Sunday, November 18, 2007

دعوة للدعم






دعوة لمساعدة اللاجئين المصريين في كفر العلو

اه...اهالي كفر العلو اصبحوا زي اللاجئين السودانيين بالظبط


يعيشون تقريبا في نفس الظروف الغير ادمية


الا ان السودانيين كانوا يستوطنون احد الميادين الراقية بالقاهرة


والعالم كله شايفهم...و المفوضية الخاصة باللاجئين تحميهم و تدعمهم


لكن اللاجئين المصريين في حلوان...يا عيني حالهم زي حال كل المصريين


لا ليهم ضهر يحميهم...ولا دولة اجنبية تسهر عليهم


والإسم عايشين في بلدهم


سكان كفر العلو عشان الي مش عارف...للأسف الشديد

الحكومة خدت اراضيهم و هدت عليهم بيوتهم و تركتهم في العراء

وعدتهم بتعويضات ما شافوش منها حاجة


الناس دي في الشارع من رمضان الماضي

ابناء مصر صورت هناك و عملت فيديو سمته في العراء فيه شرح لحالتهم


الي عايز يعرف تفاصيل الموضوع التفاصيل هنا

دلوقتي يا شباب مصر....احنا مالناش الا بعض

لا الحكومة هتشفع ولا هتنفع

وكلنا معرضين في اي لحظة ان بيوتنا تتهد على نافوخنا


ولا حد هيحوش عنا ولا حد هينصفنا


مش هينصفنا غير وقفتنا جنب بعض....نقف بجد بدعم حقيقي




مش بوقفات احتجاجية لا هتودي ولا هتجيب


الناس الي في حلوان الي هما اهالينا و ناسنا

قعدين في الشارع في عز البرد محتاجين بطاطين تحميهم و عيالهم من البرد


محتاجين لبس شتوي بدل الهدوم الي اتبهدلت تحت الأنقاض


محتاجين اكل لإنهم بياكلو الكفاف



محتاجين رعاية طبية خاصة للأطفال...


محتاجين ادوية و علاج...محتاجين ما يحتاجة اي لاجئ من اللاجئين في اي مكان


كمان محتاجين خيم لإنهم قاعدين في مكان على مجرى سيل


بيخرج عليهم افاعي وتعابين و حشرات و ذئاب


و حياتهم و حياة عيالهم طول الوقت مهددة بالموت


ما يقتل كمدا و غيظا...اننا بنشحت على ناس المفروض انهم مليونيرات


يعني الناس دي..ارضهم تسوى ملايين...الحكومة خدتها منهم بألفين و خمسمية جنيه

و بعدين اكتشفت انهم بنيين بيوتهم على الأرض الزراعية


فطلعت عليهم احكام و غرامات بعشرة الاف جنية و كام سنة سجن

فالناس في يوم وليلة بقى عندهم موت وخراب ديار


مع ان الحكومة بجلالة قدرها هتاخد الأرض و تبني عليها محطة مية


و كمان وراء مصنع اسمنت....


احنا محتاجين دعم كامل للناس دي


عشان ما تبقاش قلعة الكبش الجديدة


الناس دي محدش سائل فيهم




مالهومش غيرنا...و لو اديناهم ضهرنا دلوقتي



بكرة هيجي علينا الدور...., يكتشفوا ان بيوتنا تحتها مقبرة فرعونية




ولا صندوق الزبالة الي قدام العمارة بيطلع صراصير فهنهد العمارة


ولا اي حاجة..., نبقى شعب كله من اللاجئين




و الي يحب يجي يشوف بنفسة المأساة...


ويتصل بيا برضة وهنخليه يتفرج بي و على رأي نتانا سينما
مش هيقدر يغمض عينيه


الي بقى يقدر يوصل المشكلة لأي محامي يتولاها

فعندنا صور من كل الأوراق الخاصة بالمشكلة


من عقود مية لنور لعقود صورية ببيع و تنازل

والي يقدر يجيب دعم مادي من جمعيات خيرية...يا ريت



احنا محتاجين كل الدعم واي دعم

17 comments:

Monzer said...

معاكى طبعا

أساسى أساسى أساسى وان شاء الله هانجد صدى كبيييييييييير

وأرجوا من الجيمع أن يعتبر نفسه فرد من أفراد كفر العلو، حينها يستحرك أكيد

تحياتى للجميع ان شاء الله

Bella said...

للاسف الشديد الحكومة لم تعد تقوم بدور تجاه اي مواطن اللهم الا اختيار مسؤولين يساهمون في التخلص من اكبر عدد ممكن من السكان.

هؤلاء المنكوبين يحتاجون لحملة فعلية لتقديم يد العون لهم.

