لو حد فاهم حاجة امانة عليه يفهمني

قريتوا يا حلويين البوست الي فات

عملتوا الواجب و بصيتوا على الموقع الرسمي لمجلس الشورى

طيب الي عمل فيكوا الواجب بتاعة وبص على الموقع الرسمي لمجلس الشورى...الي عملاه الدولة..اكيد زمانة في عنبر المخابيل بالعباسية...لابس كسرولة في نافوخة ... وقميص ابيض بالشقلوب...وعمال يغني...وانا عاملة نفسي نايمة..وانا عاملة نفسي نايمة...

أنا شخصيا..اهلي كانوا قربوا يطلبولي الإسعاف ياخدني على هناك لإني كنت عمالة اضحك زي الهبلة كل انواع الضحك العبيط المتواصل ...شوية ضحكة الشرير..ناهها ها ها ها ها ...و بعدين افتكر المقلب الي عملاه فينا الحكومة ..فأضحك ضحكة العبيط..هييييهييييهييييهييي لحد ما امي قالت لابويا عوضك على الله في البت يا بو سكوت..بركة اننا خلفنا غيرها...

عايزين تعرفوا ليه..

اقروا معايا كده الدولة الغراء كتبة ايه عن نشأة مجلس الشورى واختصاصاتة...قال يا ايه خير اللهم اجعلة خير

"فى الاستفتاء الذى جرى يوم 19 أبريل 1979 ، كان من بين الأمور التى وافق عليها الشعب فى هذا الاستفتاء إنشاء " مجلس الشورى "" اما عن اختصاصاتة..( حددت اختصاصات مجلس الشورى فى المادتين 195،194 من الدستور إذ تنص المادة 194 على أن يختص مجلس الشورى بدراسة واقتراح ما يراه كفيلاً بـالحفاظ على مبادئ ثورتى 23 يوليو سنة 1952 و15 مايو سنة 1971، ودعـم الوحدة الوطنية ، والسلام الاجتماعى ، وحماية تحالف قوى الشعب العاملة والمكاسب الاشتراكية ، والمقومات الأساسية للمجتمع وقيمه العليا والحقوق والحريات العامة والواجبات، وتعميق النظام الاشتراكى الديمقراطى وتوسيع مجالاته)

طب معلش انا اصلي علامي على قدي..حد يقولي كده..المجلس ده بيهبب ايه لحد دلوقتي...

و بيتخانقوا عليه بأمارة ايه والنبي..اذا كان طبقا للتعريف ده..المجلس ده المفروض يتقلب طابع بريد

نسلم عليه كل ثورة و دمتم.....اذا كان الدستور الجديد شخرم كل تخصصات المجلس..يبقى ازاي الإنتخابات فيه قائمة؟؟

وبعدين بصراحة بقى...الناس ليها حق تقول ان المجلس ده مسؤول عن الأعمال الخيرية لمجلس الشعب..

هو حد فاهم راس من رجلين في كلام زي المحافظة على السلام الإجتماعي...ولا الوحدة الوطنية...يعني لامؤاخذه كده..

صنعتة ايه بالظبط...بالذمة مش حاجة تضحك لحد البكا

عجبي

مجلس الشورى

تعرف ايه هو مجلس الشورى و ايه وظيفتة؟؟

احنا مالنا ومال مجلس الشورى....اسأليني عن سعر اللحمة..ده المهم..الكيلو بقى بتلاتين جنية...حليلي انت المشكلة دي و بعدين كلميني عن مجلس الشورى والذي منه

الكلام ده جه على لسان احد المواطنين..بعد سؤال نميس من اسئلة احد مراسلي العاشرة مساءا..

طبعا الكلام نفسة محتاج كونتكست اناليسيس..او تحليل النص...الناس ما تفهمش الكلام الكبير...الناس عايزة الي يكلمها بالهجايص...

انا مالي و مال مين رئيس الوزرا....انشاالله يطلع ابن بارم ديلة....يغرف و يحش ان كان عايز..المهم ان انا الاقي اكل...

ولادي يتعلموا..اه طبعا..لازم ولادي يتعلموا..لكن ايه دخل ده بالوزرا....هما البهوات الوزرا هيلاقوها منين ولا منين...دول حملهم تقيل...

مشكلة الشعب المصري...انه فاصل ما بين الحكومة والأداء....زي بالظبط كده...لما الريس يغير الحكومة...ونسمع عن تغيير الحكومة..وتعديل وزاري جديد يغير كل الوزراء من اول رئيس الوزارة لغاية المحافظين...

