Tuesday, May 1, 2007

سؤال في الجون

بقالي ساعة عمالة اكتب وامسح.....شوية عشان مش عارفة ادور على الكلام الي ينقع يتقال منغير ما يسبب إزعاج لحد.....

يعني مثلا...خفت اتكلم عن اي فساد جاري في الحكومة...لحسن الحكومة تمسك في خناقي بتهمة تكدير الأمن العام.....أصل ساعتها...
هبقى عاملة زي عادل إمام في مسرحية شاهد ماشافش حاجة...لما جاتله فاتورة تليفون فيها 32 جنيه مكالمات زيادة...مع انه معندوش تليفون...و لما حب يشتكي...قالوا يا تدفع يا هنشيل العدة....مع انه لسه معندوش تليفون...لكن هو الصراحة خاف عالعدة....
طيب...بلاها الحكومة بتاعت الامن العام دي...نتكلم عي اي فساد في العالم العربي مثلا...والعالم العربي بسم الله ماشاء الله الله اكبر عليه...الكلام فيه يكفي دواوين...قلت مثلا...اتكلم عن المقالة المنشورة في جريدة الكرامة...عن ان الملك عبد الله(بتاع السعوديو) الي نفسة يلعب دور جمال عبد الناصر لا يجيد القراءة والكتابة لا بالعربي ولا بالأفرنجي...او مثلا ان الملك عبد الله(بتاع الأردن المرة دي) لا يحسن القراءة ولا الكتابة باللغة العربية لأن لغته الأم هي الإنجليزية...وبعدين قلت يا واد طنش خالص...لا تلاقيلك جمعية سعودية ولا أردنية رافعة قضية بتهمة إفساد علاقة مصر بدولة صديقة....قال يعني علاقة مصر بأي دولة في الدنيا ممكن تفسد من مقالة....لو على كده كان زمان مصر أعلنت الحرب على إسرائيل من زمان بقى....نهايته....بما اني عجزت اني الاقي دولة اقدر اتكلم عنها بحرية منغير ما اتعرض لمساءلة قانونية من اي نوع....قعدت افكر هو ايه حدود الكلام....وهو المفروض ان اصلا الكلام يكون بحدود....؟؟؟؟ و فجأه اقتكرت حاجة خلت عقلى يشت من التفكير...

السؤال مهم قوي...ومحتاج تفكير عميق...أنا شخصيا فشلت بشده في الإجابة علية....

بس قبل ما اقولكم السؤال عايزة احكي عن خلفيته...السؤال كان مطروح من قبل مدرس انجليزي في احدى المدارس الصيفية للتقريب بين الثقافات...والموضوع كان عن نظم الحكم الديموقراطي و تطبيقها بين الشعوب المختلفة....

طيب ركزوا بقى في السؤال...لو انك فرد من مجموعة تمثل اقلية مهمشة في مجتمعك....لا تزيد نسبتكم عن واحد في المئة....ولديكم مجموعة من المطالب التي لا يعبأ بها أحد من اعضاء مجلس الشعب...المنتخب نتيجة لإنخفاض اعدادكم...كيف يكم ان تلقت انتباه الدولة الى مشكلتكم...حتى يمكن حلها؟؟؟
السؤال ده بحذافيرة ممكن نقول عليه انه مشكلة البهائيين والعلمانيين والوهابيين واليهود والأصوليين المتطرفين والمعتقلين والمهمشين في الصعيد وسينا الخ الخ....
يا ترى الناس دي تعمل ايه عشان تلفت نظر الحكومة ليها....؟؟؟؟؟؟؟؟؟؟؟؟؟؟؟؟

14 comments:

شادي said...

قصدك نعمل ايه عشان مانلفتش نظر الحكومة لينا. احنا عايزينها تدينا بطاقة وتسيبنا في حالنا :)

الدرويش المرووش said...

مقال مزعج لأنه محتاج تفكير
منك لله هى ناقصه
أنا مش عايز أبقى بايخ فى أول زياره
و يا بخت من زار و خفف

بس أنا عندى سؤال برضه ألا وهو
لا مؤاخذه يعنى
هى الأغلبيه المهمشه (برضه) لافته الإنتباه لما الأقليه تلفته

حاجه سخيفه إن الواحد يرد بسؤال على سؤال
بس أنا ما قدرتش أقاوم

ibn nasser - ابن ناصر said...

