اخيرا زرت حزب الجبهة الديموقراطية..
أخدت القرار بعد اللقاء الي عملة الدكتور يحي الجمل على العاشرة مساءا...
واتكلم فيه كلام من القلب..عن النوايا الطيبة الي وراء الحزب..
بس كان فاضل اني اتأكد ان وراء النوايا الصالحة فيه عمل صالح..اتصلت بداية عشان اعرف إمكانية حضور الجمعية العمومية الأولى
الي هتنعقد يوم الجمعة 22 يونيو القادم بمسرح قصر النيل
الكلام هنا موجه بالأخص لحركة ابناء مصر...بما اننا كنا طارحين فكرة ممارسة عمل إجتماعي من خلال حزب
الي عايز يراجع ( حلوة يراجع دي..بتفكرني بالإمتحانات) المراحل الي فاتت..يقدر يتفضل هنا و هنا عند حنتكلم...فيه اختصار اللقائيين اليتيمين الي فاتو
صحيح ان النتيجة انتهت في غير صالح الحزب....لكن انا كنت اتفقت مع تامر( حنتكلم) انه من المهم اننا ندرس خطواتنا و نقدم برنامج
مدروس بدلا من الجعجعة الي منغير طحن..
والنهاردة..كانت اول خطوة على الطريق ده..انا اتجهت للمقر الرئيسي للحزب بالمهندسين..المكان زحمة جدا..والركن فيه شبه مستحيل
بس ربنا سهل و ركنت جنب السفارة التنزانية...
مقر الحزب صغير نسبيا...الحقيقة هو صغير قوي..بس الشهادة لله ... انيق و مريح للأعصاب...قابلت احد اعضاء اللجنة الإعلامية..شاب كده يجي في اواخر العشرينات..متحمس بشدة....و ان كان غير ممّرس في خدمة الجمهور..يعني من الناس الي بتزهق لما تلاقي السؤال بيتسألها للمرة الألف..مع ان الألف واحد الي سألوا دول مختلفين...يعني هما مش مسؤولين ان هو زهق من السؤال..و بعدين ما دي شغلتة...يعني ماهو بياخد مرتب عشان يجاوب على الأسئلة الي من الطبيعي انها تكون مكررة...بصرف النظر عن النقطة دي...هو كان متعاون جدا و متحمس بشدة...انه يدافع عن مبادئ واراء حزبة بمنتهى القوة..( احب اوضح انه كان بيدافع عن حزبة مش بيدعوله)
طبعا كان فيه نقطة مكبلة كل الأسئلة الي وجهتهالة وهي ان الهيكل البنائي للحزب لسة ماتشكلش...وبالتالي..مقدرش اقيم..او اوجه حتى أو حتى احسن في عمارة لسة ما ترملهاش اساسات اصلا...
لكن كان عندي كام نقطة يهموني...أولا تمويل الحزب..الموقع الإلكتروني ( الي ابديت استيائي الشديد من فقرة الشديد في عرض نشاطات الحزب و اراءة) ما وضحش اكتر من رقم تليفون محاسب...يعني مفيش رقم حساب في بنك..بس كان رده ان ده كان غير مسموح بيه الا عند استيفاء اوراق اشهار الحزب...و ده جاري حاليا
ده جرني لسؤال تاني...التمويل ده هيروح فين..وازاي ممكن لدافع الدعم يراقب ان فلوسة بتتصرف صح..الحقيقة ان رده هنا كان الى حد ما ضعيف...كان قرارة ان دي مسألة ثقة..العضو بيثق في المسؤول الموجود وبالتبعية هيثق في اوجه صرفة...ولو معجبهوش الأداء يقدر ما ينتخبش العضو ده في الفترة الي بعد كده...قلتلة طيب وانا هعرف منين مصادر الصرف..قالي ماهي الميزانية العامة دي بتطرح في الجمعية العمومية العامة.. الي لكافة الأعضاء..و بالتالي من حق كل واحد يعرف فلوسة اتصرفت في ايه..انا ساعتها اقترحت ان الكلام ده يكون موجود على بانر شغال طول الوقت على الموقع...بحيث ان كل قرش وارد و صادر يبان فنكسب شوية شفافية...