طيب ازاي الرئيس الي هو رئيس الحزب الوطني..يغير الحكومة منغير ما هو يتغير...اليس الرئيس هو رئيس الحكومة...؟؟

و بالتالي...تغيير الحكومة هو في حد ذاته تغيير للرئيس...

لكن طبعا...في مصر...بلد الضحكات المبكيات...

صندوق العجب يطلعلنا لعبة تغيير الحكومة الي اعلى سلطة فيها قابلة للتغيير هو رئيس الوزراء بس

عجبت لك يا زمن

http://www.shoura.gov.eg/

اللينك ده في الموقع الرسمي لمجلس الشورى..عشان الي عايز يعرف نشاطة و هيكلة...

دعوة مهمة

الزملاء الأعزاء....

من المهم ان نعرف حجم تأثيرنا الحقيقي...

و حقيقة ان كنا مجرد ابواق جديدة تضيف المزيد من الصخب الى غرفة الوطن المزدحمة بسبعين مليون نفس ام اننا ادوات فاعلة نشطة قادرة على تحمل مسؤليتها بالفعل

....دماغ ماك...كتب عننا اننا شعب المنفضين....و منقدرش ننكر ان عنده كل الحق...لكن فيه في ادينا حاجة نقدر نعملها...على الأقل كتدريب بسيط على مدى فاعليتنا...مشروع صغير و بسيط نقدر بيه نحدد إذا كنا ناس منهجية و منظمة ولا مجرد اغنام من القطيع...و لكن اعلى صوتا...توجد في مصر الان حملة المليون توقيع لإنقاذ المسجد الأقصى...من ايدي الصهاينة...في الاول احب ادعوا كل النشطين للمشاركة..بصرف النظر عن ديانتة او اتجاهة...الوثيقة دي هتروح للأمم المتحدة...و الأمن المصري بيعرقل لم التوقيعات...المفروض ان الوثيقة دي تلف الوطن العربي والإسلامي كلة...و تلم مليون توقيع...( بالمناسبة المسلمين عددهم مليار) يعني المفروض ان المسالة سهلة جدا....يبقى ايه المشكلة؟؟؟ خلونا نقول ان الأمم المتحدة مش هتعمل حاجة....بس مجرد لم التوقيعات ... معناه ان الناس مستعدة تنزل من بيتها...و تركب مواصلات او تسوق...لمكان التوقيع...عشان تقول كلمة...لما نعرف ان العدد وصل دلوقتي لواحد وتلاتين الف بس....في بلد فيها سبعين مليون...تبقى مصيبة....ان كان ده حال مسالة تافهة كده يبقى الباقي ايه...

خلونا نبدا بنفسنا الاول...و نوقع..وبعدين ننشر الدعوة...انا هبدا بنفسي..على فكرة التوقيع مستمر حتى يوم 29 مايو...والرابط ده فيه التفاصيل...مستنية النتيجة...الي مش عارف الطريق...او عنده اي استفسار...يتفضل...يلا نبدا حملة بين المدونين...و نشوف احنا بجد حجمنا ايه...يا رب اتخض من كترنا...

