Friday, June 8, 2007

إسلاك نبية..مش هنخلص من المحاكمة دي بقة

القضية اتأجلت ليوم 4 يوليو...معرفتش اروح الجلسة يوم الخميس..لإن كان عندي ارتباط عمل مهم جدا..كان صعب عليا اني افوتة...بس نوارة...و زنزانة...و مراقب مصري...ووائل عباس قاموا بالواجب...بصرف النظر بقى عن تفاصيل المحاكمة..ايه العلة في التطويل ده..القضية منظورة من شهور..وشهر يجر شهر يجر شهر...و مفيش جديد....يا ترى الجلسة الي جاية دي هتكون للنطق بالحكم...ولا لسة هتتأجل تاني؟؟
و يا ترى القاضي هيكون حكمة النهائي ايه...السؤال الأهم...ايه الحكم العادل في القضية دي..؟؟
في رواية نجيب محفوظ اولاد حارتنا...جبل الي هو سيدنا موسى..فقع عين قصاد عين..عملا بقاعدة العين بالعين والسن بالسن والجروح قصاص...يا ترى لو خد إسلاك ست اشهر مع ايقاف التنفيذ....زي مما بعض المحامين متوقعين..يبقى الحل ايه..هل ده هيكون بداية الفوضى؟؟؟
ربنا يستر..ويعدي المرحلة الي جاية على خير...ويجعل القضاء المصري عند حسن ظننا...

10 comments:

amy lee said...

حسبي الله
ايه ده
انا مش مصدقه الي بيحصل ده
صحيح انا مليش ف الكلام ده
ومش متابعه
بس بجد الي يشوف الحاجات دي ويسكت
يبقى معندوش دم بصراحه
دي حاجه تقشعر لها الابدان

عبقرينو said...

السلام عليكم
حاجة سكوت هنصوت...تفى من من بقك ست شهور ايه؟ وكماان مع إيقاف التنفيذ
على رأى زنزانه فى كلمة بيقولها الإسكندرانية من تلات حروف هتبقى معبرة جدا عن الموقف ساعتها

البتاع said...

هو ده القضاء المصرى
على رأى عمرو اديب
الرول فيه قضيتين بس فى اليوم
"فيه 200 بس عمرو بيتريق "
فالقضاة مش بيعلقو قضايا خاااااالص

يابنتى انا كلمتى المعهودة

" ابتسم انت فى ارض الوطن"

Iron Cobra said...

على فكرة القضاء و النيابة اللي أنتوا متشعلقين اوي فيهم دول أنيل و أضل سبيلاً من الشرطة و الجيش و الفساد ضارب جذورة فيهم حتى النخاع بكل انواعة رشوة و محسوبية و استغلال سلطة و نفوذ و أبقوا ارجعوا لتاريخ مرتضى منصور .
على فكرة الكلام اللي انا بأقولة دة من بق ناس كانوا أصحابي و معارفي في القضاء و النيابة .
مش معنى كدة أن الكل فاسد لأ في شرفا بس نسبة قليلة جداً (زي مابرضة في الشرطة و الجيش لسة في شرفا) حاجة تعملها بتاع 0.5% كدة بس دول ياأما بيسكتوا عشان ياكلوا عيش يا أما بيشتروا دماغهم و راحتهم و كرامتهم و يتركوا السلك دة يا أما بينحرفوا عشان يجاروا الجو عملاً بمبدأ عندما تعيش بين الذئاب فلابد أن تستأذب و ألا ستكون أول ضحاياهم ، يا أما بيحاولوا يعملوا حاجة و يقفوا ضد الفساد و في الحالة دي بتتفتح عليهم أبواب جهنم اللي بتؤدي في النهاية لقطع أكل عيشهم و أضطهادهم في رزقهم و تشريدهم هم و عائلاتهم و مش بعيد كمان تلفيق قضايا ليهم و القائهم في غياهب السجون أو وصفهم بالجنون و أدخالهم العباسية أو حتى أغتيالهم في حادث يتهم فية مختل عقلياً أو يقيد ضد مجهول.
أنا مش بأكسر من مجاديف حد و لا من دعاة الأنهزامية بس بحاول أون واقعي و أقولكم ماتحلقوش بأحلامكم و أمانيكم عالياً لأنة كلما زاد الأرتفاع كلما كان الأرتطام بالأرض مدوياً و مؤلماً بل و أحياناً قاتلاً.

ibn nasser - ابن ناصر said...

حاجه تجنن كده سكوت هنعيط ... ويا رب ياخد اقصي العقوبه
تحياتي

sokoothansawat said...

أمي ليي...انا بضم صوتي لصوتك و بقول حسبي الله و نعم الوكيل في كل ظالم في البلد دي...طيب احنا كلنا عندنا دم..يا ترى نعمل ايه...تفتكري حضور المحاكمة كفاية...الأهم لو إسلاك مخدش حكم عدل..الحل هيكون ايه الحل؟؟؟
لازم نلاقي اجابة عدلة والا هنبقى كلننا معندناش دم

عبقرينوا..أيوة انا عارفة كويس الكلمة دي(تييييييييييت) تفتكر الكلمة دي كفاية

البتـــــــــــــــــــاع
انت فين يا هانم...و فين بوستاتك..محدش بيشوفلك جديد ليه..و بعدين خلصتي امتحانات ولا لسة...عندك حق..هي دي ارض الوطن..على فكرة انا قعدت في المحمة من الساعة 11..لكن القضية بدأت الساعة 1:30 وخلصت 3:00 كل ده في قضية واحدة..طب بقية القواضي نظروها امتى؟؟؟ وهي المحاكم بتشتغل فترة واحدة بس..انا مش عارفة الوم مين..خايفة اجي عالقضاة ابقى جيت على حق الناس..ربنا يهون

sokoothansawat said...

ايرون كوبرا

هو احنا ناقصين احباط

طبيعي ان يكون في القضاة نفس درجة الفساد الي في البلد...الي خلاهم مختلفين..انهم الفئة الوحيدة القادرة بجد على احداث تغيير مهم و جذري...و ان كانوا خذلونا شوية فإحنا خذلناهم شويتين..يعني لو كنا ساندناهم بجد..ماديا و معنويا..ساعة الوقفة الإحتجاجية الأخيرة..مكنش ده بقى حالنا ساعتها..

ابن ناصر

أخيرا خلصت الإمتحانات الكئيبة..يا رب النجاح انشاء الله..ويا ترى هنشوفك المحاكمة الي جاية؟؟؟
مستنيين البوستات الجامدة يا مان

اتفضل عندنا said...

هي عادة الحكومه ولا هتشتريها يعني، كل ما تطلع قضيه كبيره كده يفضلوا يمطوا فيها لحد ماالناس تنسي و تزهق من السؤال، معتمدين علي الزهايمرالوراثي اللي عندنا، بس و حياة امهم ما احنا مفوتين المرة دي ... العواف يااختشي

7ntklm said...

مستبعد النطق بالحكم فى جلسة الشهر القادم , بنسبة للقضاء افتقدت الثقة فى قضائهم الكان عادل
بنسبة للفوضى بدات من سنين طويلة

وزى ما انتى قولتى ربنا يستر ويعدى

المراحل الجاية على خير

كلبوزة لكن سمباتيك said...

اكيد الحكم حيكون سنة مع الشغل مع مقشة ماركة الهلال و النجمة

طبعا معروف ليه


تحياتي