Friday, October 26, 2007

التاج التاج

تاج جديد جالي المرة دي من الجميلة رانيا, و شمس الزناتي
زملائي الأعزاء في مجموعة أبناء مصر
نخش في المفيد..و نرد على التاج
****************************
لو قالولك تختار اي عصر او عهد تعيش فيه تختار اي عصر و ليه؟؟؟

ممم...سؤال لوذعي..بما اني من كارهي التغريب, فأنا هشعر بغربة في أي عصر غير عصرنا ده
لكن لو عندي فرصة اني اختار عصر معين, فأظن اني هختار عصر النبوة في أخر خمس سنوات من حياة النبي,
و هخد معايا ورقة و قلم فيها كل الأسئلة الي ممكن تخطر على بالي عشان اعرف إجابات نهائية ليها
هعرض على الرسول كل الشؤون المحيرة الي عمالة تلف في نافوخي و مش عارفة ان كانت صواب ام خطأ
هتعرف على سيدنا عمر بن الخطاب, و اكتب عنه مجلدات كاملة..ادفنها في الرمال حتى تحفظ للعصر الحديث
فنعرف إجابات كل الأسئلة المحيرة في حياتنا..

أول اولوية في حياتك عيلتك ولا شغلك ولا صحابك؟؟

من الصعب ان احكم...كلهم اولويات..انا بعتبر الأصحاب من العائلة
لإني اخترتهم بنفسي, و على مزاجي الخاص
أعتقد ان المسألة تخضع لنوع الأولوية..يعني لو شغلي في ورطة ولا عيلتي في ورطة..يتحرق الشغل
المهم العيلة..لكن لو هخرج مع صحابي ولا هخرج مع اقاربي, لا يبقى صحابي اولى
حسب الظروف يعني

إيه اكتر حاجة بتحبها في رمضان؟؟؟؟؟

رجعت بقى لذكريات رمضان, وصوت الشيخ رفعت, القطايف والكنافة الي بتتعمل في الشارع
وانا بنبهر بالكنافة الي عمالة تتلف عند الكنفاني...الأطفال الي بيفضلوا يجروا في الشارع لحد الفجر
الزينات الي بتتعلق بين البيوت, يفضلوا العيال طول الليل يظبطوا الحبل من البلكونات عشان يعلقوا الفانوس
المدارس الي كنا نروحها الصبح في قمة النشاط عشان متسحرين قريب وعلى اخر اليوم نبقى زي الرنجة
مقددين من الجفاف...صلاة التراويح الي نروحها عشان نفرح اهالينا اننا واقفين جنبهم واحنا مستنيين الفرصة عشان نزوغ
و نجري بين المصلين و نستغل ان هما مش قادرين يخرجوا برة الصلاة و يزعقوا
كفاية رغي بقى عن رمضان...لحسن هعيط

الي بيبوظ الحكام نفسهم ولا شعوبهم ولا الحاشية المقربة؟؟

سؤال معقد شوية, يرجعنا لفرضية البيضة ولا الفرخة...
الحاكم هو إفراز الشعب, فإن كان الشعب خانع كان الحاكم طاغي, وإن لم يثر الشعب على الظلم
بغى الحاكم و تجبر, لكن إصلاح امر الشعب لا يتم إلا بيد الحاكم الذي يملك مقاليد الأمور
الحاشية هي وسيلة الإتصال بين الحاكم الفرد والشعب, لذا غالبا ما تكون من عينة الشعب,
فإن كان الشعب جبانا كانت الحاشية خسيسة, و إن كان الشعب حرا و أبيا كانت الحاشية شجاعة
وهكذا...هذا سؤال يحتاج الى مقالات لإجابته وليس تاج

مين أكتر إعلامي بتحترمة؟؟؟

طارق السويدان و حمدي قنديل

لو نفسك تشتغل شغلانة تانية غير شغلك نفسك تبقى إيه؟؟؟

ياااااااااااااااااه كان نفسي ابقى حاجات كتيرة قوي
كنت احب ابقى دبلوماسية في الخارجية
و كنت احب ابقى مترجمة فورية, ومترجمة محترفة
وكنت احب ابقى مدربة كلاب
و مربية خيول
و كنت احب ابقى مديرة لمزرعة بها الكثير جدا من الحيوانات المختلفة
كنت احب أبقى أخصائية علاج طبيعي
و محامية
و متخصصة في الأدب العربي والعالمي
كنت احب ادرس فلسفة
و علم نفس و منطق
كنت احب اجيد ستة لغات و أعمل في مجال السياحة
مرشدة للأثار العربية والإسلامية
مم...كفاية كده مؤقتا