http://forum.harakamasria.org/showthread.php?p=62288#post62288

غطيني وسوطي يا بهية

غطيني وصوتي يا بهية......قال اش عرفك انها كدبة قال من وسعها......الله يحرق هتلر على جوبلز الي بلونا بفلسفة عفنة قوامها كل ما تكدب اكتر كل ما الناس هتقول مش ممكن يكدب في حاجة كبيرة كدة فيصدقوا....اخر نكتة وصلت طازة بتقول ايه يا اخوانا.....اسمعوا....بس لو عندكو امراض مزمنة اتكلوا على الله واسمعوا شريط تامر الجديد...عشان انا مش عايزة البس ذنبكوا في رقبتي....الإخوة بقى الي لسة مرارتهم ما اتفقعتش...يسمعوا النكتة دي....اتحاد الصحفيين العرب....الي هو جهة مستقلة وغير تابعة للحكومات العربية اصلا...وتابع للنقابات الصحفية الي في دول العالم بأسرة...عمل استبيان كان المفروض انه يكون مهم عن حرية الصحافة والنشر في الدول العربية....خمنوا بقى مين يحصل على المركز الأول.....ههة....حد عندة فكرة.....مصر!!....ابدا....لبنان!! إطلاقا......المغرب!!! يا خوانا ركزوا ايه الدول القمعية دي...المركز الاول كان من نصيب.....ترترترترترترتررترترترترتر ( مزيكا تصويرية) ......السعودييييييييييييييييييييييييية ايه رايكوا....اكثر الدول حرية في الصحافة والنشر.....حسب التقرير الغير حكومي....طلعت السعودية.....السعودية الي معندهاش نقابة اصلا...لا للصحافيين ولا غيرهم على اعتبار ان كل بدعة ضلالة لإن الصحابة رضوان الله عليهم معملوش نقابة تناقش مشاكل .....و طبعا معندهمش صحافة...على اعتبار ان الشعر هو الحاجة الوحيدة الحلال وحتى مكروه....عشان الشعراء يتبعهم الغاووون....وكمان الإعلام ده بيدعوا للفسق....فمعندهمش كليات اعلام اصلا...تخيلوا بقى.....دولة بالشكل ده....طلعت اكثر الدول حرية في الصحافة والنشر......السعودية الي بتقطع الصفحات الي مش عاجباها في الجرايد الي جاية من برة....طلعت اول دولة في التقرير ممارسة للحريات....السعودية الي قبضت على معارض سعودي قال راية في مداخلة مع قناة الجزيرة على الهوا....تخيلوا...الراجل لسة بيتكلم على الهوا...قام اتقبض علية قبل المداخلة ما تخلص....السعودية الي لما مصر كسبتها في بطولة كأس العرب....قطعت صفحة الرياضة من كل الصحف المصرية الوافدة....السعودية البلد الوحيدة في العالم الي عندها كل وسائل المواصلات متاحة ومتوفرة و مع ذلك بتقرا جورنال الجمعة يوم الحد و كل الجرايد مترحلة يوم....تصوروا.....طيب اتفقعتوا كفاية....خدوا الثانية بقى....مين يا شطار يقولي الدولة الثانية طلعت مين.....موريتانيا....!!! ابدا..ليببيا مثلا!!! خالص....طيب السودان احتمال....إطلاقا...الدولة الثانية هي الدولة الشقيقة سورياااااااااااااااااااااااااااااااا......سوريا الي معندهاش ولا جريدة واحدة مستقلة او معارضة طلعت تاني دولة في الحريات......انا مش هكمل عشان حاسة ان المرارة اتفقعت والعصارة هتغرق الدنيا...

طيب اكيد في حد خلبوص عايز يسأل ابلة سكوت هنصوت .....هي مصر طلعت رقم كام...الحقيقة يا جماعة مصر شرفتنا جدا المرة دي....احنا بفضل الله طلعنا رقم 12.......اه مانا مقلتلكوش المراتب الأولى كلها استأثر بها الخليج.....اما الرقم 12 و13 فكان لمصر والمغرب....الي نشر التقرير ده يستاهل ايدة تتلف فشاش.....وحلال فيه الوأد....طبعا الدول الي معندهاش متنفس من الحرية...جاوبت على الإستبيان كلة بفلسفة كلة تمام يا ريس....اما الدول الي عندها هامش من الحرية المنتزعة زي مصر والمغرب...فنقاباتهم جاوبوا فعلا بصدق وشفافية...و بالتالي ...سردوا المشاكل الموجودة فعلا بدقة...وعشان كده طلعنا ال12 اما دول الخليج فيا طويل العمر كل شئ على ما يرام....والله يبارك في الأمير...تخيلوا المهزلة....انا بقى عايزة اسأل....طيب دول بهايم و مش فاهمين حاجة في عيشتهم و بياكلو من تحت رجليهم.....الصخص الي نشر التقرير ده للدرجة دي معندوش دم....ولا ايه اصلا أهمية نشر تقرير مضروب بالشكل ده....ليه ما ترفضش التقرير زي اي رسالة ماجستير او دكتوراة نتايجها متفبركة...كان ايه لزمة النشر.....اهو مجرد سلسلة من سلاسل التخلف....بس برضة عمار يا مصر....على الأقل طلعنا احسن من السعودية