النقطة الثانية..هو موقف الحزب من الإخوان..كان الرد واضح جدا..ان الحزب ضد تكوين احزاب ذات مرجعية دينية...وبالتالي هم ضد حزبنة الإخوان( الموقف ده اكتر حاجة ضايقتني النهاردة) هم بيعتبروا ده جزء من الليبرالية...مش مشكلة..نبقى نتكلم في الأمر ده بعدين
اكثر النقاط سخونة بقى...هو موقف الحزب من انشاء جريدة...لإن ده كان مطلب رئيسي بالنسبة ليا...لكن الحقيقة ان مبدأ الأعضاء المؤسسين هو ان مفيش حاجة اسمها صحافة حزبية...في حاجة اسمها صحافة مستقلة...الدول المتخلفة فقط هي الي عندها صحافة حزبية..الواقع اني معرفش ايه مدى صحة المعلومة دي...لكن انا شفت انها نقطة ضعف رئيسية...ولا كيف يمكن ضم ال 77 % ان مكنش فيه وسائل مخاطبة تقولهم الحزب مين...رامي( عضو اللجنة الإعلامية) كان متفق معايا تماما في النقطة ديي...و قالي انا اؤيدك بشدة..وناوي اعيد طرح المسألة دي تاني على اللجنة الإعلامية بس بعد ما يتحدد رئيسها الحالي
اما بقى عن النشاط الإجتماعي..الي كان هدف حركة ابناء مصر في الأساس...فأنا سألتة عليه..قالي ان الحزب ناوي يتزعم مؤسسة اجتماعية ضخمة جدا بقيادة الأستاذة ماجدة السعيد..( انا معرفهاش بس حسب كلام رامي هي احدى العضوات المؤسسات لإحدى الجمعيات الخيرية الي هو ميعرفش اسمها ايه)
فيه بقى نقط ماكانش ليها إجابة واضحة..إما لإن رامي ميعرفش و اتكسف يقول...وإما لإن الأعضاء المؤسسين برضة ميعرفوش و اتكسفوا هما كمان يقولة...وإما انها ما اطرحتش..وقابلة للتفاوض...زي موقف الحزب مثلا من حركة كفاية..و سيناريو الحزب في حالة تزوير الإنتخابات البرلمانية القادمة..و موقف الحزب ان حدث التوريث قريبا بعد ما الي بالي بالكو ياخد استمارة ستة و يخلع...الخ
رامي رد بلباقة و قال احنا مع الشارع( طبعا الرد مالوش معنى..لإن المفروض ان الحزب هو الي بيقود الشارع مش العكس) بس انا منعا
للسخافة والغلاسة مرزلتش في النقط دي
السؤال الأهم بقى..لو حد عنده اراء..ازاي يطرحها على الأعضاء المؤسسين..هل فيه الية لكده..فكان الرد ان الدكتور اسامة الغزالي حرب والدكتور يحي الجمل بيجتمعوا مع الأعضاء كل يوم اربع الساعة السابعة مساء في مقر الحزب الرئيسي بالمهندسين...صحيح الغرفة بتاعة الإجتماعات ما تسعش اكتر من ميت فرد...بس اكيد هما دول بس المية الناشطين
أخيرا بقى....موقف الحزب من المدونين..بعد ما هريت الراجل اسئلة..و عملت فيه كل حركات مفيد فوزي القرعة..على غرار تسمحلي ارزل عليك..وأسألك...قالي انت من الصبح هارياني اسئلة احب اسألك بقى ايه سر اهتمامك ده...قلتلة انا مدونة...ما تتخيلوش يا جماعة نظرة الإنبهار..تقولش قلتلة سفيرة موريتانيا...الراجل قالي اهلا و سهلا...( اهلا و سهلا بعد ساعة و نص رغي) والله دي فرصة سعيدة جدا جدا..احنا مهتمين جدا بنشاط المدونين...و كنا دعينا مرة وائل عباس و محمد الشرقاوي..بس هما ما كانوش مهتمين..
