Sunday, July 15, 2007

عن مهزلة المحاكمات العسكرية







تصحيح: منذر صاحب مدونة حين البأس...مش من الإخوان..ولا انا والله






والله النهاردة يتحكي في اسبوع

يوم طويييييييييييييييييييييييييييييييييل و مرهق بشكل غير عادي

كل التعب ووجع القلب والأعصاب ده..من جلسة واحدة..كان الله في عون الأهالي الي كل يوم والتاني يتشحططوا الشحططة دي..

خلاصة اليوم..اكبر من انها تكون في بوست واحد..عشان كده النهاردة هقولكوا رتوش عن الجلسة...و في البوست القادم..هحكيلكوا عن اجمل امرأة رايتها هذا العام...

تضامنا مع الشرفاء المحالين لمحاكمات عسكرية..قررت ان البي دعوة علاء و منذر و احضر جلسة الإخوان المسلمين العسكرية

مكان الجلسة كان في الهايك ستب..ولكم ان تتخيلوا بعد المشوار ... كنت حاسة ان كلها فركة كعب و اوصل اسماعيلية.. استعنت بالدعاء و كملت.. لما وصلت في حوالي الساعة 11 صباحا..لقيت مجموعة من شباب المدونين و بعض مدوني الإخوان منهم سبيل المثال لا الحصر..علاء صاحب مدونة مش انا..ومنذر صاحب مدونة حين البأأس..ومنعم صاحب مدونة انا اخوان..واحمد صاحب مدونة شاعر اخوان و احمد عبد الفتاح صاحب مدونة يا لالاي و اخرين..و غاب الحضور النسائي من المدونات تقريبا..المكان في قلب الصحراء..بلا بقعة ظل تائهة من يمين او يسار.. كان هناك حضور اعلامي لا بأس به..سألت عن النساء.من اسر الماساجين فقيل لي انهن قد سبقن الى القاعة...طيب فين القاعة..لا دي لازم تصريح..امال احنا جايين نعمل ايه..لا احنا هنا عشان نتابع بس...بدأت اصور مناظر الناس الي يا ولداه اتسلقوا في الحر من سبعة و تمانية الصبح...و بدأت الأخبار تتدافع..منذر اخبرني بالقبض على الجيزاوي و معتز صاحب مدونة منفي..وبدأت اتصل بالناس..كلمت تخاريف المعادي..و هي كلمت نوارة..و كلمنا احمد سيف الإسلام المحامي..واخرون..في هذه الأثناء..استطاع النشط جدا منذر..ان يحصل لي على تصريح بحضور الجلسة....و احنا مستنيين التصريح..إذا بسيارة امريكان فارهة..تدخل الى ارض الهايكستب..و تتجمع حولها عدسات التصوير...تقولش رئيس الوزرا .. عرفت بعد كده ان ده رامزي كلاركس..وزير دفاع امريكي سابق و جاي متضامن مع الإخوان.

المهم بعد ما جبت تصريح للدخول..و تسللت مع صحفيتين من اللوس انجلوس تايمز.والإذاعة الألمانية..وصلنا لقاعة المحكمة ...في قلب الصحراء..تم تفتيش الشنط تفتيشا دقيقا..اخذ منا اي اقلام او اوراق..او اجندات صغيرة..او موبايلات او كاميرات وخلافة..ثم دخلنا الى غرفة صغيرة و فتشانا تفتيشا ذاتيا..عشان يتأكدوا ان مفيش حاجة من الممنوعات دي متهربة في هدومنا..بعدها ..دخلنا القاعة..

في القاعة..هالني عدد الشباب والشابات..وسيمي الملامح..بادي الملاحة..يقطر وجوههم بالإشراق...كإن ذويهم في مسابقة وليسو في سجن.. يتبادلون الدعابات بإبتسامة خفيفة و مرحة على الوجوه...أما الأمهات..فلهن عندي بوست خاص..لإن ما رأيته منهم يستحق وقفة خاصة..لا يجب ان يدفن بين باقي التفاصيل.

