Sunday, July 1, 2007

والتقينا

تحديث: اقروا التعليقات كويس عشان فيها افكار جديدة..
*****************************
والتقينا
ليس هذا عنوان قصة من قصص يوسف السباعي او يوسف ادريس...
بل بداية البداية والميلاد الحقيقية لمجموعة ابناء مصر
طبعا كالعادة...احب انبه وابدأ بتحذير ان هذا البوست شديد الطول..
الإخوة بتوع الجري مسافات قصيرة..يتفضلوا عند اي من المدونات التالية..هتلاقوا عندهم ملخصات للقاء خلال يومين بالكتير
حنتكلم( الي هتلاقوا عنده البوست بتاعي..خدعة يعني)
أما بقى بتوع الماراثون والجري مسافات طويلة..فيلحقوا بتاع اللب قبل ما يقفل..يجيبوا القرطاس المتين..ويحصلوني
اتفقنا بشكل عشوائي يوم الجمعة الماضي على اللقاء..كان الهدف استغلال فرصة ان عبقرينو بالفعل في مصر لمدة 48 ساعة
وفرصة اننا نتعرف على بعض بشكل مباشر..ونتكلم في الخطوات القادمة
كان الحضور المجموعة الي فوق بالإضافة الى يساري مصري ومراقب مصري الي جه نص ساعة كده شرب فنجان قهوة واتكل على الله
بعض المدونين بحكم كونهم اقدم في الحركة استأثروا بالجانب الاكبر من الحديث
والبعض الأخر ( حديثي الظهور اثروا بحنكة شديدة ان يستمعوا بإنصات حتى يصلوا الى لب الموضوع)
غاب عن الحضور العزيز بن ناصر...لتواجده خارج القاهرة
بدأنا نتطارح الأراء...وكالعادة كان هناك تعريف بالستة اشهر الماضية..والخطوات التي اخذت بالفعل
طيب عشان ماطولش عليكو نخش في المفيد...خرجنا بإيه من اللقاء؟؟
********************
مجموعة ابناء مصر ليست ذات اطار خاص يقيدها..بل هي اقرب ما يكون لتجمع الناشطين الذي يدعم اي عمل
مدني او اجتماعي بالعناصر النشطة
والأفكار الإيجابية البناءة
********************
تعدعيم فكرة المجلة الإلكترونية و تفعيل الويب سايت الخاص بمجموعة ابناء مصر( لاحظوا ان اسمها اتغير من حركة ابناء مصر الى مجموعة ابناء مصر)
*********************
المشروع القائم حاليا هو تعريب الويكيبديا و ترجمة اي اخبار ترد عن مصر في اي صحيفة عالمية ( اللغات المتوفرة حاليا هي الإنجليزية..الي عنده غيرها يسجل اسمة عندي)
تحديث: ولاء صاحبة مدونة اتفضل عندنا هتمسك الجزء الفرنسي من المشروع
*******************
الهدف القادم هو اشهار جمعية بإسم ابناء مصر...حين تشتد الحاجة اليها..في الخطة الخمسية الجاية ان شاء الله
*******************
ربة السيف والقلم..بحكم كونها الصيدلانية الوحيدة..هتتولى قسم الصيدلة على الموقع..بالتعريف بالأدوية المتوافرة..والأدوية ذات الأزمات...بالإضافة الى مجموعة مقالات قيمة خاصة بعالم الأدوية في مصر والعالم..( المشروع ده محتاج دعم من البلوجرز الصيادلة...يقدروا يراسلوا شمس على مدونتها)
*******************
ممارسة الصحافة الشعبية الحقيقية...بمعنى اننا ننقل اخبار المناطق الشعبية...و نسلط الضوء على نشاطاتهم..سواء المدنية او الرياضية ( النشاط ده مالوش مشجعين غيري لحد دلوقتي) زي مثلا التنسيق مع مراكز الشباب وبيوت الثقافة الي موجودة في الأماكن الشعبية..بحيث اننا ننشر اخبار دورياتهم ونتابعهم...نمارس بالفعل دورنا كصحافة شعبية...كمان كان فيه اقتراح اننا ننفذ نفس الفكرة في السجون والليمانات( الإقتراح ده جديد لم يذكر في اللقاء بالمناسبة)
*****************
القيام بدور تثقيفي بحقوق وواجبات اصحاب المهن العمالية البسيطة..كالبائعات في المحلات او العمال الأرزقية..او اصحاب البقالة..
بمعنى ادق..نحاول نفهم الناس دي...ان فيه حد حاسس بيهم و بيسأل عليهم..وان لو حد فيهم تعرض لتحرش او استغلال..يقدر يدرك ان ده
هضم لحقوقة مش من ضمن واجبات وظيفته..( المشكلة دي بتواجه الفتيات بشكل اكبر بحكم كونهن عناصر هشة للإستغلال) الدور ده ممكن يتم من خلال كتيبات مطبوعة بسيطة الشكل والمحتوى..تفيد اصحاب كل مهنة بالروابط الي ممكن تخدمهم..وايه هي حقوقهم و نقابتهم موجودة فين..ده لو موجودة اصلا..الخ ( النشاط ده..لسة مالوش حد يتولاه..الي حابب يكون الأول يتفضل يعلن هنا ثم على بلوج الحركة..ثم على بلوجة الشخصي.)
****************
أخيرا وليس اخر..اتفقنا على ان من حق كل منا ان يتواجد زي ما هو..منغير ما حد يشكلة او يقولبة..او يحولة من اتجاه لإتجاه اخر
اتفقنا ايضا على ان نبدأ في الدعوة لهذه الأنشطة على المدونات بحيث ان الي مش عارف يبدأ منين..فها نحن نعطيه الخيط الأول
يلا يا رجال...عايزين اسماء
انا من ضمن مجموعة الترجمة...محتاجين متطوعين في النواحي التالية..( مجموعة تساعدنا في جمع الأخبار من المجلات..سواء العربية او الأجنبية, و مجموعة تترجم الأخبار من المجلات الأجنبية الى العربية)
بالإضافة الى فريق الويكيبيديا
احنا محتاجين من كل متطوع ساعة واحدة كل يوم
من يرى في نفسة الرغبة في المشاركة في هذا العمل...يراسلني اما على التعليقات..او على البريد الإلكتروني الخاص بي على البلوج
المشروع فيه حتى الأن..نقطة مية..تخاريف من المعادي و سكوت هنصوت
مستنيين المشاركات