وشكرا على تعريفنا بهذه النكبة ولو ان اغلب احياء مصر الشعبية بها من هؤلاء المنكوبين الكثير

لا حول ولا قوة الا بالله

شهيدة said...

سلام يا مها

بالفعل مأساة كبيرة

ان يتهجر الانسان داخل وطنه

ربنا يكون في عونهم

وان شاء الله بالتكاتف والدعم سيقدرون على التحمل والصبر حتى نيل حقوقهم

ربنا يقويكم كلكم

تحياتي

Unknown said...

ازيك يا مها؟
حكاية غريبة !
اول مرة اسمع بانه في لاجئين مصريين.
بقى مصر العظيمة ضاقت على دول الغلابة وما فيش مكان يأويهم
انا بسمع بازمة السكن والناس بتنام في السطوح او بيوت طين او الترب بس ماكنتش اعرف ان الوضع ممكن يوصل للدرجة دي ينامو في العراء من غير متطلبات الحياة الاساسية
الله يكون في عونهم

Dr. Eyad Harfoush said...

Dear Maha,
Please email me on eharfoush@gmail.com , as I do not have your mail. Thanks

Unknown said...

بارك الله فى كل من شارك فى فضح هذه الصورة
وبارك الله فى كل من دعا الى المساعدة

وبارك الله فى كل من مد يد المساعدة

اللهم تقبل من الجميع

ibn nasser - ابن ناصر said...

هنعمل اللي نقدر عليه ان شاء الله
وكتابة رائعه وساخنة يا سكوت
تحياتي

kol-eldonia said...

ربنا يسهل و هاحول اوصل الصورة دى لناس كتير لان لازم كلنا نفوق قبل فوات الاوان

dr.Roufy said...

بلدنا دي ام الكوارث

لأن البني آدم هو أرخص حاجة فيها
شئ مؤلم زي اشياء كتير حوالينا
وان شاء الله احاول..اوعي اكبر عدد من الى حواليا..ياريت اقدر اعمل حاجة

تحياتي

نقطة مية said...

السلام عليكم...مش قادرة اقولك قد ايه وحشتيني...بتابعكم يا ابناء مصر و حزينة ان الظروف بعدتني و عزلتني عنكم..فرحانة بناشطكم و كان نفسي اكون بينكم...بجد وحشتيني يا مها...ربنا يكرمك...

Unknown said...

بجد انا اتصدمت لما شمس قالي و استغربت و حزنت و حاجات كتير كده
ربنا معاهم و الكل لازم يتحرك
تحياتي ليكي

kol-eldonia said...

مها بجد فعلا الناس دى دلوقتى بتمر بمرحلة اخطر من الجلوس فى العراء المرحلة دى و هى تحول معظمهم الى طريق اخر و هو طريق الاجرام و انا عرضت الموضوع ده عندى و مستنى رائيك

http://kol-eldonia.blogspot.com/2007/11/blog-post_12.html

نداء said...

دعوة للدعم
ومن الواجب ان نساعد هؤلاء
ولكن اين دور الحكومة!!!! ولكن هيهات
هناك اعمال اخري تقوم بها الحكومة مثل التفكير في انشاء عاصمة جديدة لمصر
والجرايد معندهش موضوع غير موضوع استقالة شهيناز النجار
ربنا معانا

ابن رشد said...

في استفسار في اخر بوست عندي ياريت الاقي رد علية
عن مدونة حضرتك مشتركة بها

Anonymous said...

الى من نشتكى وانت المولى الناصر
ام الى من نستجير وانتالمعين القادر
لا اله الا الله
حزيــــــــــــــن

سكوت هنصوت said...

منذر

ربنا يكرمك..و يبارك فيك..و يجعل عملك الصالح في ميزان حسناتك يا رب

بيلا

هؤلاء المنكوبين بالفعل يحتاجون لإعانة عاجلة فإن كانوا لا يساووا قلامة ظفر عند الحكومة..فهم عندنا يسوون الدنيا و ما فيها..و من هنا جاءت الدعوة

سكوت هنصوت said...

شهيدة

دعمك من لبنان يسوى الدنيا

بارك الله فيكي يا جميلة.., دعواتك معانا ان ربنا يكرمنا و يجعلنا سبب في التهوين عليهم ولو خردلة

امار جرار

بالفعل مصر مليئة باللاجئين الأن

الفرق الوحيد..ان اللاجئين السودانيين مثلا

كانت ليهم مفوضية تدور عليهم...و كان ليهم دول تسأل عنهم

لكن اللاجئين المصريين. قسا عليهم اهلهم و ناسهم.., ظلمهم الي المفروض يحميهم

و مش لاقيين حتى الطبطبة