Monday, May 21, 2007

غطيني وسوطي يا بهية

غطيني وصوتي يا بهية......قال اش عرفك انها كدبة قال من وسعها......الله يحرق هتلر على جوبلز الي بلونا بفلسفة عفنة قوامها كل ما تكدب اكتر كل ما الناس هتقول مش ممكن يكدب في حاجة كبيرة كدة فيصدقوا....اخر نكتة وصلت طازة بتقول ايه يا اخوانا.....اسمعوا....بس لو عندكو امراض مزمنة اتكلوا على الله واسمعوا شريط تامر الجديد...عشان انا مش عايزة البس ذنبكوا في رقبتي....الإخوة بقى الي لسة مرارتهم ما اتفقعتش...يسمعوا النكتة دي....اتحاد الصحفيين العرب....الي هو جهة مستقلة وغير تابعة للحكومات العربية اصلا...وتابع للنقابات الصحفية الي في دول العالم بأسرة...عمل استبيان كان المفروض انه يكون مهم عن حرية الصحافة والنشر في الدول العربية....خمنوا بقى مين يحصل على المركز الأول.....ههة....حد عندة فكرة.....مصر!!....ابدا....لبنان!! إطلاقا......المغرب!!! يا خوانا ركزوا ايه الدول القمعية دي...المركز الاول كان من نصيب.....ترترترترترترتررترترترترتر ( مزيكا تصويرية) ......السعودييييييييييييييييييييييييية ايه رايكوا....اكثر الدول حرية في الصحافة والنشر.....حسب التقرير الغير حكومي....طلعت السعودية.....السعودية الي معندهاش نقابة اصلا...لا للصحافيين ولا غيرهم على اعتبار ان كل بدعة ضلالة لإن الصحابة رضوان الله عليهم معملوش نقابة تناقش مشاكل .....و طبعا معندهمش صحافة...على اعتبار ان الشعر هو الحاجة الوحيدة الحلال وحتى مكروه....عشان الشعراء يتبعهم الغاووون....وكمان الإعلام ده بيدعوا للفسق....فمعندهمش كليات اعلام اصلا...تخيلوا بقى.....دولة بالشكل ده....طلعت اكثر الدول حرية في الصحافة والنشر......السعودية الي بتقطع الصفحات الي مش عاجباها في الجرايد الي جاية من برة....طلعت اول دولة في التقرير ممارسة للحريات....السعودية الي قبضت على معارض سعودي قال راية في مداخلة مع قناة الجزيرة على الهوا....تخيلوا...الراجل لسة بيتكلم على الهوا...قام اتقبض علية قبل المداخلة ما تخلص....السعودية الي لما مصر كسبتها في بطولة كأس العرب....قطعت صفحة الرياضة من كل الصحف المصرية الوافدة....السعودية البلد الوحيدة في العالم الي عندها كل وسائل المواصلات متاحة ومتوفرة و مع ذلك بتقرا جورنال الجمعة يوم الحد و كل الجرايد مترحلة يوم....تصوروا.....طيب اتفقعتوا كفاية....خدوا الثانية بقى....مين يا شطار يقولي الدولة الثانية طلعت مين.....موريتانيا....!!! ابدا..ليببيا مثلا!!! خالص....طيب السودان احتمال....إطلاقا...الدولة الثانية هي الدولة الشقيقة سورياااااااااااااااااااااااااااااااا......سوريا الي معندهاش ولا جريدة واحدة مستقلة او معارضة طلعت تاني دولة في الحريات......انا مش هكمل عشان حاسة ان المرارة اتفقعت والعصارة هتغرق الدنيا...

