Sunday, September 2, 2007

محاكمة البرنس كلاكيت ثامن مرة

النهاردة كانت محاكمة البرنس إسلام نبيه
الي عايز يعرف التفاصيل الي فيها بهاريز...يتفضل عندنا في أبناء مصر
و هيلاقي ان شاء الله المفيد
أنا بصراحة ماليش مزاج اتكلم في تفاصيل كتيرة...
لكن عايزة احكي فقط انطباع تاني جالي النهاردة
الجلسة المرة دي كانت اهدى من كل مرة
على غير ما كنت اتوقع
كنت منتظرة اني اشوف الأمن أشد ضراوة
والمدونين اكثر حماسة
لكن حالة من الخمول كانت سائدة في المكان كله بدون سبب وجيه
الباشا جه حوالي الساعة 11:45 دقيقة
والقاضي دخل بعده مباشرة
زي ماقلت البهاريز في أبناء مصر
لكن بعيدا بقى عن تعاطفي الشديد مع عماد الكبير
بحكم كونة بني ادم انتهكت انسانيته
وبعيدا عن نفوري الشديد من الطبقية الشديدة الي اتكلم بيها انور عبد الله
رئيس هيئة الدفاع عن إسلاك نبيه
والي فضل يردد لفظة كهربائي, خريج دبلوم الصنايع اكتر من عشر مرات
زي ما يكون بيذل الراجل
مع ان المحكمة منتدباه كخبير
لكن كان فيه قدر من الوجاهة في كلامة
قدر من الوجاهة ضميري لا يسمح بإغفالة
فعلا لا يوجد عقل او منطق يقيم اي وزن لخبير يقيم الصوت
فقط بالأذن!!!!!
حقيقي كلام منطقي
لكن الغير منطقي
ان في العصر الي قدرنا نطلع فيه للمريخ
و بنفكر نفجر القمر عشان عامل مشاكل
لسة معندناش اجهزة في مصر تقدر تقيم الأصوات بشكل تقني
ده ايه الخيبة دي
طب لو ما عندناش
ما نبعت نشتري
هي كرامة البني ادمين دي شوية
ما نبعت الشريط برة مصر يتحكم
و نشوف
ولا كمان امريكا معندهاش اجهزة
بلاها امريكة
يعني هي مفيش دولة في العالم عندها جهاز واحد يقدر يحدد ان كانت ذبذبات الصوت دي
هي نفسها ذبذات صوت إسلاك نبيه
بالرغم من وجود بصمة صوت لكل بني ادم لا تتكرر
!!!!!!
حاسة بحالة من الشفقة الشديدة على القاضي
و متخيلة الموقف الصعب الي هو فيه
كلنا عارفين بنسبة 99% ان الي حصل ده حصل فعلا
وبإيد الكلب اسلاك نبيه فعلا
لكن للأسف...الدليل القوي الحقيقي ضدة
هو دليل ضعيف
ما يقفش بقوة امام المنطق
للأسف من السهل جدا ضحدة
ومش هلوم على القاضي قوي لو اعطي إسلام براءة
لإنه فعلا مفيش دليل قطعي
على الاقل من وجهة نظري
لو احنا في بلد تانية
بتحترم المواطن
و حاسة ان العصاية الي انتهك بيها عرض هذا المواطن
انتهكت عرض مصر كلها
كنا عملنا المستحيل
عشان نجيب لعماد حقة
كنا بدل ما نطلع قمر صناعي يعرض راقصات مصر
كنا بعتنا جبنا اجهزة ولا حتى بعتنا الإسطوانة للتحليل بالخارج
لكن احنا في بلد
المواطن فيها رخيص
ومالوش سعر
الحضور من المدونين كان الى حد ما كبير
روضة عن إخوان اونلاين
دول الي انا اعرفهم
بعد الجلسة, قابلت عماد الكبير
وسألتة انت عايز ايه دلوقتي
قالي انا عايز اخلص
انا زهقت بقى
عايزين كل واحد يشوف مصالحة ويشوف وراه ايه
كده ما ينفعش
سألته عن أخوه الي أخذ في الرجلين
وكان بالمناسبة حاضر معاه الجلسة
قالي لا...عبدة مالوش دعوة
عبدة ما بيتصورش...سيبوا عبدة في حالة
صعب عليا عماد قوي...يااااااااااه
قد كده بلدنا ما بترحمش
الفيديو الي مع عماد اهة..
الي فيه بيعلن زهقة
اخوه رفض يسجل...وعماد زهق من الكلام
و بصراحة وانا كمان
الجلسة اتأجلت ليوم 5 سبتمبر
يا رب اظهر الحق بحقك يا رب العالمين.
ده الفيديو بتاع عماد

