عن اخبار مرعي

محمد مرعي

الطالب بتاع كلية الطب البيطري الي كان بيعمل تطوعا مترجما لجيمس بك

الصحفي الأمريكي في تغطية احداث المحلة

محمد كان مسجون في سجن برج العرب في إسكندرية

مع المتهمين جنائي, و ماحدش كان عارف عنه حاجة

لحد ما بالصدفة مركز هشام مبارك عرف بوجودة

الأستاذ خالد علي من مركز هشام مبارك الحقوقي

بلغني امبارح ان محمد عمل إضراب عن الطعام عشان ينقل من عنبر الجنائي

ويتحول لعنبر السياسي

و ان اخيرا تمت الإستجابة لإضرابه ونقلوه سياسي

ودي في حد ذاتها حسب كلاام الأستاذ خالد خطوة إيجابية لإن معاملة السياسي افضل من الجنائي

حاجة غريبة قوي....لما إسراء اتسجنت وخرجت من المعتقل

كانت عمالة تشكر المسؤولين على انها بنت واتصانت

يعني بتشكرهم ان الحمد لله محدش اتعرض لشرفها ولا حاول يعتدي عليها او يغتصبها

كانت بتصلي كل يوم شكر لله انها خرجت بنت من السجن

و دلوقتي احنا بنحمد ربنا ان محمد مرعي خرج من الجنائي للسياسي عشان المعاملة افضل

الحمد والشكر لله في السراء والضراء

بس يعني لما نوصل للمرحلة دي من الذل

نوصل اننا نقبل الذل وراضيين بيه, و بنحمد ربنا ونشكر فضلة انه لحد كده بس

اه يا بلد مالهاش عزيز ولا غالي

قد كده بقينا ضعفا وهانت علينا روحنا

معلش لك الله يا محمد يا مرعي

ولك الله يا مصر.....

محمد مرعي مازال في سجن برج العرب

الي حابب يزورة من اجل الدعم النفسي والمعنوي يقولي

و بحاول حاليا اجيب تليفون اهله عشان نحاول نتواصل معاهم نفسيا و معنويا

جايز نوفيهم حقهم

هشوفكو يوم الخميس الجاي ان شاء الله

تحديث: اولا فيما يتعلق بمحمد مرعي

احنا عرفنا هو في الفرقة الكام وجبنا جدول محاضراته

محمد من سكان ميت حبيب بسمنود

للأسف معرفناش نجيب عنوانة من شؤون الطلاب

شؤون الطلاب قالوا لرانيا زميلتنا في ابناء مصر وهي من سكان المنصورة

ان السجن بعت يخطر الجامعة بإن الطالب مسجون وهيتعمله لجنة خاصة

وهشام مبارك قالوا انهم عرفوا بوجودوا في السجن بالصدفة

وان السجن رفض يوديه الإمتحان يوم السبت

معرفش بقى معنى الكلام انهم رفضوا يعملوله لجنة خاصة ولا ايه بالظبط

على كل انا بتابع مع هشام مبارك وان كنت الحقيقة مش عارفة ايه الي ممكن اعملة

""""""""""""""""""""""""""""""

يوم الخميس القادم الموافق 22 من مايو 2008

هيكون حفل توقيع كتاب مدونات مصرية للجيب

اول خطوة في طريق سعة انتشار الصحافة الشعبية

و جعل كتابات المواطنين مباشرة في إيد القراء

منغير ما يتحكم فيها رئيس تحرير له توجه او كاتب مهم يختار

او بعد سياسي او ديني, كتابات من الشارع وللشارع

كتابات ناس ما اهتمتش مين الي هيقرالها بقدر ما اهتمت تخرج الي جواها

واتاري جواها كنوز, كنوز قدرت في مدة قصيرة تهز عرش وحوش لابدة

و تصحي شعب كنا فاكرينه مات, اتاري لسة فيه دم بينبض

و لإن البركة في الشباب على رأي إعلانات روتانا

فإن اتنين من شعراء المدونين الي في نظري الشخصي من اكثر الشعراء ابداعا

تحولوا من المتفرجين لعالم التدوين الى صناع الحدث

اخذوا زمام المبادرة و حطوا اول طوبة في طريق نشر ثقافة التدوين

استثمروا فكرة روايات مصرية للجيب والي موجهة في الأساس للشباب

و صنعت بحجم صغير كي يسهل حملها و نشروا على غرارها مدونات مصرية للجيب

أحمد مهني (واحب ان اناديه حزين) واحمد البوهي (صاحب مدونة انكسارات)

