Friday, October 12, 2007

كل سنة وانتو طيبين

المدونة وحشتني قوي

شهر بحالة وانا تقريبا مهملاها تماما

بالعافية بفتح, و كتير بكسل

و ماكانش عندي وقت اقرا او اكتب حاجة عليها

كمان انشغالي بالعمل في موقع ابناء مصر

خلاني اهملت مدونتي , الي كانت متنفس رائع بالنسبة لي

عشان اخرج فيه اي فكرة تخطر على بالي

منغير ما اقعد افكر لها واحسب لها....نوع من الفضفضة المجانية

و برغم انه لسة فاضل يوم على العيد...لكن حبيت اشارككم معايا يوم لطيف جدا

قضيتة مع مجموعة من المدونين الأكثر لطفا

منذ فترة, دعيت الى حفل إفطار تنظمة الدينامو عاليا حليم

مع الأستاذ خالد الصاوي في ساقية الصاوي.....

و بالأمس عقد هذا الإفطار....الحاضرين كانو نخبة من الطف المدونين

من مختلفي الإتجاه والأفكار, من مدونين لمدونات شخصية

و خواطر, و مدونات فنية, و بعض المدونين السياسيين......

تباين الإتجاهات .... والأفكار كان اكثر من رائع

كان شئ لطيف جدا ان الواحد يتعرف انسانيا على ناس

معجب بيهم من بعيد من خلال كتباتهم....و يكتشف فجأة انه كإنه عارفهم من زمان

محمد صاحب مدونة غمض عينيك, و زوجتة سارة و بنتة الجميلة فرح

بنتة دي بقى..بونبوناية صغيرة....الطف بنت شفتها في حياتي

هادية جدا...و بتروح لأي حد يشيلها, ولا سمعنالها صوت, ولا حسينا بيها..نسمة يا ناس

المفاجأة التانية بالنسبة لي, كانت رشا صاحبة مدونة مكان في القلب....

شخصية مشعة الى اقصى مدى تأسر الحاضرين دونا عن إرادتهم

و عندها بسم الله ما شاء الله...ولدين زي القمر

بس شياطين...محتاجين سبعة الاف جول من الطاقة عشان تلاحق عليهم...

ياسمين اختهم على النقيض تماما....سوسة...بس هادية جدا

شعلة النشاط عاليا حليم صاحبة مدونة عندليبيات..قامت بدور المضيفة على اجمل وجه

كانت حريصة على ان الكل يكون راضي و سعيد...و مستمتع بوقته..
....
وينكي...اكتشاف جديد من اكتشافات الطاقة البناءة..كتلة من المرح والصخب

و حب الحياة...شخصية تتحب..وتفوت عالقلب من اول لحظة

كانت اجمل فرصة ان مجلسي يجي جنبها في الإفطار

منى صاحبة مدونة نبضات...نموذج كامل للأنثى الرقيقة

رقيقة الصوت, مرهفة الإحساس...حسيت وهي بتتكلم

ان كل كلمة خارجة من قلبها بجد...حتى لما بتسلم علينا..سلام بجد

من القلب..مش مجرد هز للرؤوس....

أشرف حمدي رسام الكاريكاتير والمدون امتعنا بخفة ظل و حضور

و شرفت اني اتعرف على زوجتة الرقيقة هند

من ضمن الحضور ايضا كان مندهش صاحب مدونة رسالة من تحت الماء

و حورس صاحب مدونة جيفارا مات و أمة الله صاحبة مدونة إيميز و مصطفى الحسيني صاحب البوابة

كان من الحضور ايضا فاطمة واحمد...و هما من غير مدونين..لكن ليهم نشاطات مدنية

و غادة ايضا من غير المدونين..لكن حضورها كان إثراء للجلسة لإنهم برغم

انها من غير المدونين....لكنها من متابعي المدونات بشدة

أخيرا بقى....خالد الصاوي نفسة...

اولا فوجئت انه مش طويل زي ما كنت متخيلة....بالعكس..طلع متوسط القامة الى حد بعيد

رشيق...و مهذب الى اقصى درجة

رجل محترم بحق...جاء في موعدة بدقة...

سلم على الجميع في اماكنهم, لف على الترابيزة واحد واحد وواحدة واحدة

عشان يسلم على كل واحد بنفسة....