38 comments:

صاحب البوابــة said...

انا أول متطوع

:)

واحب اتطوع في قسم أفلام الكارتون

واشوف فيلم موكلي فتى الادغال

:P

Monzer said...

بخصوص الموقع

ممكن يكون فيه قسم أدبى للأشعار والازجال والقصص القصيرة وننشر فيها اعملنا واعمال غيرنا من المدونين أو الأشخاص العاديين وممكن ننوه ليها بين أصدقائنا فى الجامعة فى الشغل وبين الجيران وفى النوادى ونقولهم احنا هاننشر اعمالكم فى موقع الحركة وممكن نستضيف أديب يقيقم الأشعار والأزجال والقصص ويختار أفضل قصة أو رواية أو قصيدة وتكون فيه جواير برده كتب وشهادات تقدير، وبالتالى نوسع الناس الأعضاء لما يعرفوا اننا بننشر أعملاهم فيتابعوا ردود الفعل عليها

Monzer said...

اما بخصوص الصحافة الشعبية فممكن نغطى الى بيحصل فى مراكز الشباب زي ما قلتى بس لو انت عندك خبرة ممكن انزل معاكى واتعلم بعد كده ممكن أغطى الى بيحصل فى مراكز الشباب الى جنبى ، بس أفهم الاول ممكن اعمل ايه

برده بخصوص الكتيبات فانا ممكن أطبعهالكم سهلة ان شاء الله

أما الترجمة فأنا تجارة عربى وشايل لغة ترم تانى فهافضحكم لأنى انا فيه كلام كتير بالعنجليزى وقع منى أصلا وكنت متعقد لما كنا قاعدين مع بعض

Monzer said...