إيه تاني بلد تتمنى تعيشي فيها بعد مصر؟؟؟

عمري ما اتمنيت اعيش في أي بلد غير مصر, و عمري ما ظنيت للحظة اني ممكن اكون
سعيدة خارج مصر, بل بتضايق لما بخرج برة مصر عشان بحس انها تعبانة و مرهقة قوي
و مش قادرة ازعل منها, وهي ممالهاش ذنب
انا بحبها كده, زي ما هي, منغير مبررات, ولا أسباب..بحبها برقة و بعنف و على إستحياء

أوصفي ترتيبات اجمل فرح تحضريه؟؟؟

مم...الأفراح كلها مملة في العموم, لإنها بقت تقليدية والراجل الرخم بتاع البوفية
الي تحس انه عايش في علاقة من طرف تالت مع العريس والعروسة...
واحد بيحب واحدة و هو جاي يقعد معاهم كده.. بس أجمل فرح
هو الي بيجمع بين اتنين بيحبوا بعض ...و اهاليهم حوليهم فرحانة
...
بتراعي كلام الناس والقيل والقال, ولو اه قولي ليه؟؟

نعم اراعي كلام الناس والقيل والقال, لإني مؤمنة ان الإنسان
لا يمكن ان يعيش ان اصطدم بالمجتمع
والمجتمع متمثلا في مجموعة من الأعراف والقوانين تحدد طبيعة التعاملات بين البشر
فتكسب المرء اهم ما يملك وهي السمعة..والإسم والتي بيها بيتعامل الشرفاء
.
لو صحيت من النوم ومالقتش الموبايل ولا الكومبيوتر ولا التلفزيون والتواصل بالحمام الزاجل هعمل ايه؟؟

اكيد مش هتبسط, لإن مفدرات حياتي مش هتكون موجودة...لكن هتعايش

السعادة هي؟؟؟؟

الرضا عن النفس و عن الحال

عندك أمل؟؟ أسبابك؟؟

دائما عندي أمل, اما لما, فلإن الأمل هو ما يدفع المرء للأمام
بالأمل تتحرك الأمم, وباليأس تهزم الشعوب

لما بتحب الهرب من كل شئ بتروح فين؟

لو عندي القدرة و الفرصة, هروح اقعد ادام اي بحر مفيهوش ناس

امتى مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟

كتييييييييير, تقريبا كل يوم, أكتر أغنية بتعبر عن إحساسي ده هو كلام على سلامة و صوت وجيه عزيز
في غنوة قلت أبص في المراية
.
لما بتعمل عمل إجتماعي بيكون ايه هو دافعك الأول؟؟

أولا و أخيرا وجه الله, بقول يمكن دي تكون الفسيلة الي تنقذني من النار
و عشان اكون تركت للجيل الي بعدي متر جديد عُـــبِّـــدَ على طريق الخير

بتشرب سجاير؟؟ إيه شعورك لو شفت ست بتشرب سجاير؟

انا ما بشربش سجاير والحمد لله و عمرها ما خطرت على بالي
ولما بشوف ست بتشرب سجاير ببقى عايزة اضربها, بحس انها غبيه
بتقتل روحها بإيدها, و بتحدد حياة ابنها او بنتها منغير اي مبرر محترم..
انا عامة بشعر ان المدخنين أشخاص غير مسؤولين وضعاف الإرادة..
و بتعجب إزاي مش قادرين يخدوا موقف من مسألة شديدة الوضوح بالشكل ده
..
بتعرف إيدك اليمين من الشمال ازاي؟؟

سؤال عبيط بصراحة, ولو جاوبته ابقى انا كمان عبيطة

إيه اكتر الة موسيقية بتحبيها؟؟

انا بحب الناي قوي, لإنه حزين جدا وشرقي قوي
كل الالات الوترية بالنسبة لي حساسة قوي, وفيها رقي, العود القانون
كمان الطبلة هي الشريك الرئيسي في الزيطة

