Saturday, April 12, 2008

يا ولاد بهية


يا مدونين

يا ولاد بهية

اظن الوقت جه ان كل واحد بقى يقول لنفسة

العمر واحد والرب واحد...والي هيبيع مصر النهاردة يبقى عيل وابن عيل

الصورة المعروضة دي....صورة إسراء..

إسراء بنوته في العشرينات من عمرها, وعضوة بحزب الغد

كانت صاحبة فكرة عمل جروب على الفيس بوك اسمة إضراب ستة إبريل

و الحقيقة ان كل من سمع عن الإضراب من غير السياسيين سمع عنه عن طريق إسراء

يعن البنت الي بميت راجل دي هي الي وصلت الرسالة لشعب مصر الي نايم على ودانه

واخره ينزل صورة في مارينا بشورت وجنبة كام مايوه بكيني

انا شخصيا قابلت كام بنت وولد من الجامعة الأمريكية يعرفوا عن الإضراب من خلال إسراء

إسراء استطاعت انها تشجع ميت الف واحد انه يشارك في الإضراب

دلوقتي إسراء مرمية في سجن القناطر بتاع النساء..

مش بايته في سريرها...,ما بتغسلش سنانها بالليل و بتنام في عنبر مليان قمل و براغيث

الأمن لو ما كانش مرعوب لدرجة انه يعملها على روحة ما كانش حط واحدة زي إسراء في السجن

إسراء مش محتاجة اكل ولا شرب ولا هدوم.....لكن محتاجة دعم نفسي و دعم معنوي

اهلها كمان محتاجين دعم نفسي ودعم معنوي .....

انا اتصلت بالمحامية الخاصة بيها وابلغتني ان اهلها زاروها النهاردة

و هعرف منها ازاي ممكن نقدم الدعم المطلوب لأهلها

كمان عايزين كلنا نتكاتف ونتبرع للجنة الإعاشة بمركز هشام مبارك

لإنه هو المسؤول عن حماية و متابعة المعتقلين في قضايا الرأي

يا مصريين يا مدونيين...دقت ساعة العمل...وراح زمن النوم




8 comments:

Dr. Eyad Harfoush said...

عزيزتي ألفا الجيل
نعم النداء من نعم المصدر و لدعم نعم الشباب ، أعانك الله على الخير كما تعينين دوما يا صديقتي العزيزة ، كلنا لإسراء قلوبا و قوالب ، حتى لو كان الثمن هو أن نحل محلها لو أن هذا يجدي ، و أنا أقولها بحقها و الله يعلم ، عنقي فداء لعنق إسراء، و أرجو لو وصلتي للاتصال بأهلها ان تعينيني على الوصول لوالدها ، لعلي أقبل اليد التي ربت هذه الوردة على صدر مصر، و أنا معك مقدما بأي شيء يدعم سجناء الحق (عدا الاخوان كما تعلمين) و جزاك الله عن نشاطك بالحق خيراً

مـحـمـد مـفـيـد said...

سحقاً لكل الجبناء الذين يتخفوا خلف عجزهم بعمل تصرفات حمقاء
فتلك الحكومه العاجزه لم تعد تأتي الا بكل الاعمال التي تسئ لها مجدداً
مبادره رائعه كعادتك وان كنت اعيب عليكي استخدمات مصطلحات غريبه عليكي وعلي كتاباتك ومن الممكن توصيل الفكره وعدم استخدام هذه المصطلحات
دمتي بخير

a7lam 3adya said...

مها

احنا ممكن نعمل دعوة للتبرع الى مركز هشام مبارك .. والله انا نفسى ازورها بس المشكلة انو فى هشام مبارك قالو لنا ان الزيارة للاقارب الدرجة الاولى بس .. بس على فكرة هما ممكن يوصلوا جوابات مننا لاسراء وربنا معاهم ويحفظهم

شهيدة said...

السلام عليكم

الله يكون معاها
ويفرج عنها
بالفعل زي ما قلتلي لو الحكومة ما كانتش خايفة ما كانتس حطت واحدة زيها في السجن

الله يقويكم
ويقويها
وهي أكيد محتاجة كل الدعم
هي وغيرها من اللي ضمايرهم لسة صاحية وقلوبهم لسة بتضخ دم وعزة نفس

تحياتي

Anonymous said...

خبر الافراج عنها كان بالنسبة لى فرحة غامرة

Anonymous said...

الحمدلله افرج عنها

بس بجد بنت ب 10000 رجل

ربنا يحفظها

سكوت هنصوت said...

خيجار

ده فيرس يا جماعة محدش يدخل
---------------------

د.إياد حرفوش

دعوة فارسية..(نسبة للفروسية وليس لبني فارس) تصدر من شخص رومانسي نبيل

لقد اتصلت بالفعل بالمحامية الخاصة بإسراء و طلبت منها ذات الطلب...و في إنتظار ردها


----------------

محمد مفيد

عذرا يا اخي الفاضل على اللهجة الغاضبة الغير معتادة...لكن الحال اقصى من قدرتي على اللباقة

-------------------
احلام عادية

فات اوان الجوابات لإن إسراء خرجت بكفاله مؤقته

------------------

شهيدة

قلوبنا معها...سلمت لي دوما

---------------

إنكسارات

ليتها تعلم ذلك..لكانت سعدت للغاية

------------------

عاليا حليم

معنديش خبر عن الموضوع..بس جاري الإستقصاء

-----------------

مريم

فعلا بنت بمليون راجل

سعدت بمرورك لأول مرة

تحياتي

عمرو فكرى said...

انا هاخد الصورة دى احطها عندى ف المدونة انا كمان


بالمناسبة الصورة دى متاخدة من وادى الريان فى الفيوم