Friday, July 6, 2007

يوميات محدثة محاكمات

أصحاب الباشا يتهامسون عن مصير الأول



الر اجل ده أمين شرطة..غريب الأطوار..مصاب البلوجرز..وزي ما يكون هرشينا..كنا شكين فيه انه هو الي سرق موبايل مريم

ده بقى المحامي الجهور الصوت..بتاع القضية الي ما تخصناش..
ده محامي رضا فتحي الي احرج موقف عماد الكبير بشدة في القضية..بتقديم ثغرة متماسكة..وراه بقى الظابط ابو طبنجة الي زي ما يكون مستني حكم صادر على خالته..وعلامات الترقب تكسو ملامحة


الباشا وهو داخل القفص بين المتهمين


عدسات الكاميرات تتسابق في التقاط اهم الصور للباشا داخل القفص...الراجل الي قفاه لينا ولابس تي شيرت ابيض...كنا شاكين برضة انه هو سارق موبايل مريم
موبايل مريم..المأسوف على شبابة ووراءة طبنجة الأمن التي لم تستطع ان تحمية من الضياع
صورة عسكري ينظر الينا في مزيج من عدم الفهم والتعجب...الصورة عجبت احمد عبد الفتاح...وهو الي لقط معظم هذه الصور


عساكر الأمن المركزي تنظر الى الباشا حال دخولة القفص...
























شوفوا يا خوانا...انا مش هحكيلكو تفاصيل المحاكمة...

انا عايزة ارغي و افضفض شوية في رتوش الصورة
تاني مرة ادخل دار القضاء العالي
المرة دي بقى...اتعلمت من المرة الي فاتت...
خدت تاكسي زي الهانم انا ومريم...
ونزلنا عند المحكمة..المرة دي ركبي ما كانتش بتخبط في بعض..كنت حاسة بثقة مش عارفة جايباها منين
يمكن عشان تاني مرة
عملت نفسي مرشدة سياحية لمريم..( قالي يعني فاهمة حاجة)
و دخلنا عدل على قاعة المحكمة
الوجود الأمني كان غير عادي
مريم عرفت احمد عبد الفتاح على طول
قالتلي دول مدونين...بقى عندها خبرة بشكل المدونين اهة
قعدنا انا و مريم و احمد ومحمد صاحب
ناحية اسلاك نبية
القاعة مترشقة ظباط..ورتب..و مباحث لبسين مدني
ودفعة البرنس كلها كانت حاضرة
شوية شباب كده زي القمر...بس عارفين وسامة الأوغاد في السينما
الرجالة الحلوين الي اول ما الواحد يشوفهم يحس بالخسة
اهم كانوا كده بالظبط
ينفعوا ممثلين سينما..بس في ادوار زير النساء والنصاب
او الرجالة الي بيتجوزوا ستات عواجيز و ياخدوا فلوسهم حاجة زي كده
وانا هرغي كتير ليه...الصور عندكوا..نوارة شبهتهم بالخنازير
حيث اني بقى حديثة عهد بالمحاكم..
فأول ما دخل القاضي...وخدنا اماكنا على الأرض تحت المنصة
رحت مطلعة الكاميراوهات يا تصوير
الحاجب قام..راح قايل ( جلسة رقم ......... وشوية زز شش ببب تت قق)
راح القاضي باصص للقفص و مكلم واحد معرفوش..وقالة الكلام ده حصل
الراجل قالة محصلش يا بيه
استغربت قوي...اذا كنت انا الي قاعدة تحت رجلين الحاجب مفهمتش ولا كلمة
امال الراجل الي في القفص و مش شايفه اصلا ده سمع منين الي بيتقال!!!
قلت ده اكيد حافظ مش فاهم
راح طالع محامي برضة اول مرة اشوفة..شاب صغير كده
قلت جايز جاي يطلب التأجيل
انا كل ده فاكرة ان دي محاكمة اسلاك
و رحت مطلعة الكاميرا..وهريت الراجل تصوير
نوارة و مينا واحمد عبد الفتاح ومريم..يبوصولي بمنتهى الغباء
نظراتهم بتقول " هي البت دي هبلة ..بتخلص البطاريا على ايه"
وبعدين نوارة بصتلي وقالتلي انت بتصوري ايه
قلتلها بمنتهى الامبالاة كل حاجة
قال يعني فاهمة
المحامي الصغنتت نزل
وطلع مكانة واحد ايه صوته كان بيرج المحكمة
وانا برضة بصور
وبعدين مرة واحدة الحاجب راح قايم وقايل المتهم اسلاك نبية..لجنة الدفاع والإدعاء
عندها ادركت مدى حمقي..حيث كنت اصور القاضايا الاخرى التي في الجدول
طبعا شكلي كان وححششششششششششششششش
بس ايه..ولا همني
رحت بمنتهى الألاطة ماسحة الي عالكاميرا
وبدأه من الاول
الفيديوز طلعت عيني كالعادة في التنزيل
عموما هما نفس فيديوهات نوارة...انا بس سجلتهم عشان لو لا قدر الله اي حاجة حصلت
يبقى عندنا ستبن
الصور بقى..اتفضلوا معانا
معظم الصور صورها احمد عبد الفتاح...الي يا عيني ما كانش فاهم حاجة في كاميرتي
فضيع نص الصور على صباعة وجزمته




