Tuesday, May 15, 2007

حرقة دم

عمري ما اتحرق دمي زي امبارح....منى الشاذلي دي باينها منطهداني....كل ما اجي اقول انشاء الله هنقضي سهرة لطيفة مع اخبار مبهجة تطلع عليا باأخبار زي وش الي بالي بالكو....حاجة كده تغم النفس....امبارح نقلت خبر مش يوجع على قد ما يفقع....ينقط...يشل...يخلي الواحد عايز ينزل من بيتة يطلع على بيت اي مسؤول يدغدغة....الي شاف الحلقة...مش هيستفيد حاجة لإني هعيد نشر الخبر..أما الي ماشافش بقى فيستعد لحرقة الدم....وزير التربية والتعليم....اذل الله مقامة...حب يزور مدرسة فقنا....وطبعا احنا ناس محبة جدا للحكومة وللسلطة بكل ةممثليها....يعملوا ايه عشان يحسنوا استقبال الوزير....يرشوا المدرسة بالرمل...شوية...طيب يغسلوا الحيطان بالمية.....مش كفاية....يأجروا اصاري زرع عشان بسلامتة يشم اكسوجين نضيف....ايه الكلام التافة ده...برضة مش كفاية....العباقرة تفتق ذهنهم انهم يجيبوا أطفال من مدرسة ابتدائي ويوقفوهم على الرصيف تشريفة لسعادته عشان ينبسط.....أيوة بس الوزير مش رايح يزور مدرسة ابتدائي...مش مهم...هو يعني الوزير هيدق....نهايتة...راحوا خدوا العيال من المدرسة...ووقفوهم حوالي ساعة ونص في انتظار الوزير....لما بسلامتة يشرف.....طيب وبعدين....وقفوا العيال تشريفة...في درجة حرارة تتعدى 42 لكم ان تتخيلوا الحر الشنيع في قنا الساعة 9 الصبح...لأطقال من سن عشر سنين....إختصارا للوقت...الطفلة أميرة أصيبت بضربة شمس من جراء الوقفة في الشمس....ثم لقت نحبها بعدها بساعات في المستشفى العمومي......يا الله.....طفلة تروح مدرستها الصبح عشان تتعلم.....تقوم تلاقي نفسها جثة هامدة لأجل عيون الوزير....يا حرقة الدم.....الخبر في حد ذاتة حرقة دم....بس الحكومة تكتفي و تحترم نفسها و تعتذر....ابدا.....تحرق دمنا زيادة....البرنامج استضاف على الهاتف كلا من والد الطفلة و وكيل وزارة التربية والتعليم.....
وكيل الوزارة بقى يقول ايه.....الأول قال...ايه المبالغات دي...الوزير زيارته كانت كلها ساعتين...يبقى ايه الثلاث ساعات الي قلتي عليهم دول...وبعدين الساعة 9 الصبح كانت درجة الحرارة لحقت تبقى 42 ...شوفوا الفقع...وبعدين يقولها ايه...انا تابعت الحالة بتاعت البنت بنفسي....لقيت ان البنت كان عندها اصلا حرارة وبقالها اسبوعين واخدة اجازة من المدرسة ولسة راجعة يوم زيارة الوزير.......(بالذمة ده بني ادم) مش يتكسف على دمة بقة و يسكت لأ....يكمل السيناريو المعروف بتاع الحكومة....اكدب كدبة كبيرة ومحدش ممكن هيقدر يكدبك إحنا اصلا ما جبناش بنات من المدارس ولا حاجة وماكانش فيه تشريفة.ولا حاجة للوزير...لو كنا عايزين تشريفة كنا جبنا من مدرسة الثانوي الصنايع القريبة...بدل ما نجيب اطفال من على بعد كيلو....منى جالها حالة ازبهلال...و الى حد ما ظهر على وشها امارات عته من هول الي بتسمعة _ يعني حضرتك عايز تقول ان ماكانش فيه تشريفة ولا حاجة
البجح يقولها اطلاقا....كل ما في الأمر ان الأهالي جابوا شوية طبل وزمامير و رقصوا شوية ابتهاجا بزيارة الوزير
.....كنت حاسة ان منى نفسها تقلع الجزمة وتحدفها على المتصل....طيب...خدتوا جرعة استفزاز كافية...خدوا عندكو .... بعد ما منى غسلت الراجل وكيل الوزارة و نشرتة بالأدب....جابت بقى ابو البنت....تسألة على التفاصيل....قلت بس....هنشوف طرطشة دم بقى .....البنت دمها لسة ما بردش...واكيد ابوها محروق جدا....الراجل صوتة غلبان قوي..ومكسور....حسيت بغصة في حلقي من كتر الألم والحزن..... بعد ما تقبل التعازي...قالتلة ايه شعورك يا حج ناحية الي حصل....قالها...احنا ما بنلومش حد...ده قضاء الله وقدرة...وعمرها و مكتوبلها...ومحدش له ذنب.....الحمد لله.....كان هاين عليا اكسر التلفزيون.....يا سلام....قضاء الله وقدرة....لا حول ولا قوة إلا بالله...طبعا منى كمان اتحرق دمها لإنها كلفتت الراجل و في النهاية قالت...يظهر يا جماعة ان حسب رواية الوزارة...مفيش تشريفة ولا دياولة....كل ما في الأمر ان الناس في قنا بيحبوا الحكومة والمسؤولين جدا لدرجة ان هما بيخرجوا طواعية منغير ضعط او تنظيم عشان يستقبلوا اي مسؤول بالطبل والزمر....