و طلب مني موقعنا عشان يقدر يتابع الحركة...( الحقيقة كنت على وشك اني اديلة عنوان حركة ابناء مصر) و بعدين شعرت ان ده خرق لقانون الديموقراطية حيث ان احنا لسة ما اتفقناش على فكرة العمل الحزبي ده..عشان كده رفضت اديلة البلوج بتاع الحركة..و قلتلة هبقى ابعتلك بلوجز الناس المهتمين فقط
عن رايي النهائي بقى..انا شايفة ان الحزب لسة بيتولد...و سهل تشكيلة..و هيتسع للجميع ( الا الإخوان الي مش هيساعهم يظهر الا بطن الأرض) بالمناسبة انا سألتة عن راية في ان الإخوان ينضموا ..قالي اهلا و سهلا..الا ان مبادئ الحزب مش هتتغير
طبعا ده كلام وارد فيه الأخذ والرد...المحصلة ان دي خبرة سياسية مهمة...و نافذة نقدر نجرب فيها مدى قدرة الشباب الحقيقي على التغيير
الإنطباع الأكيد هيجي بعد الجمعية العمومية القادمة انشاء الله...انا اخدت دعوة بالحضور..الي حابب يجي...أهلا وسهلا..أهي برضة فرصة اننا نشاهد الحدث من طرق مختلفة..و بكده
..هاخد رأي قطعي و نهائي انا عايزة اعمل ايه السنة دي
25 comments:
السلام عليكم
أولا كل أسئلتك اللى أنتى سألتيها كلها ليكى فيها حق انك تعرفيها بس ده مش وقتها علشان الحزب لسه فى المهد
موضوع منع إنشاء أحزاب على أساس دينى أؤيده وبشدة وبخاصة فى مجتمعنا المصرى علشان احنا مش مستحملين إستقطاب على أساس دينى كمااااان كفاية استقطاب بلقمة العيش والسلطة والفلوس
موضوع آراء تطرح على المؤسسين ليه شخصنة المواضيع
كان المفروض سؤالك يكون أيه الآليه اللى الواحد يتخذها لعرض أفكاره
لامؤاخذة مش مهم المؤسسين ولا أحنا كماان عاوزين يبقى الموضوع ماشى بغض النظر عن الأشخاص نفسى يحصل كده فى مصر
حابب تسأليهم سؤال صريح فى الإجتماع اللى هتحضريه من المسئول الرئيسى فيما آلت له مصر من وضع على المستوى الداخلى والخارجى؟
اللى هايجوبك بأى إجابة غير كلمة الرئيس مبارك حتى لو كانت أسبابه صحيحة يبقى تفقدى الأمل ساعتها
مصر احسن بكرة بينا كلنا ...بالحركة ووضوح الهدف
ميعادنا يوم الخميس الساعة 12 باليل والدعوة عامة
عبقرينو...انا مع احقية اي حد في انشاء حزب..بصرف النظر عن توجهة ديني ولا مش ديني...أما عن شخصنة المسألة..ما ده لابد في البداية لإن الحزب لسة غير معروف و كمان لسة مالوش مكان في الساحة ولا كوادر..و السؤال سؤل بالفعل..وذكرتة في البوست بس انت مخدتش بالك..المسؤولين بالحزب بيلتقوا اسبوعيا في مقر الحزب ... كمان لابد نلاحظ ان المجال واسع لطرح الأفكار و تنفيذها..انا طبعا مش هسأل مين المسؤول عما وصلنا اليه..وبصرف النظر عن الإجابة... مش نكاية فيك ولا حاجة يا فندم..بس عشان انت مؤمن ان الحركة بركة..والمثل بيقول علي ان اسعى وليس على ادراك النجاح...يعني في النهاية .. انا مع الحزب حتى النهاية سأدعم كل انشطتة المدنية انشاء الله ان ارتأيت انه من الممكن تفعيلها بحق...هنتكلم اكتر انشاء الله يوم الخميس
السلام عليكم
تحياتى انا شايف ان افكارك وافكار حركه ابناء مصر لا يسعها حزب فى مصر الا
حزب الكرامه (تحت الانشاء ) وهو حزب مفتوح على كل التيارات بما فيها الاسلامى ولا يعارض حزبنه الاخوان وهو داعم لهم ويقف بجانب كل تيارات مصر
وكفانا فخر ان رئيس الحزب هو حمدين صباحى
وفيه الكثير من الرموز الوطنيه المشهود لها بالكفائه وحسن الاخلاق الوطنيه
وهو حلم نتمنى ان نحققه ليتبلور امام اعيوننا كحزب قائم يمارس نشاطه العام
تحياتى
زى ما ذكرتى يا سكوت هنصوت هانم الحزب تحت البناء .ومجهودك رائع فعلاً
لكن اجابات عضو اللجنة الاعلامية بسيطة وتكاد تكون اجابات فض مجالس او اعدة بمعنى ان انا مش ملاحظ اى اجابة ايجابية ومباشرة غير راى عن المدونين فقط وترحيب ,
اما اعتراضه عن انشاء احزاب ذات مرجعية دينية , هو فى حزب فى مصر متفق على المبدا دا ؟؟ على اى حال انا متفق معه
واستغربت من
مؤسسة اجتماعية ضخمة جدا بقيادة الأستاذة ماجدة السعيد
الاستاذة قيادية والعضو الاعلامى لا يعلم من هى ولا يعلم اسم الجمعيات التى هى عضو فيها .