بدأت الجلسة برفع اذان الظهر..ثم الصلاة..بعده قام احد المعتقلين بالدعاء ( في حضور القاضي) و ارتجت القاعة بكلمة آآآآآآآآآآآآآآآآآآميييييين...نظرت الى وجوه القضاه والظباط..فوجدتهم والله منكسي الرؤوس..مخذولي الهمة...كأن على رؤوسهم الطير...ووجدتهم في كياسة شديدة..يسمحون للمساجين ان يكملوا دعائهم حتى فرغوا ... ثم بدأ القاضي الجلسة...و كان على قدر عالي من التعاطف مع المساجين انسانيا...الا انه ( كديدن العسكريين) لديه اوامر لن يخرج عنها مهما حدث ...
في البدأ ترافع المحاميين طالبين ان يرفض القاضي النظر في الدعوة لعدم الإختصاص ... و ان يمتنع عن فض الاحراز.. الا ان القاضي اصر بإصرار اعمى ان ينظر الدعوة..مع ا ضاف كلمة المحاميين الى المحضر...ثم قام خيرت الشاطر و طلب الإذن بالكلمة..

فقال انه قد اتهم في قضية مماثلة في اوائل التسعينيات..و ان القاضي انذاك..رفض ان يرفض النظر في الدعوة..مع ان المحكمة المنظورة لم تكن جهة الإختصاص..وان هناك استشكال قانوني لدى المحكمة الدستورية العليا..لم يبت بعد بصدد مثل هذه القضايا..اي ان لو المحكمة الدستورية اقررت بطلان دستورية النظر للقضية..يبقى حكم المحكمة العسكرية اصبح باطل..بس ساعتها..هتكون العقوبة نفذت بالفعل..وهو ما حدث مع خيرت الشاطر و قضى خمس سنوات في السجن..ثم دعا الشاطر القاضي ان يحكم ضميرة..الذي سيلقى الله به فقط..وليس بغيرة..وان يتقي الله ..ويتقى دعوة المظلوم التي ستطالة في اي وقت ان هو لم يحكم ضميرة فيما يحكم..ثم اهاب بالقاضي ان يرفض النظر في الدعوة لعدم الإختصاص...وبعد ان استمع القاضي بمنتهى الإنصات..نظر الى الأستاذ عبد المنعم المحامي..وقال ..نفك الأحراز يا استاذ عبد المنعم؟؟

إذا لم تفلح كل محاولات الدفاع في تعديل نظر القاضي من فك الأحراز...و بدأت مشوار فك الأحراز..طلب الدفاع ان يخرج كل متهم من قفص الإتهام كي يشهد بنفسة احرازة و يثبت ما يثبت و ينفي ما ينفي..فوافق القاضي على الفور..فذهب بعض الظباط لإحضار القيود الحديدة..الا ان ان القاضي نهرهم بعنف و قال..بدون قيد حديدي....وخرج المتهمين واحدا تلو الأخر..بدا بخيرت الشاطر..الذي ما ان خرج من القفص حتى ارتجت القاعة بالتصفيق الحاد....وسارع اليه طفلين.يقبلون يدية و رأسة..و بدا فك الأحراز..فإذا هي مجموعة من الكتب الدينية و الدعاء المستجاب و شوية كتيبات اذكار من الي بيتباعوا في كل حتة.. وكان فيه كمان شيكين..انكر خيرت الشاطر اي صلة بهم..كما كان من ضمن الاحراز جهازين لاب توب.

و استمر خروج الإخوان واحدا تلو الأخر..مع الهتافات و التصفيق..وتقبيل الأرجل والرأس...ثم النظر الى بعض الكتيبات البسيطة و كام جهاز على كام هارد و دمتم..

استمر الأمر على هذا المنوال حتى صلاة العصر...ثم مارست كل الألاعيب والحيل حتى اقنع الظباط بأهمية رحيلي لإن الساعة قد قاربت على السادسة مساءا....و اخيرا اقتنعوا و رحلت

دي مجرد بداية..الباقي لما نطمن على الجيزاوي و نشوف حصلة ايه....



35 comments:

Bou-ME said...