13 comments:

البتاع said...

ياسكوت
انا فيه كلمة عمرى ماقلتها لانى مش بذيئة اللسان
بس الكلام اللى قلتيه ده
ملقوش غير تعليق واحد
........ أحيه عليكى يابلد بنت

ومش حكمل بقيت الجملة كل واحد يحط الام او الاب اللى عاوزهم للبلد :-)
مش عارفة اقولك ميرسى واللا الله يسامحك؟؟؟
بس انتى ذنبك ايه؟
انا لو كنت شوفتها كنت حعمل زيك واجى اصوت عالنت

شهيدة said...

والله معاك حق

هو موضوع يحرق الدم بصحيح

تعرفي انا مرت فترة كان عندي حالة تعلق شديد بأي خبر عن مصر
كنت بتابع تقريبا كل يوم القاهرة اليوم

وكنت بحب أشوف برنامج منى اللي بتقولي عليه

بس انتي عارفة بقى أخواتي وأهلي مش حيمشوا على رأيي عندنا أخبار لبنانية بما فيه الكفاية

المهم

طول ما الحكومة عندكم بالشكل ده
وطول ما الشعب عامل زي أبو الطفلة المسكينة دي فالحال حتفضل مكانك راوح

يللا أمركم على الله

بقول لكل مصري وعربي بالاجمال ساكت عن حقو

خليك كدة واتحمل الضرب على القفا

آسفة على التعبير
هههه

يللا هاكونا ماتاتا يا عزيزتي

سلام

سكوت هنصوت said...

والله عندك حق يا بتاع...بلد بنت ..( تيييييت) على طريقة التلفزيونات الحكومية...كل يوم نسمع اخبار مش بس تحرق الدم...لا تشل...الواحد حس انه عجز بدري...ومش عارف هو انهى احسن نبقى عايشين فزبالة و ما نعرفش ..ولا نبقى عايشين فزبالة ونعرف...ميرسي على الزيارة الجميلة..تحياتي..


شهيدة...اهلا بنسمة لبنان اللطيفة...جايز يا شهيدة انت وكل اللبنانيين واللبنانيات الي موجودين في الفضاء التدويني تقدروا تساعدونا في مصر من خلال نقل الصورة اللبنانية لأرض الواقع...من واقع رؤيتك ..ايه الي بيميز لبنان عشان تقدر تدعم حزب الله بالقوة دي...و ازاي قدر الشعب انة يوصل لقوة تخلية يهز الحكومة الحالية بالشكل ده.... انا سعيدة قوي بزيارتك..وثقي اننا متشوقين لأخباركم تضوقك لينا...مرحبابك وتحياتي

منورين المدونة يا بنات...

عبقرينو said...

السلام عليكم
والله كنت باسمع البرنامج ولما سمعت الخبر قولت دى بلد بنت....وحكومة بنت.......ووو(تيييييييت) على رأيك.....بس بجد أحنا وصلنا بقى للنهاية خلاص
حرام عليهم كده حرام
بس اللى مش عاجبنى أكتر إستسلام أبو البنت, كفاية طيبة بقى
سلام

Ahmed Elmasry said...

يا وزير منغير واو أهنا لازم نفضح الوزير أو الزير ده بجد و نعمل حملة بطلب أستقلتة عارف أنه هتفشل بس هيسمعو صوتنا و يفقعهم و يخوفهم

سكوت هنصوت said...