على العموم انا هحضر معاكى الجمعية العمومية يمكن ....
سكوت هنصوت هانم اسمحلى اسئل الزميل العزيز ( ضد الظلم ) بما اشار من امتيازات بحزب الكرامة
-----
الزميل العزيز ضد الظلم هل بدا حزب الكرامة فى السعى وراء موضوعات رؤية واضحة لديمقراطية المستقبل ؟ وهل تقتصر هذه الديمقراطية على صناديق الاقتراع ، أم هي حرية الفرد والتساوى بين الأفراد أمام القانون بما في ذلك الالتفاف حول وعى المواطنين بحقوقهم
وواجباتهم الحقوقية والسياسية ؟
اتمنى ان يتشارك الزملاء فى طرح افكارهم تجاه الاحزاب التى ينتمى له كل زميل محترم لى عودة
وشكرك سكوت هنصوت هانم على هذه الفرصة
بجد أهنيكي علي ده زعلي فكرة كلنا بنفكر فعلا في الحزب ده غالبا هيبقي نقطة تلاقينا يعني هنوافق علية غالبا أجماع
اولاا اسمحيلي اعتذر وبشده عن عدم الزياره انا عارف اني مقصر بس والله الامتحانات عمل عظيم جدا جدا اللي انتي عملتيه بس كويس انك مدتهوش اسم الموقع تحياتي ليك وعلي اعماللك الرائعه
سكوووت هنصوت
ازييييك ههههه طب والله كويس اصل من يومين واحد بيقوللي في مدون اتقبض عليه ..إعمل حااجه !! قولتله طب هو اتجاب من بيته ولا منين ؟ قالي كان بيغطي انتخابات مجلس الشوري قولتله خلاص مقدرش اعمل حاجه -وكأني انا اللي هفرج عنه واخده بالك- وقالي اصل ده مدون قولتله يعني عليه حصااانه ! ..رفعتي راسنا وطلع تي احسن من سفير موريتانيا ....ولا بلاش موريتانيا دي بالذات ! وبالنسبه للحزب الليبرالي الرائع ونت عارفاني من احباءالليبراليه البوست اللي عندي لكل الليبرالين المحترمين ويا سلام سلم لو كان رئيس الحزب قرا البوست بتاعي !
تحياتي
ضد الظلم..ازيك يا بو العربي..
حزب الكرامة حزب جيد بالفعل..لكن زي مانت قلت مازال تحت الإنشاء..من المهم ان يكون في مصر مجموعة من الأحزاب الفاعلة غير الأحزاب المدجنة بالفعل..كمان مين قال ان حزب الكرامة مع حزبنة الإخوان؟؟
عشان نكون واقعيين..الإخوان هم الكتلة الوحيدة المتواجدة على الساحة مع الوطني..وبالتالي هم بالفعل خطر على اي حزب ناشئ..فمتفهم بشدة رفض جميع الأحزاب لوجودهم...الفكرة ان النقطة دي مردود عليها من الكل..ان اجمع عليها الشعب..عشان اوضح احب اقول ان حزب الجبهة ضد وجود جهاز امن الدولة..وكمان ضد انشاء لجنة شؤون الأحزاب و مع ذلك هو ضد حزبنة الأحزاب..يعني هو بيسعى ان انشاء الأحزاب يكون بالإخطار..و مع ذلك يرفض ان الإخوان في يوم من الأيام يخطروه ان هم هنشؤوا حزب!!!!!! واخد بالك من التناقض..الفكرة ان بصرف النظر عن مسألة الإخوان..فباقي الأفكار جيدة..وعندي أمل ان لو فيه جيل واعي و مثقف من الشباب..استطاع انه يخترق..( او خلينا نقول يندمج) في الحزب..فمن الممكن ان كل العيوب دي تتلافي..في النهاية احنا لسة بنحاول نجرب الديموقراطية
تحياتي..و مستنينك في الميتج
حنتكلم..