في رأيك ليه الذوق والنخوة اتعدموا؟؟؟

لإنهم اتعدموا من عند الحكومة, انا مؤمنة جدا بالقاعدة الي بتقول ان كان رب البيت بالدف ضارب
فشيمة اهل البيت كلهم الرقص
يعني الحكومة لما بدأت سياسة ضرب المواطنين
بقوا الناس بيضربوا بعد في الشوارع
ولما الحكومة جت في المظاهرات و بدأت تهاجم النساء بصفة خاصة و تتحرش بيهم جنسيا
لقينا تاني سنة احداث وسط البلد والشعب بيتحرش بالبنات في الشارع في العيد
وهكذا...لما الحكومة تبقى شريفة و نزيهة
الشعب بالتبعية هيبقى شريف و نزيه

ايه الحاجة الي لو حصلتلك هتبقى سعيد قوي؟؟

لو استطعت كمان عشرة سنوات ان احتفظ بكل الصداقات التي انتقيتها و اخترتها
حولي, و في أسرتي

تختاري يبقى عندك ارض زراعية ولا كام عمارة ولا اجنس عربيات ولا فلوس في البنك؟؟

انا شخصيا افضل الأرض الزراعية, انا بحب الفلاحة بطبعي
اهي فرصة ازرعهم حشرات
. :-))))))

البحر ولا النيل؟؟؟؟
البحر
عاقلة ام مجنونة؟؟؟
عاقلة جدااااااااا
تقري كتاب ولا تتفرجي على فيلم؟؟
الكتاب
تمرري التاج ده لمين
تامر حنتكلم

حين البأس
صاحب البوابة
في الصميم
بحبك يا مصر
ابن ناصر
انكسارات
شاعر إخوان
مكان في القلب
ولأ حد عايز يخده

21 comments:

Rania said...

هاى يا مها
اجابتك عاقله بجد زيك
مرسيى على قبولك التاج يا قمرى
تحياتى

shams said...

بصراحة اجاباتك عاقلة جدا و موضوعية و اللي عاجبني فيها التركيز الشديد في اختيار الاجابة الامثل
و حلو اوي انك تخدي قلم و ورقة حتى في عصر الرسول علية الصلاة و السلام
بس ايامها مكنش فية اقلام كله ريش

shams said...

و بعدين ينفع كدة سركتى المدخنين خالص الناس تقول علية اية بعد كدة

shahy said...

يابنتي ابقي اكتبي السؤال بلون تاني عيني وجعتني

انا سعيدة جدا جدا بمعرفتك ويارب تدوم صداقتنا
دة على اساس اني خلاص اعتبرتك صديقتي

اما عن التاج فأجاباتك كلها عاقلة وحلوة بس فعلا انتي كنتي عاوزة تشتغلي كل الحاجات دي

تحياتي يا صديقتي

الفاتح اليعقوبي said...

السلام عليكم
اجمل حاجة عجبتني حكاية عصر الرسول صلي الله عليه وسلم
والورقة والقلم
طب ليه لقد قال تعالي :(واعلموا ان فيكم رسول الله)0
يااستاذة هو عايش بينا سنته وبهديه وعلي فكرة السنة واضحة وجميلة جدا وسخر الله لها من يحفظها وليس كما يدعي بعض الناس انها حرفت ولو قرانا ازاي الناس دي جمعت الاحاديث وصنفتها هانعتقد انهم كانوا بشر غير البشر الامام البخاري ومسلم والامام احمد وغيرهم

يقول تعالي :(انا نحن نزلنا الذكر وانا له لحافظون)
الذكر هو القران والسنة
فالقصة كبيرة للغاية ولو اردتي ان تسالي الرسول عليه الصلاة والسلام فارجعي لكتب السنة والاحاديث الصحيحة
وكل تاج وحضرتك بخير
والسلام

قلوب حائرة said...

هاي عليكي يامها ياجميلة عاملة ايه تعرفي اجاباتك كانت متوقعة قوي من خلال قعدتنا الصغنونة مع بعض قدرت اتوقع كتير من تضرفاتك سعدت قوي بالوقت معاكي واجابات صريحة ومنطقية جدا

سكوت هنصوت said...

رانيا

شكرا على التاج في المقام الأول...

و تسلمي على الزيارة الغالية

ما تحرمش من ذوقك ابدا

سكوت هنصوت said...