حوارة شيق, ولا يوجد اي شبهة تكلف في حديثة...لم اشعر للحظة

اني مع شخص مشهور او مدرك لنجوميتة

بعد الإفطار....الي تعارفنا فيه على بعضنا البعض بسرعة

انتقلت الجلسة الى ركن جانبي...و بدأنا نتجاذب اطراف الحديث

كالعادة, ونتيجة لوجود صاحب البوابة...تحولت الجلسة الى حوار سياسي بحت

و كان معظم الحديث سجالا بين الصاوي, والذي اعرب عن مواقفة السياسية بجرأة و قوة

و احترام شديد, للأخر وللإختلاف....و بين باقي المدونين

الي كل منهم يحمل رؤية سياسية مختلفة...او لا رؤية على الإطلاق

اسهبنا و اطلنا في الحلول السياسية للأزمة الراهنة..,احتمالية قيام ثورة

او عصيان مدني على اقل تقدير, و استمر النقاش قرابة الساعة و نصف

ثم إضطر الصاوي ان يرحل لإرتباطة بتصوير

ثم جلسنا نحن المدونين سويا ....نتجاذب اطراف الحديث قرابة ساعة اخرى

و روحت وانا في قمة السعادة...شكرا لكل من حضر..وكل من ساعد عن انجاح هذا اليوم

الصور في سبيلها للتحميل...لا تيأسوا يا شباب
القمرين دول هما ادم ويوسف,..الي هدوا حيلنا من اللعب والجري( ربنا يحميهم يا رب)
خالد الصاوي والمدونون ساعة الإفطار
الي في الوش هو اشرف حمدي و بجواره زوجتة ثم وينكي)ا الحاضرين من اليمين الى اليسار ( ياسمين بنت مكان في القلب, الي لابسة احمر تبقى فاطمة والي وراها وينكي
أحمد مش مدون صاحب البوابة الطويل ثم مندهش المندهش)
والشقية الي قاعدة على ركبها تبقى مكان في القلب أوشة)

18 comments:

انكسارات .. احمد البوهى said...

فى انتظار عود حماسى لمدونتك الجميلة الراقية
......

خلال قرايتى للبوست حسيت انى كنت معاكو حقيقى وبقى عندى فضول كبير انى اشوف الصور..مستنى الصور


......
كل سنة وانتى طيبة وعيد سعيد عليكى

سكوت هنصوت said...

كل سنة وانت بألف خير و سلامة يا انكسارات....بجد بتمتعني بحضورك و متابعتك....و بفتقد غيابك بشدة..

الصور في الطريق ان شاء الله

Monzer said...

مش هاقرا البوست من غير الصور
مفهوم ولا لا

وكل سنة وانتى طيبة

Rania Lelah said...

لو و الله يا مها
بجد احساس جميل جدااااااا
يا رب يسعدك كمان و كمان
و مبروك الصور اخيرا نزلت؟؟
تحياتى
و النيو لوك الجديد بتاع المدونه احسن من الاول

horas said...

كان يوم جميل فعلا
كل سنة وانتى طيبة

nosha said...
This comment has been removed by the author.
ابن رشد said...

فاتني هذا اليوم الجميل اللي فية اجمل المدونين و الشخصيات بس اكيد هشوفهم كلهم واحد واحد في فرصة تانية
و كل سنة و انتي طيبة

Amr Ahmed said...

كل سنة وانتي طيبة
عيد سعيد

Anonymous said...

كل سنة وانتوا بالف خير وسعادة وربنا يارب يديم المعروف مابنا يارب يارب ونكون دايما في سعادة وهنا وشكر جامد ليك علشان انا شفت ولاد اقرب حد ليا اوشا ربنا يحفظهم ليها من كل شر يارب ماشاء الله عليهم الله اكبر

سكوت هنصوت said...

منذر...

شكر خاص ليك يا بطل على الصور

اليوم كان فعلا ناقصك...

رانيا

اخيرااااااااا الصور نزلت

واليوم كان فعلا ناقصك...النيو لوك بتاع المدونة عشان انا مش قادرة اقرا على اللون الإسود..لكن لو عليا اخلي الحداد على طول

حورس

استمتعت بحضورك بشدة...

و ارجو دوام التواصل

شمس

فعلا اليوم فاتك...

أوشا كانت دايما في سيرتك...