ميرسي على دعمك في البداية..ثانيا بقى..اجابات العضو كانت فعلا الى حد ما سطحية..بس كمان هو مش في امتحان..يعني صحيح ان فيه نقاط كتيرة عليها علامة استفهام..لكن ما نقدرش نقرر ده بشكل قاطع غير بعد مرور فترة كافية على الوجود الفعلي للحزب..لو لقينا ان الحزب قائم على مجموعة الرموز الظاهرة دي و خلاص..بمعنى تاني لو شفنا حزب غد تاني..هيقع لو وقع نور..يبقى ندور على بديل اخر..اما لو لقينا ان فيه مجال للمفاوضات..وفيه مكاسب حقيقية على ارض الشارع يبقى احنا في النهاية الكسبانين..اما بقى عن اسئلتك لضد الظلم..فالبلوج بلجك يا فندم..و هسيبلة حق الرفض..و بضم صوتي لصوتك..هو بالمناسبة حزب الكرامة عنده تصور لو حصل توريث للحكم في خلال العام القادم..دورة هيكون ايه..ايه الالية الي هيتبعها للوصول للحكم..؟؟؟ ولا هو زيه زي الجبهة هيستنى الشارع؟؟؟؟
احمد المصري..اخيرا التقينا في نقطة..مستنية اسمع ارائك الحماسية يا صديقي...
فارس
يا سيدي ولا يهمك انا مقدرة ظروف الإمتحانات يا رب تكون عدت على خير..و بعدين يا سيدي ما تقلقش على الزيارة قوي كده..يعنى هي المدونة الراجل هيدورها و يطلع بيها..المهم تتواجد يوم الخميس اونلاين..و تقولي رايك في الي بيحصل..شكرا على الزيارة
ابن ناصر
اهلا بجيفارا..ازيك يا فندم..على فكرة السايت الي انت بعتة ده يحرق الدم..بقى يا راجل اخش على الليبرالية في عصر النبوة..الاقي الإسلاميين بينتقدوا الليبراليين عشان انتقدوا المتشددين لما رفضوا ان النساء يعملن في محلات الأدوات النسائية..هو بالرغم من اني بنتمي لصنف النساء..لكن الحقيقة معرفش ايه محلات الأدوات النسائية دي..دي حاجة كده زي محلات الأدوات الرياضية..وبعدين لما هي ادوات نسائية..عايزين رجالة يبيعوها ليه..؟؟؟ حسيت بصراحة ان الموضوع اقرع قوي...انا شخصيا مع الليبرالية..لكن مش مع الليبرالية المشروطة..و مش شايفة في الليبرالية اي حاجة تجرح ديني..او اخلاقي..لإن ده نظام سياسي اقتصادي..حسب تعريف السايت بتاعك..أما تقاليد العرف و المجتمع تقنن ديموقراطيايعني مثلا رغم ان امريكا نظامها علماني ليبرالي..لكن دينها الرسمي المسيحية..واجازة الشعب الرسمية في الكريسماس
بناء على القاعدة دي لا ارى ما يمنع تكوين احزاب ايا ما كان شكلها و نوعها طالما ان ذلك يتم في اطار ديموقراطي..يا رب تكون نظريتي واضحة في النقطة دي..
آسف على التحليق خارج السرب
ولكن إيماننا بدفاعكم عنمبدال الحرية
ندعوكم للتضامن مع عمر الشرقواى المعتقل فى قسم طلخا
إثر قيامه بتغطية انتخابات مجلس الشورى
وجزاكم الله خيرا
ياريت لو سمحتى تقوليلى عرفتى منين انه خرج
كلنا طبعا نتمنى ذلك
ولكنه موبايله مازال مغلق
وهناك زملائنا أمام قسم شرطة طلخا ينفون ذلك
والله من وراء القصد
وجزاكم الله خيرا سرعة استجابتكم
انتى البوست بتاعك بيبقى كبير كده ليه
انا ببقى داخل عايز اطمن على كل الناس بسرعة .. وارجع اشوف مذاكرتى .. عايز اخلص السنه دى
وباين التدوينات بتاعتك دى هى اللى هتسقطنى السنة دى
حباظة...انا قريت الكلام ده عند بعض المدونين..معنديش بالتأكيد معلومة مؤكده..لكن ان كان صحابك لسه هناك يبقى اكيد كلامهم اصدق..ربنا ينصره و يحميه يا رب..ويرجعة بيته بالسلامة..الموقع الي نشرتة معلق و مش عارفة اخد البانر..لكن هفضل وراه انشاء الله...و ربنا يفك كربة .. لا نملك له الا الدعاء..