25 comments:

Monzer said...

حق الراجل ده لازم ييجى
بدل مايتعمل تنظيم
يقتل فى ظباط الشرطة وعناصر الشركة

لو عاوزين يجبي ويعرفوا الحقيقة هايجحيبوها
يستخدموا نفس أساليب التحقيق الى استخدموها مع أي حد تانى يا مها
طالما العملية ظلم بظلم

الى انا متاكد منه ان عماد الكبير انتهك عرضه واتعذب بايد فرد امن

زي ما عملوا التوربينى وعملوا قاتل بنى مزار الغلبان وز ما عملوا هطل الفتن الطائفية يقدروا يعرفوا الحق والحقيقة

اةنا كنت عمالبسل الجيزاوى عن عماد الكبير، وأقوله غلبان وطيب، ولا سواق ميكروباص بطلجى كده ، قالى ده كان واقف مرعوب وخايف جنب الحمام وقلقان جدا
حسبى الله ونعم الوكيل فيهم

مش عارف عمالين نتحسبن عليهم ونلعنهم، كانهم يهود
سبحان الله

الكنبة الحمرا said...

قولى معايا
مصر هتفضل غليا عليا
مصر هتفضل غليا عليا
مصر هتفضل غليا عليا
مصر هتفضل غليا عليا
مصر هتفضل غليا عليا

انتى لازم تكونى وصلتى لمعرفه ان مصر
منورة اسلاك كهربائيه

kol-eldonia said...

hi maha awlan shokran la2nek khlateny aroh youm el sabt badl el had bas tab3an ana roht youm el had we we2ft ma3aky sa3et lama konty betklmy akho 3emad bas tab3an enty mesh 3arfany wla ana kont 3arfek , el fkra kolha enk enty oltely en el gelsa el sebt 2-9 we tab3an el sabt da wahed fa tab3en mal2tesh hal gher eny aroh youm el sabt we el had we 3amtan 3emad isa haykhod ha2o la2n rabna 3omro maybyedy3 ha2 ensan ya maha we bgd rabna esmo el 3adl we howa fe3lan el 3adl we ely 3agbny bsraha howa kalam wekel el neyaba

kol-eldonia said...

احسن حاجة نفعتنى فى دخول الجلسن اني محامى
و اكتر حاجة ضايثتنى انى مخادتش الكاميرا

عازف الناى said...

تحليل الصوت
وفى بلاد بره
وعلشان مواطن عادى
مها
انتى سخنه ولا ايه
اختى العزيزه مها
انتى فاكره موضوع الطياره المصريه اللى انضربت فى الجو وانفجرت
فضلوا يحللوا فى محتويات الصندوق الاسود اكثر من سنه
وفى الاخر مفهمناش حاجه
يبقى عماد المواطن العادى اللى مثلى انا ومثل حضرتك
يرسلوا الشريط الخاص بقضيته الممنوعه من الصرف للتحليل بره مصر
علينا وعليكى بخير
لما الامريكان يطلعوا من العراق

inksarat said...

