السرى للمدونه حتى يستطيع الرئيس الجديد تغيره
خامسا -لايجب ان يذيد عدد الاعضاء الدائمين عن عدد معين حتى لا تتوه الامور
سادسا - عدد الاعضاء العاديين اى عدد ويشترط فى العضو ان يضع رسم او تصميم اشعار الخاص بالحركه على مدونته وان يلتذم باهداف الحركه التى سوف يتم الاعلان عنها بعد موافقه الاعضاء عليها سابعا-يتم ارسال تدوينه كل اسبوع وبعد ارسال التدونه يقوم الرئيس او احد الاعضاء باقتراح موضوع ويتم اخذ الاصوات عليه فى خلال يومين ويتم ارسال المقالات فى خلال يومين حتى يتبقى للرئيس 3 ايام لارسال التدوينه
انا فى انتظار ردكم
ومستعد للنقاش او طرح اى سؤال
وفقكم الله
صاحب البوابة
شكرا على الحضور..و كفارة..انتظر بشغف ان اسمع رايك كاملا في الموضوع
علاء
الفتنة موجودة بالفعل..لكنها في الطبقات السفلى من الأرض...لعن الله من اخرجها للسطح..شكرا على الإهتمام
بن ناصر
صحيح الدولة هي المسؤولة الأولى والأخيرة
لكن هذا لا ينفي وجود بالفعل طبقات من المجتمع..تجد ان حرب اعداء الصليت اسهل بكثير من حرب الحكومة...و اهه كله تنفيس..و تكون النتيجة ان الوحدة الوطنية دي..على السطح بس..لكن في القاع..عند اي لحظة غضب..هتلاقي جموع غفيرة من الناس..رايحة تهد كنايس و تحرقها..اظهارا لغضب وهمي لله..هو ده الي المفروض يتنقاش..الدولة مش هتدينا حاجة..و بالنسبة لها..المصري الجيد هو المصري الميت..بصرف النظر اخواني ولا مسيحي...المهم..ازاي نقنع الناس دول..سواء المسلمين الي بيحرقوا الكنايس..ولا المسيحين الي من كتر الزهق طالبين التار..ان العدو الحقيقي عدو مشترك..و هو ده الي المفروض كلنا نوجه ليه نشاطناّ!!!
الجاهل
تعليقا على المقال..نعم انا اعمل في مكان فيه 25 مسيحي..وسته من المسلمين..يعني انا اقلية في عملي..و كون المسيحين يعملون في اماكن مرموقة..وكونهم احياء يتنفسون لا ينفي وجود التمييز ضدهم..فمثلا...معظم زملائي من المتفوقين دراسيا لكن تعرضوا لظلم في تعيينهم بالجامعات الحكومية فلجؤوا لغيرها..من الجهات الأجنبية التي لا تعرف التمييز...ثم تحول الإضطهاد ضدهم الى اضطهاد منهم...فأصبح مكان العمل تقريبا حكر عليهم..لا الومهم كثيرا في الواقع..مادام المرء لم يحصل على حقة في مكانه..فطبيعي ان يلجا اليه في مكان اخر...هناك بالفعل فتنة..و لكنها حاليا..لا تظهر بقوة الا بين الطبقات الأكثر فقرا..والأشد جهلا..محاولة التعامي عنها..لن يمنع الواقع انها موجودة..شكرا للحضور
عن حركة ابناء مصر
عزيزي جاهل( مازلت اجد صعوبة في ان اخاطبك بهذا الإسم دون ان استشعر قدرا من الحرج)
حركتنا ليست حزب..وانما محاولة للتجمع..بالفعل هناك هيكل إداري مؤقت..وهناك خطط مطروحة لتنظيم التولي الإداري..لا يوجد لدينا رئيس للحركة..لإن اهداف الحركة متنوعة بشده..ولكن يوجد رئيس لكل نشاط..نحن مازلنا في طور المخاض كما اسلفت الذكر من قبل..ولذلك ستجد التغييرات في الحركة تتم اسرع مما تتخيل..اللقاءات كانت تتم على المسنجر..لإن الحركة لم تكن ولدت..في الخطة القادمة..سيتم اللقاء بين كل رئيس و مجموعة العمل الخاصة به على المسنجر..كلمة رئيس لا تعني اي منصب اكثر من المنصب الإداري فقط..اي تنظيم اللقاء..الخروج بملخص و عرضة على بلوج الحركة..ثم الموقع الإلكتروني عما قريب..و هكذا..اما طرح الأفكار و تناولها..فحق متاح لأي عضو في الحركة..سيتم تغيير الرئيس خلا مده زمنية غير محددة..اقترحت ان تكون 3 اشهر..قابلة للزيادة الي سته اشهر فقط لا غير..ثم تنتقل المهام الى الرئيس المنتخب التالي..و هكذا..عموما..كل اطروحاتك دي..هحطها هتؤخذ بعين الإعتبار..المهم يا بطل الأفكار الهامة..الخاصة بالأعمال والأنشطة..مستنينك
اختي الغالية
اتمنى التواصل معكِ سريعاً للأهمية