ياسر سليم
معلش يا فندم البوست طويل لإن الموضوع مهم..شكرا انك حاطتني في المدونات الي بتطمن عليها..عموما اتكل انت شوف مذاكرتك وانا هبقى اعملك ملخصات بالي فات ما تزيدش عن اربع سطور...يعني هختصرلك قصة سيدنا يوسف في عيل تايه و لقوه..اظن كده مالكش حجة..عشان ما تعلقش النتيجة عليا..شكرا عالزيارة
الحمد لله البانر اشتغل عندك تمام
وبجد حابب أشكر كل أعضاء أبناء مصر لانه وقفوا جنب عمر الشرقاوى
بس فيه محلوظة لو سمحتى لى
ان عمر مش إخوان تخيلى
عمر مش مسيس على الإطلا ولا يتبع أي جماعة او منظمة او حركة أو حتىمجتمع مدنى أو جمعية اهلية
تخيلى بأه فالموضوع مابقاش ده اخوان
الموضوع انه عاوز يكشف الحقيقة
وجزاكم الله خيرا
سكوووت هنصوت
:)
خلاص انا معاكي نعملحزب ليبرالي
ونمسكه لهيفاءوهبي .. يالا حري ايه ولا الجامعه الامريكيه ولا امريكا نفسها !
تقبلي تحييياتي
نسيت اقولك حاجه ... بين ان ان الناس اللي عايزه تخش ابناء مصر اكتر من اعضاء الحزب الوطني ! والله كتروو فارجوكي نحاول كره ماحدش يتخانق علي افكار ولا حاجه عايزين نشرف الحركه بقي
دي فرصتا
تحياتي
حباصة...
بصرف النظر عن توجه عمر الشرقاوي..فمن حقة تماما انه ياخد حريتة...و كونة بلا توجه على الإطلاق..مش هيغير حاجة من هذه الحقيقة..
يا رب يخرج بالسلامة
لو فيه اي حاجة ممكن تسهل في الأمر..فأعتقد ان انا بتكلم باسم جميع اعضاء الحركة لما نقول اننا مستعدين نساندها..يا ريت لو يكون فيه صندوق دعم..يسهل التبرع اليه يكون توجهة للصرف على قضايا حبس اصحاب الرأي..
بحيث ان اي مدون ولا صحفي ولا حتى ناشط يتقبض عليه..نقدر نمولة بما يكفل له محامي صاحب ضمير
عايزين نبقى نشوف المسألة دي وارد تطبيقها فين
ابن ناصر
انا همخمخ شوية كده في مجموعة اراء نطرحها عشان الأمور ما تطيش..الي عايز يطرح افكار للمناقشة يتفضل يبعتهالي على الميل بتاعي الي على البلوج..او يحطها على الكومنت في موقع الحركة..و ساعتها هنرتبها و نطرحها على الارض بشكل ديموقراطي
هههههههههههه
لو اعضاء الحركة بقوا اكتر من الحزب الوطني..يبقى نستخبى احنا اليومين دول..
المهم اننا نعمل حاجة..وما نبقاش مجرد صوت اخر يعلو بين الغوغاء
I am nоt sure where you're getting your info, but great topic. I must spend a while learning more or figuring out more. Thank you for great information I used to be searching for this info for my mission.
Also visit my web-site :: abiaba.com
Appreciate the reсоmmendation.
Will try it out.
Нaѵe a looκ at my blog ... abiaba.com
Woah! I'm really digging the template/theme of this website. It's sіmple, уet effective.
A lot οf times it's tough to get that "perfect balance" between usability and visual appearance. I must say that you've ԁone а amаzing job with this.
Adԁitionally, the blog lоaԁs supеr quick for me оn Internet eхρlorer.
Excellent Blog!
Why visitoгs stіll make use of to read news papers when in
thiѕ technologіcal world eveгуthing is accеsѕіble on net?
Here iѕ my web ѕitе :: magazine online second hand
Post a Comment