على فكرة .لو اتفرجتى على حلقة العاشرة مساء 3/9 كنتى اكيد هتعرفى ان الشرطة مظلومة ومش بيعزبو حد ده مجرد حسم مش اهانة ..ايون حسم عادى يعنى

وبعدين لازم نحافظ على سمعة رجل الامن ..ايون علشان يعرف يحافظ على الامن

وكمان اللى بيعمل الزوبعة دى هو التأجيج الاعلامى ..انا اول ما سمعت كده كنت عايز ابلغ عنك

..........
باختصار طلع ان الشعب المفروض يكون فى خدمة الشرطة عشان الشرطة تعرف تقوم بشغلها

والصبر منت عندك يا رب

سكوت هنصوت said...

منذر

والله ما عارفة اقولك ايه...حق عماد اكيد هيجي ان شاء الله..ان ما كانش في الدنيا ففي الأخرة!!

لكن مش اكيد انه هيجي بإيد القضاء المصري...الحقيقة ان المشكلة فعلا ان مفيش دليل...

اه هو اعتدي عليه..لكن مفيش دليل مادي حقيقي...يثبت ان الي عمل ده هو اسلاك!!!
والله انا بفكر اقول للمحامي اننا نلم فلوس و نبعت الفيديو يتحكم برة مصر...عشان نثبت حكاية بصمة الصوت دي بجهاز لا يقبل الشك..

الحاجة الثانية بقى...حتى لو عماد بلطجي...فالشرطة مش دورها انها تغتصب البلطجية..ايا ما كانت فعلتهم..

والله ما عارفة اقولك ايه....انا حقيقي حاسة بالقهر

سكوت هنصوت said...

بلال ( الكنبة الحمرا)

ماهي المصيبة انها غالية عليا..

اه والله غاليا عليا...عاليا قوي..مع انها ... اقول ايه بس...الله يسامحك يا مصر....الله يسامحك...ويسامح ولادك...الي بيعملوا في بعض كده...يا رجع قلبي منك يا مصر....و يا تعب قلبي وانا بعيد عنك يا مصر...يا رب سوي الحب بيني و بينها يكون كفافا ...لا علي ولا ليا..

سكوت هنصوت said...

مصطفى (كل الدنيا)

أنا اسفة على اللخبطة الي حصلت بس والله ما كان قصدي...عموما انا شفتك..وخدت بالي انك محامي...لإنك كنت بتنصت قوي من كلامي مع اخو عماد....لكن بصراحة ما خطرش في بالي انك ممكن تكون مدون...او حتى مصطفى كل الدنيا...صورتك على المدونة مختلفة

أكيد ربنا ما بيضيعش حق حد يا مصطفى..بس مين قال انه هياخدة في الدنيا...لو كان كده..ما كانش حد اعدم ظلم..ولا اتسجن ظلم...ولا مات من القهر...ربنا ببس يهون علينا و عليه هم الدنيا..ويخرجنا منها على خير..

سكوت هنصوت said...

عازف الناي

ههههه....والله انا بضحك من غلبي

طيب امال ايه الي معقول...الي معقول ان واحد ينتهك عرضة..ويغتصب و تنزل صورة موقف الميكروباص و يتجرس في حتتة و وسط ناسة....و ما نعرفش نجيب حقة..!!!

يعني هي المخابرات معندهاش حتت جهاز يقيم الأصوات...يقول ده صوته ولا
لأ

بقى معقول في عص الإتصالات ...والعيال الصغيرة بتعمل البدع...بالأجهزة والسوفت وير..لسة مش عارفين نعمل شغلانة هبلة زي دي...ده ايه الخيبة التقيلة دي...وايه النيابة الخايبة دي...,ايه القاضي الساذج ده...فيه حاجة غلط..بس مش عارفة ازاي مش شايفين كده

سكوت هنصوت said...

إنكسارات

انا بطلت اشوف العاشرة مساءا عشان فقع المرارة..