استثمروا ايام وشهور في نشر الفكرة بين المدونين بشكل شفهي

ثم الإطلاع والتصفح لمئات المدونات سواء الشخصية او السياسة او الفنية والأدبية

و استقروا في النهاية على تقسيم الكتيب الى ثلاث اجزاء

جزء سياسي وجزء فني وجزء شخصي

الفكرة مازالت وليدة, لكنه مولود غاية في الرقة والعذوبة والنقاء

مولود ان لم يحمل صفات الجمال الإبداعية الرسمية من عيون زرقاء وانف مستقيم

ولون مرمري, فهو بالتأكيد يحمل صفات الجدعنة الخالصة بتاعة ولاد البلد

يحمل خفة الدم المصرية وهي بتتريق على نفسها و تضحك لحد ما تدمع

يحمل البعد السياسي الي مش فارق معاه نفاق لإنه مش باقى على حاجة

يحمل التجرد الذاتي لناس بتستعرض حياتها الشخصية على الملأ لكن في السر

بعيدا عن الأقارب والأهل والأصحاب الي لو عرفوا خبايانا يجرحونا

و استبدلوا بيهم عالم افتراضي من القراء مش هيتكسفوا يشرحوا نفسهم قدامهم

الكتاب عبارة عن مشروع طفل عبقري وغاية في الشقاوة وخفة الدم

قادر على جذب مئات الشباب الى شاشات الكمبيوتر او الى المكتبات لمعرفة كلام الشارع

يوم 22 مايو هو يوم هام جدا وخاص جدا لكل مدون

فلو لم يجد انتاجه في هذا الكتاب (الكتيب) فهو على الأقل مشارك

في هذا الحدث لإنه لو لم يدون لما وجد من الأصل مدونات مصرية للجيب

انا شخصيا مليش بوست او تدوينة في هذا العدد

لكن اشعر بشدة ان هذا الكتيب هو جزء مني

يكفي انه يحوي بين طياته الكثير من العالم الذي بهرني

وأمتعني

يا ريت اشوفكو كلكو هناك

الحقوا محمد يا مدونين

محمد صالح مرعي

طالب عمرة 23 سنة في كلية طب بيطري جامعة المنصورة

دي كل المعلومات الي اعرفها عنه

محمد كان ملازم للصحفي الأمريكي جيمس بك الي كان نازل مصر عشان يدرس مدى تأثير الإنترنت على الحراك السياسي في مصر

ممثلا في دور المدونين ونشطاء الإنترنت

جيمس اتعرف على محمد بشكل او بأخر والأخير تطوع انه يكون المترجم الشخصي لجيمس يلف معاه

شوارع مصر وحواريها و قهاويها يحاول يختصرله تاريخ 7000 سنة في مدة قصيرة

و بكلمات اقرب لعقلية الأمريكي المتحمس

جيمس عن طريق محمد تابع الدعوة لإضراب 6 إبريل

ونزل معاه المحلة الكبرى عشان يحضر المظاهرات والوقفات الي دعوا العمال ليها

و فوجئ بالإنفلات الأمني والهيجان الي حصل

و كان شاهد حقيقي و صادق على العنف الأمني المستعمل

اتقبض عليه هو ومحمد من وسط شوارع المحلة

في محاولة من جيمس للحفاظ على حياة رفيقه و مترجمة تمسك بيه ورفض تركه

جيمس حسب روايته شبك ايده في دراع محمد عشان ما يعرفوش يفصلوهم

و بحيلة استطاع العساكر فصلهم لثواني كانت كافية انهم يخدوا محمد على زنزانة تانية

و عرضوا على جيمس العرض الأخير...عايز تخرج اتفضل بس مالكش دعوة بمحمد

في البداية رفض وبعدين ادرك ان العند مالوش معنى

فخرج...و في خلال 24 ساعة كان مسافر على بلده مصرا على دعم المتظاهرين بكل ما يملك من قوى

