Thursday, May 10, 2007

tag

شهيدة اتحفتني بتاج ...استحملوني بقى....
أحب شخص لقلبك فى الدنيا؟
سؤال صعب جدا...بالتاكيد احب الناس ليا هما عيلتي....الأقرباء من الدرجة الأولى...لكن الإنسان الي فعلا اكتشفت انه احب
شخص ليا كان استاذي العزيز الله يرحمة...الي فضلة عليا غير عادي وادين له بكل خير يجيني في الدنيا دي بعد ربنا سبحانة وتعالى...اللهم ارحمة واغفر له يا غفور يا رحيم
إنسان مستعد تضحي بحياتك –ركز فى كلمة حياتك- عشانه؟
انا بطبعي جبانة قوي...وبخاف على نفسي جدا...لكن اظن ان اي انسان احبة بإخلاص هبقى مستعدة اني افدية بعمري...ايا ما كان بقى
ابويا.... اخويا....أختي....أمي...صديق....صديقة
مش هتفرق...ساعة الجد المسائل بتختلف...كمان الغضب لما بحس ان حد بحبة في ورطة بيخلي الواحد يعمل حاجات كتير ما يقدرهاش بعقلة

.انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
في ناس كتير بكرهها ....انا بكره اي حد عنده القدرة انه يعذب اخوه...على راي صلاح جاهين...ما اعجبش من الي يطيق بجسمة العذاب واعجب من الي بإيده يعذب اخوه....اما التقطيع والقتل ده...فأنا جبانة جدا...ومهما كرهت مش ممكن اقدر افكر واشوف حاجة زي كده..ولا حتى لفرخة مش بني ادم
ما هو:اسم أجمل كتاب كتبه بشر قرأته ومحتفظ به حتى الان؟
القراية عندي مراحل...يعني في الإبتدائي كان كل روايات رجل المستحيل و مازلت محتفظة بيها بس بطلت اقراها عشان الضغط بعيد عن السامعين, وفي إعدادي قريت كتاب اثر في حياتي جدا وقتها لنجيب الكيلاني مش فاكرة اسمة...كان عن قصة حياة طفل....اما في ثانوي فكانت رواية امام العرش لنجيب محفوظ...كنت بحبها جدا...واثرت في دماغي كتير....في الجامعة بقى فكان مجموعة الإخوات برونتي...بالأخص شارلوت وإميلي, اما حاليا فأجمل كتاب قريتة ولسة محتفظة بيه هو المعارضة في الإسلام لجابر قميحة...كتاب رائع انصح الكل بقراءتة

اسم كتاب-كتبه بشر برضة- انت متعلق بيه وبتقرأه كل فترة؟
قصة رائعة لجورج اورويل اسمها المزرعة...عن حيوانات عايشين في مزرعة اكتشفوا ان هما مصدر رزق صاحب المزرعة فقرروا ان هما يتمردوا علية و ياخدوا منه الحكم...القصة هزلية بتناقش بعمق وبساطة شديدة الفكر الإشتراكي...كتاب رائع اقراة كل ما الاقي نفسي زهقانة ونفسي اضحك

اهم جهاز منزلى انت متعلق بيه او بتستخدمه كتير؟

التلفزيون والكمبيوتر


شىء تحس بالراحة النفسية عندما تنظر اليه؟
البحر
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
جامعة القاهرة حيث قضيت اجمل سني عمري..في صحبة استاذي ومعلمي ومرشدي رحمة الله

مكان تحس بالراحة عندما تدخله؟

اي جامع بالأخص المسجد النبوي والمسجد الحرام
أجمل مدينة زرتها في مصر؟؟
الإسكندرية
أجمل مكان طبيعي رأيته داخل مصر---> لبنان؟
طابا
شخصية كارتونية بتحبها؟
بجز بني
نوع هاتفك المحمول؟
نوكيا
سرعة بروسيسور جهازك؟

حمارين وكارتة

حجم ذاكرة –هارد- جهازك؟
1 جيجا

المساحة التى تشغلها المواد الاسلامية على جهازك؟

أقل من واحد في المية

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

طيب هخليها لنفسي
أهم هدف في حياتك حاليا؟
أهم هدف ان ميعديش عليا يوم منغير ما احس اني عملت فيه حاجة مفيدة