أنا كمان نفسى فى حاجة نعلمها لو كل واحد فينا يعنى أعضاء الحركة مميز فى حاجة معينة او عندة مهارة فى اللغات أو الكومبيوتر أو مهارات الاتصال أو التنمية البشرية أو اخد كورس معين ، فهو ممكن يشرحلنا الكورس ده او البرنامج الى أخد فيه دورة تدريبية

يعنى مثلا انت متفوقة فى الانجليزى فممكن تعملى كورس وأساعدك ونجيب كتب بسيطة وتشرحى فيها بعض القواعد ونجيب كتاب كلمات ونزود رصيد الكلمات عند كل واحد فينا، وده للأعضاء وناشطى الانترنت والى عاوز من أصدقئنامن البواب من أي حد نعلمها دعاية كويسة فى كل حته وبين معارفنا

أنا مثلا على قدى فى الكومبيوتر بس أقدر أشرح مجموعة الأوفيس فممكن ننوه عنها بين أصدقائنا وفى بلوجاتنا وعلى الموقع نقولهم ده كورسات مجانية والى يحب يشترك، طبعا هانحتاج مكان ممكن ناجر سايبر من معارف أي حد فينا هايبقى عارف ان ده عمل خيرى ونحسب مثلا لو هانستخدم خمس أجهزة والساعة بجنيه يبقى خمسة جنيه وكلها حاجات بسيطة

Monzer said...

الى حافظ قرآن وعارف أحكام التلاوة والتجويد ممكن يعلمها لأعضاء المجموعة وأصحابهم، أو لو يعرف شيخ متخصص وأنا أعرف ممكن يعملها فى المسجد ونتعلم كلنا مع بعض

ولو كل واحد فينا قرأ كتاب مميز وحابب الكتاب ده وعاوز يشرحه لينا ففممكن نعمل جلسة أسبوعية وندعى فيه كل الناس والعضو الكريم ده يشرحلنا الكتاب ده بطريقة مبسطة كاننا قرانها فيه جلسة أو اتنين او زي ما هو عاوز وكل واد يبقى عليه الدور ونستفيد كلنا

Monzer said...

هاه ايه رأيك حلو الشغل ده
بجد سعدت بالتعرف عليكم كلكم
ومتحمس جدا للعمل معاكم
وده ان شاء الله بعض الأفكار الى حاسس أنا ممكن أساعد فيها

وربنا يرزقنا الإخلاص فى القول والعمل

والله من وراء القصد

وسلامى لكل الناس الحلوة الى كانت موجودة

نقطة مية said...

السلام عليكم

بجد شرفت بمعرفتك جداو نأمل كل الخير فيما اتفقنا عليه...

سكوت هنصوت said...

صاحب البوابة

طيييييب...اقتراحك بقى..هيكون قيد التنفيذ...وانت مكلف انك تحطيلنا على الموقع مجموعة من افلام الكارتون الخاصة بالأطفال..وممكن نترجمها احنا....يلا يا بطل..ورينا الهمة

سكوت هنصوت said...

منذر

حقيقي انا فخورة جدا بمعرفتك...مش ممكن اوصفلك قد ايه انا منبهرة من اداءك...بعد كل الصمت والتركيز ده..طلعت بإقتراحات اكتر من رائعة..,هدرسهم معاك واحد واحد..
شوف يا سيدي
فيما يختص بالأشعار ...الفكرة اكثر من رائعة..و صاحب البوابة..هيقدر يفيدنا في النقطة دي..بخصوص النقد الفني..كمان ممكن نبقى ننظم حفلة صغيرة لكاتبي هذه الأزجال..وممكن كمان تنشد او تغنى و تباع للفرق الغنائية الشابة..الفكرة محتاجة كلام كتير لإنها غنية جدا..ورائعة..ويمكن دمجها مع العمل المدني في الأحياء الشعبية لإنهم اكيد مليانيين مواهب...خلينا نناقشها اكتر..وبما انك شاعر جامد قوي...ابدأ طرح الموضوع عندك على البلوج..ونفكر هننفذه ازاي

*******

عن الصحافة الشعبية..انا بدأت اول خطوة في الفكرة بالفعل..لإن لي صلة باحدى الجمعيات النسائية التي تخدم في الأحياء الفقيرة القابعة خلف الاحياء الراقية كالمهندسين..واتفقت على ميعاد غالبا هيكون يوم الخميس القادم بحيث اننا نلتقي مع افراد الجمعية و نشوف ممكن يفيدونا ازاي بالخبرة على الأرض...طبعا يا بطل محتاجينك معانا في اللقاء ده