حرقة دم

عمري ما اتحرق دمي زي امبارح....منى الشاذلي دي باينها منطهداني....كل ما اجي اقول انشاء الله هنقضي سهرة لطيفة مع اخبار مبهجة تطلع عليا باأخبار زي وش الي بالي بالكو....حاجة كده تغم النفس....امبارح نقلت خبر مش يوجع على قد ما يفقع....ينقط...يشل...يخلي الواحد عايز ينزل من بيتة يطلع على بيت اي مسؤول يدغدغة....الي شاف الحلقة...مش هيستفيد حاجة لإني هعيد نشر الخبر..أما الي ماشافش بقى فيستعد لحرقة الدم....وزير التربية والتعليم....اذل الله مقامة...حب يزور مدرسة فقنا....وطبعا احنا ناس محبة جدا للحكومة وللسلطة بكل ةممثليها....يعملوا ايه عشان يحسنوا استقبال الوزير....يرشوا المدرسة بالرمل...شوية...طيب يغسلوا الحيطان بالمية.....مش كفاية....يأجروا اصاري زرع عشان بسلامتة يشم اكسوجين نضيف....ايه الكلام التافة ده...برضة مش كفاية....العباقرة تفتق ذهنهم انهم يجيبوا أطفال من مدرسة ابتدائي ويوقفوهم على الرصيف تشريفة لسعادته عشان ينبسط.....أيوة بس الوزير مش رايح يزور مدرسة ابتدائي...مش مهم...هو يعني الوزير هيدق....نهايتة...راحوا خدوا العيال من المدرسة...ووقفوهم حوالي ساعة ونص في انتظار الوزير....لما بسلامتة يشرف.....طيب وبعدين....وقفوا العيال تشريفة...في درجة حرارة تتعدى 42 لكم ان تتخيلوا الحر الشنيع في قنا الساعة 9 الصبح...لأطقال من سن عشر سنين....إختصارا للوقت...الطفلة أميرة أصيبت بضربة شمس من جراء الوقفة في الشمس....ثم لقت نحبها بعدها بساعات في المستشفى العمومي......يا الله.....طفلة تروح مدرستها الصبح عشان تتعلم.....تقوم تلاقي نفسها جثة هامدة لأجل عيون الوزير....يا حرقة الدم.....الخبر في حد ذاتة حرقة دم....بس الحكومة تكتفي و تحترم نفسها و تعتذر....ابدا.....تحرق دمنا زيادة....البرنامج استضاف على الهاتف كلا من والد الطفلة و وكيل وزارة التربية والتعليم.....
وكيل الوزارة بقى يقول ايه.....الأول قال...ايه المبالغات دي...الوزير زيارته كانت كلها ساعتين...يبقى ايه الثلاث ساعات الي قلتي عليهم دول...وبعدين الساعة 9 الصبح كانت درجة الحرارة لحقت تبقى 42 ...شوفوا الفقع...وبعدين يقولها ايه...انا تابعت الحالة بتاعت البنت بنفسي....لقيت ان البنت كان عندها اصلا حرارة وبقالها اسبوعين واخدة اجازة من المدرسة ولسة راجعة يوم زيارة الوزير.......(بالذمة ده بني ادم) مش يتكسف على دمة بقة و يسكت لأ....يكمل السيناريو المعروف بتاع الحكومة....اكدب كدبة كبيرة ومحدش ممكن هيقدر يكدبك إحنا اصلا ما جبناش بنات من المدارس ولا حاجة وماكانش فيه تشريفة.ولا حاجة للوزير...لو كنا عايزين تشريفة كنا جبنا من مدرسة الثانوي الصنايع القريبة...بدل ما نجيب اطفال من على بعد كيلو....منى جالها حالة ازبهلال...و الى حد ما ظهر على وشها امارات عته من هول الي بتسمعة _ يعني حضرتك عايز تقول ان ماكانش فيه تشريفة ولا حاجة
البجح يقولها اطلاقا....كل ما في الأمر ان الأهالي جابوا شوية طبل وزمامير و رقصوا شوية ابتهاجا بزيارة الوزير.....كنت حاسة ان منى نفسها تقلع الجزمة وتحدفها على المتصل....طيب...خدتوا جرعة استفزاز كافية...خدوا عندكو .... بعد ما منى غسلت الراجل وكيل الوزارة و نشرتة بالأدب....جابت بقى ابو البنت....تسألة على التفاصيل....قلت بس....هنشوف طرطشة دم بقى .....البنت دمها لسة ما بردش...واكيد ابوها محروق جدا....الراجل صوتة غلبان قوي..ومكسور....حسيت بغصة في حلقي من كتر الألم والحزن..... بعد ما تقبل التعازي...قالتلة ايه شعورك يا حج ناحية الي حصل....قالها...احنا ما بنلومش حد...ده قضاء الله وقدرة...وعمرها و مكتوبلها...ومحدش له ذنب.....الحمد لله.....كان هاين عليا اكسر التلفزيون.....يا سلام....قضاء الله وقدرة....لا حول ولا قوة إلا بالله...طبعا منى كمان اتحرق دمها لإنها كلفتت الراجل و في النهاية قالت...يظهر يا جماعة ان حسب رواية الوزارة...مفيش تشريفة ولا دياولة....كل ما في الأمر ان الناس في قنا بيحبوا الحكومة والمسؤولين جدا لدرجة ان هما بيخرجوا طواعية منغير ضعط او تنظيم عشان يستقبلوا اي مسؤول بالطبل والزمر....