قال التأجيج الإعلامي قال...يعني المفروض لما نشوف واحد محطوطلة عصاية في دبرة..نقول يا جماعة عادي سيبوا العدالة تاخد مجراها...

حسبنا الله و نعم الوكيل

انتصار عبد المنعم said...

جرحتني وآلمتني كلمة عماد
أنا زهقت
أنا عايز أخلص

العدل البطيء ظلم
هذا لو كان في عدل أصلا
انتظار المجهول هو عذاب

عبقرينو said...

قولى معايا برده
أصحى يامصر أصحى يامصر
أصحى يامصر
فوق ياشعب مصر يامنكوب ومسروق وغرقان ومحروق
ياجماعة الحل زى ما قولتلكم زمااااااااااااااااان التغيييييييييييييير يبدأ من الداخل أتغيروا وغيروا
يعنى مثلا قوم او قومى غيرى هدومك وغيرى أفكارك وغيرى كل حاجة حواليكى للأحسن أبذلى كل مجهود للتغييييير
مصر هتفضل غاليا عليا فعلا هيا غاليه عليا

مـحـمـد مـفـيـد said...

اختي العزيزه
كم من مواطن في تلك البلد ينتهك وحقه
الخق لازم هيرجع بس امتي مش هنتكلم عن الاخره
ولكن لابد من ولو علي الاقل ان يستطيع رفع رأسه عاليا امام الجميع
عماد ليس الضحيه ولكن كلنا ضحايا الفساد والاستبداد واللا نظام الحاكم في مصر
ولو أرادوا الحق فهو واضح

تحياتي لقلمك الجرئ
ولشخصك المحترم جدا جدا
وسعدت جدا باللقاء

مـحـمـد مـفـيـد said...

وبعدين
كده مش هينفع
انتي هتخلي عبد الله يعمل مظاهره والا ايه
وبعدين ابيض ايه ووجع دماغ ايه
مفيش غير الاهلي وبس
وبعدين متفقين ان عبد الله هواللي هيختار كل حاجه
وهو بيموت في ابو تريكه
يبقي الموضوع انتهي
بلاش تقوي الواد عليا
بس سيبك انتي التوقيع اللي عند عبد الله
موتني من الضحك
ربنا يجازيه اللي كان السبب

شهيدة said...

ازيك يا سكوت (ولا نقول مهى أحسن)

شوفي انا بجد بتمنى من كل قلبي ان الراجل اسلاك ده يتعذب عذاب ما بعدو عذاب عشان اللي عملو في الراجل ده شيء غير انساني بالمرة ولا يحتمله اي عاقل أي ممتلك لأدنى درجات الاحساس

"شفتي الفصاحة" هههه

بس بجد أتمنى انو يتعاقب عقاب شديد وما يتسابش بعد مدة قصيرة من الحكم
بالرغم من ان اللي سلبو المجرم ده من عماد أكبر من أي شيء تاني وكل عقوبات الدنيا مش حترجع عماد زي ما كان ولا حترجعلو مشاعرو الانسانية زي ما كانت في الاول

تحياتي ليكي يا ستي
وموفقة ان شاء الله

inksarat said...

انا لازم اعزم بنفسى؟ ..عموما
انا فى انتظار زيارتك

سكوت هنصوت said...

إنتصار عبد المنعم

عماد زهق و تعب...ولو عليه...كان دارى نفسة جنب الحيط و قعد في حالة...جايز كان اتعقد. و اكيد كان هيتحول لمفتري ...مالي حصلة مش شوية و يعقد فرويد نفسة...