عبقرينو...والله الواحد مش عارف يشتم الناس دي يقولها ايه بس....فين الشتيمة الي تليق عليهم..اعتقد ان الإنسانية لسة ما وصلتش بالإنحطاط للحد الي ممكن تلاقي ككلام يعبر بيه عن الناس دي...مفيش غير كلمة حسبنا الله ونعم الوكيل...
______________________________
أحمد المصري

والله عندك حق...بس الي اختشوا ماتو...دول ناس (تييييييت) بعيد عنك معندهمش لا دم ولا خشا...هما دول لو بيتكسفوا ولا بيخافوا كان ده بقى حالنا...لو تفتكر كان مفيد فوزي زمان عامل حلقة مع تقريبا محافظ في برنامج حديث المدينة...عن طفل وقع في بلاعة مفتوحة فمات...فمفيد فوزي بيحاول يحرج المحافظ بطريقة كانت مستفزة قوي....الأخ المحافظ على منصبة بس...اتنرفز قوي...يقوم يقول ايه يا ترى؟؟؟ يقولة انت عايز كل ما عيل يقع فبلاعة الوزير يستقيل...!!!! بمنتهى التعجب كإن مفيد فوزي بيتكلم عن صرصار مش طفل...بالذمة دي ناس حد بتخاف...

a7lam 3adya said...

لا حول ولا قوة إلا بالله

يعنى مسئول الحكومة حاجة تحرق الدم بجد .. والاهالى سابوا اللى ايديهم وطلعوا يطبلوا للوزير على اساس ايه ؟؟؟ مهنيهم ومعلم عيالهم تعليم صح ؟؟؟ والا عشان الحكومة مرياحم ةلاقيين يتعالجوا وياكلوا ويشربوا ؟؟ يعنى هو الراجل ده بيستهبل الناس اللى بتسمعه والا بيستهبل على نفسه؟؟

والراجل الغلبان ابو البنت ... هقول ايه ؟؟ مكسور ومهزوم وقلبه واجعه بس كده بيضيع حق بنته

حسبى الله ونعم الوكيل فيكى يا حكومة
حسبى الله ونعم الوكيل

Iman said...

والله احنا عالم محتاجه ضرب الجزمه
لا بنرحم البنى ادميين الكبيره ولا حتى العيال الصغيره
ربنا يحرقهم وزير وزير
تحياتى ليكى يا مها وانتى وحشتينى جدا

حدوته مصرية said...

والله ما اعرف اقولك ايه هى حرقة دم فعلا و اصبتينى بالحزن بالخبر اللى قلتيه ده وانا بتابع منى لكن مشفتش الحلقة دى و اديكى عرفتيهالى

امتى الحق يرجع و نشوف فيهم اللى بيعملوه فينا بقى

mohamed sabry said...

في كلمه بتتقال في المواقف اللي زي دي
بس مش هينفع
حسبيييييييييييييييي الللللللللللللللله و نننننننننعم الوكيييييييييييل
و شكرا علي تعليقك عندي

سكوت هنصوت said...

إيمان..انتي كمان وحشتيني...ووحشاني مدونتك جدا...والله انتي عندك بس انا مش عارفة انهي جزمة دي الي هتكفي سبعين مليون مواطن..دي هتتقطع من كتر الضرب..عموما...ربنا يولعلهم بيوتهم بحريقة انشاء الله..

محمد ياسر...انا اسفة اني غميتك والله...معلش بقى ما كانتش احب ان اول زيارة ليك عندي تبقى وش كابة..بس هي ظروفك يا مان...بس هقولك بس البيت الي بيقول وكم فيك يا مصر من المضحكات ولكنة ضحك كالبكاء
نورت يا فندم


محمد صبري...والله الكلام الي يتقال كتير...بس للاسف اهالينا طالعونا متربيين...معلش...بكرة ربنا يكرمنا وننحرف ونقول كل الي احنا عايزينة...تحياتي و منور

7ntklm said...

احنا ما بنلومش حد...ده قضاء الله وقدرة...وعمرها و مكتوبلها...ومحدش له ذنب.....الحمد لله.....

----------------------------------
راى الحج عبارة عن اقوال تنبع من نبضات الخوف من المسئول والمسئولين

وليس انتنتقده . او تساله هو بيتكلم كدا ليــه والهدف من تنصيب تلك الاطفال فى الشمس لرفع معنويات سيادة الوزير ولا جاء التفكير فى رفع حرارة و احتقان تلك الاطفال ..........

كل هدف البرنامج اخراج سيادة الوزير بصورة الوزير بالفعل
ولسسسه

Anonymous said...

What a stuff of un-ambiguity anԁ pгeѕervеness
of precious еxpeгiencе соncerning unpredicted emotіonѕ.


mу sіtе haine dama online