(عن عبد الكريم عامر ( حوار هادئ مع النفس)

كثر الكلام في موضوع عبد الكريم بشدة...و هذا ان دل فإنما يدل على ان هذه الحكومة ليست جميعها من الغباء الذي كنا نظنة...وقد فطن كثير من الناس الى هذا الأمر...و نادوا جميع المعارضين الى الإلتفاف وراء عبد الكريم حتى وان كان كافرا مدافعين عن حقة في الدفاع عن افكارة و نشرها و ان كانت اشدها هرطقة و ابتذال...وهم ما فعلوا ذلك تنازلا عن دينهم او مراءاة له , وانما ينبع الأمر من إيمان عميق ( اظنة في معظم الأحوال صادقا) بأن للبيت رب يحميه.....أما المهاجمين فهم ايضا على سواء في نفس الخندق...فهم انما يهاجمون عبد الكريم دفاعا عن حرية الرأي الحر المحترم وليس المبتذل....و إيمانا منهم ان لله جنودا في الأرض يآزرون دينة و يراعون حرماته...وهم في هذا ليسوا بعيدين بحال عن شؤون الحريات بل هم يدافعون عن عبد المنعم المدون الإخواني دفاع المستميت...

إذا نحن امام فريقين مؤمنين بمنتهى القوة بالحق من وجهة نظرهم ...السؤال إذا ايهم على حق....وهل ينبغي ان ندافع عن عبد الكريم ام نتركة لمصيرة الذي سطرة بيدة....الواقع ان هذه القضية في رايي قد عرتنا امام انفسنا...

ذلك ان لكل منا معتقدات ثابتة...اما اننا نخشى مصارحة انفسنا بها و مناقشتها خشية الضلال او الكفر...أو ان العقيدة لدينا هي من كماليات الحياة ورثناها كأسمائنا دون مناقشة او تفصيل...ونظن ان هكذا ينبغي ان تكون.... ذلك لأن هناك في ديننا امور تدخل الإسلام في الدول الممارسة للإرهاب ان طبقت....و تخرج المسلمين عن الحق أن اهملت...كالحدود ..و احكام التجارة, و بيع الخمور الخ... هذه الأمور يمتنع معظم المسلمين عن مناقشتها حتى لا يجدوا انفسهم تحت طائلة الكفراو الشرك والعياذ بالله....قضية عبد الكريم اوقعتنا في شقي الرحى...الان لم يعد بالإمكان ان نتراجع....لابد من وقفة قوية مع انفسنا حتى نعرف ما نؤمن به بقوة فنسير فيه الى النهاية...
أظن ان اول الأمور الواجب وضعها في الإعتبار لكل مدون اوحقوقي هو حقيقة إيمانة..العالمانيين واللادينيين قد اعفوا انفسهم من هذا الحرج ... فتحرروا بالفعل من روابط الدين والتزموا بورابط القيم الإنسانية في العموم.....أما الملتزمين دينيا فلا يجدون في انفسهم الشجاعة لذلك....ذلك ان كل منا يسعى في النهاية الى الجنة وينأي بنفسة عن النار...الللا دينيين لا يثقون في وجود جنة او نار...لذلك لا يخشون عذاب ولا يرجون جزاء الا النجاح في الدنيا لذلك متفهم بشدة موقفهم المؤيد لكل الحريات...فنصر عبد الكريم الان يفتح الباب لإنتصارات اخرى لنصر حامد ابو زيد و جورجي زيدان وغيرهم....هم اذا واضحوا الهدف والهوية ولهذا فأنا احترمهم بشده وان اختلفت واشفقت على كثير منهم.....اما ما يحيرني بشده فهو موقف المسلمين الملتزمين....
الواقع ان الحكومة الخبيثة استغلت نزعة الشعب المصري الطبيعية للخلاف .... و سربت اليه قنبلة صغيرة...جاءت بشخص كافر بالكلية( بإعترافة هو على احسن تقدير) و تركتة يسب كيفما يشاء في الله والرسول متهما الرسول بأشنع التهم الممكنة والغير ممكنة...ثم غررت به على حين غفلة و قدمتة للرأي العام على انها حامية دين الله عز وجل, ثم اعطتة حكما 3 سنوات عن سب الدين الإسلامي و سنة عن سب رئيس الجمهورية....
التهمة التي اختلف عليها المسلمون من اقصى الأرض لأدناها هي سب الدين اما سب رئيس الجمهورية فلا تكاد تذكر...طيب...هل عبد الكريم هو الوحيد المجاهر بكفرة.؟؟.. ينتصر الإسلام بسجن عبد الكريم....؟؟؟ هل ينقص من قدر الإسلام الف من امثال عبد الكريم؟؟؟ اليس الله بكاف عبده...إذا ما الداعي لجعلة كبش فداء؟؟؟

في البوست القادم ساطرح بعض من ارائي في الإجابة عن هذه الأسئلة...

tag

شهيدة اتحفتني بتاج ...استحملوني بقى....

