Saturday, March 31, 2007

عن الجامعة وحياة المدونات

بقالي فترة مش طويلة قوي عمالة اتصفح مدونات الناشطين في حركة المدونات...اول مرة اتعرف على العالم الخصب ده من البولجز كان اثناء التنفيخات الدستورية....التنفيخات نسبة لعمليات التجميل الي الستات بيعملوها طمعا في جمال مفقود فينتهي الامر بحالات ورم اقرب للمرض منها للجمال...الى حد ما هو ده احساسي بالتعديلات الدستورية...المهم ان اثناء الإعتصامات الي حصلت في التحرير الصدفة البحتة قادتني لمدونة نوارة نجم...ولإني من عشاق نجم وإمام...و من معجبي صافيناز كاظم وان كان ساعات بحس انها تايهة زيي بالظبط الا اني ما اقدرش انكر اعجابي الشديد بكل واحد امن بفكرة لدرجة انها تسجنه ايا ما كان انتماء او اتجاه الشخص ده...المهم ان الصدفة البحتة ودتني عند نوارة...ولقتني عمالة اقرا كل كلمة مكتوبة..طبعا كان واضح ان فيه ناشطين بعينهم امساءهم بتتكرر اكتر منغيرهم...لكن اكتر حاجة لفتت نظري...و بصراحة شديدة اشمئزازي...اني لقيت نوارة نفسها بتستخدم الفاظ شديد ة السوقية...و بما اني اتربيت على ان عيب البنت تشتم..اصلا فما بالك والشتيمة من الدرجة الرابعة على مقياس من واحد لخمسة...المهم ان انا جالي صدمة حضارية الا ان طرافة العرض و قوة الموضوع اعموني عن اللغة وركزت في الكلام لقيت اني الى حد كبير مش مختلفة معاه..قعدت اقرا التعليقات و فوجئت بإن المسألة اصبحت لغة اقرب ما تكون للغة العربجية...الفاظ ماسمعتهاش غير من سواقين الميكروباسات....الي شد انتباهي ...ان كل واحد من الشباب النشط قوي ده....اتقبض عليهم و وقفوا مواقف في منتهى الرجولة ( على حد زعمهم و شهادتهم لبعض) لكن مع ذلك عرضهم في منتهى البذاءة...في ربط شديد ما بين البذاءة والحرية...و كإن عشان نبقى احرار لازم نتحرر من وحدة الأخلاقيات والسلوكيات العامة والأداب...طبعا ماحدش معترف بكدة...لكن ده الواقع مهما انكروا..الملاحظة المهمة ان دائما التيار الإشتراكي والناصري هما اكتر تيارات تتباهى بسلاطة اللسان....اثناء دراستي في جامعة القاهرة...كان في 3 تيارات سياسية اساسية...الإشتراكيين, والإخوان وطبعا اتحاد الطلاب الي هو شكل مصغر من الحزن الوطني...و لإن الجامعات صورة مصغرة من المجتمع الخارجي...كنا نلاقي بتوع الاتحاد الإشتراكي...اكتر ناس تحدف طوب عالأمن و تشتم الحكومة بكل الألفاظ الممكنة والغير ممكنة بأعلى قدر من التشنج والسباب....لكن الشهادة لله كان عندهم ميزة رائعة انهم الى حد ما ارتجاليين مما يترك مساحة لأي منضم انه يضيف من عنده بسهولة..اما الإخوان فكانوا اشد انضباطا...و تقيدا..تلاقيهم مشيين في صفيين متتابعن المقدمة للرجال كالعادة والمؤخرة للنساء...ولئن صوت المراة عورة كما ذكر عند محمود الصحاح..الي هو يبقى اخو عبد المجيد الصحاح...الي هو شخصية وهمية زي الحديث المكذوب ده بالضبط..فالبنات ماكانوش بيهتفوا خالص...والرجالة كانت بتقضل تهتف بكلام مالوش راس من رجلين ولو فكرنا فيه شوية مش هنلاقيلو معنى حقيقي....اما الإنتحار الطلابي بقة ...فده عايش على وش الفتة...اقسى احلامة ينظم رحلة للأوبرا عشان يطلعها اعضاء الإتحاد نقسهم منغير مشاركة طلابية اصلا....و اقسى انجازاتهم انهم يطلعوا مسرحية هطلة لا تتشاف ولا تتسمع....عموما الكلام كتير وانا يظهر اني سخنت عالرغي...بس اصل الكلام محشور في زوري و خايفة اقولة بره البوج بتاعي اتشتم...

5 comments:

7ntklm said...