الباشا الميري ابو طبنجة في بنطلونة...الي كان متقمص دور اسلاك على الأخر و شماهلها صورة عماد الكبير



تحديث: شكر خاص لحنتكلم على مساهمتة الجبارة في انزال الصور دي...يخليك لمصر يا حنتكلم يا خويا
وما يحرمناش من كلامك ابدا

















24 comments:

أحمد عبد الفتاح said...

سيبك الجلسة كانت حلوه
والصور حلوه بس اضغطيها قبل ما ترفيعها
والله يسامحك انا بقالي 3 ايام مستني الصور

Alaa said...

انا مش عارف ليه حاسس ان الواد ده هياخد براءة
اصل يا انسه
البلد دي ماشية بالشقلوب
ربنا يستر
دي هتبقى شربة لحقوق البني الادمين الغلابة
بس ايه
ضربة قاضية

7ntklm said...

علاء ممكن يكون عندك حق بعد السمعتة امبارح من محامى دفاع المتهمين فى تفجيرات الازهر

وكان راي حضرتة ان قضية عماد الكبير كله لعب واكتر من جه بتلعب عليه وكمان راى فى اسلام زفت انه ظابط تمام وشغله كويس انا بمسع الكلام دا منه امبارح وانا مستغرب بعد ما بعتلى مرافعتة فيديو على الموبايل علشان انشرها عندى فى المدونة وراى فى الشباب المتهمين فى التفجيرات ضحايا وفى عماد شغل للاكثر من جه
مسحتها من كلام المستفز وسبيت لصاحبى العرفنى عليه

عبقرينو said...

مجهود رائع ...بس صحيح لو أسلاك خد براءة وعماد لبس قضية ....ممكن تتوقعى كده
شكرا لكل اللى راحوا وشكرا ليكى على أنك بتساعدينا على اننا نتابع واحنا برة مصر مايحدث فى مصرنا الحبيبة

Anonymous said...

لو متحكمش على الواد ده بى اقصى عقوبه انا مقدم على طلب هجره متردد لو محصلش كده هالم اعزالى واهاجر من البلدى لانها معدتش بتعتنا دى بلد اللى ميسمو

نقطة مية said...

ازيك يا جميل...مجهودك مثمر ربنا يبارك فيكم..كان نفسي ابقى معاكم بس انتي عارفة الظروف و صاحب البوابة سألته عليكم و قالي على التأجيل...انا حاسة و الله اعلم انه هياخد سنة سجن و فصل من جهاز الشرطة..و يدفع 2001 جنيه على سبيل التعويض المدني و يتكفل بمصاريف الدعوة...و ابقي قولي رنا قالت...
مستنية بقية الصور

Unknown said...

ربنا يستر

صاحب البوابــة said...