طيب اكيد في حد خلبوص عايز يسأل ابلة سكوت هنصوت .....هي مصر طلعت رقم كام...الحقيقة يا جماعة مصر شرفتنا جدا المرة دي....احنا بفضل الله طلعنا رقم 12.......اه مانا مقلتلكوش المراتب الأولى كلها استأثر بها الخليج.....اما الرقم 12 و13 فكان لمصر والمغرب....الي نشر التقرير ده يستاهل ايدة تتلف فشاش.....وحلال فيه الوأد....طبعا الدول الي معندهاش متنفس من الحرية...جاوبت على الإستبيان كلة بفلسفة كلة تمام يا ريس....اما الدول الي عندها هامش من الحرية المنتزعة زي مصر والمغرب...فنقاباتهم جاوبوا فعلا بصدق وشفافية...و بالتالي ...سردوا المشاكل الموجودة فعلا بدقة...وعشان كده طلعنا ال12 اما دول الخليج فيا طويل العمر كل شئ على ما يرام....والله يبارك في الأمير...تخيلوا المهزلة....انا بقى عايزة اسأل....طيب دول بهايم و مش فاهمين حاجة في عيشتهم و بياكلو من تحت رجليهم.....الصخص الي نشر التقرير ده للدرجة دي معندوش دم....ولا ايه اصلا أهمية نشر تقرير مضروب بالشكل ده....ليه ما ترفضش التقرير زي اي رسالة ماجستير او دكتوراة نتايجها متفبركة...كان ايه لزمة النشر.....اهو مجرد سلسلة من سلاسل التخلف....بس برضة عمار يا مصر....على الأقل طلعنا احسن من السعودية

14 comments:

صاحب البوابــة said...

أخي العزيز سعدت كثيراً بزيارة مدونتك

كما اود ان اشكرك على عرضك المساهمة معنا في حملة الافراج عن شيخ المجاهدين

وما نتمناه منك ونكون شاكرين لو صنعته

ان تضع صور الحملة عندك في السايد بار

وهناك عدة تصاميم اختر منها ما تشاءه

وجزاك الله خير الجزاء

تحياتي اخي

مصر هى أمى said...

ديه بقى مشكلة الشعب المصرى
انه مفهمش التقرير صج
التقرير ده كان بالمشقلب

يعنى رقم واحد هوا اكتر واحد معندوش حرية لا تقييد على النشر

افهموها بقى

تصدقى اول ما قريت الكلام ده قلت انتى بتهرجى
السعودية الاولى بامارة ايه وسوريا التانية
صح بامارة ما هيا حاكمت واحد من المعارضة بتهمة اضعاف الشعور القومى

اول مرة اسمع عن التهمة ديه

البتاع said...

سكوت انا حبتدى اتشائم منك

بجد يعنى
كل مرة خبر افقع من اللى قبله؟؟
ليه ياماما؟؟
طب انا ولية فى امتحانات واعصابى سايباها عند الميكانيكى بتتصلح
بايظة خلقة يعنى
.............
فيما يخص ذلك الاستبيان احب اوجه رسالة للسيد المسئول
مفادها
كحك بالاوى يعنى

وياستى يابخت من بات مضروب ولا باتش ضارب
:-)
يالا يااختى بخـــــــــــاطرهم

عبقرينو said...

السلام عليكم
سوطى...مش عارف أنطقها :)
ده حتى أسمك سكوت هنصوت مش هنسوت:)
ماعلينا ...لو عرف السبب بطل العجب..البنود التى تم إختيار تلك الدول عليها تختلف عن وجهة نظرك بتاتا
علشان كده مش تستغربى خالص
وكمان بأه أيه رأيك نبطل أخبار كئيبة ونفكر فى أيجابيات نتكلم فيها ...الأيام اللى جاية أيام حالكة السواد على مصر والعالم العربى وبالتالى كآبة فى كآبة يبقى نموت أحسن
بص حلوة آوى سوتى دى:)

سكوت هنصوت said...

صاحب البوابة...علم و سينفذ انشاء الله...اشكرك على المجهود والزيارة

_____

مصر هي امي

والله لو كنت شفت الورقة بتاعت الإستبيان كنت هتعيط...تخيل اسئلة زي...هل هناك قيود على حرية النشر...الإجابةلا ...هل هناك منع لإصدار الصحف..الإجابة لا...كلة كده يا معلم...بس على رايك...احنا الي مش عارفين نفهم....جتهم البلاوي ملو البلد..ميرسي على الزيارة يا ريس

بتاع....هو انتي الولية....شوفي يا ستي ولا ستك الا انا...اصل انا بعيد عنك وعن السمعين اعز النكد زي عنيا...اه من يومي وانا غاوي نكد...ادور علية بمنكاش....بس اوعدك لما ربنا يحقق الي فبالي وابو رجل مسلوخة يقطع تذكرة هو وعيلتة رايح بس جهنم اكسبريس...اوعدك هتيجي المدونة تلاقيني معلقة فانوس رمضان و بضرب بمب العيد...و مشغلة شريط عدوية الجبار بتاع حبة فوق حبة تحت....لكن حاليا...انا عاملة نفسي نايمة ...انا عاملة نفسي نايمة...شرفتيني يا قمر

عبقرينو...