اما محمد فظل مصيره مجهول لحد ما مركز هشام مبارك بالصدفة وجده ضمن المعتقلين في سجن برج العرب

محمد صالح مرعي

ما نعرفش حاليا هو في الفرقة الكام

السجن رفض خروجه

فيه 24 معتقل تاني مش عارفين ان كانوا طلبة ولا لأ

لا السجن راضي يقول هما مين ولا حد عارف يجيب عنهم حاجة

فين بقى اتحادات الطلاب الي المفروض تسأل عن طلبتها

فين الطلبة الي غايبين وزمايلهم يبلغوا عنهم

لو فيه حد من كلية طب بيطري جامعة المنصورة يبعتلي على الميل

و نحاول نوصل لأهله

أعتقد ان محمد صالح مرعي هو اجدر الناس بالإهتمام في الوقت الحالي

ربنا يرجعه لأهله بالسلامة

اخبار وتحديثات

انا لسة دلوقتي مكلمة المحامية الخاصة بإسراء

و سألتها عن خبر إختفاء إسراء و نادية مبروك وهل هو صحيح ام لأ

و طمنتني ان ده إجراء مؤقت ومعروف لإن البوليس

ما بيفرجش عن الناس بالساهل

هو دخول الحمام زي خروجه....لازم تلف كعب داير شوية ما بين امن الدولة

للداخلية الخ الخ

المهم انا في إنتظار اني اسمع اي خبر عنها و هطمنكو ان شاء الله

**************************

امبارح وانا بسمع خبر الأحكام على الإخوان دعوت الله من كل قلبي

أن لا يكون الدكتور محمود ابو زيد من ضمن المحكوم عليهم

وذلك لإحساس بعيد لدي بأن هذا الرجل قريب لي..رغم اني ابدا لم اميز شكله يوم ان حضرت جلسة المحكمة العسكرية

الوحيدة...لكن لهذا الرجل زوجة عظيمة كنت قد افردت لها(هنا) مساحة على مدونتي

كي انقل ما رأيته منها من صبر و ثبات و تفهم واعي تماما لدورها في هذه الدنيا

السيدة شاهيناز بشكل او بأخر اصبحت تهمني بصفة شخصية

ولكم وددت لو استطعت ان ادون رقمها في هذا اليوم حتى ازورها وانقل اليها تعازي الحارة

فمهما اختلفنا مع الإخوان لا يمكن ان نقبل ان يحاكموا مثل هذه المحاكمات المهينة

الى السيدة العظيمة شاهيناز...عزائي الخالص لك على ما اصابك من مصاب

و تقبل الله منك ومن كل من اوذي بغير حق

يا ولاد بهية

يا مدونين

يا ولاد بهية

اظن الوقت جه ان كل واحد بقى يقول لنفسة

العمر واحد والرب واحد...والي هيبيع مصر النهاردة يبقى عيل وابن عيل

الصورة المعروضة دي....صورة إسراء..

إسراء بنوته في العشرينات من عمرها, وعضوة بحزب الغد

كانت صاحبة فكرة عمل جروب على الفيس بوك اسمة إضراب ستة إبريل

و الحقيقة ان كل من سمع عن الإضراب من غير السياسيين سمع عنه عن طريق إسراء

يعن البنت الي بميت راجل دي هي الي وصلت الرسالة لشعب مصر الي نايم على ودانه

واخره ينزل صورة في مارينا بشورت وجنبة كام مايوه بكيني

انا شخصيا قابلت كام بنت وولد من الجامعة الأمريكية يعرفوا عن الإضراب من خلال إسراء

إسراء استطاعت انها تشجع ميت الف واحد انه يشارك في الإضراب

دلوقتي إسراء مرمية في سجن القناطر بتاع النساء..