رقمي مع ابن ناصر او احمد المصري او فارس
انتظر مكالمتك سريعاً
وإن لم تتمكني من الاطلاع على تعليقي هذا إلا بعد فترة
فأقترح ان نتقابل في ندوة حرية الصحافة الالكترونية بنقابة الصحفيين الساعة السابعة والنصف مساء يوم الاربعاء 20 يونيو 2007
تحياتي اختاة
sokoothansawat بصراحة لم اكن اعرف بوجود تلك الحركة الا عندما ارسلتى تعليقك عندى فى المدونة هى الفكرة حلوة وانا معاكم باذن الله لكنى محتاج اتواصل مع اى حد من الاعضاء على الماسنجر علشان اوضح وضعى قبل اى حاجة
اما بالنسبة للموضع اللى انتى طرحتيه دا ان شايف ان فى ايدى خفية من الطرفين تدعمهم قوى اجنبية ماديا ومعنويا خصوصا اننا لما بنقرا على المواقع او نسمع على القنوات اللى عاملها الطرفين حتلاقى كل طرف بتكلم عن التانى بجهل شديد يعنى حتى الهجوم والشتيمة مش منسقة لو ان اللى بيهاجم دا طرح الفكرة اللى بيهاجم بيها على حد من الطرف الاخر على شكل استفسار كانت انتهت المشكلة مثلا مثلا يعنى زى ما كتب ابن ناصر عن تقصير البنطلون انا بقول مثلا كان عرف ان فى حديث يحذر من ان يتخطى الازار او الزى الكعبين عموما لينا لقاء تانى فى موضيع اخرى والسلام ختام
الله الله الله؟؟؟
ايه ياجدعاااااااااان هى الليلة قلبت فصحى كده ليه؟؟؟
كلمونا بالهجايص
بصى ياستى
البلد دى بلدنا
مسلم ومسيحى
والحيوانات - واعتذر للحيوانات عن انى اهنتهم- اللى فاكرين انهم اسم الله بيحافظو على الدين
احب اقولهم ان الرسول وصانا على اهل الذمة
سيدنا عمر دخل في اهل الذمة المجوس وعبدة النجوم عشان يتعاملو حلو
حتى الملحدين بلغتنا الحديثة
كانو بيتعاملو كويس
فى الاندلس اليهود كانو عايشين بشاوات
تاريخنا كله يدل على اننا
" لا اكراه فى الدين"
وحسبى الله فى ولاد الـ......اللى كاسفينا
العواف
عياش.
الموقع الرسمي للحركة على مدونة ابناء مصر
abna2masr.blogspot.com
تقدر تتابع كل تحركات الأفراد..هتلاقي كل حاجة تمت حتى الان..شرفت يا فندم..و منتظرينك هناك
البتاع....
حمد الله على السلامة يا قطة...
ههه..عملتي ايه في المصيف يا بت..
عايزة تفاصيل التفاصيل..ما تاكلنيش في دوكة
اما بقى عن المقال
فده مجرد نقطة في بحر
لسة لما انزلكوا بالمعلقات
ولا عبد الفتاح الصحاح هينجدك مني عن الحيوانات بقى الي بتقولي عليهم
فدول للأسف هم القاعدة العريضة للمجتمع
الي لازم ننزل نكلمهم بشكل مباشر...مستنياكي تعدي على موقع الحركة الي ذكرته لعياش..وقوليلي رايك ايه
تحياتشي يا قمر
من غير كلام مجاملات بتاع التعاليق
انا بنحني لكي احتراما ويا ريت فعلا الفكر الجميل ده يتغلغل شوية في قلوب البنيادمين هنا عشان ريحة الدخان عليت والحريقه جاية جاية
ومش هتسيب حد
تحياتي لكي كثيرا
نفسنا
حاضر هبص عليها
احمد سلامة
يا سيدي كتر خيرك...مادام الكلام عاجبك..يبقى ليا عندك زيارة لموقع ابناء مصر..جايز الكلام يعجبك و يحمسك تشارك معانا..تحياتي
مش عارف ليه ما بحبش اتكلم فى مواضيع زى دى وبحس ان الكلام نفسوا بيزيد حاله الحنق والغضب بين الطرفيين من راى نتعاون على اننا مصريين والاغلبيه اللى تحدد النظام بس خلاص
كفارة يا عمر..
الأول حمد الله على سلامتك..واهلا بيك عندي..ثانيا..يا عمر عدم الكلام لا ينفي وجود مشكلة..انما يزيد من حساسيتها لإن ساعتها لن ندرك مدى الإحتقان الموجود بالفعل..مش عايزين نعمل زي النعام الي بيدفن راسة في الرمل..ثم ان فكرة الأغلبية هي الي تحكم منغير ما تفهم مشاكل الشعب كله أقلياته قبل اغلبيته..هيزود المشكلة..لإن معنى كده انك بتقول لخمستاشر في المية من الشعب..لا مؤاخذه انتم اقلية مالكوش عندنا حاجة..الحوار هو اسهل وابسط السبل للوصول للناس..على الأقل في رأيي..شرفت يا عمر
Post a Comment