شمس

انا ما رضتش اقول لاب توب ولا نوتباد عشان الشحن و القلق...

كفاية ورقة وقلم..على الأقل ممفهومة

عن المدخنين بقى..فمعلش...يا بخت من بكاني و بكى عليا, ولا ضحكني وضحك الناس عليا..

سكوت هنصوت said...

شاهي الجميلة

أحلامك اوامر..وطلباتك تحت التنفيذ

انا كمان سعدت جدا وشرفت بلقائك و بصحبتك...و أتمنى ان صداقتنا دي تدوم للأبد..

انا بالفعل كنت عايزة اشتغل كل المهن دي..بس على فترات مختلفة من عمري..

ده دول بس نص المهن الي كنت عايزاها

الباقي هبقى اقولهولك بس بيني و بينك

سكوت هنصوت said...

عزيزي اليعقوبي

تمتعني دائما أحاديثك...لم أشكك لحظة يا عزيزي اليعقوبي في وجود السنة...


لكن فهم السنة, وما وراء النص هو ما اختلف الناس عليه...

اعلم تماما ما تم من مجهود في ما يتعلق بجمع السنة..

لكن يا صديقي العزيز...ما اقتتل الصحابة والتابعين الا في تفسير الكتاب والسنة...

انا لا اطالب بالمرة بإهدار السنة, وإنما تمنيت لو استطيع ان اقابل رسول الله فأحدثة مني اليه عما استغلق علي فهمة نتيجة لتغير معطيات الزمن..

لا أظن ابدا ان ما اقول فيه اي محاولة لإهدار السنة او تركها...

شرفت بمعرفتك و بمرورك..

سكوت هنصوت said...

قلوب حائرة

انا كمان سعدت بشدة بالتعرف عليكي و بلقائك...

امتعني حضورك و جاذبيتك..و شكرا على الزيارة والمرور

3abdo me7tas said...

ممكن نقول إنى أول مرة أدخل المدونة بتاعتك
طبعا كلنا عارفين ما مدى أهمية التاج وما مدى خنقة التاج
انا بعتبر التاج كويس فى حالة انى بقراه عند حد لانى بعرفه أكتر وأكتر وفعلا التاج بتاعك عرفت أحلل شخصيتك يعنى مش أوى بس عرفتك كويس من أول مرة أدخل فيها هنا
اما التاج خنقة لما حد يبعت ليا تاج لانى مش عارف أقول ايه ولا ايه وبيبقى عايز وقت والواحد بيخاف من كل كلمة بيكتبها فيه لانها بتبقى محسوبة عليه
بس عن نفسي انا بخلصة فى يوم واحد يوم واحدج ايه فى قعدة واحده :) وبجاوبة بكل صراحة وبكل ثقة كمان

ربنا يكرمك يا رب وإبقى تعالى زورينا
تعالى بس شوفى اللى انا عايش فيه
:D
بالتوفيق

Doba said...

سعدت كثيرا كثيرا بلقائك وباجاباتك المتوقعة من خلال شخصية ذكية وعاقلة وامورة زيك

ربنا يوفقك ويحققلك كل اللى بتتمنيه
تحياتى
هبة

Ammar Jarrar said...

اجابات جميلة
تحياتي

عاليا حليم said...

أزيك يا مها عاملة أيه ؟ أجاباتك كلها جميلة اجابات تجمع بين الخيال و الا تقليدى و بين أنسانة واقعية أكتر حاجة عجبتنى فيكى انك أتنمنيتى ترجعى عصر النبوة و تاخدى معاكى ورقة و قلم و كمان ان السعادة عندك هى الشعور بالرضا

تحياتى

غمض عينيك said...

ايه ياعم الاجابات الجامدة دي
تعرفي اني زيك في موضوع الشغل ده
لو لم اكن مهندسا لوددت ان اكون دبلوماسيا
لان الدبلوماسي لازم يكون عنده مهارات كتير وشخصية متميزة بتعرف ست لغات وفلسفة وادب ويكون رياضي وتقريبا معظم الحاجات التانية اللي كنتي تحبي تكونيها
يعني باكدج كاملة
اخبارك ايه مها

محمد سمير

غمض عينيك said...

اه بمناسبة رمضان
تفتكري الحاجات اللي بتقولي عليها دي لسه موجودة؟
اشك

شهيدة said...