أحب شخص لقلبك فى الدنيا؟
سؤال صعب جدا...بالتاكيد احب الناس ليا هما عيلتي....الأقرباء من الدرجة الأولى...لكن الإنسان الي فعلا اكتشفت انه احب

شخص ليا كان استاذي العزيز الله يرحمة...الي فضلة عليا غير عادي وادين له بكل خير يجيني في الدنيا دي بعد ربنا سبحانة وتعالى...اللهم ارحمة واغفر له يا غفور يا رحيم

إنسان مستعد تضحي بحياتك –ركز فى كلمة حياتك- عشانه؟
انا بطبعي جبانة قوي...وبخاف على نفسي جدا...لكن اظن ان اي انسان احبة بإخلاص هبقى مستعدة اني افدية بعمري...ايا ما كان بقى

ابويا.... اخويا....أختي....أمي...صديق....صديقة

مش هتفرق...ساعة الجد المسائل بتختلف...كمان الغضب لما بحس ان حد بحبة في ورطة بيخلي الواحد يعمل حاجات كتير ما يقدرهاش بعقلة

.انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
في ناس كتير بكرهها ....انا بكره اي حد عنده القدرة انه يعذب اخوه...على راي صلاح جاهين...ما اعجبش من الي يطيق بجسمة العذاب واعجب من الي بإيده يعذب اخوه....اما التقطيع والقتل ده...فأنا جبانة جدا...ومهما كرهت مش ممكن اقدر افكر واشوف حاجة زي كده..ولا حتى لفرخة مش بني ادم
ما هو:اسم أجمل كتاب كتبه بشر قرأته ومحتفظ به حتى الان؟
القراية عندي مراحل...يعني في الإبتدائي كان كل روايات رجل المستحيل و مازلت محتفظة بيها بس بطلت اقراها عشان الضغط بعيد عن السامعين, وفي إعدادي قريت كتاب اثر في حياتي جدا وقتها لنجيب الكيلاني مش فاكرة اسمة...كان عن قصة حياة طفل....اما في ثانوي فكانت رواية امام العرش لنجيب محفوظ...كنت بحبها جدا...واثرت في دماغي كتير....في الجامعة بقى فكان مجموعة الإخوات برونتي...بالأخص شارلوت وإميلي, اما حاليا فأجمل كتاب قريتة ولسة محتفظة بيه هو المعارضة في الإسلام لجابر قميحة...كتاب رائع انصح الكل بقراءتة

اسم كتاب-كتبه بشر برضة- انت متعلق بيه وبتقرأه كل فترة؟
قصة رائعة لجورج اورويل اسمها المزرعة...عن حيوانات عايشين في مزرعة اكتشفوا ان هما مصدر رزق صاحب المزرعة فقرروا ان هما يتمردوا علية و ياخدوا منه الحكم...القصة هزلية بتناقش بعمق وبساطة شديدة الفكر الإشتراكي...كتاب رائع اقراة كل ما الاقي نفسي زهقانة ونفسي اضحك

اهم جهاز منزلى انت متعلق بيه او بتستخدمه كتير؟

التلفزيون والكمبيوتر

شىء تحس بالراحة النفسية عندما تنظر اليه؟
البحر

مكان تحس فيه بالحنين الى شىء لا تدرى ماهو و ذكريات جارفة الى لاشىء؟
جامعة القاهرة حيث قضيت اجمل سني عمري..في صحبة استاذي ومعلمي ومرشدي رحمة الله

مكان تحس بالراحة عندما تدخله؟
اي جامع بالأخص المسجد النبوي والمسجد الحرام
أجمل مدينة زرتها في مصر؟؟