ههههههههه ايمان تمسك القذافي شويه وانتي الملك عبد الله انتو صافيتوا الحكام العرب هههههههههههههه
وبالنسبه للفت النظر ه عارفه اللي بنقولوا وبيوصل لهم الفكره يسيبونا في حالنا مش من اجل الشفقه !! بل حق من حقوق الحريه , وصدقيني الدستور المصريفي حريات لكن المصايب اللي فيه كتير يعني فعلا من مقالتك دي ممكن اطلعلك تلاتة اربع تهم .. انا لاقت ان من مقاله عندي ممكن اخد اعدام !!... رميا بالرصاص !!
تحياتي مقاله رائعه وراشده تحتاج الي وقفه بس مع مين!!؟
تحياتي

عبقرينو said...

السلام عليكم

كيف يمكن ان تلقت انتباه الدولة الى مشكلتكم...حتى يمكن حلها؟؟؟
ده سؤالك صح
السؤال ده انتى بتقولى انوا للمهمشين والأقليات...أنا هاعكس السؤال
ماذا لو كنت أنت الأكثرية والأقلية هى التى تحكم فماذا عساك أن تفعل لكى تجعل الأقلية تشعر بمشكلاتك وآلامك؟
ده أعتقد السؤال اللى محتاجين نجاوب عليه؟
مالعمل؟
كمان فيه حاجة مهمة قوى لو انتوا جامدين وقاعدين تجروا شكل الناس فى ليبيا ودلوقتى فى السعودية...أيه الفايدة أناقش موضوع عن الملك عبدالله أو معمر القذافى
خليكم هنا على الأرض وناقشوا حالكم وسيبكم من بره
أحنا مصريين نخلص مصر.... وبعدين نبقى نشوف الوطن العربى
هيطلع ليا كذا واحد يقولى أزاى تقول كده مصر عربية..هاأقوله صح
بس فى الأول مصر للمصريين..مصر لمصلحة المصريين يبقى نشوف مصلحة مصر وبعدين ساعتها تتحقق مصلحة الأمة العربية وتتحقق القومية وووو كل اللى الناس عاوزاه
أنتوا كده بترغوا وتغنوا على بعض ومافيش حد وضع خطة عمليه أو أفكار لما هو السبيل للخروج؟
على البلوج هتلاقوا بوست أن شاء الله هيناقش أسئلة تحت ماالعمل؟
كيف ترى الوضع الآن؟
ما رأيك فيما ظهر من فاعليات فى الأيام السابقة وبخاصة فى السنتين الأخيرتين ؟
ما رأيك فى المعارضة الحالية بشكل عام وبالتحديد اليسار وكفاية والإخوان والأحزاب المعترف بها وماهى تنتظر قرار لجنة الأحزاب؟
أشئلة من النوع ده تخلينا نفكر مع بعض ونطلع فى النهاية بأفكار محددة وواضحة لما هو السبيل والعمل لرفعة مصر والامة العربية
ويصبح كلامنا ليس مجرد طق حنك او جعجعة بلا طحين او كلام حنجورى لاطائل من ورائه
تحياتى

سكوت هنصوت said...

يظهر ان كل واحد فينا معبي من الحكومة قوي...طيب خلوني اوضح الفكرة...اولا...انا مش بتكلم عن الوضع فمصر...لإن دي مشكلة مالهاش حل واضح حاليا...انا بتكلم عن الفرضية المثالية...فلنتخيل اننا عايشين في وطن مثالي..واننا بنطبق الديموقراطية بحذافيرها..الحل ايه..لما نكون في وضع زي ده...
عموما...في البوست القادم انشاء الله هوضحلكم الفكرة اكتر...
شادي
...السؤال هو هو..مانتا لو الحكومة محستش بيك..يبقى كلامك مالوش لازمة..لإنه مش هيغير...

درويش..لامؤاخذه يا صاحبي...حظك معايا كده...بس يا سيدي ولا يهمك...شوط كلام زي السم انا ما بزعلش....عموما...سؤالك فعلا في الجون..انت جبت الي انا عايزة اوصله بس بطريق غير مباشر...طيب السؤال هو هو...ازاي الأغلبية تلفت نظر الحكومة لمشكلة موجوده بالفعل والحكومة مصرة تتجاهلها...

معلش اتعب معايا شوية و حالو تديني اقتراحات...مستنيه الباقي

بن ناصر...انت مصيبة متحركة..انا يا عم ما جبتش سيرة حد...بس هم اصلهم بصراحة مستفزين قوي...يعني نفسي اشوف امارة للحكام دول ...اشوف مبرر منطقي يحكمونا عشانه ...نهايته ربنا يجعل كلامنا خفيف على الكل..و يستر عليك من الإعدام...المهم عايزين اجابات...