استغربت قوي...اذا كنت انا الي قاعدة تحت رجلين الحاجب مفهمتش ولا كلمة
امال الراجل الي في القفص و مش شايفه اصلا ده سمع منين الي بيتقال!!!
قلت ده اكيد حافظ مش فاهم
راح طالع محامي برضة اول مرة اشوفة..شاب صغير كده
قلت جايز جاي يطلب التأجيل
انا كل ده فاكرة ان دي محاكمة اسلاك
و رحت مطلعة الكاميرا..وهريت الراجل تصوير
نوارة و مينا واحمد عبد الفتاح ومريم..يبوصولي بمنتهى الغباء
نظراتهم بتقول " هي البت دي هبلة ..بتخلص البطاريا على ايه"


-----------------

:)


تحيـــــــ :) ـــــــــاتي

ياسر سليم said...

أهم حاجة عندى الصور

انا مستنى الصور

_____________

على فكرة: انا خلصت امتحانات

سكوت هنصوت said...

احمد

سيبك انت احلى ما في الجلسة هما الناس الحلويين الي الواحد بيتعرف عليهم كل يوم..سعدت بمعرفتك صديقي انت و محمد صاحب بلوج بولوتيكيا...الي بيتكتب بالإنجليزي...بجد شباب يفرح...

علاء

شوف انا حاسة ان القاضي ناوي يلبة سنه مع ايقاف التنفيذ...هو عامة اي عقوبة مكسب..ربنا يستر بس و ما يطلعش براءة
وبعدين حقوق مين يا عم...قول يا باسط
تحياتي اخي الكريم

حنتكلم

أحسنت اختيار اسمك يا تامر...على فكرة يا صديقي انا طالبة منك خدمة بدل ما الناس هنا تعلقني على باب زويلة...انا بحكم كوني من عباقرة الكومبرورر ( الي هو الحاسب الالي عشان الناس الي ما معهاش لغة يعني) ما عرفتش انزل الصور عندي...فبعتهوملك عالميل...وحياة الأخوة تحطهم عندك زي المرة الي فاتت..ويجعلة عامر بحسك يا سي حنتكلم...

عبقرينووووووو

اولا اشكرك على الشكر...ربنا يباركلك يا رب..شوف يا صديقي..هو من الممكن ان اسلاك ياخد براءة..لكن ازاي عماد يلبس القضية؟؟ يعني هيتهموة ان هو الي انتهك عرض نفسة..اكيد لأ...ربنا يصدق ظننا في نزاهة القضاء المصري...رغم ان المبشرات ما بتقولش كده..اللهم عدلك يا رب

تحياتي صديقي العتيد


نقطة مية

اهلااااااااا بالرطوبة المحببة للنفس في ايام الصيف القائظة دي...شوفي يا ستي...ابشع ما في السخرية القاتلة..ان تتحول الى حقيقة..ساعتها يصدق علينا ان نضحك حتى البكاء...الصور بقى اصبحت كورتها في ملعب حنتكلم...انا اعلنت غبائي الازلي في هذا المضمار....ربنا يكرمة حنتكلم هيحل الأزمة العويصة دي.
ميرسييييع ليكي يا قمر على الزيارة الغالية دي

صاحب البوابة...

نعم سعادتك...مش عارفة ليا حاسة ان الكومنت ده شتومة....عموما...شرفت يا ريسسسسسس ...

ياسر سليم

كفارة يا عم ياسر

فيما يختص بالصور..ارجع للكومنتس صفحة 13 فيما يختص بردي على نقطة مية و حنتكلم...ربنا يخليلنا تامر الي هيظبطنا في موضوع الصور ده

شكرا على الزيارة يا فندم

سكوت هنصوت said...

عمر الشرقاوي

تهاجر فين يا عم...ونسيبهالهم مخضرة..

قاعدين فيها على قلبهم ان شاء الله

السيد اي ار سي بريزدنت

آآآآآآآآآآآمين

Bou-ME said...

أنا كل اللي هعلق عليه هو الموبايل اللي مش عارفة مصيره
على رأي الست اطاطا, تاميت بنلبسله اسود و التايه بنلبسله ايه؟؟؟ أديداس؟؟؟؟

نداء الي أصحاب القلوب الرحيمة: رجعولي الفقيد العزيز و تعالوا خدوا لب.. بداله ( طبعا انتي عارفة أنا بتكلم عن مين يا مها)

و لو سمحتم يا جماعة, كله يحط صورة موبايلي بانر عندكم و اكتبوا: عاش الفقيد

Unknown said...