مش بايته في سريرها...,ما بتغسلش سنانها بالليل و بتنام في عنبر مليان قمل و براغيث

الأمن لو ما كانش مرعوب لدرجة انه يعملها على روحة ما كانش حط واحدة زي إسراء في السجن

إسراء مش محتاجة اكل ولا شرب ولا هدوم.....لكن محتاجة دعم نفسي و دعم معنوي

اهلها كمان محتاجين دعم نفسي ودعم معنوي .....

انا اتصلت بالمحامية الخاصة بيها وابلغتني ان اهلها زاروها النهاردة

و هعرف منها ازاي ممكن نقدم الدعم المطلوب لأهلها

كمان عايزين كلنا نتكاتف ونتبرع للجنة الإعاشة بمركز هشام مبارك

لإنه هو المسؤول عن حماية و متابعة المعتقلين في قضايا الرأي

يا مصريين يا مدونيين...دقت ساعة العمل...وراح زمن النوم

يوم ستة إبريل

ومر يوم الإضراب بنجاح وسلام

شوارع القاهرة كانت فاضية زي ما نكون يوم الجمعة

رمسيس والتحرير كانوا حرير

مش هبالغ واقول ان ماكانش فيه ولا عربية في الشارع

طبعا كان فيه عربيات..اقلهم عربيتي..

لكن ما حدش يقولي انه ممكن يقطع المسافة من ميدان لبنان لحد التحرير مرورا بجامعة الدول في

فترة زمنية لا تتعدى الخمستاشر دقيقة الساعة واحدة الظهر

ده الي حصل معايا والي بناءا عليه بقول ان الشوارع كانت فاضية والدنيا كانت هادية

لم يكن هناك مظاهرات في ميدان التحرير نفسة..اللهمم الا تجمعات بسيطة امام هارديز

فضتها بسهولة و بكفاءة صراحة قوات الأمن المركزي

انا شخصيا ما شفتش تطاول من الشرطة..وده احقاقا للحق

انا ركنت قريب من نقابة الصحفيين

و نزلت مع بنوته من أبناء مصر ووقفنا امام نقابة المحاميين وصورنا تحت نن عين الظباط

ولا حد قالنا حاجة..بالعكس..العساكر كانوا هما الي بيتفرجوا علينا مش احنا الي بنتفرج عليهم

مريم بنت عمران بتحلف انها شافت سواق تاكسي واقف جنب عسكري امن مركزي

وعمال يقوله " يا حمار الي بيهتفوا دول بيهتفوا عشانك مش ضدك

عشان رغيف العيش الي مش لاقينه وكيلوا الزيت الي بقى بعشرة جنيه"

الناس حولين النقابة كانوا بيقدموا رجل ويؤخروا عشرة

عدم اعتداء الأمن عليهم بالضرب الى حد ما مطمنهم انهم يفضلوا واقفين

لكن قلبهم مش مطاوعهم يدخلوا النقابة

كمان كان فيه على سطح النقابة ناس ياما

يجمي خمسين او ستين واحد فيهم ستات كتيير قوي

والمشهد الغريب انهم كانوا على كل لون با بطستا

واحدة منتقبة لابسة اسود كانت عمالة تشوح بإيديها بمنتهى القوة من فوق سطوح النقابة

عرفت وقتها انها بتهتف لإنها منتقبة فبقها مش باين

ما عدا شوية الناس الي عند النقابة دول ما كانش فيه حد في البلد

المحلات كانت هادئة تماما..بس أعتقد ان ده نهارا لكن بالليل الوضع هيتغير

ولا الغبار بقى...يا ساتر

كان لعنة النهاردة..الجو فجأة قلب قلبة سودا

بس ساعدت على ان الناس تفضل في بيوتها

التجربة كانت جيدة...او بدائية لكن ناجحة

حققت الغرض المطلوب منها في وقته

عقبال التجربة التالية..لكن بيتهيألي ان الشعب لسة شوية عليه

الرك دلوقتي على موظفين الحكومة...هما الي في ايدهم التغيير

لإنهم اكتر ناس مضرووين..القطاع الخاص الى حد ما مش حاسس بنفس القدر من الإستغلال

لذلك كان اقل انضماما...