**********
فكرة الكورسات التعليمية فكرة اكثر من رائعة..وبالفعل عندي متطوع محترف في المجال ده..اظن انه هيسعد بتقديم خبراته..المشكلة يا منذر ان قوة المرء في التحدث واستعمال لغة لاتعني قدرته المنهجية على تدريسها..عشان كده احنا محتاجين في النشاط ده..خريجي الالسن والأداب و علوم الحاسب الالي..مش خريجي العلوم الي واخدينها بالسليقة..عموما الفكرة برضة تحتاج لدراسة..واظنها مثمرة جدا جدا جدا

**********

حفظ القران والتلاوة نشاط رائع...كنت بدأت فيه من قرن من الزمان و توقف لضيق الوقت..و عدم وجود صحبة صالحة تعين على تنظيم الوقت في الحق...ممكن نعيد احياء النشاط حتى لو بدورات بسيطة بين الجمعيات المختلفة..اظن ان ده نشاط هيلاقي اقبال كبير قوي...مريم كانت بالفعل اقترحت اننا نشارك مع جمعية بتنظم حفلات للأطفال الحفظة للقران..من الممكن ان المجموعة تدعمة و تتبناه...و نتكلم عنه و ننشر كمان
بالمناسبة..النشاط مفتوح كمان للكنايس..لو بتمارس عمل تطوعي..من الممكن القاء الضوء على دورهم المجتمعي..بل و تغطية احداثهم المحلية..حتى لا يفهم ان الكلام موجه فقط للمسلمين

منذر..بسم الله ما شاء الله عليك..انت كرة متفجرة بالطاقات..كل فكرة من دول عايزة شخص مستقل يتولاها كنشاط..انت قلت المفيد..فاضل المتطوعين.. محتاجين بقى..الحملات التنموية والتوعوية بعمل المجموعة بتاعت ابناء مصر
عايزين بانرز قوية..ولوجوهات..والسايت يبدأ الشغل
منتظراك ان شاء الله يوم الخميس عشان ننسق العمل مع الجمعية المدنية
والى الأمام يا رومل

سكوت هنصوت said...

نقطة مية..حقيقي انت نقطة ندى عطرة في جو شديد الجفاف والحر...وجودك اسعدني و يشرفني ان يكون بنا عمل مشترك مستقبلي..اشكرك بشدة على الدعم و تلبية النداء الأكثر من رائع...مستنينك بقى يا قمر في حركة الترجمة...لما بس نلاقي بقية المتطوعين..بالمناسبة يا رنا..لو لديك فائض من الوقت...هل من الممكن ان تبدئي بحصر المجلات والصحف العربية الموجودة على الشبكة..بحيث انه عند توافر المتطوعين..نكون قد جمعنا في مكان واحد كل المطلوب نقلة و ترجمته؟؟؟
ارجو الإفادة..جزاك الله كل خير..ورزقنا واياك الإخلاص في العمل

عازف الناى said...

وفقكم الله
بسم الله الرحمن الرحيم
وقل اعملو فسيرى الله عملكم ورسوله والمؤمنون
صدق الله العظيم

Anonymous said...

ممتاز مجهود رائع ما شاء الله منذر كلمنى كتير عن الحركه وكنت فى البورصه امبارح وما شوفتش حد طبعا كان معاى احمد الجيزاوى ومنذر وفريده كان نفسى اتعرف على الحركه المباركه دى والحركه بركه والجمود خمود

سكوت هنصوت said...

عازف الناي

جزاك الله خير على الدعاء..والمساندة..بس يا ترى قدرنا نشدك لأي من الأنشطة المطروحة..محتاجين دعم فعلي..ولو بالدعوة للمجموعة بين المدونين..انتظر رأيك على احر من الجمر

عمر الشرقاوي

اهلا بيك يا بطل...بقى يا راجل تبقى ماشي جنبنا و ماتشوفناش...عموما احنا محتاجين شبكة اتصالات افضل من كده..منفضلك ارسل بريدك الإلكتروني الى عشان اقدر ابلغك في حالة وجود لقاءات اخرى...كمان يا بطل..ايه النشاط الي من الممكن انك تشارك فيه في الفترة القادمة...انت والجيزاوي وفريدة..؟؟؟
مستنية ردرودك بفارغ الصبر...