شكلك مسحتي الصور الأولانيا

أنا عايز أشوف الباقي :(

لو سمحتي إبعاتيها على الميل بتاعي، موجود عندي في البروفيل

عبقرينو said...

مريم...ههههههه الله يرحمه كان فقيد غالى قوى قوى قوى:)
طيب هتعملى أيه فى المرحوم مش هتعمليله عزا وكده ولاهتستنى زى مالقانون العسكرى بيقول بعد 5 سنين من فقدان الشخص فى موقعة عسكرية ويعلن وفاته رسميا

مصر هى أمى said...

سكوت هنصوت

والنبى كده فى مرة وانتى فى المحاكمة عايز اطلب منك طلب
تقربى من الشىء ده اللى اسمة اسلاك نبيه وتساليه سؤال محشور فى زورى

انتى حاسس انت غلطان ولا لأ
بتستغفر ربنا على اللى عملته ولا حاسس انك انقذت البلد من الارهابى الكبير عماد

نفسى اعرف شعوره ايه دلوقتى
اسلاك ده بنى ادم زينا ولا من طينة تانية مبتحسش بالذنب

أحمد عبد الفتاح said...

فين باقي الصور يا انسة
لالالالالالالالالالالالالا
انا محبش الي يضرب عالصور
كده ازعل
عايزين صور وش اسلام بيه كانت كويسة

Monzer said...

ازيك يا مها
وازيكم كلكم
بجد نفسى فى مرة أحضر المحاكمة وأسلم على عماد
وان شاء الله ربنا يجبنا حقه وحقنا كلنا

زبرده يوم 15/7 فى الهايكتسب المحاكمات العسكرية
ياريت لو تعلنى عنها

وسلامى ليكى
والله يقويكى ويقويكم

سكوت هنصوت said...

منذر..

من فضلك ابعتلي تفاصيل اكتر عن موضوع المحاكمة في الهايكستب دي..عشان لو اقدر اغطيها معاك ان شاء الله..

تحياتي اخي العزيز

Anonymous said...

نقل موضوعي وجيد للواقعة

انا كمان ركبي بتخبط شوية من السيرة دي

ربنا يجعلنا خفاف على قلوبهم


دمت بخير

Monzer said...

بصى يا مها
المحاكمات العسكرية
هاتكون فى الهايكتسب يوم 15/7 الموافق يوم الأحد

طبعا الدعوة عامة

والهايكستب ده فى طريق مصر إسماعيلية الصحراوى

ولو انت من ارباب السيارات يبقى هاتسلكى طريق جسر السويس كإنك جاية من إشارة روكس مثلا ورايحة على العاشر من رمضان هو فى منتصف السكة تقريبا

لو تاكسى ولا أنصحك بها علشان هاتدفعى كتييييييير قوى :)

ولو ميكروباص تاخدى أي حاجة رايحة ألف مسكن
وتركبى بعيدها أي حاجة رايحة للعاشر من رمضان وتقولي للسواق عاوزة انزل الهايكستب وهو على طريق مصر إسماعيلة الصحراوى

وممكن أستناكم فى ألف مسكن ورنوح كلنا مع بعض فهو جنب البيت

وربنا يستر
تحياتى

kol-eldonia said...
This comment has been removed by the author.
kol-eldonia said...

من كلام المحامى بتاع اسلام يبان انو محامى ساذج و يتمسك بادلة ساذجة لا يتمسك بها محامى حتى و لو كان محامى جزئى (تحت التمرين) و ده اكبر دليل انو مش لاقى حاجة يقولها و يريت تقولولى امت الجلسة الجاية علشان اجى اتفرج و اتعلم بردو ازاى اتراقع قى قضية خسرانة مهو بردة ده علم و قدرة ان الواحد يترافع فى قضية خسرانة

سكوت هنصوت said...

كل الدنيا

محامي اسلاك فعلا قال كلام عبيط...الي قال كلام تقيل قوي..هو محامي رضا فتحي..الجلسة التانية يوم 2 سبتمبر ان شاءالله...مستنينك يا فندم

kol-eldonia said...

شكرا مع كل تمنياتى بمعرفة حسنة