كلامك معايا في التليفون عن مدام شاهيناز و عن أهالي المتهمين خلاني أقشعر و لما قفلت معاكي اقعدت أدمع

سبحان من مقاويهم و مديهم صبر

ربنا يصبرهم و ينصرهم

وينتقم من كل ظالم جبار

سكوت هنصوت said...

امين يا مريم...انتظري بوست مدام شاهنياز اول لما نطمن على الجيزاوي..الست دي تستحق كتاب مش مجرد بوست

محمد السيد..مش حاسكت said...

طيب أوي كويس إنك عرفتي تدخلي ,,,,

كان فيه بشششششششششششششر بره نفسهم يركبوا الأتوبيس بس ...

ربنا ينفع بيكي يا افندم ... وشدي حيلك بقي .....

عقبال كل مرة ...

حمدا لله علي السلامة يا أفندم ....

تحياتي ودعواتي

7ntklm said...

sokoothansawat

مجهودك جيد لا يحتاج الى سطوري ليشهد له إذ يكفي ما تكتبى فتشهد ببراعته ويبقى لنا من السطور لنقترب من الاحداث اكثر واكثر

فى انتظار متابعة استكمال تقريرك


ربنا يطمنا على الجيزو

7ntklm said...

ربنا يطمنا على الجيزاوى

أحمد عبد الفتاح said...

بصراحة يا جماعه
انا مفرتحش بحاجة في المحكمة ده بجد قد حضور اختنا بتاعه المدونة ده
بجد كنت فرحان جدا اول ما شفتها داخله
ايه ده ؟ بنت ؟ مش اخوان ؟ جاية الهيك استيب ؟ سايبة شغالها ؟ مش قايلة حتي لاهلها ؟
ده اكيد عبيطة
وهي طبعا عبيطة بحب البلد ده
مبادرتها معملهاش ناس تاني كتير من مدونين ونشطاء شباب وبنات الله اعلم بظروفهم
بس نيابة عن كل الاخوان ارفع القبعة لاحراء مدونة في مصر

ibn nasser - ابن ناصر said...

أحيكي علي المجهود الشاق
وتحياتي

ibn nasser - ابن ناصر said...

اه علي فكرة منذر مش إخوان

Alaa said...

تغطية جامدة جدا جدا
ماش اء الله
:)

"استطاع النشط جدا منذر..ان يحصل لي على تصريح بحضور الجلسة"

حرام عليكي يا شيخة :)
دا أنا اديتك التصريح بتاعي
هههههههه
آه و الله
لما الظابط قال ده آخر تصريح هاتوا بطايق
حطيت بطاقتك قبل بطاقتي من غير ما ياخد باله

طبعا ده من غير تقليل من شأن المناضل منذر :)

سعدت جدا بحضورك :)

Alaa said...

ابقي قولي رأيك بأه :)

المدوّن خانة

أحمد الجيزاوي طلع و الحمد لله
:)

Monzer said...

اليجزاوى خرج يا سكوت
الجيزاوى خرج يا سكوووووووووووووووووت


الحمد لله

أمــانــى said...

بسم الله مشاء الله
ايه النشاط ده
ربنا يكرمك يااااااااااارب
ويفك اسر المأسورين يااااااااااااااااارب آمـــــــــــــين

About Me said...

احييكي على النشاط والمجهود اللي انتي عملتيه ده كله
ربنا يعينك

Xee said...

مجهود رائع و مبادرة جميلة منك

تحياتي ليكي و ربنا يصبرهم و يفك اسرهم

Xee

سكوت هنصوت said...

محمد السيد

ربنا يسرلي امر الدخول منغير ما اتعب فيه..بس المحاكمة دي..خلتني اقدر قيمة الحرية...لا تتخيل احساس القهر..واحنا ممنوعين من الخروج برة القاعة غير بإذن من القاضي..وممنوعين من مغادرة المحكمة..غير بإذن من القاضي او لواء عام المنطقة..قمة الذل..الصحفية بتاعة لوس انجلوس تايمز..الي تسللت زيي للقاعة..( على فكرة هي مصرية ما كانش فيه اجانب في القاعة) كان هيجيلها انهيار عصبي من منعها من الخروج..كانت حاسة انها هتتخنق من القهر..كان الله في عون المساجين..حقيقي ذل..ربنا يهون عليهم يا رب.