الإسكندرية
أجمل مكان طبيعي رأيته داخل مصر---> لبنان؟
طابا

شخصية كارتونية بتحبها؟

بجز بني
نوع هاتفك المحمول؟
نوكيا

سرعة بروسيسور جهازك؟

حمارين وكارتة

حجم ذاكرة –هارد- جهازك؟
1 جيجا

المساحة التى تشغلها المواد الاسلامية على جهازك؟

أقل من واحد في المية

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

طيب هخليها لنفسي

أهم هدف في حياتك حاليا؟

أهم هدف ان ميعديش عليا يوم منغير ما احس اني عملت فيه حاجة مفيدة

مواصفات فتاة –أو فتى للبنات- الأحلام بالنسبة لك؟

ممممم.....انا زي اي بنت (مع الإعتذار للإغنيه) عايزة عريس تفصيل....يكون كامل من مجاميعة...يعني لو بل جتس يبقى كويس ماكانش...فممكن براد بت....ايه برضة محجوز....يادي النيلة....خلاص..بقى اي كلب والسلام...المهم يكون دمة خفيف...عندة منطق في كلامة....فيه اساس ديني نحتكم ليه ساعة الخلاف....واخر حاجة بقى اكون بحبة جدا...
صف ما يأتى:شعورك لما بتسمع كلمة مصر---> لبنان؟
ممممم....مصر...بحس اني عاملة زي السمك النيلي الي رموة البحر....لو طلع عالشط هيموت..ولو كمل في البحر هستسمم...او برضة يموت..مصر بالنسبة لي بقت بحر..لا قادرة اسبها ولا اكرهها...مع اني زعلانة منها و عليها قوي...بقيت حاسة اني اتلعنت بحبها...كات أما لبنان...فنسمة صيف رطبة في جو جاف وحر...اقبل ثراك يا لبنان ان انجبت لنا نصر الله...لا وشوف الجمال كمان نانسي عجرم...طب بالذمة مش هي دي الجنة...لبنان بحس انها حته مارونجلاسية...اترمت في صحرا مليانة ضباع وتعابين....

شعورك لما بتسمع كلام عن اليهود؟

بشعر برغبة شديدة في اني املك موهبة بارعة في القر والحسد يمكن يحوق فيهم

ما شعورك لما بتشوف ظابط شرطة؟

لما بشوف ظابط شرطة ببقى نفسي اخدة فعالم موازي يبص فيها على نفسة هو وزمايلة من فوق ويشوف قد ايه هما اغبياء...كمان بحلم اني اعمل اختبار ذكاء لكل رجال الشرطة ونشوف هيجييبوا سكور كام...

لون البطانية اللى بتتغطى بيها فى الشتاء؟

سؤال عبيط قوي , تفرق ايه

لون الجورب المفضل؟

بيج

احساسك اذا داست قدمك فى الطريق على مخلفات اخراج حيوان- *** ولا مؤاخذة-

بفتكر المنتصر بالله في مسرحية شارع محمد علي....خلاص بقى تلاجة غسالة هي هتحمض

ما شعورك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

لا شئ...هو حر...لكن بفكر اني مش ممكن احب واحد زية

احساس يراودك فى اشارة مرور مغلقة بسبب مسئول كبير؟

الحقد والكراهية الشديدة للدنيا بحالها...

التاج ده همررة للتالي اسماءهم...

عبقرينو

حنتكلم

احمد المصري

بليفر

عند غياب العقل

عندي كلام كتير قوي عايزة اقولة من كتر تسارع الافكار..حاسة انها كلها عمالة تخبط فبعضها و مفيش فيهم فكرة سليمة...استنوا كده لما اطلعلكم فكرة ولا فكرتين سلام...

الأول كنت عايزة اكملكم الفكرة الي كنت طرحتها في البوست الي فات..المدرس الإنجليزي لما طرح علينا السؤال كان فاهم ان احنا معظمنا عرب ومسلمين..وبالتالي..كان مستني اننا نقولة طبعا نعمل عمليات ارهابية يا ريس..ونموت المدنيين...ونقول عليكو كفار...
احنا كعرب و مسلمين كلنا جايين من بلاد تركب الحمير او الجمال..مانفهمش حاجة عن الديموقراطية ولا الحرية..ولا نيلة..احنا اخرنا الي مش معانا نفقعة علقة لحد لما يعرف ان الله حق وينضم لينا..او ياخدها من قصيرها و يسمي نفسة سامية...وساعتها مش هينفع ببصلة فمش هنحتاجة اصلا معانا...(مع الإعتذار لأي سامية تقرا البوست)...طبعا النتيجة ان اي اقلية مهمشة في بلد عندها حد ادنى من النزاهة تقدر تلفت النظر لمشاكلها من خلال سلسلة من الأفعال و الأنشطة زي مثلا...المسيرات السلمية في الميادين العامة...او لفت الإنتباه للمشكلة من خلال وسائل الإعلام المسموعة والمقوؤة والمرئية..او استقطاب رجال اعمال يدعموا القضية بالمال..الخ...اما الدول الي معلوماتها عن الديموقراطية..تشبة معلومات شبعان عبد الرحيم عن رياضة السومو في اليابان ...الدول الي معندهاش قدر من النزاهة في التعامل مع شعوبها..فكل الوسائل السلمية دي تصبح غير ذات موضوع..و تبقى الساحة فاضية تماما امام الإرهاب..وأظن تاريخ المنطقة العربية مع الجماعات الإرهابية اكبر دليل على كده..اول ما تنعدم النزاهة يلجا الناس الى الحل بالدراع..ويصبح مقولة عبد الناصر ما خذ بالقوة لا يسترد الا بالقوة. هي شعار الحقبة..ونفضل ندور في حلقات مفرغة من العنف والعنف المضاد..الي مالهاش اخر..اتمنى ان المرحلة الي جاية ما ترجعناش للأيام السودا دي..لإن ساعتها لا قانون ارهاب هينفع ولا طوارئ هيبقى قانون الي يعرف ابويا يروح يقولة