لعل بكرة افضل من النهاردة

عموما يوم ستة ابريل خلص

و كل إضراب وانتو طيبين

6 إبريل يا قاتل يا مقتول

بصوا بقى على رأي رائدة الفكاهة والمجدعة المصرية نوارة نجم

هالله هالله على الجد والجد هالله هالله عليه

احنا بالصلاةُ على النبي كده محشورين في رقبة قزازة

مليانة قطران و زقت وبلا ازرق...

دماغنا محشورة في رقبتها ومش عارفن نطلع نتنفس هوا نضيف

الحكومة دي خلااااااااااااااااص جابت اخرها

مش كفاية انها فاشلة..وان فشلها مش بس بان ده خرب بيوتنا

لا كمان بجحة..والبجاحة والبكاسة دي بقت ظل يمشي جنبها على الأرض

البجحا هاريينا اعلانات على الدش...الدش يا عالم عن الضرايب..كإننا مش هنعرف نهرب من قرفهم

عايزين حتى سواق التاكس والحلاق يدفع ضرايب

والي عنده شقة عايش فيها مع الفاميليا ابوه جابهاله ايام العز

يقاسم الحكومة فيها ويعتبر روحة مأجرها منها (رغم انها تمليك)

يعني ناقص يشاركونا في الهوا الي بنتنفسة

طيب وان حد فتح بقة يقولك ايه ما العالم كله على كده

ده اموريكا ..اموريكا يا عالم..بيدفعوا ضرايب 40%

واحنا يادوبك بنقولكوا عشرين في المية بس

طب يا سيدي خليك ورا الكداب

عمال تقولي هات هات هات..خدت انا بقى منكو ايه

خدنا الصلاة على النبي ومفيش احسن منها في الدنيا

طيب طالما انتو معتبرين امريكا دي هي القران الي نزل من عند ربنا

نمشي بقى وراها...ادونا خدمات زي امريكا

بلاش..وفرلي اكل زي امريكا

امريكا بتعفي المواد والسلع الغذائية لحياة الإنسان اليومية من الضرايب

يعني مفيش ضرايب على الزيت ولا اللبن ولا السكر ولا اللحمة ولا الفراخ

ولا الرز ولا العيش ولا اي اكل يومي وضروري للنمو

يعني ارخص حاجة فيها الأكل

احنا بقى رغيف العيش الي يتاكل بقى بخمسين قرش

وقزازة الزيت بقت ب12 جنيه

ملح كوكس ملح الطعام الي بنحطة على السفرا

مستورد من النمسا...مصر الي عندها بحرين بطول البلد وعرضها

بتستورد ملح...ملح يا ناس من النمسا

النمسا الي هي بلد معندهاش بحر اصلااااااااا

تخيلوا...بلد داخلية مفيهاش ريحة المية المالحة...تصدر لينا ملح

واحنا الي عندنا بحرين نستورد ملح من النمسا

طب اقول ايه بس حسبي الله ونعم الوكيل

بلاش...القمح الي النهاردة مش لاقيين منه نتفة

و هننزل الجيش عشان يحافظ على الأمن الغذائي

من كام سنة قالك احنا مش محتاجين نزرع قمح

يا جماعة القمح غالي..وتكلفته عالية..ومالوش لازمة

وامريكا بتعملة ارخص بكتير

احنا نزرع كنتلوب متسرطن..ونستورد القمح

الفواكه الي قرفونا بيها بتاخد مية بدينها..رغم ان القمح ما بيحتجش مية كتير

الحكومة الرشيدة بقى...بتشتري من الفلاحين اردب القمح بتلتميت جنيه

مع ان تكلفة استيراد القمح من امريكا بتقف بحوالي 100 دولار للشحن فقط

غير تمن الإردب نفسة

يعني جع بمصاريف نقل اردب القمح تساوي ضعف تمن زراعته في مصر

والحكومة تستخسر في الفلاح المصري انه يبيعه بسعر عدل

وتشتريه منه بالبخس..وترجع بعد كده تشتريه بالغلا والكوا من بره

لو قعدنا نتكلم عن اداء الحكومة

شرايين مخي هتضرب...بجد شرايين مخي هتضرب

اصل الواحد يستحمل فساد اه...لكن فساد وغباء ده بقى كتير قوي

اللذيذ بقى اني كل ما اكلم حد عن الإضراب يقولي يا شيخة ولا حد هييجي

هتلاقي في الأخر نفسك لوحدك

انا بقى هضرب ولو كنت اخر حد في مصر

الي مش هيقف النهاردة لنفسة يبقى يستاهل حسني مبارك يديلة على نافوخ الي جابوه

احنا عاملين زي اليهودي الي فضل يدعي ربنا انه يكسب اللوتريه منغير ما يشتري التذكرة