سكوت هنصوت said...

حنتكلم..

يا فندم لا شكر على واجب...هبعتلك الصور زي كل مرة..وانت عارف سكتك..ربنا يباركلنا في كلامك يا حنتكلم يا خويا


أحمد عبد الفتاح

انت بصراحة تعبت معايا قوي...تليفوني ما بطلش رن..وانت يا ولداه هتعمل ايه ولا ايه..بجد..وقفتكوا معايا انت و منذر و علاء و كل من سأل عليا على راسي من فوق..تحياتي صديقي العتيد

ابن ناصر.

ربنا يخليك يا فندم..وفعلا عندك حق منذر مش اخوان..منذر مش اخواااااااااااااااااااان هصلح البوست حالا...ولا انا كمان اخوان بالمناسبة


علاء...معلش يا فندم كله عند العرب صابون
وبعدين يا راجل مش كنت سبت بطاقتك انت و جبت التصريح و بعدين اديتهوني..يعني هو كان عليه اسم ههههههه..عموما حضورك كان اكثر من رائع يا علاء..وكانت فرصة لطيفة قوي اني اتعرف بشباب فعال زيكم

ياسر سليم said...

انا كنت هناك امبارح

بس هما عاملونى زى ما عاملوا

وزير العدل الأمريكي الأسبق

رمزي كلارك

وشفت حضرتك فى الأخر كنتى مستعجلة قوى وعايزه تروحى

وبالنسبة للجيزاوى

هو خلاص خرج

..........

ياريت تعدلى أسم مدونتى وتخليها

حياتنا كلمات

ده بعد اذنك

سكوت هنصوت said...

منذر..

الله يفرح قلبك يا شيخ...الجيزاوي خرج يا رجالة ههههههههههههههههههههههههههههههههههههههههههههههههههههههههههههه

بلغواااا تحياتتتتتتتتتتييييييي


أماني

بنت الجنوب الجميلة احرجتيني بذوقك..تسلميلي..

ميدو مجدي

تسلم و ااااااامممممميييييييينننننن

زيياد

اهلا بنفحات السودان

والله يا زياد دي مش مبادرة..دي رغبة مني في اني ما كنش بس مع جانب واحد من الشارع..زي ما عماد الكبير اتظلم و بنروحلة مخصوص بالعشرات..من الواجب اننا كمان نقف مع الإخوان الي اتظلموا مهما اختلفنا معاهم..و نقول كلمة حق..نقابل بيها ربنا يوم الحساب..
شرفتني يا فندم

سكوت هنصوت said...

ياسر سليم

يااااااااااه بقى انت كنت هناك و ما شفتكش..بايخة دي..اعذرني يا صديقي..بس اصل انا كنت متأخرة جدا و كان لازم امشي..

اما بقى عن اسم المدونة حياتنا كلمات...فأقدر اعرف ايه السبب؟؟؟

ياسر سليم said...

اه .. شفتى بقه

كنت هناك

وحاسيت انك مهمة قوى .. ومش اى حد يعرف يكلمك

دا كفايه انهم مادخلونيش انا ولا رمزي كلارك ودخلوكى انتى

فأكتفيت انى اشوفك من بعيد وخلاص :)


أما بالنسبة لمدونتى .. فالسبب انها اسمها كده و كمان عنوانها كلماتى وليست كلمتى

يعنى حضرتك لا كتبتى اسم المدونة ولا حتى العنوان مكتوب صح

سكوت هنصوت said...

ياسر سليم

من زمان و صحابي بينصحوني ابطل اكل الخس...بعيد عنك..بيسطلني اخر سطل..معلش يا فندم..كنت فاكراك بتتكلم عن مدونتي انا..اتاريك بتتكلم عن مدونتك انت...سوري يا ياسر..هصلحها حالا..واسفة مرة تانية..بس بعيد عنك اصل الخس ده مفعولة عجييييييييييب....اما بقى عن الأهمية..فيا عم قول يا باسط..ودي اماكن برضة الواحد يحب يبقى يتشهر فيها...يظهر ان حظي وحش عشان معرفتش اشوفك..مرة تانية ان شاء الله..الأيام جاية كتير تحياتي يا فندم

Alaa said...

