Saturday, April 21, 2007

ما بين نبيل لوقا بباوي ومعاوية بن ابي سفيان

قبل ما اقول اي حاجة احب اقول اني ضد اي تشهير او اهانه لاي من صحابة الرسول صلى الله عليه وسلم...واني مؤمنه تماما انهم جميعا رضوان الله عليهم...لكن كذلك كلي ايمان بانهم بشر يخطئون ويصيبون...ارجو من جميع القراء وضع هذه البدايه في الاذهان قبل قراءة المقال.
طيب اش جاب نبيل لوقا بباوي لمعاوية بن ابي سفيان...الحكاية ليها اصل...و عشان اتبع المرجعية احب اقول ان العهده على ما اقول ترجع على الدكتور طارق السويدان..في مجموعته احداث الفتنه الكبرى الي تناول فيها حقبة من اشد حقب التاريخ الإسلامي جدلا و نزاعا...لكن انا مش هتوهكوا في تفاصيل كتيرة....بإختصار كده...حدث نزاع شديد الضراوة بين قطبين من اقطاب الإسلام...معاوية بن ابي سفيان وعلى بن ابي طالب..رضي الله عنهما...كل واحد فيهم له حجة واضحة و مقنعة...وبالتالي انقسم الشعب الإسلامي الي قسمين...كل تبع مؤيده...بما في ذلك الصحابة...مجموعة كانت مع معاوية زي الزبير بن العوام...زوج السيده اسماء بنت ابي بكر...والسيده عائشة نفسها كانت من مؤيدي معاوية ضد عليى...والجزء التاني من امثال عمار بن ياسر كان مع على كرم الله وجهة..طيب كل ده معروف..فين الجديد...تعالو بقى نرجع شوية لورا ... ايام ما كان الرسول لسه حي يرزق...وكان المسلميين في المدينة بيسابقوا الزمن عشان ينتهوا من بناء المسجد النبوي...و كل صحابي بيشيل طوبة طوبة معدا شاب يافع السن بيشيل طوبتين طوبتين...لحد ما ضهرة اتسلخ والتراب ملا وشة و راسة...الشاب الهمام ده كان عمار بن ياسر...بن سمية اول شهيدة في الإسلام...يعني مأصل من بيت اصول...الرسول لما راي همته و حماسة في العمل ...نظر اليه ضاحكا...و قال له...ويحك يا عمار...تقتلك الفئة الباغية!!!!
الكلمة الخطيرة دي هي محور الموضوع كله...نرجع بقى للصراع القائم بين على و معاوية...طيب عمار في جيش على...لكن السيده عائشة في جيش معاوية...فتنه دي ولا مش فتنه...المهم الجيوش عماله تتلاقي في حروب دموية رهيبه...مالهاش نهاية...عمار وقتها كان عنده 90 سنه...طبعا دي فحد ذاتها معجزة...تخيلوا بن تسعين ماسك سيف و بيحارب عشان مقتنع بمبدا....
الجيشين عارفين مقولة الرسول في حق عمار...و كل واحد مستني انه يشوف يا ترى مين الي هيقتل عمار...النهاية انه في احدى المعارك...اعتقد انها معركة الجمل...قتل عمار بن ياسر من قبل جيش معاوية...تاتتتا...اظن بقة محدش له حجة...الامور وضحت...واضح جدا مين الي على حق ومين الي على باطل...لكن الأمر كان خرج من زمام العقل...احتاس جيش معاوية و ضرب حيص بيص....لكن معاوية رجل داهية...طلع على الناس بمقولة من اغرب ما تكون...قال..انما قتل عمار من جاء به...فما دام على بن ابي طالب دعاه في شيبته الي القتال ...فقد قتله اذا جيش على....الأعجب ان جيش معاوية صدق...المؤرخين ساعتها قالو...فوالله ما علمنا ايهم اعجب..هو في قولته ام هم في تصديقها....طيب اش جاب ده للبباوي...امبارح قريت عند نوارة حاجة مشابهة بتتكلم فيها عن المزعوم انه بيقول..ان الموانطنين بيحبوا التعذيب...عشان كده بيتعذبوا طيب مش بالذمة شايفين شبه ما بين المقولتين...