Alaa said...

جميل جدا
ربنا يوفقكوا
تحياتي لكم

سكوت هنصوت said...

علاء

جميل جدا ..ربنا يوفقكم...!!!!!
ايه يا جدعان القلب ده..
شوفوا يا خوانا..شعارنا في الفترة المقبلة..بالإضافة لبنحب هنقدر حنغير..هو تعاطفك لوحدة مش كفاية..اتبرع ولو بنشاط
كل واحد بقى يرجع هنا تاني..و يقولي هيشارك بإيه..قولوا لوحدكوا بدل ما تقولوا لوحدكو برضة

اتفضل عندنا said...

صباحك فل يامها، انا لسه جايا من عند مريم و جيت كملت قرايه عندك و بما انكوا ظبطواالقسم الانجليزي فانا هتطوع و امسك القسم الفرنساوي ـ لو موند و لو فيجاروـ و هظبط الاخبار مع عبقرينو، شدو حيلكم و شدوني معاكم

Anonymous said...

انا اميلى اهو عشان ما يبقاش ليكى حجه واى حاجه لازم تبلغينى بيها واحنا كلنا ابناء مصر omar_sangar_art@yahoo.com

kol-eldonia said...

ana momkn as3ed 3qamtan ana taleb fe kolet ho2o2 we momkn as3ed be ay haga we el english bet3y kwes la2ny ba2ly senen badres english we ay mos3da ana mogod we de el blog betety law 3ayz teb3toly 3aliha
http://kol-eldonia.blogspot.com

malhoza kman ana 3andy ma3rfa was3a be el syana bet3et el computer
law had 3ayz yet3lm

سكوت هنصوت said...

ولاء

هايل ...برافو عليكي يا لولة...نشاط تحسدي عليه..اللغة الفرنسة بالفعل مش هتلاقي مشجعين..اما الإنجليزي فأكتر من الهم على القلب...ابداي انت نشاط الترجمة باللغة الفرنسية..وانشري الفكرة في مدونتك...خليكي انت حجر الزاوية في اللغة دي..وكل ما تخلصي جزء..ابعتيه على الميل...وانا هرتبلك ان شاء الله...انت وكل الي معك عشان نعين حد بعينة هو المسؤول عن وضع الأخبار يوميا..سلمت يمينك..ودمتي لمصر

سكوت هنصوت said...

عمر
بعتلك الميل..مستنية الرد

المحامي

شوف يا سيدي...اظن ان احنا هنحتاجك جدا في الفترة الي جاية
موضوع الكمبيوتر فكرة رائعة...لكن تنسيقها هيكون مع عبقرينو و حنتكلم..لإن بصراحة اختك في موضوع الكمبيوتر ده بالذات مييييييح...انا بالعافية بعرف اكتب على الكيبورد...انا هبعت الفكرة لعبقرينو و حنتكلم بالميل...وهشوف هيظبطوها ازاي...لو قدرت اشدك لأي نشاط تاني..ابعتلي قبل يوم الأربع القادم
منتظرة ردك
تحياتي

نقطة مية said...

بالنسبة للمقترحات...
ياريت ميكونش تركيزنا على الاصحاء من الشعب..بمعنى اننا نهتم بذوي الاحتياجات الخاصة و محاولة ازالة النظرة الناقصة للمجتمع لهم بأنهم عبء...

كمان نعمل حملة عن المجانين اللي في الشوارع..والله عيب اللي بنشوفه..و اللي يقدر يفتح ملجأ ايتام يقدر يفتح مكان لايواء المجانين و برضه يقوم على التبرعات..

كبار السن..كتير في دور رعاية كبار السن محتاجين انهم يحسوا بأنهم مش مستنيين الموت..و ممكن نبتدع حاجة اسمها الابن البديل او الابنة البديلة زي الام البديلة كدة و مفتكرش انها موجودة في مصر..يزور و يسأل و يبر بيهم...