:)
ياافندم الظابط بياخد البطاقة و يحطها مع رقم التصريح
عشان تستلميها و انتي خارجة
و كان ممكن مشوفكيش و انتي خارجة
و معرفش آخد البطاقة
:)
و انتي اللي حضورك كان رائع
ربنا يكرمك
:)

Monzer said...

لا باه يا عم علاء
هو م الآخر ادى التصريح
علشان هي بنت
لا علشان بطاقتك فى الاول ولا حاجة
:)))))))))))))))
بخبط الدنيا صح
بس للازم نطلع السنج والمطاوى ونفرج علينا المدونين
كفاية انا وهي بقينا شبهة
والناس افتكرتنا اخوان هههههههههه
هاتشبهونا
بس والله ما فيش شبهة أحسن من كده
ربن ا يعزك يا علاء ويعزكم كلكم

قولوا آمين

بن توفيق said...

فى الاول حمدا لله على سلامة الجيزاوى .. وخروجه

اليوم فعلا مش ينفع يتحكى فى بوست او اتنين
ةخصوصا ان حضرتك من الناس اللىدخلت المحكمة وكانت جوه

بس سؤال كده على المشى .. ليه اول جمله فى البوست دى ؟

ابن رشد said...

رائع جدا يا مها و صدقتي في وعدك بنقل الاحداث
و لكن اللي مستغرب عشانه ازاي دة كله يحصل في منطقة عسكرية

هاني جابر said...

السلام عليكم
ربنا يجزيك خير فعلا عن هذا النشاط الطيب
بارك الله فيك وفي قلمك
وبعدين يا اخ علاء انت ومنذر
سواء كان السبب انت او هو
المهم انها دخلت
واحنا كنا قاعدين بره مش عارفين نعمل ايه
عشان كده انا بنادي بالمساواه
بينا وبين البنات
ويرايت بأه نعمل حاجه كده زي جمعية رجال وبس
علي فكره انا بهزر
محدش يخدها بجد
انا عارف

bedo said...

سلام عليكم

طبعا تغطية جامدة مش عايزة كلام

وشدي حيلك علشان تدخلي المرة اللي جاية


وربنا يسهل ونعرف ندخل إحنا كمان


وحمد لله على السلامة


وربنا يتقبل


بس

ومستنيين

الباقي

bedo said...

ربنا يكرمك يا منذر

بصراحة كان من الحاجات الحلوة في اليوم ده إني والله إتعرفت عليك


أنا عارف تعبتك معايا للأخر


بس نردهالك يوم لما نشوفك إن شاء الله عندنا في المنصورة




ومرة أخرى

مجهود رائع يا سكوت

ومستنيين بقية القنابل


في الانتظار

سكوت هنصوت said...

انا حاسة ان شكلي وحش قوييييييييييي....كل الناس الحلوة الي هنا دي كانت موجودة اول امبارح..وانا يا حسرة عليا ما شفتش غير تلاتة اربعة منهم..( وش حزين جدا) لا والمشكلة ان كلهم جايين من محافظات..يعني فرصتي اني اشوفهم تاني اصلا ضعيفة..حقيقي خسارة حقيقية..طيب..اسلم عيلكو هنا بقى يا شباب..و اكيد المرة الجاية..هشوفكوا ونتكلم وجها لوجه..

علاء و منذر..بصرف النظر عن مين فيكو الي سلم البطاقة..انا منغيركو انتو الإتنين ما كنتش عملت اي حاجة يومها..وكنت بالكتير قضيت ساعة في الشمس و روحت..بجد مش عارفة اشكركم ازاي..جزاكم الله خيرا..