لامؤاخذة يا فندم اصل السين جنب الصاد في الكيبورد...وبعيد عنك وعن السامعين...وعبقال الي فبالي المستخبيين..اختك صوابعها صوابع كفتة...فكل ما ضرب حرف...تلاقي اربعة اتضربوا معاه...عموما ده يا بيه مش تزوير ده ضعف في الإملا بس...و عالعموم...الغلطة في العنوان بس...اما باقي البوست اشاء الله سليم...وبعدين اصل السين والصاد قريبين من بعض قوي مش زي الزين والذال...ميرسي يا فندم عالزيارة...

.:.-=- ELGaZaLy-=-.:. said...

السلام عليكم ورحمة الله وبركاته


سعات بحز بالحزن من الحياة بس لما بشوف تصرفات البشر بتقهر

ومين قالك ان الاتحاد غير تابع كلة بالونجز يا ستى


والسعودية ارض الرسول ليها احترامها رغم الفكر السلفى بس

انا عمرى ما سمعت عن جرنان سعودى

معارض او غير معارض

يكونش علشان مجلة روتنا وهل يخفى الخبر؟؟


يا ستى اى استبيان مصرى او عربيى او قومى

او قوم نام حتى
متعتبريش بية

مالها التايمز؟؟

mohamed sabry said...

لا والمفروض تكملي احنا انضمينا لحقوق الانسااااااااااااااان انا كاتب عندي في المدونه مدي فرحتي بانضمامنا واحنا نستاهل يا جماعه ننضم المهلبيه مغرقه الدنيا ّّّّّّ!!!!!!!!!!!!!
سعيد بزياره مدونتك

حدوته مصرية said...

هى السعودية الاولى لانها لاتملك صحافة بقى اكيد

خلى مصر تتعلم بقى و يلغو الصحافة حتى يريحو


جميل انك حاطة دكتور احمد من المواقع المفضلة ده حتى حطاه الوحيد بس هو جميل جدا يعنى

تحياتى

Amr Ahmed said...

هههههههههههههههه

انتي فهمتي الخبر غلط

دي كدبة ابريل

بس كانو ماجلينها

تمويه يعني

Fantasia said...

you will get high blood pressure like that.. I know it is so disappointing. Those who say the truth always pay the price of their frankness. But they can't fool anybody with this imaginary list.

سكوت هنصوت said...

غزالي...شرفتني يا معلم..بس والله انا مش عارفة اذا كان التقرير حاطط في الإعتبار موضوع روتانا ولا لأ...مع ان السعودية مهدرة دم هالة سرحان..هم يضحك و هم يبكي...

محمد صبري...يا اخي امرك عجيب...اذا ما كانش مصر هتاخد كرسي في حقوق الإنسان...يبقى مين الي هياخد ... احمد ربنا ان السعودية هي كمان ما حصلتش على كرسي..والا كان زمانا كلنا في الربع الخالي...منور يا فندم

محمد ياسر

اصل احمد خالد توفيق ده..صديقي من ايام الطفولة...الحقيقة ان انا علاقتي بيه علاقة من طرف تالت..يعني هو بيالف قصص عن ناس..وانا بتفرج عليها غلاسة يعني...بس عندي قناعة اكيدة ان الراجل ده عبقري...و لسة نجمة هيلمع اكتر...شرفتني

عمرو احمد

عندك حق...انا برضة شكيت في كده...و جايز يكونوا كانوا ناويين يكحوا فاتلخبطوا و عطسوا اما طلعوا التقرير ده كده..منور يا عمرو..

سكوت هنصوت said...

Fantasy, i have no idea why you constantly choose to post in english, and also comment in english, you may be a bad Arabic typer like myself, but no matter in which language we are communicating through, its very pleasent to see you around in here. by the way i used to think of myself as a feminist but after reading your blog i realized that i 'm a total neutral...thanks for hanging around in here..keep it up girl

Fantasia said...

Sorry for writing in English, it is much faster and easier for me. I tend to be kinda practical with everything. That's maybe why my feminist attitude might have scared you. But believe me, when you think of it the way the world truely is, you'll find I'm an extreme.

ahmed said...

https://site7555280.fosite.ru