التعاون مع دور رعاية المكفوفين لانهم بيحتاجوا متطوعين في مساعدة من عندهم في الدراسة خاصة...

الاطفال مرضى الكلى و الكبد و السرطان..و خاصة السرطان نحاول نحقق احلامهم البسيطة في الدنيا قبل ما يقابلوا رب كريم..مع ملاحظة ان غرفة العابهم في مركز الاورام سيئة جدا و اقصى حلم ممكن يحلمه اي واحد منهم ممكن يكون دفتر تلوين!!؟
.........................
ازالة وصمة العار اللي بتلاحق المهن الدنيا من كناسين و عمال في البنزينة و ماسحي الاحذية و غيرهم لانها مهن شريفة و ممكن نلفت النظر لاجورهم الضعيفة و ممكن لما ربنا يكرمنا نقدر نقدملهم حاجة
...................
حاجة تانية
الامهات "الارامل" ..لا يملكن مصدر للدخل
...............

ممكن نعمل حاجة زي
book club
نقرأ كتاب و نناقشه على مراحل و اذا قدرنا نجيب مؤلف الكتاب او ناقد ادبي يبقى جميل
وممكن نعمل حاجة شبها للاطفال
................
نعمل ورشة عمل للاطفال من متوسطي الحال و اللي ملهمش في الاجازات غير الشارع..نعلمهم فيها الانشطة المختلفة و ننمي مهاراتهم
...................
نعمل حلقات دراسية بما اننا في تخصصات مختلفة...
............

عمل حملات توعية بالامراض الختلفة..
.............

عمل نشرة اسبوعية بالتنسيق مع الجمعيلت الخيرية المختلفة عن فعالياتها و مواعيدها و المناسابات فيها و كذلك الحال بالنسبة لمراكز الكمبيوتر و الدورات المختلفة و ايضا المكتبات
............
كفاية كدة عشان شكلك نمتي مني
:-)
و بدء حصر الاخبار هبتدي فيه فعلا و بعمل عمليات بحث مكثفة و ربنا يكرم

تحياتي

Anonymous said...

أنا بنت مصر وبحب مصر وعاوزة أشارك معاكم

أفكاركم حلوة أوى، الحقيقة أنا لسة مش عارفة أنا ممكن أساعد فى ايه بالظبط بس أنا خريجة إعلام القاهرة قسم صحافة ، أى أخبار ، أى تغطية أقدر أساعد إن شاء الله

وده ايميلى
sh_press2007@yahoo.com

ونقطة مية معاها رقم الموبايل، بس أنا مسافرة وحرجع كمان أسبوع، يا ريت لما أرجع أكون معاكم

سكوت هنصوت said...

نقطة مية

الله اكبر عليكي....انت و منذر..بهرتوني بصراحة..دول يا جماعة الي كنت بلقح عليهم بالكلام وقلت عنهم انهم صامتين صمت استراتيجي...لكن طلع اهة تحت القبة شيخ....بسم الله ما شاء الله عليكي
لا اخفي عليكي ان المقترحات كلها..تثير الحسد..وان كانت اكبر من امكانياتنا الفعلية على الأقل في الوقت الحالي...لكن مين قال اننا هنفضل صغيرين...اكثر المقترحات الي عجبتني..فكرة نادي القصة..ورعاية الكناسين واصحاب المهن الحقيرة..باقي المقترحات..شفتها بالفعل في جمعيات خيرية اخرى..وان كانت محتاجة عون اكبر و اكتر من شباب زيك يا رنا
منتظراكي في مشروع الترجمة...ان شاء الله..
انا هقدر اكمل معاكو فيه من يوم السبت القادم بإذن الله..عشان اكون خلصت التزمات اخرى ورايا...اقترح حاليا..ان يكون هدفنا التدريب على جمع الأخبار قبل الترجمة...لإن الترجمة مش هتنزل الا لما السايت يخلص..وده لسة قدامة على الأقل اسبوع...فالأخبار البايتة مش هيبقى ليها طعم..يلا نتصفح المجلات والصحف..ونشوف مين هياخد ايه..وندرب نفسنا في الأسبوع ده ازاي نوصل للخبر بأسرع وقت ممكن..عشان ما نضيعش وقت
رنا..فخورة قوي ان عرفتك..انت و مريم و شمس وولاء...قطرات ندى سعدت بقربي منها
تحياتي

سكوت هنصوت said...