7 comments:

ibn nasser - ابن ناصر said...

ههههههه لوقا بباوي الجل ده بينرفزني قوي اساسا لكن علي تشبيهك هههه فوالله انتي خلتيني دخلت في القصه حسيت اني قدام المعركه بالذات الحته بتاعت تتتا ,,وبالنسبه لحكاية معاويه فانتي كلامك صح منغير تشهير او حاجه بس هي دي الحقيقه ....بس معلهش في سؤال هو سيدنا عمار كان ماسك السيف ازاي وهو عنده تسعين سنه .. وبيحارب وكل ده من غير ولا فيتامين ولا غيره...ههههه الله يرحمنا

ibn nasser - ابن ناصر said...

اه صحيح انا من راي تعترضي علي اسم الحركه وتقدمي شكوي لمجلس قيادة الحركه وتغيري اسمها من ابناء مصر لبنات مصر ولا ايه؟؟!؟
تحياتي

7ntklm said...

سكوت هنصور

الموضوع كبررر اوى معاكى ووسع بشكل تاريخى

انا من راى بطلى شرب جزر

---------------------------------
احمد ابن ناصرر بصى يبنى الحركة دى انا اتخنقت منها وبعدين تغير اسم ايه بس

يبنى

والله ما بتفرق معايا الاسماء

sokoothansawat said...

بن ناصر..عمار بن ياسر رضي الله عنه مكانش محتاج مقويات ولا فيتامينات...لإن دول ناس ربنا راضي عنه..انا شخصيا من اشد المعجبين بيه و بسيرته و تاريخة...و عموما الجيل ده كان كله كده..يعني عبد الله بن الزبير بن العوام..كان بيقاتل الحججاج و هو بن السبعين..واسماء امه بنت التسعين..و قتل و مثل بجسده...يعني الإعمار ما بتفرقش هنا..الرك على الإعمال.أما عن تغيير اسم الحركة..فحنتكلم جاب من الأخر..والله ما بتفرق معانا الإسماء...و بعدين احب اقول لسعادة البيه الأمن اني وحياه الأخوة ما اعرف حاجة عن الحركة...

sokoothansawat said...

بالمناسبة انا لقبي سكوت هنصوت مش هنصور..لإني مؤمنه بسياسة الصويت..يا اما بالصوت الحياني..يا اما بالحبر التشيني...اهو كله صويت...ثانيا لما اكون عاملة دماغ جزر بيطلع مني احلى كلام...جربوه و هاتشوفوا الفرق...

a7lam 3adya said...

السلام عليكم

مبدئيا : السرد التاريخى جميل اوى .. وفعلاعماربن ياسر لا يحتاج الى مقويات كفى رضوان الله عليه ... وكفى انه مثلما قال الحبيب المصطفى ( قاتل عمار وسالبه فى النار ) .. ولكن التشبيه ما بين معاوية والزفت نبيل لوقا غريب شوية .. ولكن الاثنين يتمتعون بذكاء رجل الحرب وان كنا قد فهمنا اى حرب هى التى خاضها معاوية .. ولكن نبيل لوقا يا ترى بيحارب مين ؟ المواطنين اللى عندهم هواية التعذيب

انا يا بنتى لما ببقى فاضية بعدى على اى قسم اتعذب شوية .. عادى يعنى ما احنا اصلنا غاوويييييييييييين

sokoothansawat said...

الجميلة نانا...انا ما حاولتش اربط ما بين معاوية و بين نبيل بباوي..لكن كنت بربط ما بين غرابة التفسيرين في مواقف واضحة زي الشمس...معاوية حتى في نظر اسوأ المؤرخين و اكثر المتحاملين علية...كان رجل حرب عظيم...قدر في النهاية يوحد المسلمين..و يكون دولة عظيمة....لكن المعلم بباوي..فحتى اكثر المؤيدين ليه و اشد المعجبين مش هيلاقوا حاجة عدلة يمدحوة بيها..الراجل ده اكيد عبقري..و اكبر دليل انه الوحيد اي مش ممكن تطلعيلة صفة محترمة واحدة توصفيه بيها..مش كده