المرة الجاية لازم تيجي ان شاء الله

عمرو أحمد

وانت بألف صحة و سلامة

شكرا على الزيارة والسلام..لك غيبة يا عمرو


قلوب حائرة...ياااااااااه ادم و يوسف يجننوا

امال لو كنت شفتيهم... كارثة بشرية

تبقى مش عارفة لما يعملوا مصيبة تعيطي ولا تاكليهم بوس...

مالهمش حل...ربنا يبارك فيهم و يحميهم يا رب

غمض عينيك said...

اليوم كان جامد جدا يامها

انا انبسطت اوي وفعلا قضيت وقت جميل

وسعدت اكتر بمعرفتي بيكي

انا حسيت اني اعرفك من زماااان

عايزين اليوم دا يتكرر من فترة للتانية

ياريت والله

تحياتي ليكي

محمد سمير

فى القلب said...

ياااااااااااااااااا قمرررررررر

متحرمش منك يا جميل

اسمحيلى بقه اوصف حضرتك

عود فرنساوى رقه متناهيه توهج غير عادى ثقافه عاليه هدوء بعمق نظرات جذابه ثاقبه استشعار للأخر بحساسيه ثقه فى النفس
و أكثر و أكثر كل ده انت يا جميل

أحنا كده كلنا جنبك و لا حاجه

سكوت هنصوت said...

غمض عينيك

وانا كمان حسيت اني اعرفك و اعرف سارة من زمان...إحساس جميل قوي ان الإنسان يحس ان الزمن يختزل فجأة في لحظات قليلة....و نقصر مسافات و اعوام, و نشعر لوهلة ان من نراه ليس غريبا و إنما صديق قديم...و كأن اللقاء ليس بداية تعارف, و إنما استكمال لحديث بدأ منذ سنوات و فقط تأخرنا في إستكماله...

سعدت و شرفت بالتعرف عليك و على عيلتك الجميلة في هذا اليوم يا محمد

سكوت هنصوت said...

أوشا ( مكان في القلب)

مش سايبالي حاجة اقولها يا أوشة...

أخجلتيني بلطفك و رقتك, انا حاسة زي ما اكون اعرفك من زمااااااااااان قوي...نفس الإحساس الي محمد سمير بيتكلم عنه....حالة من إختزال الزمن مريت بيها.

من البشر أناس يشبهون الماس, من يجدهم فقد وجد كنز لا يبلى, وانت منهم...(أحسبك كذلك والله حسيبك)

بإذن الله نلتقي قريبا لنستمتع بمثل هذا اليوم الجميل مرة اخرى...

دمت في خير يا جميلة

شــــمـس الديـن said...

ماشي يا مها عملتي الدنيئة معايا و مش قولتيلي

بس ملحوقة فعلا

عامة ان شاء الله تتعوض و كل عام و انت بخير و صحة و سعادة و يا رب اشوفك قريب و ابقي بلغيني بالتطورات و انا و الله لو استطيع لن ادخر جهد في اني اقدم اي شئ

خالص التحية لك يا عسولة و كل سنة و انت طيبة رغم انها بعيدة و ياريت تقري التعليق دا لانه علي تدوينة قديمة

سلاميا قمر

سكوت هنصوت said...

شموسة

يا بنتي دنيئة ايه...انا اتعزمت على الفطار ده...بالصدفة البحتة

عموما ملحوقة..ان شاء الله المرة الجاية

لازم الكل يحضر ان شاء الله...و لازم الناس الحلوة دي تعرف بعض...

اللقاء القادم هيكون ان شاء الله اجمل بيكي

safa7_karmooz said...

يا بختكم...:(

مندهش عزمنى يومها ...او قبلها بس كان صعب ان اخر يوم او يومين افطر برا مش مع العائلة ...:(

بس واضح انه فاتنى الكتيييييييييييييييييير اوى اليوم ده..:)

نبضات said...

سكوت حنصور
ازيك شكرا على كلماتك الرقيقه على نبضات وربنا يخليكى
مدوناتك جميله جدا وانا سعيده بمعرفة شخصيه مثلك وسعيده بمعرفة مدوناتك
وعلى فكره اليوم كان تحفه واتمنى انه يتكرر وياريت يكونبرده فى الساقيه لانها مناسبه جدا لعالم التدوين الجميل
وعلى فكره البوست جميل اوى اللى كتبتيه عن يوم الفطار
تحياتى لك