بحبك يا مصر...

انا بعتلك بالفعل اول ميل عن الأنشطة المتاحة..ايوة كده عايزين صحفيات شابات..يمارسوا الصحافة الشعبية عن احتراف..هنحتاجك بشدة في مشروع الصحافة الشعبية...تفاصيل المشروع هنزلهالكو بالتفصيل بإذن الله خلال يومين..حين يتم لقائي مع الجميعة المقترحة للعمل من خلالها...هبعتلك التفاصيل على الميل...مرحبا بك في ابناء مصر

سكوت هنصوت said...

Rodrigo

Muchas gracias por el oferta, me voy a pasar cerca

البتاع said...

اعدم جوز خالتى لو كنت فهمت حاجة

سكوت هنصوت said...

بعد الشر على جوز خالتك...ابقى تعالي يوم الجمعة الساعة 11 بالليل على المسنجر وانا هفهمك

خليك فى البيت said...

ندعوكم لزيارة مدونة خليك فى البيت والمشاركة فى الحملة

Xee said...

مش عايزين اي مساعده في السودان؟

كركديه، حنة، تماسيح

انتو بس تأمرو يعني
:)

شــــمـس الديـن said...

سكوت

حصلت حاجة مش متوقعة

باعوا الراوتر يا بت يا سكوت !!!

و انا تقريبا انفصلت عن عالم النت الي اجل غير مسمي بس هحاول اني ارجع تاني من السايبر و ربنا يكن في عوني

اشوفك علي يخير و مستنية منك تليفون في اقرب وقت ممكن تكوني فاضية فيه

MaMaDo said...

I can work on both English and German Translations, if I may say

سكوت هنصوت said...

زياد

اهلا بيك يا صديقي من بلاد الزودان الشجيج...يا فندم لو تمدنا بشوية مقالات لطيفة كده عن السودان..يبقى كتر الف خيرك..ولو تمساح صغير عشان العيال اذا ماكانش فيها رزالة يعني.. تسلم يا زوق...شرفت يا فندم

سكوت هنصوت said...

شمس

الف سلامة على الكونكشن بتاعك...و يا ستي انا مستنية البوستات الجامدة على احر من الجمر..منتظرين انتاجك في موضوع المقالات الصيدلية...او على الأقل اسماء المشاركين معك

تحياتي يا جميلة

سكوت هنصوت said...

mamado

welcome aboard my friend, i sent you a personal email, and waiting for your response....

You may even initiate the project of german translation....

Regards

شــــمـس الديـن said...

يا بنتي انت شكلك مفهمتيش انا قولت لك ايه

خلاصة القول انه معادش عندي نت
ربنا يسهل بقي و يركب بسرعة

سكوت هنصوت said...

شموسة

يا جدعان مش كل شوية تعايروني
بغبائي كده...مانا عارفة ان معندكيش نت...بس فيه نت كافية..وفي سيلانترو وكوستا و بينوز كلهم عندهم واي فاي..وفي خالتك تزوريها و تقعدي عندها على الجهاز خمس دقائق ترزعي البوست و تطلعي الصالون على طول..بطلوا بقى حجج فارغة..الي يدون يا يهرينا بوستس يا بلاش...سلام يا قمر

amr_hockey said...

انا عاوز امسك موضوع الكشف عن تجاوزات الحكومة مع اصحاب المهن والمحلات الغلابة
وكمان انا مهندس كمبيوتر لو فيه ايتام عاوزين يتعلموا كمبيوتر وتصميم العبد لله موجود .
وكمان حافظ قرآن واحكام التجويد للمساعدة

عبقرينو said...

حقيقي انا مش قادر اخفي اعجابي
بالمدونة الجميلة
انا حقيقي احب اكون صديق للمدونة
و عاوزكم تبقو تشقروا علي مدونتي
مدونت عبقرينو
علشان فيها حملة ضد التطبيع الخطير
في مؤتمر الاتحاد من اجل المتوسط
و شكرا
م / اسماعيل
3abqrino.blogspot.com