بن توفيق

الله يسلمك..هو صحيح الجيزاوي نشف ريقنا على الصبح..بس الحمد لله انه بخير..دي لوحدها بالدنيا..اما بقى عن اول سطر في البوست..والي بينفي صلتي و منذر للإخوان المسلمين..فده مجرد تقرير واقع ليس الا...انا كنت ذكرت في البوست ان منذر من شباب الإخوان...وبعدين ابن ناصر صلحلي الكلام و شلته من البوست..فكان لازم انوه على انه ليس أحد اعضاء جماعة الإخوان المسلمين..وانا كذلك لست من ضمن اعضاء او كوادر الإخوان المسلمين..وده فقط منعا للخلط..يعني ليس في التوضيح ما يعيب يا صديقي هو فقط اقرار واقع لا اكثر ولا اقل...

سكوت هنصوت said...

شمس

يا دي النيلة..واحد كمان ما شفتوش يومها اهة.. تحياتي اخي الكريم...و الحمد لله ان كلنا خرجنا منها على خير

هاني جابر

بقى عايز تساوي بينا و بينكم...بعينكو يا رجالة..شوف يا عزيزي فيه علة ان احنا نكون مختلفين في المكانة..عشان تفضلوا انتو برة..وادخل انا جوا..وكمان عشان ربنا يرحمنا من الدماغ الميري..وما ندخلش الجيش...بدأت اشعر ان ربنا كرم النساء عن الرجال بس يا عيني انتو الي مش فاهمين...و الدليل..قالولو

شكرا على الزيارة...وعلى فكرة..انا بقى ما بهرجش..هه


بيدو

اشكرك على الزيارة..و معلش بقى..انا النهاردة اعتذرت بسنه قدام..كان نفسي والله يكون لي شرف التعرف عليكو كلكوا..بس مفيش نصيب..وانا بضم صوتي لصوت سعادتك واشيد بالسيد المحترم منذر..الي اسمة مش منذر ولا حاجة و عامل لنفسة تموية..بفكر اغير اسمي و اخليه فتاكات..لحسن اسمي انتشر اوي اليومين دول..شرفتني يا فندم..وانتظر المزيد قريبا

Anonymous said...

ايه المجهود الجامد ده الحمد لله ان ربنا قدرك علي ذللك ومستنين البوست التاني
تحياتي

كش ملك said...

جزاكى الله خير

تغطية رائعة


والله انا كنت فرحان اوى لما كنت بعرف ان فى ناس بيتحركوا مع المحكمات العسكرية بغض النظر عن اى انتماء ليهم

بجد ربنا يكرمك وجعلة الله فى ميزان حسناتك



وكان فعلا والله يوم اكتر من رائع

كش ملك said...

اكيد يا اسلام الناس افتكروا انهم من الاخوان

او انها عشان لما تظهر الحقيقة ميقولوش انهم ميولهم اخوانية

انت عارف بقه كلام الناس كتير

:)



ولا ايه يا سكوت

سكوت هنصوت said...

فااااااارسسسس

اهلاااااااااااا....ايه يا عم...ولا حس ولا خبر..ما ولا سلام ولا كلام...كل ده..ماشي ماشي..سماح بس عشان عرفت انك نجحت..شكرا على الزيارة العزيزة

محمد

انت قلت اهم كلمة يا محمد..ربنا يجعلة في ميزان حساناتنا...فكرتني بسؤال سألتهولي صحفية في المصري اليوم..لما قالت انتم متخيلين ان تحركاتكم دي ممكن تجيب نتيجة..قلتلها معذرة الى ربنا..ولعلهم يهتدون..أما بقى عن مسألة الإخوان..فالإخوان لهم منهجية قد نتفق او نختلف معهم..لكن ليس كل من ليس مع الإخوان ملام لكونه ليس منهم..من حقي ان ابرز عدم اخوانيتي و الا يؤثر هذا على معتقدي او ايماني بالله....إذا انا مسلمة..و اسعى ان اكون ناشطة في مجتمعي ولا انتمي لجماعة الإخوان المسلمين. ( نقطة في اخر السطر)
شرفتني بالزيارة يا اخي العزيز

Anonymous said...

Ιt is not my fiгst timе to visіt this site, i am visiting
this web page ԁaіlly and taκe good facts from here eѵerydaу.


my web sitе pwap.ca