مواصفات فتاة –أو فتى للبنات- الأحلام بالنسبة لك؟
ممممم.....انا زي اي بنت (مع الإعتذار للإغنيه) عايزة عريس تفصيل....يكون كامل من مجاميعة...يعني لو بل جتس يبقى كويس ماكانش...فممكن براد بت....ايه برضة محجوز....يادي النيلة....خلاص..بقى اي كلب والسلام...المهم يكون دمة خفيف...عندة منطق في كلامة....فيه اساس ديني نحتكم ليه ساعة الخلاف....واخر حاجة بقى اكون بحبة جدا...
صف ما يأتى:شعورك لما بتسمع كلمة مصر---> لبنان؟
ممممم....مصر...بحس اني عاملة زي السمك النيلي الي رموة البحر....لو طلع عالشط هيموت..ولو كمل في البحر هستسمم...او برضة يموت..مصر بالنسبة لي بقت بحر..لا قادرة اسبها ولا اكرهها...مع اني زعلانة منها و عليها قوي...بقيت حاسة اني اتلعنت بحبها...كات أما لبنان...فنسمة صيف رطبة في جو جاف وحر...اقبل ثراك يا لبنان ان انجبت لنا نصر الله...لا وشوف الجمال كمان نانسي عجرم...طب بالذمة مش هي دي الجنة...لبنان بحس انها حته مارونجلاسية...اترمت في صحرا مليانة ضباع وتعابين....
شعورك لما بتسمع كلام عن اليهود؟

بشعر برغبة شديدة في اني املك موهبة بارعة في القر والحسد يمكن يحوق فيهم
ما شعورك لما بتشوف ظابط شرطة؟

لما بشوف ظابط شرطة ببقى نفسي اخدة فعالم موازي يبص فيها على نفسة هو وزمايلة من فوق ويشوف قد ايه هما اغبياء...كمان بحلم اني اعمل اختبار ذكاء لكل رجال الشرطة ونشوف هيجييبوا سكور كام...

لون البطانية اللى بتتغطى بيها فى الشتاء؟
سؤال عبيط قوي , تفرق ايه
لون الجورب المفضل؟
بيج

احساسك اذا داست قدمك فى الطريق على مخلفات اخراج حيوان- *** ولا مؤاخذة-
بفتكر المنتصر بالله في مسرحية شارع محمد علي....خلاص بقى تلاجة غسالة هي هتحمض
ما شعورك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

لا شئ...هو حر...لكن بفكر اني مش ممكن احب واحد زية

احساس يراودك فى اشارة مرور مغلقة بسبب مسئول كبير؟
الحقد والكراهية الشديدة للدنيا بحالها...
التاج ده همررة للتالي اسماءهم...

4 comments:

شهيدة said...

اولا شكرا على اجابتك السريعة على التاج

اجاباتك جميلة جدا
وصادقة وحلوة

وشكرا ليكي على كلامك عن لبنان :)

صدقيني أهل لبنان بيحبوكم كمان كلهم

تحياتي ليكي دايما

ويارب نبقى على تواصل

Amr Ahmed said...

ايه التاج الصعب ده

ده اللي عامله متوصي بيه اوي

بس نفسي اعرف ايه علاقة البطانية بتاعت الشتاء باي حاجة

حلوة اجاباتك

عبقرينو said...

السلام عليكم
أولا شكرا على التاج...سعيد جدا بوفائك لأستاذك الراحل, لسه فى ناس عندها وفاء...رحمه الله رحمةواسعة
صعبة قوى مواصفات فتى أحلامك ..بقى بالذمة فى حد فى وسط هذه الهموم هيبقى دمه خفيف...تصدقى آه ممكن.... كل يوم يحقن نفسه بشويه ميه لغاية لما يخف من الدنيا خالص:) وبرده مش هتلاقيه علشان هيكون مات من الخفة..ههههههه
حلوة إجابتك...أصل لسه دايقها أمبارح
تحياتى

Anonymous said...

Thank you for sharing youг thoughts. I
truly apprecіate your еffoгts and I wіll be waiting for your nеxt post thank уou once again.


my websіte; www.abiaba.com