Sunday, April 6, 2008

يوم ستة إبريل




ومر يوم الإضراب بنجاح وسلام


شوارع القاهرة كانت فاضية زي ما نكون يوم الجمعة


رمسيس والتحرير كانوا حرير


مش هبالغ واقول ان ماكانش فيه ولا عربية في الشارع


طبعا كان فيه عربيات..اقلهم عربيتي..


لكن ما حدش يقولي انه ممكن يقطع المسافة من ميدان لبنان لحد التحرير مرورا بجامعة الدول في


فترة زمنية لا تتعدى الخمستاشر دقيقة الساعة واحدة الظهر


ده الي حصل معايا والي بناءا عليه بقول ان الشوارع كانت فاضية والدنيا كانت هادية


لم يكن هناك مظاهرات في ميدان التحرير نفسة..اللهمم الا تجمعات بسيطة امام هارديز


فضتها بسهولة و بكفاءة صراحة قوات الأمن المركزي


انا شخصيا ما شفتش تطاول من الشرطة..وده احقاقا للحق


انا ركنت قريب من نقابة الصحفيين


و نزلت مع بنوته من أبناء مصر ووقفنا امام نقابة المحاميين وصورنا تحت نن عين الظباط


ولا حد قالنا حاجة..بالعكس..العساكر كانوا هما الي بيتفرجوا علينا مش احنا الي بنتفرج عليهم


مريم بنت عمران بتحلف انها شافت سواق تاكسي واقف جنب عسكري امن مركزي


وعمال يقوله " يا حمار الي بيهتفوا دول بيهتفوا عشانك مش ضدك


عشان رغيف العيش الي مش لاقينه وكيلوا الزيت الي بقى بعشرة جنيه"


الناس حولين النقابة كانوا بيقدموا رجل ويؤخروا عشرة


عدم اعتداء الأمن عليهم بالضرب الى حد ما مطمنهم انهم يفضلوا واقفين


لكن قلبهم مش مطاوعهم يدخلوا النقابة


كمان كان فيه على سطح النقابة ناس ياما


يجمي خمسين او ستين واحد فيهم ستات كتيير قوي


والمشهد الغريب انهم كانوا على كل لون با بطستا


واحدة منتقبة لابسة اسود كانت عمالة تشوح بإيديها بمنتهى القوة من فوق سطوح النقابة


عرفت وقتها انها بتهتف لإنها منتقبة فبقها مش باين


ما عدا شوية الناس الي عند النقابة دول ما كانش فيه حد في البلد


المحلات كانت هادئة تماما..بس أعتقد ان ده نهارا لكن بالليل الوضع هيتغير


ولا الغبار بقى...يا ساتر


كان لعنة النهاردة..الجو فجأة قلب قلبة سودا


بس ساعدت على ان الناس تفضل في بيوتها


التجربة كانت جيدة...او بدائية لكن ناجحة


حققت الغرض المطلوب منها في وقته


عقبال التجربة التالية..لكن بيتهيألي ان الشعب لسة شوية عليه


الرك دلوقتي على موظفين الحكومة...هما الي في ايدهم التغيير


لإنهم اكتر ناس مضرووين..القطاع الخاص الى حد ما مش حاسس بنفس القدر من الإستغلال


لذلك كان اقل انضماما...


لعل بكرة افضل من النهاردة


عموما يوم ستة ابريل خلص


و كل إضراب وانتو طيبين


12 comments:

Layla said...

اليوم خلص في القاهرة...لكنه لسة مستمر في المحلة

المحلة بتولع حرفيا مش مجازا

Dr. Eyad Harfoush said...

عزيزتي سكوت هانصوت
أنا أيضا متفائل ، صحيح كان أملي أكثر من كده شوية ، لكن أول الغيث قطرة، و دي أول مرة في شكل عصيان على مستوى القطر، ما يحدث بالمحلة الان من اندساس المخربين بين المتظاهرين من قبل الحكومة عمدا يثبت ان حكوماتنا لا تتعلم ، فلا حريق القاهرة و لا 18 و 19 يناير علمهم ان حرق البلد لاتهام المتظاهرين بها يعجل بنهاية الظلم و ليس العكس ، كويس ، خليهم بهايم كده احسن

أبو علي said...

تحياتى على المجهود الرائع وطول ما فيه ناس محترمه كده يبقى فيه أمل

يوميات أم حديثة الولاده said...

أنا متبعاكي من زمان...و على أد ما أنا فرحانه بيكي خايفه عليكي..ربنا معاكي

عبد من عباد الله said...

الاضراب من وجهة نظري مساؤة جات اكتر من مميزاته

أنا وصاحبى said...

اجد ان اهم ما جاء به الاضراب هو بداية لتغير ثقافة دامت على مدار سنييييييييييين وسيطرت على عقول شعب باجياله
ــــــ
ــــــ
عالهامش ... اذا كنتى قد اضربتى عن زيارة مدونتى انا ومزاج
يبقى على الاقل تنطلقى فى مدونتى انا وصاحبى
ـــ
تحياتى
احمد البوهى
انكسارات

Anonymous said...

Hello! I am a reader from the Philippines. Your blog is definitely one of the most interesting I have seen. I am happy to visit it.

مصر اللى مشفتهاش said...

الاضراب نجح فى انه بين للشعب مدى خوف الحكومة وجبنها..
وهو كان مجرد بداية ..وكل اضراب واحنا طيبين

سكوت هنصوت said...

ZOLOKIS

i did, but couldn't find anything of my interest, thanks for stopping by though

Marvel

معركة المحلة مازالت تندلع...وربنا يستر

د.إياد حرفوش

صحيح اول الغيث قطرة...بس مش عارفة الجفاف ده اخرته ايه

فلننتظر ولنرى...والزمان بيننا

سكوت هنصوت said...

أبو علي

اشكرك على الزيارة الغالية

و مبروك المدونة الجديدة

-------------------------
يوميات ام

مدونتك مبدعة, ما تخافيش عليا عمر الشقي بقي

------------------------


يا عبد من عباد الله

ايه المساوء الي مش عاجباك في الإضراب

؟؟؟؟؟؟؟

-----------------------
انا وصاحبي

اعز اصحابي هنا....مهني وانكسارات

يا دي الهنا يا دي الهنا

بجد انا في غاية السعادة بيكو

نورتوني وشرفتوني

و جايالكو قريب ان شاء الله

mostafa rayan said...

الأضراب بين للناس قد ايه الحكومة جبانة وخايفة
لعل اللي حصل يغير شيئ
والحكومة تعرفان الناس مش هتقدر تتحمل اكتر من كدة

Anonymous said...

بجد اليوم ده كان نقطه امل

وسط ليل طوييييييييييييييييييل

و كان من الاسباب اللى خلتنى ارجع افتح مدونتى تانى

عاشان "ما ضاع حق وراءه مطالب " عاشان كده مش لازم نسكت

و لازم نكمل

و المدونه رائعه ماشاء الله