عبقرينو

الرد عليك عايز صفح...الحقيقة انا مش فاهمة يعني ايه ازاي نخلي الأقلية تشعر بممشكلات الأكثرية... شوف السؤال المفروض انه مش مجال طرح اصلا...لإن كل النظم الديموقراطية الحكم فيها للأغلبية...لو فيه اقلية حاكمة اغلبية..يبقى وضع زي جنوب افريقيا ايام العنصرية..ساعتها انت مش هتفكر في حلول سلمية...في ساعتها مشاكل تقيلة قوي...ثانيا...مين قال ان احنا بنجر شكل حد..انا قلت بمنتهى الصراحة اني مش هتكلم عن السعودية او الأردن...انا كل ما في الأمر اني بعيد نشر خبر منشور بالفعل في جريدة الكرامة..يعني مفيش مناقشة حقيقة لأمر خارج ارض الوطن...ثم البوست ده مش هدفة اننا نحط خطط للمستقبل..كل المقصود ان الواحد يفكر شوية في سؤال جايز في المستقبل يبقى ليه اهمية كبيرة لينا...عموما شرفت وانست...

عبقرينو said...

السلام عليكم
اولا الاقلية هى التى توجة الاغلبية الآن فى مصر ..لأن الشعب كله مغيب أو خائف أو غير واثق من قدرته على التغيير نتيجة تراكمات وخبرات سيئة فى السابق
الحل إذن محو الغمامة من أمام عيون الأكثرية لكى يروا الضور المنير فى نهاية النفق...وذلك بالحركة السلمية كنموذج غاندى فى الهند
أبسطها بعد بكرة تلبسوا أسود وتضعوا شارات سوداء على سياراتكم ومنازلكم وتغلقوا الأنوار ليلا لمدة خمس دقائق..ده حل سلمى جدا ونوع من الإعتراض على المضى فى التوريث
ثانيا هما مش بيفهموا كده إخوانا دول بياخدوا بالشبه يعنى اللى يجيب سيرة زى اللى يشتم زى اللى ينقل الخبر زى اللى يكتب تعليق زى اى حد من الآخر مش بيفهموا
أخيرا من ليس لديه خطة فهو مكون وترس وأداة فى خطط الآخرين
حتى متى لا نطمح أن نكون نحن الفاعلين لماذا الإنتظار لكى يأتى الفاعل من غيرنا لما لاتكونى أنتى أو هو أو أنا أو اى من كان هو الآخذ بذمام المبادرة
على قدر المعالى تكون المشاق...وبقدر ماتتعنى تنل ماتتمنى
الحركة هى الحل.مصر أحسن بنا كلنا وعاشت مصر حرة مستقرة

7ntklm said...

الزميل عبقرينو اتفق فى كل ما طرحتة من افكار ولكن لضيق الوقت وبدون الخود فى التفاصيل اكتشفت ان ( الشباب مجبنا ) وعذرنى الان لى عودة للانضمام بالمناقشة بينكم فى الاجازة الاسبوعيا

david santos said...

Thanks for you work and have a good day

My next work goes to be made in Arab. The heading is: Egipto, the mother of the World.

سكوت هنصوت said...

حنتكلم...لازم نتكلم انشاء الله قريب...

الأخ دافد سانتوس...والله تشكر على الزيارة...بس مش عارفة ليه بتفكرني بالرسائل المسجلة...عموما ... شرفت وانست

Anonymous said...

الحكومه لما تكون فاشله لازم ينطبع عليها الفشل الذريع في كل حاجه علاقتها الداخليه بشعبها وعلاقتها الخارجيه بالبلاد الاخرس تحياتي

الحصان الأسود said...

عادل امام خاف عالعدة قام دفع الفاتورة بتاعه المكالمات الزيادة برغم انة ماعندوش تليفون اصلاً

طيب احنا عمالين نتكلم و نهاتي على تعديلات الدستور لية
طالما محدش بيعمل بية اصلا

بالضبط زي عدة التليفون

Anonymous said...

I haνe been explоrіng for a bit fοr any
high-quality articlеѕ or wеblog posts on this sort of house .
Eхploring in Yahoo I еventually stumblеd upon this site.
Reaԁing this infοrmаtion So і'm glad to convey that I have a very just right uncanny feeling I came upon exactly what I needed. I so much no doubt will make certain to do not disregard this site and provides it a look on a continuing basis.

Feel free to surf to my web page :: Hainute Second Hand Copii

Anonymous said...

I would lіke to thank you for the еfforts you've put in writing this blog. I am hoping to check out the same high-grade content from you in the future as well. In fact, your creative writing abilities has encouraged me to get my own website now ;)

Feel free to visit my homepage ... wineloverinfo.com

Anonymous said...

Hi there eveгуοne, it's my first pay a quick visit at this site, and paragraph is in fact fruitful in favor of me, keep up posting such articles.

My web site ... Suggested Looking at