اهلا بيكى بعالم التدوين

بنسبة للبزات اللحظتها فى البلوجز فبتأكدة يجب عليكى ادراك ان السب دا اقل الاشياء سهولة واقل الاشياء للتشبه عن موقف ما ,

اتمنى لكى عرض افكار موفقة وتواجد فعال بيننا .

sokoothansawat said...

اشكرك على التواجد..واشكرك بشدة على الترحيب بيا..اكيد هنتكلم اكتر في المستقبل بخصوص الرؤية الواضحة فيما يتعلق بالاحداث الجارية...

جبهة التهييس الشعبية said...

مبدئيا

اقسى مشتقة من قسوة

انت تقصدي اقصى احلامهم

الا اذا كانت احلامهم قاسية وانا مش واخدة بالي

ويا ستي كتر خيرك على الزيارة

بس احنا والله مش عربجية

ولا ولاد عربجية

بس انت شكلك ما بتنزليش الشارع

اه صحيح انا ناسية انك بنت والبنات عيب تنزل

بس مين قالك اني بنتة؟

ايوووووووو

انا عزبته

وبانزل الشارع

عشان انا ما اقدرش اتكلم عن البلد من الجزيرة او الجرايد

لازم انزل وسط الناس المعفنة عشان اعرف اتكلم عنهم

والحقيقة

اني والاخوة الزملاء

والله ما بنشتم

احنا بنوصف

الغريبة ان الناس لا تسبتشع الفعل

ولكن تستبشع توصيف الفعل

انت بتقول عز؟

يعني لما واحد يتف على وشي

وانت واقفة

لما اقول اصله تف على وشي

ابقى انا اللي غلطانة عشان باقول اللي هو عمله؟

انا برضه ملا كنت قدك ما كنتش شفت حاجة في الدنيا

وعشان كده

ما كنتش باوصف حاجة

بس ما كنتش باتكلم خالص

لاني كنت عارفة اني ما اعرفش

بس لما عرفت

عاديكي

اقول لك

خليكي مش عارفة احسن

sokoothansawat said...

اهلا هلا اهلا نوارة بنت الغالي...يا ستي كتر خيرك عالزيارة..و اسفين على الزحمة الي عندك عالبلوج بس معلش بقى ربنا يجعل بيت المحسنين عمار...بما اني خدت الإعدادية فانا عارفة الفرق بين اقسى واقصى ...بس بعيد عنك العتب عالنظر..صباعي الشمال الي بيسموه البنصر دايما مغلبني في الكتابة العربي...سماح يا ستي...اما عن الشتايم بقى...فاسمحيلي يا عزيزتي نوارة اني اختلف معاكي شكلا وموضوعا.....انا مش مقتنعة ان الي بيتقال عندك في البلوج ده توصيف..راجعي رد وائل عباس ..وجيمي هود..دي شتيمة رسمي..وشتايم مالهاش اي علاقة بالتوصيف..اكيد المومس اسمها مومس...واكيد القواد اسمة قواد ... و كل المهن والأفعال المهينة والغير شريفة لها اسماء مهينة وغير شريفة...لإن لكل من اسمه نصيب...لكن المسألة بين الشباب خرجت عن الإطار ده....الحقيقة انا عمري ما هستسيغ الوضع ده مهما كبرت في السن...انا كمان عزبتة...وما اظنش اني ممكن ارحب بيه...لكن طبعا دي اختلافات اراء مالهاش علاقة بإني بنحني لكل واحد فيكو شايل روحة على كف ايده عشان قناعة خاصة بية..كل واحد نزل واتبهدل واتعذب( بالذال مش بالزين اهة) عشان البلد حالها يتصلح...مهما اختلفت مع وائل عباس في مصطلحاتة لكن اكيد بحترمة جدا لمواقفة..ومهما اشمئزيت من طريقة كلام جيميهود لكن مش هنسى انه من القلائل الي قالو لا بعلو الصوت مش وهما قاعدين في بيوتهم قدام التلفزيونات ....الجيمسنات... الدافيانين ومولعين الدافيات..يا محفلطين يا مورقين يا جيمسنات يا بتوع نضال اخر زمن في العوامات. سواءا اختلفنا او اتفقنا...فانا سعيدة بوجودك..و بوجود كل ابطال البلوجز..

Anonymous said...

I'm impressed, I must say. Seldom do I encounter a blog that's
equаlly educаtive anԁ enteгtaining,
аnԁ without а doubt, yοu hаve hіt the nаil on the head.
The іssue is something which not enough men anԁ women аre
speaking intellіgently about. Nοw і'm very happy I found this in my search for something regarding this.

Have a look at my homepage: simply click the following article