لكن عماد شايف ناس عمالة تزقة..وتقولة...تعالى يا عماد

لازم نجيب حقك من الكلب ده...لقى نفسة
ضيف في موبايلات و كاميرات ناس ما يعرفهاش

لقى نفسة داخل في عالم لا هو فاهمة..ولا عارف طلعلة منين

عماد محتاج اعادة تأهيل...اظن انه عايز يرجع للمعطيات الي هو يفهمها

عايز يرجع موقفة تاني...يسوق عربيتة..منغير وجع دماغ

كان الله في عون عماد...وربنا يستر عليه

سكوت هنصوت said...

عبقرينو

ههييييييييييييييه دنيا


انا برضة هفضل انادي مصر

يمكن تسمع

سكوت هنصوت said...

محمد مفيد

أظن ان الإيمان هو الحل الوحيد للمصريين

ان نؤمن انه حتى ان ظلمنا..فإن الله سيأخذ لنا بحقنا في الأخرة...فنموت مستريحيين...
لولا الإيمان لإنتحر الشعب...

أما عن قولك إن ارادوا الحق فهو واضح

فعمن تحكي يا صديقي؟؟؟

عن القضاة, ام الداخلية ام عنا نحن

ان اردت الحق..فلن الوم القاضي كثيرا ان حكم ببراءة اسلاك...لكن سألوم المنظومة..وسألوم الرئيس والدولة...و سأقنط عليهم....و أحاربهم حتى يقضي الله امرا كان مفعولا

انا ايضا استمتعت جدا بحضورك يوم اللقاء...و اعترف انك مختلف عن تصوري عن السلفيين بالعموم...
أجد مكانة خاصة في نفسي لكل من يختلف معي و يظل يحترمني...لذا يشرفني معرفتك

و يسعدني دوام التواصل

سكوت هنصوت said...

محمد مفيد (مرة اخرة)

إبنك بيحب ابو تريكة عشان غسيل المخ الي انت عملهولة

سيب عبد الله يختار بنفسة قناعاتة يا محمد

ولا هو انت هتعمل زي الحكومة..ديموقراطية القمع

للشعب ان يقول ما يشاء وللحكومة ان تفعل ما تريد..

وان شاء الله على ما عبد الله يكبر و يحضر ماتشات...هيكون ابو تريكة اعتزل و مش بعيد الزمالك يكون كسب ساعتها امبى

اما عن الإمضاء...

فكشفت راسي و دعيت على الي كان السبب

سكوت هنصوت said...

شهيدة

والله يا زينب الواحد بيفرح لما يحس ان فيه ناس تانية بتشاركة فرحة والمة

بفرح بيكي وانت شايلة همومنا على كتفك

زعلانة على عماد...ومتابعة قضية اسلاك

وكإن الهم ناقصك...ولا الحزن مفارقك

دعواتك يا زينب على الي كان السبب...في الي حصل لعماد...ويا رب نشوف جزاءة في الدنيا قبل الأخرة عشان ربنا يبرد قلبنا على عماد

و تسلمي على الزيارة الغالية يا غالية

سكوت هنصوت said...

إنكسارات

انا دايما عندك

لإني حقيقي من اشد المعجبين بكتاباتك على العموم

و كمان بتعجبني قوي الصورة الي انت حاططها
للمهرج الحزين...اصلي طول عمري ما بحبش المهرجين...وبشوفهم مرعبين جداااا

لما بيضحكواكنت بعيط...واقول ده اكيد حد مجنون

لكن صورتك دي...حقيقي جميلة....محسساني فعلا...بالإنكسارات

تحياتي لقلمك المبدع....وربنا ما يقطعلك زيارة

مواطن زهقان said...

بجدد قلم جرىء لازم نلتفت ليه
بوست هايل
لايخشى الحق لومة لائم

Anonymous said...

That iѕ reаlly fascinаting, Үou are an excesѕively
prоfessional blogger. Ӏ have jοinеd уouг feed and sit up
for іn quest of moгe of yοur great post.
Additionally, I've shared your website in my social networks

Take a look at my web blog - http://Lottoaudit.Blogspot.com/
Also see my webpage > blogtext.org