سلام يا مهى

ازيك؟

"حال شما چطور است؟"

لسة فاكرة الجملة دي؟

المهم بالنسبة للتاج ده.. اجاباتك حلوة أوي وانا بحب فكرة التاج عشان بتعرف الناس على بعضها.. يعني ممكن تبعتيها لناس ما بتعرفيهومش عشان تتعرفي عليهم أكتر من خلال اجاباتهم

عجبني جوابك عن الشغل اللي تحبي تشتغليه يعني مش مخلية شي من شرك

ورأيك في البنت اللي بتدخن ده صحيح مية في المية ولو مكانك انا حقول كلام أقصى من كدة

وشكرا يا ستي على العزومة على التاج تعبتي نفسك ليه ... :P
على كل سماح المرة دي
مش حطول عليكي اكتر من كدة

يللا سلام

سكوت هنصوت said...

عبدة محتاس

ممممممم تعليق لوذعي

مفهمتش منه رأيك في إجاباتي

انا كنت لسة عندك و شفت وصلة الجيم الي هناك...عضلاتي وجعتني من النظر فقط
مش هقولك بقى من اللعب

شكرا على المرور وابقى كررها


------------------

دوبة الجميلة

انا كمان سعدت اكتر بلقائك..و بهرت بسعة اطلاعك في عالم الأبراج
والمجتمع والناس

يا رب اشوفك تاني...و ربنا يديم بينا الصداقة دائما يا رب

---------------------------


امر جرار

اشكرك اخي الكريم و شكرا على المرور والزيارة

-------------------------

عاليا حليم الحالمة ابدا و الرومانسية حتى النخاع
شكرا ليكي يا جميلة على المرور والزيارة الكريمة..اسعدتيني بحق
تحياتي

---------------------------
غمض عينيك

محمد سمير ازيك يا صديقي العزيز

كل ما افتكر اليوم الجميل بتاع الصاوي
وافتكر فرح و سارة...توحشوني اوي

واتمنى اشوفكوا...يا ترى عامل ايه

انا كنت كل يوم بحلم بشغلانة شغل...يمكن عشان هواياتي كانت كتير قوي
نسيت اكتب ان كان من ضمن احلامي اني ابقى امينة مكتبة, و عندي محل تأجير عجل...
عن رمضان بقى...مافيش من ريحتة زمان...غير الزحمة والناس والأكل
لكن الطقوس والعادات خلاص اختفت..و سابت وراها ريحة عطرة من الذكريات الجميلة...يا بختنا بيها..

شكرا على الزيارة يا محمد و سلامي للعائلة

---------------------------
شهيدة

اخيرا فهمت انت كنت بتقولي ايه

بصي بقى...عشان خاطر الغلطة الشنيعة دي

التاج ده رايحلك مخصوص لوحدك في تعليق خصوصي..و منتظراكي تيجي تخديه..ولما ينزل هكون ان شاء الله اول المعلقين

تحياتي يا قمر

inksarat said...

لو نفسك تشتغل شغلانة تانية غير شغلك نفسك تبقى إيه؟؟؟

ياااااااااااااااااه كان نفسي ابقى حاجات كتيرة قوي
كنت احب ابقى دبلوماسية في الخارجية
و كنت احب ابقى مترجمة فورية, ومترجمة محترفة
وكنت احب ابقى مدربة كلاب
و مربية خيول
و كنت احب ابقى مديرة لمزرعة بها الكثير جدا من الحيوانات المختلفة
كنت احب أبقى أخصائية علاج طبيعي
و محامية
و متخصصة في الأدب العربي والعالمي
كنت احب ادرس فلسفة
و علم نفس و منطق
كنت احب اجيد ستة لغات و أعمل في مجال السياحة
مرشدة للأثار العربية والإسلامية
مم...كفاية كده مؤقتا

ـــــــــــــــ
انا مستنى اعرف الباقى
انا حاسس ان لسه فى كتير

ــــــــــــــ
ربنا يديم عليكى صداقاتك
ويكرمك

و....لكى تحياتى

Anonymous said...

Spot on with this writе-uρ, I absolutely feel thiѕ web site needs а lot mοгe attention.
Ӏ'll probably be back again to read through more, thanks for the advice!

My blog ... haine Copii