ربنا قال لا يغير الله ما بقوم حتى يغيروا ما بأنفسهم

العمر واحد والرب واحد..واحرص على الموت توهب لك الحياة

الكلام اللطيف ده بقى جه وقت استخدامة وتطبيقة

ونطلع برة كتاب المطالعة ده بقى

أشوفكوا ان شاء الله يوم ستة ابريل

عجبت لمن لا يجد قوت يومه ثم لا يخرج بين الناس شاهرا سيفه"ه"

كلمة لأبي ذر الغفاري

هوامش

تحديث: هغيب اسبوع لسفر طارئ

راجعالكم في اسرع وقت ان شاء الله

و لما ارجع هرد على التعليقات

أشوف وشكم بخير

************

ماذا حدث للمصريين

كتاب اكثر من رائع لكاتب و فيلسوف و محلل غاية في الإبداع هو جلال أمين

ملحمة لغوية وادبية و فلسفية لا نملك الا ان نتوقف امامها فاغري الفاه اندهاشا واعجابا

********

فيدل كاسترو تنحى عن السلطة كي ينصب اخاه بدلا منه

(هو كاسترو مالوش ولاد رجالة ولا ايه!!!)

كاسترو البالغ من العمر 85 سنة, و ظل يحارب منذ 53 دفاعا عن الدستور!!!

عمل مع جيفارا ثورة لطيفة تحت مسمى حركة 26 يوليو

(مش عارفة ليه الشهر ده ما بيريحنيش)

بعد ما بلغ من العمر ارذلة تنحي عن السلطة كي ينصب اخاه

البالغ من العمر اكثر من 75 سنة

هل حقا العرب فقط هم من لا يتعلمون؟؟؟؟

**********

شاب وجد جثة في صندوق القمامة فأبلغ عنه

ليتحول الى قاتلة ثم يمكث في السجن ثمان سنين

ليدخل القتيل الذي سُُجن لقتله نفس الزنزانة زميلا له

يا ترى ده فيلم هندي ولا انا الي بهييس؟؟؟

********

أعضاء مجلس الشعب يتبادلون الضرب تحت قبة البرلمان!!!

********

75% من الإستجوابات المقدمة من أعضاء مجلس الشعب لا تناقش

تحت قبة البرلمان بالمرة, والإستجوابات تتم اختيارها للنقاش انتقائيا!!!

********

سعر زجاجة الزيت بلغ 9 جنيه و نصف, كما سيتم الغاء العيش المدعم من فئة الخمسة قروش

ابتداء من يوليو القادم.

سعر البنزين سيرتفع مرة اخرى ابتداءا من شهر يونيو القادم

طبق الكشري اصبح بخمسة جنيهات

سندوتش الفول بلغ سعره خمسة و سبعون قرشا

*******

ثمن طن الحديد ارتفع من 1200 جنيه الى 4400 جنيه و يتوقع ان يصل الى 5000 في نهاية العام

********

أحمد عز عضو مجلس الشعب هو محتكر الحديد الأول

في مصر , و هو أيضا عضو الحزب الوطني الذي يمثل الحكومة

والتي تقوم بإستهلاك 80 في المئة من إجمالي انتاج الحديد في مصر

يا ترى فيه حد غيري في الحكومة الرشيدة ملاحظ ان الشعب له عنين!!!

********

يا ترى الحرافيش لما يثوروا ستكون ثورتهم ضد من ظلمهم حقا

ام ضدنا نحن؟؟؟

{و ما كان ربك بمهلك القرى بظلم وأهلها مصلحون}

صدق الله العظيم