في البوست الجاي انشاء الله نيقى نقطع شوية ففروة عبد الكريم...الى لقاء انشاء الله

سؤال في الجون

بقالي ساعة عمالة اكتب وامسح.....شوية عشان مش عارفة ادور على الكلام الي ينقع يتقال منغير ما يسبب إزعاج لحد.....

يعني مثلا...خفت اتكلم عن اي فساد جاري في الحكومة...لحسن الحكومة تمسك في خناقي بتهمة تكدير الأمن العام.....أصل ساعتها...
هبقى عاملة زي عادل إمام في مسرحية شاهد ماشافش حاجة...لما جاتله فاتورة تليفون فيها 32 جنيه مكالمات زيادة...مع انه معندوش تليفون...و لما حب يشتكي...قالوا يا تدفع يا هنشيل العدة....مع انه لسه معندوش تليفون...لكن هو الصراحة خاف عالعدة....
طيب...بلاها الحكومة بتاعت الامن العام دي...نتكلم عي اي فساد في العالم العربي مثلا...والعالم العربي بسم الله ماشاء الله الله اكبر عليه...الكلام فيه يكفي دواوين...قلت مثلا...اتكلم عن المقالة المنشورة في جريدة الكرامة...عن ان الملك عبد الله(بتاع السعوديو) الي نفسة يلعب دور جمال عبد الناصر لا يجيد القراءة والكتابة لا بالعربي ولا بالأفرنجي...او مثلا ان الملك عبد الله(بتاع الأردن المرة دي) لا يحسن القراءة ولا الكتابة باللغة العربية لأن لغته الأم هي الإنجليزية...وبعدين قلت يا واد طنش خالص...لا تلاقيلك جمعية سعودية ولا أردنية رافعة قضية بتهمة إفساد علاقة مصر بدولة صديقة....قال يعني علاقة مصر بأي دولة في الدنيا ممكن تفسد من مقالة....لو على كده كان زمان مصر أعلنت الحرب على إسرائيل من زمان بقى....نهايته....بما اني عجزت اني الاقي دولة اقدر اتكلم عنها بحرية منغير ما اتعرض لمساءلة قانونية من اي نوع....قعدت افكر هو ايه حدود الكلام....وهو المفروض ان اصلا الكلام يكون بحدود....؟؟؟؟ و فجأه اقتكرت حاجة خلت عقلى يشت من التفكير...

السؤال مهم قوي...ومحتاج تفكير عميق...أنا شخصيا فشلت بشده في الإجابة علية....

بس قبل ما اقولكم السؤال عايزة احكي عن خلفيته...السؤال كان مطروح من قبل مدرس انجليزي في احدى المدارس الصيفية للتقريب بين الثقافات...والموضوع كان عن نظم الحكم الديموقراطي و تطبيقها بين الشعوب المختلفة....

طيب ركزوا بقى في السؤال...لو انك فرد من مجموعة تمثل اقلية مهمشة في مجتمعك....لا تزيد نسبتكم عن واحد في المئة....ولديكم مجموعة من المطالب التي لا يعبأ بها أحد من اعضاء مجلس الشعب...المنتخب نتيجة لإنخفاض اعدادكم...كيف يكم ان تلقت انتباه الدولة الى مشكلتكم...حتى يمكن حلها؟؟؟
السؤال ده بحذافيرة ممكن نقول عليه انه مشكلة البهائيين والعلمانيين والوهابيين واليهود والأصوليين المتطرفين والمعتقلين والمهمشين في الصعيد وسينا الخ الخ....
يا ترى الناس دي تعمل ايه عشان تلفت نظر الحكومة ليها....؟؟؟؟؟؟؟؟؟؟؟؟؟؟؟؟